(((___مشاكل طلاب الثانوية العامة___)))

[أسيل رزق]

المشاركة الأصلية كتبت بواسطة كل الحلا مصرية

السلام عليكم
وعليكم السلام ورحمة الله وبركاته

انا ان شاء الله داخله تانية ثانوى وجايبه والحمد لله مجموع كويس فى اولى الترم الاول لسه الترم التانى ربنا يستر واجيب فيه درجة كويسة
انا عايزه ان شاء الله ادخل علمى وعايزه انى اكون من الاوائل لانى مش بحب اكتفى بالنجاح او "" انك تعدى وخلاص "" بس اكتر حاجة بتضايقنى ان الناس بتقول على امتحانات الثانوية العامة صعبة وبتيجى معقدة جدااااااااااااااا وانا خايفة بالرغم ان الواحد جايب درجات الحمد لله كويسة فى اولى الا انه مش مطمن لان اولى مش مقياس لتانية صح ولا لأ ؟؟؟؟
فعلاً أولى مش مقياس لتانية و تالتة .. بيكون فى إستهتار مننا أصلاً بسنة أولى .. و فى أصحاب ليا كتير كانوا مش شاطرين فى أولى و بقوا الأوائل فى تانية و تالتة و فى بعضهم عكس كده .. لازم تاخديها جد و انتى شكلك بسم الله ما شاء الله شاطرة و مهتمة إنك تذاكرى و تجتهدى فى السنين الجاية .. ربنا يوفقك

وانا عايزه ادخل هندسة لانى مستتقلة طب وصيدلة: 7 سنين طب وصيدلة متعبه جدا اكتر من هندسة وانا احب ادرس هندسة ان شاء الله
ونفسى تقولولى افضل اقسام هندسة للبنات ؟
وايه افضل الحلول ان الواحد ما يملش من عدد ساعات المذاكرة
وكمان صح ان الاوائل على الجمهورية تقريبا ما كانوش بيناموا ؟؟؟؟!!!!!!!!!
إزاى بقى .. أكيد بيناموا .. دى لو حرب هيناموا برده
بصى مش معنى إنهم من الأوائل يبقى بيذاكروا ليل نهار ومش بيسيبوا ثانية و مدلوقين على الكتاب صبح وليل .. لأ طبعاً دا أصلاً غلط لازم يكون فى تنظيم وقت و بريك بين كل مادة علشان مش تزهقى لإن بيجى فترة فى السنة بتتخنقى جداً من المذاكرة .. تخيلى لو فضلتى تذاكرى صبح وليل وجيتى عند آخر شهرين و إتخنقتى وبقيتى مش بتذاكرى أكيد هتبقى مشكلة .. الراحة شىء أساسى من وقت للتانى فى المذاكرة
وجزاكم الله خيرا

جزانا و إياكم كل خير

هتكلم سريعاً كده عن نقط لازم تعملوها
1.العبادة والصلاة وطاعة ربنا ثم الوالدين مهمة جداً يا جماعة علشان ربنا يكرمكم فى الامتحانات و النتيجة
2.حددوا مكان هادى وترتاحوا فيه للمذاكرة لإن تغيير المكان بيشتت العقل
3.لازم تنظموا أكلكم كويس مش تقولوا إحنا هنذاكر وبس .. لأ طبعاً لازم تتغذوا كويس علشان عقلكم يفضل صاحى و يقدر يستوعب المعلومات
4.لازم تنظموا نومكم كويس لإن النوم القليل بيتعب الإنسان جداً وبيكون مرهق طول اليوم 7 ساعات نوم حلوين ليكم
5.تنظيم وقت المذاكرة و جدول المذاكرة .. هيتكلم عليها دك.سعيد إن شاء الله
6.ماتقنعوش نفسك إن الثانوية العامة صعبة و مستحيلة والكلام الكبير ده لإنى لا صعبة ولا مستحيلة ولا فيها حاجة .. كل شىء مع المذاكرة والمراجعة و تقوى ربنا أولاً و أخيراً هتكون سهلة و بسيطة
7.وقت البريك بتاعكم حاولوا تقضوه فى شىء يفيدكم .. يعنى إسألوا على أقاربكم أو جيرانكم أو أصحابكم .. إقروا كتب مفيدة فى المجال اللى بيفضله كل واحد فيكم .. ساعدوا أهل بيتكم فى أى حاجة محتاجنها

دى لفتة سريعة عن حاجات مهمة لازم تنفذوها

و ربنا يكرمكم و يوفقكم إلى ما فيه الخير بإذن الله