الاكل ممنوع .. الشرب ممنوع .. حتى النفس ممنوع !!

[نقاء الروح]

السلام عليكم ورحمة والله وبركاته ..

طبعا زي ماحنا عارفين البنت او كل ماهو مؤنث عموما يجب المحافظة عليه من كل أي حاجة ممكن تأذيه

ولازم نحكم قبضتنا عليهم لحد مايجلهم كبت ثم انفجار ثم ينتهي المطاف بمصحة نفسية !

ودا كله عشانهم مش عشان حد تاني .. بس للاسف الكل فاهم غلط وبيظنوا ان دا كلو ضدهم !

...

وعشان نحقق الموضوع دا كان علينا نعمل الاتي :

اول حاجة ممنوع الموبايل .. دي اداة خطرة جدا جدا عالبنات واثبتت الابحاث المطولة انه المفروض يحرم على كل ماهو مؤنث يمسك موبايل ..

والا هتحصل مصايب مش ليها اول من اخر .. حد يعاكسها ، او تكلم البوي فريند بتاعها او او ......

ولازم الاباء يوقفوا وقفة جادة للموضوع ده ويمنعوا الحاجات الفاضية دي ..

النتيجة : مبهرة جدا البنت ارتحت من نحيتها ماهي مش معاها موبايل واكيد مش بتكلم حد !

النتيجة الحقيقية : البنت عندها تلات اربع شرايح وموبايل صيني وماارخصهم .. مخلياه مع صحبتها

واول ماتروح المدرسة او الجامعة تبدأ المغامرة ......

والاب نايم ومستريح اووووووووي ..

تاني حاجة ممنوع تكلمي صحباتك .. البنات دولأُس الفساد وواضح جدا من المثال اعلاه ..

واياني واياكِ اشوفك ماسكة تلفون البيت وتقولي اسئل صحبتي على حاجة او طفشانة عاوزة اكلمها

مش عندنا بنات تتكلم فالتلفونات !!!

النتيجة: البنت بقت مطيعة مش بتمسك تلفون والفاتورة قلت والدنيا بمبي خالص ..

النتيجة الحقيقية : الام والاب بقوا مش عارفين بنتهم ماشية مع مين ولا زميلتها دي بنت ناس ولا واحدة كدا ..

وربنا يستر عالبنت !

تالت حاجة النت وما ارداك ما النت .. دا داء العصر .. لازم البنت مش تبص عليه حتى ’ تبص ؟

دي المفروض مش تفكر اصلا !!

وطبعا عارفين ليه .. بلاويه كتيرة و الباب ال يجيلك من الريح سده واستريح ..

مش كدا ولا ايه ؟

النتيجة : ارتحت من التفكير البت بتعمل ايه ؟ وبتكلم مين ؟ .............................

النتيجة الحقيقية : البنت بعد المدرسة بقت بتروح سيبر تشوف هو ايه النت ال بابا واخواتي عملين حذر تجول عليه ..

وطبعا الباقي معروف .. دا كفاية بس دخولها السيبر ..

رابع حاجة التلفزيون .. التلفزيون دا اساس كل انحلال وفساد فالكون ..

وكمان البنت ازاي تبص على شباب ورجالة ؟ وتسمع كلامهم ؟

احنا عارفين اد ايه البنت مرهفة المشاعر وبتميل للشباب .. وانا مش عاوز البت تطلع قليلة ادب ..

النتيجة: الحمدلله البنت بقت محترمة مش بتتفرج على حاجات وحشة وانا مطمن ..

النتيجة الحقيقية : البنت عمالة تسمع اصحابها شفتي الفيلم الفلاني ؟ شفتي البرنامج العلاني ؟

والبنت الحاجات دي بالنسبة ليها لغة هيروغلفية .. ونفسها تشوف وتعرف ..

وطبعا غالية والطلب رخيص .. البنات معاها هيقوموا بالواجب وزيادة !!

ولأن البنت غالية اوي اوي اوي .. فكمان الشرب ممنوع .. زي ماانتو شايفين المية ملوثة ومليانة ميكروبات

ودا مضر بصحتها الغالية ..

وبلاش كمان تاكل .. الدنيا بقت مليانة لحوم خنازير على حمير و والاكل مابقاش مضمون ..

ودا مضر جدا جدا بصحتها الغالية ..

وبالمرة بلاش تتنفس .. ماانتو شايفين الجو مليان انفلونزا طيور على خنازير ودخان سجاير ..

وكله مضر جدا جدا جدا على صحتها الغالية ..

...

الموضوع مش فكاهة ولا هو دعابة

انا بتكلم عن مشكلة لمستها فالفترة الاخيرة ..

والكل فاكر انه بيحافظ علينا ..

لكن الحقيقة انكو بتضيعونا ..

ايه المشكلة لما يكون معايا موبايل وبدخل نت وبكلم اصحابي وبشوف تلفزيون

وكله تحت مظلة رعايتكم ؟!

تعرفوني الصح والغلط ..

تحسسوني اني شخصية تُحترم ..

لما اغلط توجهوني .. لما ابقى مصرة على حاجة وحشة تفهموني ..

مش تقولوا ممنوع ومحرم ومافيش تفاهم

اصلك بنت ولازم نحافظ عليكِ ..

انا بنت اه بس فالاول انسانة ! .. ليا عقل وليا روح ولكل واحد منهم مطالب ..

أي المشكلة لما تبقى متابعني مش شك فيا لاء دا خوف عليا

ايه الاحسن استخدمهم تحت عينك عارف انا بعمل ايه وبمشي مع مين

ولا اروح اسرق زي الحرامية من وراكو وربنا يعلم من هيكون معايا !

فيه كلام كتير عاوزة اقوله
بس بلاش عشان الموضوع طويل ومش عاوزة حد يمل ..

ولي رجاء .. انا عاوزة ردود واقعية بلاش حتة المثالية الزايدة دي
ودلوقتي انا كدا خلصت ومستنية ردود الطرفين ..