دفعة ثانوية عامة 2016

Mohamed_Hamza · #10 04-05-2016, 07:28 PM

اقتباس:

المشاركة الأصلية كتبت بواسطة ahmedtarea

طب معلش ي دوك المواد الي مش بتتضاف انت حفظت وذاكرت ايع فيها بالظبط لاني معرفش فيها حاجه اللهم نص منهج الاحصا فاهمه من اليوتيوب بس

كفاية نص المنهج في الاحصا عسل اوي، هتنجح بيه اصلا لو واحد جاب اقل من درجة النجاح بكام درجة بيرفعوا الكام درجة دول وينجحوه.
الدين احفظ الاحاديث الي عندك كلها واقرأ قصص الصحابة اللي في الاخر دي، وباقي الورقة طلع علي جمعه اللي جواك.
الاقتصاد والتربية الوطنية نزل الكام ورقة دول واحفظهم مش كتير، ومش لازم تحفظهم كلهم بردو، ذاكر الكم اللي تحس انه ينجحك بس.
الاقتصاد. التربية الوطنية.

اقتباس:

المشاركة الأصلية كتبت بواسطة Duke Tefa

وبالنسبة للمواد الي مش بتضاف ابدا فيهم دلوقتي يعني ولا ايه ؟؟؟؟؟ عشان لسة مش بدات فيهم

ايوا من دلوقتي، حتى لو مذاكرة قليلة جدا، بس مش ليلة الامتحان تكون فاتحهم لاول مرة يعني.

اقتباس:

المشاركة الأصلية كتبت بواسطة رفيقة الامل

لو سمحت يادكتور انا عايز اظبط مواعيد النوم بتاعتى بس مش عارفة ازااااااااااااااااااااااااااااى
وممكن تقولى طريقة احفظ فيها او افهم الكهربية ف الكينيا الخلايا مش عارفة تثبت معايا
ومش فاهمة قاعدة لوشاتيلة

-النوم: الوقت اللي تحسي فيه انك عايزة تنامي خليه معاد نومك، عشان مش هتستوعبي بعده.
-الصحيان: نزلي تطبيق alarmy sleep if u can من يوم مانزلته وانا بصحى فمعاد محدد.
حبذا النوم من 10 ل 3 معاد ممتاز جدا دلوقتي.
بس على فكرة مش النوم بس اللي محتاج تنظيم، دا كل حاجة.
######
قاعدة لوشاتيليه بسيطة جدا، هي خاصة بالتفاعل المتزن، فيه 3 حاجات بتأثر على سرعة التفاعل المتزن دا: التركيز ودرجة الحرارة والضغط، لو زادت او قلت حاجة من التلاتة دول (مؤثر خارجي) التفاعل المتزن ميبقاش متزن ساعتها، هيختل توازنه، ودا مينفعش عشان هو لازم يتزن "من اسمه"، فعشان كدا التفاعل من نفسه هينشط في اتجاه معين عشان يلغي تأثير المؤثر دا عشان يرجع متزن من تاني زي ما كان.

*التركيز:
تأثير التركيز دا يعني اضافة مواد او سحبها من التفاعل (سواء متفاعلة او ناتجة).
مثلا ناخد التفاعل دا:
A + B ⇌ C
- لو اضفنا A او B هينشط في الاتجاه الطردي (اتجاه تكوين C)
-لو سحبنا منه A او B هينشط في الاتجاه العكسي (اتجاه تكوين A و B )

-لو اضفنا C هينشط في الاتجاه العكسي.
-لو سحبنا كمية من C هينشط في الاتجاه الطردي.

*الضغط:
2A + B ⇌ C
عدد مولات المتفاعلات هنا (3 مول) اكبر من عدد مولات النواتج (1 مول)
يعني حجم المتفاعلات اكبر من حجم النواتج..
تخيلي لو واحد ماسك سفنجة بإيده جامد، هيكون الضغط عليها كبير بس حجمها قليل، ولو سابها حجمها هيكبر ومش هيكون عليها ضغط، اذا الضغط بيتناسب عكسيا مع الحجم.
يعني في المثال ضغط المتفاعلات اقل من ضغط النواتج.
-يبقى عند زيادة الضغط يسير التفاعل في الاتجاه اللي فيه عدد مولات اقل (حجمه اقل) عشان يقلل التأثير دا ويتزن (في المثال دا هيسير في الاتجاه الطردي)
-وعند تقليل الضغط يسير التفاعل في الاتجاه الي فيه عدد مولات اكثر (حجمه اكبر) عشان يقلل التأثير دا ويتزن ( في المثال دا هيسير في الاتجاه العكسي).

-لو الاتنين عندهم نفس عدد المولات الضغط مش هيأثر مهما زاد او قل، لانه مش هيعرف يروح لانهي اتجاه فيهم.

-تقليل الحجم (او حجم الاناء) =زيادة الضغط
-زيادة الحجم (او حجم الاناء) =تقليل الضغط

*درجة الحرارة:
فيه نوعين من التفاعل يا اما طارد للحرارة (ينتج عنه حرارة) يا اما ماص للحرارة (بيحتاج حرارة).
في السؤال تعرفي الطارد من الماص كدا:
-الطارد: بتكون فيه ΔH سالبة او Heat في النواتج.
-الماص:بتكون فيه ΔH موجبة او Heat في المتفاعلات.
ممكن بدل ال Heat دي يكتب J او kJ او Energy او كالوري وكلهم الغرض منهم واحد "كمية الطاقة الحرارية"

"التبريد في الطارد طردي" احفظي الجملة اللي كلها جرس موسيقي دي وهيا هتجيب الباقي، قصدي انك لما تعرفي ان التبريد في الطارد طردي، يبقى التسخين فيه اكيد عكسي، والماص تعكسي الكلام اللي في الطارد دا.

-لو قال تفاعل "في اناء مغلق" يقصد انه تفاعل متزن (ينطبق عليه كلام لوشاتيليه)
######
الخلايا الكهربية دي انا اكتر واحد كنت بنساها، ملهاش طريقة بالنسبالي، كرريها وخلاص اي حاجة بتيجي بالتكرار... سمعيهم لنفسك كل ما تقرأيهم بس الخمسة مع بعض مش كل واحدة لوحدها، ومش تقلبي عليهم الا ما تسمعيهم كلهم مع بعض غيبا بدون اخطاء، اول مرة هتكون صعبة وهتاخد وقت، بس المرة الي بعدها ومع التكرار هيكونوا اسهل بكتير وهتحفظيهم.
######
الحديثة شوفي محمد عبد المعبود شرحه كويس فيها، وحلي عليها كتير.. الحاجة اللي مش تفهميها احفظيها زي ماهي وخلاص، انا فيه حاجات فيها مكنتش بفهمها بردو وتعبت في فهمها بس في الاخر حفظتها وخلاص والدنيا مشيت يعني.
ولو لسه مش فاهمة لوشاتيليه قولي السؤال اللي واقف قدامك فيه.

اقتباس: