دفعة ثانوية عامة 2016

[علا علي ٣٣٣]

المشاركة الأصلية كتبت بواسطة mohamed_hamza

[size=3]

حاسة انك مش عارفة تلمي المنهج؟
أولاً: مبروك، احب ابشرك ان دا احساس المتفوقين، كل الاوائل واللي جابوا مجموع عالي كانوا حاسين نفس الاحساس في الوقت دا
ثانياً: دا من الاحاسيس الكدّابة اللي كنت بحذركوا منها، يعني الكلام دا مش حقيقي، حتى لو مذاكرة المنهج عشرين مرة هيفضل عندك نفس الاحساس دا
ثالثاً: الحل حاجة واحدة مفيش غيرها، حل امتحانات كتير، ابدأوا حلوا امتحانات من دلوقتي حتى لو مخلصتوش لسه، كنت السنة اللي فاتت زيك كدا بالظبط في كام مادة وكنت عمَال أراجع وأنسى أراجع وأنسى، لحد ما ربنا كرمني وبدأت احل امتحانات، الاطمئنان والسكينة نزلت على قلبي من بعدها وحسيت أني تمكنت من المنهج وفرحان بقى وكدا
ابدأي من دلوقتي أعملي جدول للمراجعة مع حل امتحان واحد حتى كل مرة تذاكروا فيها المادة، اثناء حل الامتحانات، الحاجات اللي واقعة منك دي هتقابلك في الحل، اشطا دا المطلوب، ترجعي بقى لمصدر المذاكرة (مش تروحي تشوفي الاجابة اللي ف اخر الكتاب هاه) وتشوفي بقا الحاجة دي وتحفظيها، نفس الحاجة هتقابلك تاني وتالت اكيد، تاني مرة هترجعيلها بردو، بعد كدا؟ خلاص، الحاجات اللي كانت واقعة منك دي هتبقي اسهل حاجة بالنسبالك، واسألي مجرب (أنا).
مش عايز الأحاسيس دي تجبلكوا احباط او اي حاجة يا جماعة، عشان الاحاسيس دي مع انها كدابة وعبيطة، بس ممكن تدمر ناس ممتازة لو استسلموا ليها.

.....................

بالنسبة لتضييع الوقت، نفسي افهم هو انتوا ازاي مش مقدرين ان الشهرين دول اهم شهرين في حياتكم ؟!!! وانهم اهم من كل اللي عدا، هقولها للمرة العشرين، فيه ناس لما في ثانوية مكانوش بيذاكروا من أول السنة وبدأوا يذاكروا بجد من دلوقتي و في الأخر جابوا مجموع عالي (99%) ودا حصل قدامي مش بألف، وفيه ناس تانية شادة حيلها ع الاخر من اول السنة وجت الفترة دي وريحت، وفي الاخر محصلوش 85% ، مع انهم كانوا شغالين كويس جداً، بس للأسف جم في اهم فترة (اللي احنا فيها دي) وريحوا، عرفتوا بئا قيمة الوقت دا ؟ اه ؟ طيب ايه الحاجة اللي بتعملها وتستاهل انك تضيع اهم شهرين في حياتك عشانها ؟؟!!! يا جماعة ابوس اياديكوا انتوا مش مقدرين اللي انتوا فيه والله، مش هتقدر قيمة الوقت دا غير لما تيجي في امتحانات آخر السنة وتتزنقي في سؤال او اتنين وتقولي ياريتني ارجع ساعة واحدة بس او حتى نص ساعة اذاكر الدرس دا، هيكون اكتر احساس ابن كلب هتحسوه في حياتكوا انا عارف، (الواحد مش بيحس بقيمة الحاجة غير لما تضيع منه، مثلاً الرجل اللي بنمشي عليها دي ومش مدينها اهمية ونشكر النعمة، لا احنا مش هنحس انها مهمة بجد غير لما تحصلنا حادثة وتتكسر أو تتقطع ومنعرفش نستخدمها تاني، وقتها بس هنحس بقيمتها)، وبنفس الكيفية الوقت اللي بتضيعوه ع الفاضي داـ طيب وليه توصلوا نفسكوا لكدا ؟! طيب مانتوا لسه الفرصة بين ايديكوا حتى لو واحد فاكر نفسه ضايع ممكن في الوقت الباقي دا انه يرتب ع الجمهورية بس مين يفكر صح بئا!! بس عدم تضييع الوقت دا محتاج تحكم في النفس عالي ودا محتاج صبر ومش بيجي من يوم وليلة، فانتوا ممكن تاخدوا كام خطوة كدا للطوارئ بما ان الوقت قدامكوا محدود ودي طبعاً للأشخاص اللي مش بيقدروا يمسكوا نفسهم قدام المغريات:
* الموبايل: واللي فيه من (فيس، واتس، ألعاب ) الحاجات دي ادمان بمعنى الكلمة فمش هقلكوا الغوها من الموبايل، لا، عشان لو اتلغت الاحتمال الاكبر انكم هترجعوها تاني، فانتوا ترموا السمارت فون اللي معاكوا دا وتمسكوا nokia 1100 ، ايوا هو دا موبايل المرحلة، وهتقضوا بيه احتياجاتكم الاساسية من الموبايل (المكالمات "الضرورية بس طبعا").
* التلفزيون: أغبى اختراع بالنسبالي لو بتضيعوا وقت ع الجهاز دا مش عارف اقولكوا ايه الصراحة، شوية ناس بتاخد ملايين على قفانا واحنا بناخد تضييع وقت ع الفاضي من غير أي استفادة، الصراحة جهاز ملوش تلاتين لازمة، انا عندي المكواه اهم منه. (غير طبعاً لو برامج تعليمية بس للضرورة بس، مش تسمعوا كل الحلقات لمجرد انها "برامج تعليمية" )
خلوا قدامكم هدف قوي واشتغلوا عليه، وانسواا أي حاجة تانية دول شهرين يا جدعان مش مستحميلن!! الحاجات التانية دي مش هتفيدكوا ع المدى البعيد، دي هتستمعوا بيها ساعة أو اتنين بس، انما المتعة الحقيقية مش فيها، في الهدف اللي انتوا المفروض حاطينه لما توصلوه ان شاء الله، حطوا الهدف دا قدامكوا واتعلقوا بيه هو بس، عايزك تبصي للهدف دا زي ما بيبص الواحد الغرقان للهوا، هي الحاجة الوحيدة اللي على باله، وهي الحاجة الوحيدة اللي عايزها، وهي الحاجة الوحيدة اللي هتنقذه.
انا عارف انك كارهة المذاكرة محدش بيحبها، بس انتي مضطرة تذاكري، فارجوكي هطلب منك طلب غريب شوية: حبّي المذاكرة، عشان ع الاقل تقدري تذاكري لفترة اطول، فيه مثل بيقول:
"if you don't do what you love, you've to love what you do"
فانتي دلوقتي مابتعمليش what you love ، فلازم تحبي what you do عشان تعدي سنتك دي على خير ، والله هتلاقوا المذاكرة ممتعة بس انتوا حبوها بس، الدنيا هتبقى حلوة والله
وفي الأخر هسيبكوا تتأملوا مقولة لمحمد علي كلاي، بتجيب م الآخر ويخلص عندها الكلام:

ربنا يجازيك خير يا رب
استفدت فعلا لاني برده كنت بقول اراجع الاول و بعدين احل امتحانات
ان شاء الله امشي علي كلامك و ربنا يوفقنا
شكرا لحضرتك