|
#11
26-05-2011, 08:59 PM
|
|||
|
|||
موقف تاني معايا
طبعاً أنا سبق وقلت اني كنت شقي جداً جداً جداً في يوم كنت بالبيت لوحدي وبالليل واحد صاحبي جالي وقعدنا نتفرج علي التليفزيون وكان فيه واحد صاحبنا وبجوارنا وقلت أتصل بيه ييجي يقعد معانا ويجيب الشلة معاه اتصلت عليه ويظهر التليفون عنده كان السلك بيعلق وهو مش سامع صوتي هو افتكر ان واحدة بتعاكسه وبعد ثواني سلك التليفون اتعدل ولما سمع صوتي معرفنيش وعلشان كدا قعد يخرف في الكلام معايا قلت أشتغله شوية سبته يتكلم شوية وبعدين رحت مزعق فيه جامد وغيرت من صوتي وقلتله انت عارف انت بتكلم مين يا حيوان؟ رد وخرف معايا أكتر زعقت فيه أكتر وقلتله أنت بتتكلم مع فلان الفلاني وكيل النيابة وسألته انت اسمك ايه؟ لقيته فجأة سكت وفضل ساكت شوية وأنا بشخط وأنطر فيه زي ما أنا عايز وطبعاً صاحبي اللي قاعد معايا ماسك نفسه بالعافية كررت السؤال عليه مرة تانية وهو مش عايز يجاوب علي السؤال عمال يتأسف وخلاص وأنا مصر أنه يقول اسمه لكن هو مش راضي خالص قلتله عشر دقايق وأجيب بياناتك كلها عندي لقيته ادي سماعة التليفون لواحد صاحبنا تاني كان قاعد معاه وبردوا معرفش صوتي فضل بس يعتذر ويقول انهم كانوا فاكرين حد بيعاكسهم وأنا مفيش فايدة معايا خالص لازم يقولوا الاسم قلتله انت كمان بتدافع عنه ؟ يبقي أنت معاه في المشوار الجاي وقفلت التليفون وبعد عشر دقايق رجعت اتصلت بيه تاني وقلتله انت اسمك كذا وساكن في شارع كذا واللي قاعدين معاك دلوقتي اسمهم كذا وكذا وكذا قعد يتهته في التليفون ويعتذر ويتأسف ومش قادر يتلم علي نفسه خالص وأنا عايش الدور خالص وقلتله بكرة الصبح الساعة 10 تكون عندي انت والحيوان التاني تيجوا بالذوق بدل ما تيجوا بالبهدلة والمرمطة وقفلت السماعة . وبعت صاحبي اللي قاعد معايا ليهم عنده في البيت وقلتله انت تدخل ولا كأنك تعرف أي حاجة خالص وتقعد معاهم هناك وأكيد هتلاقيهم مش علي بعضهم خالص ومتوترين ومحتاسين ساعتها تسألهم فيه ايه ؟ ولما يقولوا لك علي اسم وكيل النيابة ترد عليهم وتقول انك متعرفوش بس تسمع عنه انه شديد جداً وبالفعل حصل الكلام دا بالظبط ولما سألوه طيب ايه الحل دلوقتي؟ قالوهم عليا أنا اني الوحيد اللي يقدر يحل لهم المشكلة دي وفعلاً لقيت بعد ساعة التليفون بيرن وصاحبي دا عايزني أروح عنده دلوقتي حالاً قلتله مينفعش لأن مفيش حد غيري في البيت وعرضت عليه انه هو اللي ييجي وفعلاً بعد ربع ساعة لقيته عندي واترمي علي الأرض ومش قادر يلم نفسه خالص يا بني قوم واقعد عدل وقولي ايه اللي حصل ؟ مالك فيه ايه؟ هو : مش قادر خالص . لازم تساعدني وتخرجني من الورطة اللي أنا فيها أنا : ورطة ايه ؟ يا ساتر يا رب . خير ايه اللي حصل ؟ حكي ليا كل حاجة . رديت وقلتله ان فعلاً وكيل النيابة دا مفتري واللي يقع تحت ايده يبقي أمه داعية عليه الجدع انهار أكتر وقعد يعيط وانا مفيش فايدة خالص بعد لما هدي شوية قالي لازم تخرجني من الورطة دي بأي شكل وبأي تمن قلتله ربنا يسهل ويقدم اللي فيه الخير أنا خالي يعرف وكيل النيابة دا وهبقي أكلمه لما يرجع بالليل وأقولك علي اللي حصل الصبح صاحبنا كان لوحده في البيت مع أخوه فقط , لكن الباقي كانوا في البلد بتاعتهم طبعاً مفيش نوم جاله خالص وكل ما يسمع حركة في الشارع يفتكر انهم جايين ياخدوه الكلام دا كان في أجازة تانية جامعة وانا بقوم من النوم متأخر بعد لما قمت من النوم اتصل عليا وقالي انه بيتصل من الصبح رديت وقلتله متحملش هم نص ساعة وأجي عندك وأقولك ايه اللي حصل وبعد لما رحت عنده لقيت صاحبنا التاني اللي كلمني بعده موجود هناك كمان وفجأة لقيت الموضوع بدأ يتطور وياخد شكل تاني خالص صاحبنا التاني لما روح امبارح قال لأبوه علي كل حاجة وبيقول لنا ان أبوه دلوقتي قاعد مع محامي علشان لما يستدعوه يبقي المحامي بتاعه جاهز لما سمعت الكلام دا قلت في نفسي الموضوع ممكن يتقلب بجد بس بردوا قلت أشتغلهم شوية كمان زعقت له وقلتله مش فلان قالك اني أنا هتصرف ؟ يبقي المفروض انك متعملش أي حاجة أنا مقلتش لك تعملها خالص انت كدا بتبوظ كل اللي أنا عملته قعدوا الاتنين يعتذروا ليا وخلاص أنا هروح لأبويا دلوقتي وأقوله بلاش محامي خالص وانك انت اللي هتتصرف في الموضوع دا . بس اتصرف بسرعة لأنهم قلقانين في البيت عندنا خالص قلتلهم أتصرف كدا علي طول من غير حتي ما حد فيكم يعزم عليا بسيجارة ؟ ردوا وقالوا خرطوشة سجاير بحالها مش سيجارة واحدة رديت وقلت لا خرطوشة كتير عليكم . كفاية كل واحد يجيب ليا علبة سجاير وفعلاً قاموا وكل واحد فيهم جاب ليا علبة سجاير حطيت العلبتين في جيبي وقلت لهم خلاص الموضوع كدا اتحل خلاص قالولي اتحل ازاي ؟ دا ممكن يبعت لينا في أي وقت قلت هو مين اللي يبعت ليكم ؟ اللي كان عايزكم تروحوا له , هو اللي بيكلمكم دلوقتي ودول مفيش فايدة مش عايزين يصدقوني خالص احكي ليهم علي كل اللي حصل يردوا ويقولوا اني عرفت الكلام دا منهم هما طيب أعمل معاهم ايه ؟ قلت لهم اتصلوا بفلان ( اللي كان قاعد معايا وأنا بتصل عليهم ) واسألوه ان كان كلامي صح ولا غلط وفعلاً اتصلوا عليه وقالوا له تعالي دلوقتي وقعدوا يسألوا فيه وهو يأكد لهم اني أنا اللي اتصلت صاحبنا الأولاني صدق لكن التاني مش عايز يصدق خالص وقعد يقول اذا كان وأنا بتكلم معاه في التليفون سامع العسكري بيضرب له تعظيم سلام وانا لما سمعت الكلام دا منه قعدت أبص لصاحبي اللي كان معايا وأقول عسكري؟ تعظيم سلام؟ فيه ايه يا جماعة لا كان فيه عسكري ولا تعظيم سلام . التليفزيون هو اللي كان شغال ساعتها وحلفت لهم ان اللي اتصل وعمل الفيلم دا كله هو أنا وفي الأخر صدقوا , لكن والدة صاحبنا كانت وصلت البيت وصاحبنا التاني راسه ومليون جزمة قديمة انه يحكي لها كل اللي حصل ومش عايز يسمع كلام حد فينا خالص طبعاً أنا المؤلف والبطل والمخرج للفيلم دا كله وأكيد شكلي قدام والدته هيكون وحش جدا جدا جدا قلت أحسن حاجة اني استأذن وأمشي وأسيبهم يعملوا اللي عايزينه وفعلاً مشيت وفلت بجلدي تاني يوم عرفت ان صاحبنا دا والدته لطشته بالقلم والقلم طرقع جامد قدام صاحبنا التاني وخد كلام في جنابه يكفيه شهر بحاله . بعدها بفترة وأنا ماشي في الشارع والدته قابلتني ونادت عليا أنا قلت بس هي لسه منسيتش وعايزة تاخد بتار ابنها مني أنا لقيتها بتقولي انت فاكر اني زعلانة منك؟ بالعكس أنا مبسوطة من اللي عملته فيهم لأن الواد دا حاله مش عاجبني خالص وشلة الأولاد اللي هو ماشي معاهم دول هما السبب في خيبته وطلبت مني اني اخليني قريب من ابنها وأقنعه انه يسيب الشلة اللي هو ماشي معاها معلش الحكاية طويلة , بس أنا حاولت أختصر فيها قدر الامكان
__________________
لقد أسمعت لو ناديت حياً ... ولكن لا حياة لمن تنادي !!
مغلق حتي يقضي الله أمراً كان مفعولاً. 
|
| العلامات المرجعية |
«
الموضوع السابق
|
الموضوع التالي
»
العرض الشجري
|
|
جميع الأوقات بتوقيت GMT +2. الساعة الآن 02:20 PM.
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
Copyright ©2000 - 2024, Jelsoft Enterprises Ltd.
