كنت بتعمل ايه ؟! .. احكيلنا ..

[Rymonda]

سوري يا جماعه بجد ع التأخير .. بس النور كان قاطع ..
منوريـــــــــــــــــــــــــــــــــــــــن !!

نكمل بقى شويه ..


*يوم لما نيجي نخرج بقى .. او نروح السوبر ماركت مثلا ..نيجي نركب العربيه بقى ..اقول لماما الحريم بتركب ورا ..يلا يا حرمه انتي وبنتك اركبوا ورا .. وانا اللي هركب جمب بابا ..ومكنش حد بيقدر عليا وفعلا كنت بنفذ اللي في دماغي ..شرسه


*نروح بقى السوبر ماركت ..لازم طبعا اركب في العربيه بتاعة الطلبات ..دي هوايه ..وطول ما احنا ماشيين في السوبر ماركت .. بشد اي حاجه وارميها في العربيه .. لحد ما يبقوا خلاص هيولعوا فيا ..


*وفي يوم ماي مازر راحت تولد .. بعد حمل 9 شهور طبعا ..ههههه
واخدونا معاها في مستشفى خاص كده ..المهم ان في هناك مكان لعب للاطفال وكده ..لقيت نفسي هنناك ..وحطوني انا واختي هناك وراحوا يولدوها ..وقعدنا نلعب ونسينا ان مامتنا بتولد اساسا ..لحد ما بابا جه خدنا وقالنا تعالوا شوفوا البيبي وكده ..وطبعا انا مكنتش طايقاه لانه مولود فوق دماغي بقى ..والدلع هيروح وكده
لدرجة اننا لما روحنا .. تاني يوم الصبح بقول لماما ده وحش وتخين وغبي روحي المستشفى رجعيه وهاتي واحد تاني ..قالتلي بس بابا نايم مين هيسوق العربيه بس ؟
قولتلها انا هاخدلك تاكسي ونروح نرجعه ونيجي قبل ما بابا يصحي ..
(عسل عسل عسل)

*لما كنت اعيط بقى ويزعلوني .. ادخل اي اوضه واقفل على نفسي .. مع العلم اني مبعرفش افتح الترباس .. بقفل بس .. واقعد اعيط .. ويقلولي افتحي يا بنتي .. اقوللهم لا انا هنام شويه بس ده بكل برود وهما هيموتوا عليا بره على اساس اني مش هعرف افتح وكده .. وكنت فعلا بروح في النوم وعــــــــــــــــــــــــــادي .. ولما اصحى عاوزه اخرج بقى بس مش عارفه افتح طبعا .. ومش عاوزه ابين بقى اني مدايقه من كده ..(طفله عندها عزة نفس)..
اقوللهم يلا نلعب ان الاوضه دي بيتي وانتو بيتكم باقي الشقه .. يا بنتي انتي في ايه ولا في ايه انتي محبوسه .. ولما احس اني محبوسه فعلا اقعد اعيط وافتحولي حرام عليكو.. المهم كانت بترسى في الاخر على نجار زي الفل بيكسر الباب ..

كفايا دول .. عشان الاقي حاجه اكتبها بكره ..