اا ... أيوا تمرد عــ الإخوان ... اا

[ضياء الدين سعيد]

أنا متمرد عــ الإخوان
مش علشان فقر وأوهام
مش علشان العيش بريال
مش علشان أكلي بتجان
أنا متمرد عــ الإخوان
فسر موقفك الحيران
لسه بننده في مورستان
واقف واكل .. نايم واكل
كل الحيرة في وسط ميدان
حمله وخطتها الأَخوَان
فل صغير أصله جبان
حط إيديه في إيد الإعلام
أكذب .. ضلل ..
ولع شمعة إعمل قربان !!
أه يا مبارك .. أه يا سوزان
كان فين صوتك ..
لما الكوسة أشكال وألوان
كنت صغير ..
واقف جنب السور حيران
أدخل صلي !!
لاء هصلي في بيتي !!
أصل الصلا في البيت دي آمان
أطلق لحيتك أنت كمان
لاء يا عم أنا مش إخوان
هي الدقن في عصر مبارك
كان محسوب وكأنه شيطان
أمن الدولة في كل مكان
كنت في بيتك ..
نايم ساكت ..
والإخوان في السجن جعان
مش بيفكر إذاي ياكل ..
كل همومه إنك تتصان
أه متمرد عــ الإخوان
إزاي مرسي في لحظة وثانية
يحكم مصر أرض العدنان
حمدين ثوري وشفيق ناضل !!
أه دا كلام
اسم الثورة في كلمة ومعنى
لما ندافع عــن إنسان
والإنسان في التربه أهو ساكن
حتى في عز الثورة جعان
جالنا وزير بيحب الثورة
لافف داير كل مكان
شُفت رغيف العيش يا جبان
ترجع تاني تقول إخوان
مش عايزينه أصله أخوان
كل ما ييجي واحد ناجح
يصرخ فل أهو جه إخوان
كنتم فين لما الشبيحه
سحلوا الشعب في كل مكان
من داخلية لإعلام فاشل
همك بس تكون شبعان
قول شبعان قول شعبان
مبقاش يفرق تشرب دم إنسان غلبان
يمرض .. يصرخ
ييجي يتكلم ..
يبقى إنسان مجنون وجبان
بص يا حركة أيوا تمرد عـ الإخوان
أنا إنسان مسلم ومسامح .. مش إخوان
بعشق شيء إسمه القرآن
بعشق كل رسول من ربه
جه برسالته في أي مكان
بعشق حاكم فاهم واعي
عادل بين الناس إنســـــان
بعشق مرسي لأنه في نظري
بيخاف ربه في كل مكان
واللي بيحمل قرآن ربه
صعب يخون .. لو خان هيبان
اللي يدوق الذل يا صاحبي
صعب يوزعه في الفنجان
بص يا مصري وركز وإسمع
عمر البحر ما روى عطشان
جرب تبني في وسط الصحرا
بيت من رمل عشان تتصان
بعد ما تبني وتتعب أسكن
وأبقى قابلني إن دام أيام
دي ثورتنا هزت رؤسا
خلعت ظالم والطغيان
فكر وأعقل قبل يا مصري ..
ما تلبس بدله كل جبان
فكك منهم .. فكر وأعقل ..
قبل ما ييجي الليل وتنام
تصحى الصبح تلاقي ولادك
تايهين في وسط البلدان
لسه بتصرخ من غير عقلك
أنا متمرد أه وجبان !!!!!!!




كلمات / ضياء الدين سعيد
صـــــــوت الحـــــق
d-e.s.t