ايه اخبار تعيين أوائل الكليات ياجماعة؟

[د.عبدالرحمن المنياوي]

لم ترد أي معلومات عن موضوع تعيين الخمسة فقط .. لأ القرار اللي اعتمده مجلس الوزراء هو قرار تعيين للعشرين الأوائل .. فقط التغييرات التي متاح أن تتطرأ هي إعادة توزيع الناس دي .. أنا مش هاقول إن الناس هتتعين في الجامعة لا كلهم ولا نصفهم علشان ده مستحيييييييييييييل .. وبلاش نعشم بعض على الفاضي ودي قي الآخر مجرد آراء وتوقعات .. صفوت النحاس قال الخمسة فالناس بدات تتوقع إن الخمسة دول في الجامعة والباقي إداريين وناس توقعت إن العشرة في الجامعة والباقي إداريين .. وبلدنا بلد إشاعات فتلاقي التوقعات اللي ملأت جروبات الأوائل أصبحت أخبار من مصادر وللأسف الحكومة جعلت الناس تلف حوالين نفسها بس .. هي دايما معودانا على التاخير لكن الشباب الصغير المتحمس دفعات 2009 و 2010 اللي مش واخدين على روتين البلد مستعجلين جدا .. وحاسين إن الدنيا هتروح منهم والتعيينات هتطلع كلام في كلام ..

أنا بس كنت عاوز أوضح إن مش كل اللي نلاقيه منشور على جروبات الفيس بوك حقيقي .. قرار التعيين انمضى واعتمد من شهرين وبدأت الإجراءات التنفيذية فيه بداية من الحصر حتى توفير الدرجات .. والتنظيم والإدارة من الآخر عنده القرار وعلى أساس كده وفروا الـ43ألف درجة مالية .. وكل ده ماينفعش يتم من غير قرار معتمد .. لكن إخواننا الأوائل مش ساكتين قالبين الدنيا اتصلات ومرواح على التنظيم والإدارة فده اللي مخلي الجماعة هناك هرشوا الموضوع وبدأوا بالفعل يتعمدوا عدم التعليق .. في الأول كان اللي يسألهم يقولولوا كل حاجة دلوقت لاتوجد تعليمات .. لانعرف شيئا عنكم .. لم تصلنا أي بيانات ..

الدرجات موجوده والأسماء في الحصر معظمها وصل للتنظيم والإدارة لكن باقي كام كشف كان ناقصهم بعض التعديلات مازالت موجوده في الأكاديمية ولم يتم إرسالها بعد والدكتور ماجد بصراحة بيحاول يتلكك ويتباطأ علشان موضوع الاعتصام وانا شايف إن ده إيجابي لأن هناك حيرة الآن حول التوزيع .. لأنهم مش عارفين هل هنعين ناس في الجامعة من الأوائل مباشرة والا بإعلان والباقي إداريين والا الحاصلين على الماجستير والدكتوراة في الجامعة والأوائل إداريين ؟؟؟!!!! كل هذه الاستفسارات في يد مجلس الوزراء ومجلس الوزراء منتظر تعيين وزير التعليم العالي الجديد لمناقشة أمر التوزيع وهذا ماكان المفترض له إن يتم الأربعاء في أول اجتماع مجلس وزراء ولكن ظروف مرض عصام شرف أجل ذلك كام يوم .. وهذا سبب رد التنظيم والإدارة بعدم ورود أي تعليمات قصدهم تعليمات خاصة بالتوزيع .. وانت يا عم عبدالرحمن ليه متفائل بالتأخير ؟!!! لعل ضغط الاعتصام والوزير الجديد يجعل التوزيع مختلف وياخدوا نسبة للجامعات .. نحن في الانتظار..

بس أنا ليا كلمة أخيرة لإخواننا الأوائل وأنا قلتها قبل كده مليون مرة القرار الوزاري لا يلغيه إلا قرار وزاري ولازم تتاخد موافقة مجلس الشعب واحنا لا عندنا مجلس شعب ولا يمكن أن نصحى يوم في الصبح نسمع خبر يقول مثلا : أصدر مجلس الوزراء قرارا بإلغاء تعيين العشرين الأوائل !! بالعقل كده ده ممكن يحصل؟!!! طبعا لأ

واللي معتقد إن القرار ممكن مايتنفذش بحجة الظروف وهيتم ده من تحت لتحت وهيخلونا نستنى لغاية ماننسى ده طبعا كلام مساطب وسهاري ومينفعش طبعا يؤخذ مأخذ الجد .. لأن اللي بيقول كده مش واحد من أوائل دفعته يعني من نوابغ مصر .. لأن هذا الكلام يجافيه المنطق والعقلانية ونحن علميون .. ولكن أقدر أقولك القرار ممكن يتم تعطيله شوية كام أسبوع يعني .. زي ما النحاس قاعد يلف ويدور معاكوا ويقولكم فاضل شهر وبعدين يقولكم قرار مجلس الوزراء بعد شهر .. وبعدين يقولكوا تعيينكم خلال شهر .. هو عاوز يقولكم من الآخر ماتزنوش عليا والتعيين غالبا هيكون الشهر الجاي ..بس الناس لو قالها كده هتخرب الدنيا واشمعنى ولو الموضوع اتعطل بعد شهر هيعتصموا ويتظاهروا ويقولوا النحاس قالنا فيتشال تاني يوم علطول .. فبيرمي الكورة في ملعب عصام شرف .. وعجبي ..