fatafeat

[أسيل رزق]

دى كل الحلقات اللى قدمتها

المشاركة الأصلية كتبت بواسطة اسيل رزق

بإذن الله إنهارده هعلمكم إزاى تطبخوا الرز العادى ( المفلفل )

أولاً : لازم نعرف كمية الرز المناسبة للأسرة قد إيه ونخلى فى بالنا إننا لازم نطبخ أى أكل على قد اللى هيتاكل بس لأن كل ما الأكل بات أو فضل فترة هيبقى مش حلو

وعن نفسى بما إننا خمسة فى البيت بعمل كوبيتين رز او 3 كوبيات

ثانياً : لازم ننقى الرز كويس علشان مايكنش فيه حصا او رز مش حلو

ثالثاً : بنغسل الرز كويس أوى بميه عادية ( ماتكنش سخنة علشان ماتطبخيش دقيق بدل الرز ) لغاية ما اللون الأبيض يروح منه ونصفيه من الميه كويس

رابعاً : نجيب حلة تأخد كمية الرز ونحطها على النار حسب الرغبة نحط زيت أو سمنة هتكون على حرارة متوسطة

خامساً : لو عايزين الرز يبقى ليه شكل حلو أو يكون فيه ألوان نحط تمن أو ربع كمية الرز اللى غسلناها (طيب هتعرفوا تمن من ربع إزاى ؟ )مش لازم بالظبط يعنى حسب تقديرك ونقلب الرز لغاية لما ياخد اللون الأصفر ونضيف بقية الرز

ملحوظة : لو بتحبوا الرز بالشعرية هنحط الشعرية بعد ما نضيف الزيت أو السمنة لغاية لما ياخ لون بنى فاتح ونضيف الرز

سادساً : فى ناس بتحب تحط مرقة وبما إنى بحب الأصل بحط شربة فراخ أو أى شربة حسب الأكلة نفسها أو الأسهل نضيف ميه على الرز لغاية لما يتغطى كله ويستحسن نزود شوية ميه صغيرين بعد ما نغطيه علشان الرز بيشرب ميه كتير

سابعاً : نحط معلقة ملح برده على حسب كمية الرز غالباً هتبقى معلقة متوسطة ملح ونقلب الرز كويس ونغطيه ولما يغلى نوطى عليه النار علشان مايتحرقش

ونسيبه من ربع ل تلت ساعة يكون إستوا

مش عارفة ليه حاسة إنى شيف فاشل

ما علينا

وكل نفس ذائقة الموت
( قصدى بالهنا والشفا )

ولو فى أى إستفسار راسلونى على ايميل البرنامج

مش هقوله علشان مخالف للقوانين :D

كانت معكم من أهدى مكان فى المطبخ : الشيف أسيل

المشاركة الأصلية كتبت بواسطة اسيل رزق

غالباً عارفة إن فى ناس كتير مش عارفة المُرتة هتعرفوها دلوقتى

هى عندنا فى دمياط بيقولوا عليها مُرتة أو عَجوزة ( وبلاش تريقة السكينة جنبى أهى )

تعالوا نشوف الحلقة التانية ونعرف إيه هى المُرتة وبتتعمل إزاى

المُرتة لذيذة جداً وصدقونى هتعجبكم أوى هى من مكونات اللبن وهى بتبقى فطار أو عشا ( غَموس زى الجبنة والمربى ... )

خلصينا وقوللنا بتتعمل إزاى ؟؟

قلت السكينة جنبى

أول حاجة كل يوم كده نجمع القشطة اللى بتبقى على وش اللبن فى سلطنية مثلاً

وعلى أخر الأسبوع أو لما يبقى عندنا كمية قشطة نحطها فى حلة ( إستنى يا أسيل شوية مانجيب قشطة من برا وخلاص )

براحتكم بس الأصل أحسن

المهم نكمل

هناخد القشطة ونحطها فى حلة ويُفضل تكون حلة ألمونيا مش تيفال علشان العملية تبقى سهلة

هنحط ملح على قد كمية القشطة ( خير الأمور الوسط فى كل حاجة يعنى شوفى كمية الحاجة اللى بتتبخيها وعلى أساسها حطى الملح )

محدش يقولى يعنى كيلو قشطة نحط كيلو ملح بلاش فكاكة

قصدى يعنى لو مثلاً كوبيتين قشطة نحط معلقتين صغيرين ملح

ونحطها على النار ونقلب ونخلى بالنا من حوافى الحلة علشان ماتتحرقش

مانسبش الحلة ونروح نتفرج على تيمون وبومبا

تؤتؤ نفضل جبنها لغاية الأخر هنلاقى القشطة إتحولت سمنة
و مُرتة فى الحلة من تحت

لما لون المُرتة يبقى دهبى نطفى عنها ونسبها شوية لما تبقى حرارتها معقولة وبعدين نفصل المُرتة عن السمنة وبكده يبقى عندنا وجبة سريعة ولذيذة بعيش أو رز وعندنا سمنة بلدى مضمونة لا روابى ولا الكلام الفارغ اللى بيكلفنا كتير ومش أصلى

طولت أوى بس علشان تحسوا إن الحلقة كبيرة :D

بالهنا والشفتشى

وألقاكم إن شاء الله فى الحقة القادمة

كانت معكم من أهدى مكان فى البيت : الشيف أسيل

المشاركة الأصلية كتبت بواسطة اسيل رزق

إنهارده هقدمكم فى الحلة التالتة ( سلطة البنتجان )

يا رب تعجبكم

أول حاجة بنجيب بتنجايتين رومى حلوين كده ونغسلهم كويس ونحطهم فى الفرن زى ماهما ونسبهم وكل 10 دقايق نقلبهم لغاية لما تكون قشرتهم انفصلت عن البنتجان هتبقى القشرة نشفه

هنطلعهم فى طبق ونفتحهم بسكينة ونطلع البتنجان من القشر ونحطه فى الطبق بس نتأكد إن مافيش قشر نزل فى الطبق

بعد كده نجيب معلقة خل نحطها على دقة فلفل أحمر ( عبارة عن فلفل رومى أحمر وتوم وملح مضروبين فى الخلاط ) وشوية كَمون

زى ماقلنا معلقة خل متوسطة على معلقة صغيرة دقة حمرا أو ممكن بدل الخل لمون و رشة كَمون ونحطهم على البنتجان ونهرسه ونقلبه كويس

وبكده يبقى خلصنا سلطة البنتجان وبالعيش بقى يبقى طعمها جميل جداً

بالهنا والشفا

كانت معكم من أهدى مكان فى البيت : الشيف أسيل

المشاركة الأصلية كتبت بواسطة اسيل رزق

إزيكم يا جماعة ؟؟ .. يا رب تكونوا بخير

إنهارده هقدملكم أكلة جديدة وهى ( سلطة البطاطس )

هنجيب بطاطسيتين متوسطين الحجم

هنغسلهم كويس

هنشغل الفرن ونحطهم تحت على صاج الفرن نفسه علشان يتشوا بسرعة زى البنتجان

كل 10 دقايق نقلبهم لغاية لما يبان انهم استوا يكون قشرتهم ناشفة أو إنفصلت عن البطاطس اللى جوا

بعد كده نطلع البطاطس لمايستوا من الفرن نفتحهم ونفرغهم فى طبق ونخلى بالنا مانزلش قشر من البطاطس فى الطبق ونهرسهم ونضيف عليهم ملقة بقدونس مفرى ونص معلقة كمون و لمونة ورشة ملح مع إى إضافات حَبنها

طبعاً المقادير دى كلها حسب الرغبة

ونقلبهم مع بعض

ونقدمها مع العيش

وبالهنا والشفا

معلش حاسة إنى كنت بايخة أوى المرة دى

كانت معكم من أهدى كان فى البيت : الشيف أسيل

المشاركة الأصلية كتبت بواسطة اسيل رزق

بما إن المخرج أصر على تقديم حلقة إنهارده

هقدملكم حلقة بسيطة بإذن الله وهى طريقة عمل الخيار المخلل

أول حاجة هنجيب خيار .. الكمية اللى عايزنها.. نغسلهم كويس ونشيل أطرافهم

وبعدين نقطعهم على شكل دواير بس تكون سميكة شوية

نحطهم فى بطرمان ونضيف عليهم ميه وحوالى معلقتين خل على حسب كمية الخيار

و3 فصوص توم ومعلقتين او 3 زيت و أساسى الملح

المقادير على حسب كمية الخيار اللى هيتخلل

وبعد كده هنحط أى قطعة بلاستك جوا البطرمان علشان الخيار يتضغط تحت

و لو مفيش مش مشكلة

ونسيبه يوم واحد هيكون لونه بقى زيتى

ونطلع منه وقت ما نحب يكون جنب الأكل بس لما نطلع منه نغسله بالميه خفيف كده

وبالهنا والشفا

كانت معكم الشيف أسيل من مطبخها المتواضع

المشاركة الأصلية كتبت بواسطة اسيل رزق

نبدأ حلقتنا الجديدة وهى بسيطة خالص زى الحلقات اللى فاتت

حلقتنا إنهارده عن طريقة عمل الفراخ البانيه

طبعاً بنجيب البانيه جاهز أو نقطعه إحنا من فرخة سليمة طبعاً واحدة زى نونا هتقول مش عرف أقطعه خلاص ماما تقطعه

نحظه فى ميه وخل أو ملح فترة نقول حوالى نص ساعة لو هنعمله فى نفس اليوم أو لو هنحفظه فى الفريزر نسيبه وقت أكتر علشان يكو صحى أكتر

بعدها غسله بميه عادى ونجيب بصله نبشرها بالمبشرة ونصفى ميه البصل لوحدها ونحتفظ بالبصلة لو عايزين نعمل بيها أى حاجة تانية

المهم هناخد ميه البصل ونخطها فى طبق وعليها توابل .. ملح ( أساسى ) وفلفل وكمون ولمون و جنزبيل يعنى الاضافات اللى نحبها

ونخلط البانيه فيهم كويس ولو هنحفظهم فى الفريزر نحطهم فى كيس بلاستك ونربطه كويس علشان مايزلش ميه من الفراخ

لو هنعملها فى نفس اليوم هنسيبها فى التلاجة شوية يكون البانيه شرب الخلطه كويس

ونحضر البقسماط فى كتر بيجبوه جاهز بس انا بعمله فى البيت أفضل

بجيب الفينو وبنشفه فى الفرن وبطحنه وأضيف عليه ملح وفلفل وشطه وكمون ونعناع ناشف يعنى برده اضافات حسب الرغبة

بعد كده نجيب بيضة نحطها فى طبق عليها رشة ملح وجنزبيل ونطلع البانيه نحطع فى البيض وبعدين البقسماط ونضغط عيه كويس فى البقسماط علشان يمسك فيه

ونكرر العملية دى تانى نحط قطعه فى البيض وعدين البقسماط

لما تخلص كمية البانيه

نحطه فى التلاجة طبعاً علشان لما نيجى نقليه البقسماط مايقعش فى الطاسة ويتحرق

بس مايفضلش فى التلاجة أكتر من 12 ساعة علشان طعمه مايتغيرش

ونطلعه ونجيب حبه زيت مش كتير

يعنى يملوا قاعدة الطاسة بس

ونحط البانيه ونخلى بالنا من التحمي علشان مايتحرقش معانا ويكون كله لون واحد

يُفضل نحط منديل ورق على الطبق اللى هنطلع عليه البانيه علشان يشرب الزيت

ويا سلام لو حبه بقدونس محترمين كده على الطبق مع البانيه يبقا هايل

وممكن يتاكل مع مكرونة أو رز أو على الفطار مع العيش والطحينة

ويارب الحلقة تكون عجبتكم

وبالهنا والشفا



كانت معكم الشيف أسيل من أمام الاسكرين


والسلام عليكم ورحمة الله وبركاته

ولنا لقاء جديد مع حلقة جديدة من برنامجكم الشهير .. fatafeat