التعليم بايظ

[Shamy shemo]

بصراحه باين من الموضوع ان التعليم بايظ على أخره خالص
وبان من التنسيق اوى فى ناس اتضربت جامد
مثلا يعنى اللى جايب 96.2 % دخل علوم واللى جايب 90.5% دخل نفس الكليه بردو
واللى جايب 94.5% دخل اثار زى اللى جايب 88%
يعنى بصراحه ناس تعبت جاااامد اوى وفى الاخر مفيش اى حاجه خالص واللى جايب 93.5% كمان ومدخلش هندسه ولا طال اى حاجه مع ان اللى كان جايب 92% دخل هندسه قبل كده

بصراحه حاجات تشل
غير كده المناهج اللى تشل اوى اوى
وبالذات قصه العبقرى طه حسين
والفول والبسبوسه والقرشين والارانب والكرنب والترعه والبنت اللى قالها انا بحبك وبعشقك وقلبى ياعينى عليه

والمفروض سنه تالته ثانوى اشطه وتمام تذاكرها وتقراها وتمتحن فيها امتحان مستقبلهم

دى تعليــــــــــــقات بعض الناس على جروب التعليم بايظ على الفيس


ودى تعليقات انا شوفتها هنا زى دى مثلا
كلوا يمسك اعصابه بس ازاى انا هتجن يا عالم ابقى جايب 82 % علمى و ملحقش كلية و الادبى اليجيب 65 % يخش اى كليه
نخش على الفضيحة : اتفضلوا حضراتكوا بالدخول على الحد الادنى للكليات الشعبة العلمية 2011
مش حتلاقوا : حقوق اسكندرية - اداب المنيا
معلش هما دول الانا شفتهم انا اصلن مش شايف حاجة و مخنوق من الدنيا كلها و من حياتى و نفسى اموت
طبعا فى كليات تانية اكيد منزلتش مش عارف ايه السبب ممكن يكونوا نسوها ولا ايه انا مش عارررررف
احنا فى بلد الكوسة و الجزر

[the spider mido]

هههههههههههههههههههههههههههههههههههههههههه
لا اله الا الله

[Shamy shemo]

هههههههههههههههههههه

والله انا اتفقعت مع انى عديت الثانويه بس بجد مفقوووووووع منها مووووووووووووت

[ENG.HAGAR]

للاسف الشديد لو حد اتكلم على مضوع التعليم فى مصر هيتجاوب عليه وهو ايه اللى عدل فى البلد دى !!
يعنى بمعنى اصح مبارك ظبط كل المؤسسات الحمد لله علشان احنا بعد ما تنحى او اتخلع بمعنى اصح لاقينا نفسنا غرقانين فى فساد صعب التقليل منه فمابالكم بالقضاء عليه .!
مثلا التعليم كلنا عارفين ان فى غش فى الامتحانات وواحد غشاش ممكن يجيب اكتر من واحد محترم "ده مش دعوة للغش ولا حاجة لان كلنا عارفين ان الغشاش ماله حرااام وهيعيش طول عمره تعيس فى حين الشخص المحترم ده طول عمره هيعيش مرتاح حتى لو حياته ماديا صعبة "
عارفين الاساتذة اللى قاعدين على ترابيزة بيعلموا بطريقة واللى قدامهم بيعلموا بطريقة تانية فين العدل يا بلد العدل !
وشايفين بعينينا المدرسين اللى بيسمحوا بالغش الجماعى ولا حرج !
وسامعين الطلبة اللى داخلين بسماعات الموب بتاعتهم
انا مثلا حصل معايا موقفاتفضلوا اسمعوه " فى لجنة الجبر انا كنت سامعة البنت اللى ورايا شغاله تقول " اه امممم اه " وانا شكيت انها بتستخدم الموبايل بتاعتها المشكلة انى ما عرفتش اتكلم لانى كنت بالكامل بحااااااااول اركز فى مسألة فى الجبر وما عرفتش اتكلم لسبب تانى بردو وهو انى فى اللجنة اللى قبليها بلغت عن بنت بتغش وقولت للمراقبة عليها لاقيت المراقبة بتقولها فى ناس مش عارفه تحل وبتشاورعليا !
فى حين انى لابسه نقاب ولازم اتفتش( ولو ما اتفتشت انابطلب انى اتفتش لانى مش بعمل حاجة غلط ) تخيلوا اللى ورايا بتغش ولابسه 2 طرحة وماحدش شايف السماعة اللى لابساها
بس الحمد لله ربنا مش بيضيع مجهود حد انا الحمد لله دخلت هندسة عين شمس وهى ما لحقتش لا هندسة ولاعلوم .ونزلت مرحلة تانية بالرغم انها متفوقة !
الخلاصة لو عايزين نصحح من التعليم لازم نكون كطلبة مهيئين لكدة نفسيا يعنى بمعنى اصح نبطل غش نحترم المراقب علشان هو يحترمنا وكمان نبلغ عن اى حاجة لو شفناها وما نخافش من حد انا اللى خلانى مااتكلمش تانىمرة لانى كنت بحاول اركز جداا فى المسالة والوقت كان ضيق .
بجد شكرا جدا على الموضوع يا دوك.شامى

[Shamy shemo]

بجد كلامك مظبوط يا بشمهندسه كلام صح جدا والله

بس التعليم هو سبب الفساد ده احنا لو اتعملنا صح واتعلمنا حاجات مفيده فى المدرسه وبالذات الابتدائى والاعدادى كنا هنكون تمام ونعرف وندى كل حاجه حقها واية مطلوب مننا وعلينا بجد كل الحاجات دى لو اتعملت حاجات كتير اوى هتتغير ومفيش بلد هتتقدم بجد غير بالتعليم الصح والاحترام

احنا غيرنا نظام كاااااااااااامل اهوه لكن المشكله مش كلها نظام ( النظام ربع المشكله ) تلت تربع المشكله هو الشعب والناس ونغير نفسنا بنفسنا لكن بصراحه مفيش أمل اللى اتربى على حاجه هيفضل طول عمرها
مش هقول النظام السابق هو اللى عمل كده ومش عارف اية لاء احنا اللى عملنا فى نفسنا كده والله
اللى تلاقى عنده ضمير ويقدر يغير ويتغير ( واحد وسط ميه )

كل المشكله فى التعليم والله

[نؤنؤة...]

No comment

عندك حق ف كل كلمة والله مش عارفة ازاى التعليم عندنا يتغير كل مرة يجيبوا وزير شكل يعك الدنيا اكتر الواحد تعب والله

[ENG.HAGAR]

بس التعليم هو سبب الفساد ده احنا لو اتعملنا صح واتعلمنا حاجات مفيده فى المدرسه وبالذات الابتدائى والاعدادى كنا هنكون تمام ونعرف وندى كل حاجه حقها واية مطلوب مننا وعلينا بجد كل الحاجات دى لو اتعملت حاجات كتير اوى هتتغير ومفيش بلد هتتقدم بجد غير بالتعليم الصح والاحترام

يا دكتور انا اقصد ان بكلامى احنا هنبنى البلد بعدين الاساتذة بتوع الجامعة ان شاء الله هيكونوا مننا دول هيحطوا المناهج بالتالى لازم يكونوا فاكريين ايه اللى كان بيحصلهم لما كانوا فى ثانوى وما يحصلش لهم زهايمر !
فعلا نفس التعليم يكون عامل زى الكورسات كدة فى تخصصات الواحد له ميول معينة عايز يوصلها يكمل فى طريقة وهيبقى ممتاز فيها
انا ابن خالى المانى وعايش فى المانى خالى بيقولى الواحد فيهم بيبقى متخصص لمدة كبيرة فى التعليم ما قبل الجامعى مش احنا سنتين واقلب !

احنا غيرنا نظام كاااااااااااامل اهوه لكن المشكله مش كلها نظام ( النظام ربع المشكله ) تلت تربع المشكله هو الشعب والناس ونغير نفسنا بنفسنا لكن بصراحه مفيش أمل اللى اتربى على حاجه هيفضل طول عمرها

عفوا ليا راى مختلف بعد اذن حضرتك
الثورة ما غيرتش نظام الثورة ازالت نظام ممكن يكون له جذور زى الشجرة بالظبط ممكن تلاقى كام جذر ماسك فى الارض وجذور كتيرة طلعت .
ريس النظام واعوانه اللى راح ده كان من الجذور الكتيرة اللى راحت لكن فى جذور لسه موجودة زى السلبية والغش والاخلاق السيئة وغياب الدين والوعى وغيره .
يا دكتور صدقنى فى امل طالما فى ناس زى الطلبة اللى عايزه تظبط البلد امثال حضرتك اهو عرضت مشكلة وعايز تحلها دخلت طلبة كتير علشان يشوفوا المشكلة ويحلوها وهكذا يبقى فى امل اكيد .
واهم حاجة حسن الظن فى ربنا
هو مين كان يظن فى يوم من الايام ان مبارك يتنحى او انه يتحاكم!

مش هقول النظام السابق هو اللى عمل كده ومش عارف اية لاء احنا اللى عملنا فى نفسنا كده والله
اللى تلاقى عنده ضمير ويقدر يغير ويتغير ( واحد وسط ميه )

الرسول صلى الله عليه وسلم كان واحد فقط بدون اى صاحب سوى ابو بكر الصديق . وكان الله سبحانه يؤيده بنصره .
والناس كلها بتهاجمه .
ممكن نقول ده الرسول واحنا مين !
ما احنا قولنا دول اجانب وعندهم حرية واحنا مين ! واخيرا الحمد لله استمتعنا ببعض الحرية .
لو الواحد بص لتحت ,, ضهرة هيوجعه لكن لو بص لقدام ,, مش هيوجعه
اتمنى ان الطلبة يقولوا حلول للمشكلة دى مش طرح للمشكلة وبس " ده طلب رجاااء تلبوه "
جزاك الله كل خير يا دكتور شامى

[Shamy shemo]

بصراحه يا بشمهندسه هاجر

مفيش كلام بعدك كلام بصراحه جميـــــــل اوى وفكرك عااااااااااااااالى جدا جدا ربنا يكرمك
وهنفضل ان شاء الله كده ونستمر منزهقش ونقول مفيش امل زى ما قولتى بالظبط

[ningooooo]

هو حضرتك لسه مكتشف النهاردة ان التعليم البايظ

طيب سيبك من المناهج ايه رايك في اسلوب المدرسين اللي كرهوا الواحد في التعليم و بوظوه و في الاخر يجوا يقلولك عاوزين يرفعوا مرتباتهم و اكيد هم عندهم حق بس ايه و سيلتهم بكده انهم يهددوا بعدم المراقبة او يرفضوا التصحيح يعني برضه بيضروا التلميذ

انا شايف ان معظم المدرسين لا تهمهم مصلحة التلميذ علي الاطلاق و تنازلوا عن شرف هذه المهنة التي اصبح يعمل بها المتكالبون علي المال و انا لا اقصد جميع المدرسين لكن معظم من تعاملت معه كان علي هذه الشاكلة

يعني مثلا تيجي تلاقي مدرس بادئلك دروس من اول شهر 8 يعني قبل الدراسة بشهر و نصف و يضيع علي الطلاب اجازتهم علشان شوية قرشين زيادة و الله اعلم بنيته و ربنا يسامحني لو كنت بظلم حد بس ده اكيد احد اسباب كره الاطفال للتعليم

للأسف ضيعوا علينا جمال المدرسة و مكانتها و اصبحت نزهة للطلاب و مكان للعب لا للمذاكرة

و كل حاجه يعد يقولك ثورة هههههه

ثورة ايه بس و الشوارع مليانة زبالة و كا جمعة مليونية و كل شوية معارك و السرقة علي ودنه و الرشاوي شغالة و الغش عيني عينك و ارتفاع الاسعار و كل ذلك من المشاكل

و لا نجد من يعطينا و لو بصيص من الامل

[العربي الصغير]

المشاركة الأصلية كتبت بواسطة ningooooo

للأسف ضيعوا علينا جمال المدرسة و مكانتها و اصبحت نزهة للطلاب و مكان للعب لا للمذاكرة

أنا معاك إن المدرسة ما بتقومش بدورها زي زمان ولكن لازم نبص للجانب الإيجابي ، أنا في تالتة ثانوي السنة دي كان عندي في المدرسة مدرس فيزياء قمة في الروعة ومخلص في عمله بشكل غير عادي وخلاني أستغنى عن الدروس ، وبعد ما شرح المنهج كله وخلص آخر درس قلت له شكراً ، رد علي رد صدمني وخلاني مذهول إن لسه فيه ناس كده في الدنيا قال لي : (( شكراً على إيه ، أنا باعمل شغلي )) ، وفي النهاية جبت في الفيزياء 49 ،فمش كل حاجة بقت وحشة والدنيا لا زال فيها أمل مهما حصل

[ENG.HAGAR]

بصراحه يا بشمهندسه هاجر

مفيش كلام بعدك كلام بصراحه جميـــــــل اوى وفكرك عااااااااااااااالى جدا جدا ربنا يكرمك
وهنفضل ان شاء الله كده ونستمر منزهقش ونقول مفيش امل زى ما قولتى بالظبط

العفو يا باش مهندس البداية كانت من حضرتك وفعلا الدال على الخير كفاعله .
وحضرتك زى ما بدأت موضوع زى ده وعملت الخطوة الجامدة دى حاول تدعى اصحابك للتوبيك ويدخلوا ويشاركوا فى الموضوع
وفعلا اهم حاجةزى ما حضرتك اكدت مش هنزهق ومش هنمل من تنظيم البلد وكدة .
طيب ممكن نضع بعض الحلول المقترحة بعد عرض المشكلة .
يعنى مثلا هقول
المشكلة : طلبة مش بيتعلموا صح وغيرهم فاهم ومش راضى يتكلم ويساعدهم وفاكر ان ده ذكاء او منافسة .
الحل : اننا كطلبة نفهم الحديث ده " كان الله فى عون العبد ما دام العبدفى عون اخيه " انا اعرف واحدة عملت كدة وربنا كرمها فى الدرجات وكان الكل فى الدرس بيتلكموا عليها وعلى معاونتها للطالبات وكانت بتروح بدرى للدرس علشان تساعد غيرها وتشيل كتب وكشاكيل زيادة مطلوبة من الطلبة علشان تفهمهم .
وطلبة تانين بيحسدوهاعلى ذكائها واسئلتها للدكتور بتاع الفيزياء وما كانتش بتخاف من حسد او كدة لانها كانت فى عون الله كما هو مذكور فى الحديث
يا ترى دى طريقة كويس يا دكتور ولا ايه ؟؟

[ENG.HAGAR]

يعني مثلا تيجي تلاقي مدرس بادئلك دروس من اول شهر 8 يعني قبل الدراسة بشهر و نصف و يضيع علي الطلاب اجازتهم علشان شوية قرشين زيادة و الله اعلم بنيته و ربنا يسامحني لو كنت بظلم حد بس ده اكيد احد اسباب كره الاطفال للتعليم

معلش يا دكتورة ليا كام تعليق كدة لو تسمحى
بداية موضوع الدروس مش مشكلته امتى بيبدأ هنقول على حاجةتفتكرى منهج الفيزياء اللى اخدناه السنة دى ينفع ناخد من منتصف شهر سبتمبر !!!!!!!!!!!!
وبعدين الطالب اولا واخيرا هو اللى عنده الاختيار مش الدكتور ضيع عليه اجازته لا الطالب اختاره وعلى اساس كدة صضاعت اجزة الطالب باختيار منه
ماهو ممكن يبدأ الاستاذ مع بداية الدراسة لكن ممكن تكون كل اسبوع3 حصص وما فيش اجازات فى الاعياد وكدة .
ومن ناحية ان ده احد اسباب كرة التعليم فعندك حق .

للأسف ضيعوا علينا جمال المدرسة و مكانتها و اصبحت نزهة للطلاب و مكان للعب لا للمذاكرة

مظبوط بسبب عدم نزاهة بعض المدرسين
هقولك على مثال فى استاذ الرياضة هو مشهور جدااا ومحبوب من ناس كتير جدااا والحمد لله عايزه اقولك ان حصته ماكانش بيغيب عنها حد وكان فى طلبة بيجوا من فصول تانية تحضر معاه وكان يا ستى لو حد من الوزارة يعملتقييم او كدة يستغرب ويكتب من مميزات الاستاذ ده هو تركيز الطلبة فى الحصة وعدم الكلام واحترامهم للاستاذ وتفاعلهم معاه بالحل .

ثورة ايه بس و الشوارع مليانة زبالة و كا جمعة مليونية و كل شوية معارك و السرقة علي ودنه و الرشاوي شغالة و الغش عيني عينك و ارتفاع الاسعار و كل ذلك من المشاكل

انت بدأتى وانا كمان وناس محترمة زيك عازين الشوارع تنضف يبقى هتبقى البلد انضف
وم ناحية ثورة ثورة اى بلد لازم تعيش عضر من الفوضى بعد اى ثورة فلازم ما نتعجلش ولكن نبدأ بالخيرمن نفسنا مش نستناه من غيرنا .

و لا نجد من يعطينا و لو بصيص من الامل

ممكن حضرتك يادكتورة تعطيه لينا ولغيرك صح ؟

[ningooooo]

شكرا يا باش مهندسة علي تفاعلك و علي فكرة أنا ولد مش بنت

بس للاسف الطالب عندنا مسير و ليس مخير و انا كنت بعطي حكاية الدروس دي كمثال علي سبب كره الطلبة للتعليم
يعني مثلا طالب 2 ثانوي خلص امتحانات اخر 7 و النتيجة طلعت علي نصف 7 و يجي يبدأ دروس اول 8 مش ده يعتبر ضغط كبير برضه ؟
ده في ناس تروح في شهر 7 علشان تحجز دروس و تلاقي المدرسين خلصوا هل يعقل هذا؟؟؟
يعني غصب عنه لازم يبدا أول 8

و انا لا انكر وجود مدرسين محترمين لكني الصراحة قلما اجد مدرس يهتم بالشرح في المدرسة و انما بتكلم عما رايته

و انا عارف ان اي ثورة لازم تصاحبها هذه الفوضي بس انا رايي اننا مش لازم نرمي كل حاجه علي الثورة لاننا السبب في هذه الفوضي و ليست الثورة و علي كل واحد انه يبدأ بنفسه فقط

[ENG.HAGAR]

شكرا يا باش مهندسة علي تفاعلك و علي فكرة أنا ولد مش بنت

العفويا دكتور
انا متأسفة جداااااا .

بس للاسف الطالب عندنا مسير و ليس مخير و انا كنت بعطي حكاية الدروس دي كمثال علي سبب كره الطلبة للتعليم
يعني مثلا طالب 2 ثانوي خلص امتحانات اخر 7 و النتيجة طلعت علي نصف 7 و يجي يبدأ دروس اول 8 مش ده يعتبر ضغط كبير برضه ؟

هنقول حاجة لطيفة جداا ان الطالب عنده عدة اختيارات وجميعها بالنسبة له صعبة بس هو بردو بيختار وممكن بردو يروح عند استاذ بيبدأ متأخر .
مثلا انا كنت باخد حصة واحدة للكيمياء فى الاسبوع وبدأنا فى شهر 9 وكان الدكتور ملتزم فى مواعيده جدااا .

ده في ناس تروح في شهر 7 علشان تحجز دروس و تلاقي المدرسين خلصوا هل يعقل هذا؟؟؟
يعني غصب عنه لازم يبدا أول 8

فعلا لا يعقل لكن بردو نقول انها سياسة التعليم
لو كان فى تعليم كويس كان الطالب اللى مستواه ضعيف كان هو اللى اخد دروس ودى جزئية الدكتور شامى
وكمان حاجة تانية احنا عندنا ايمان داخلى ان الواحد لو ما اخدش عند فلان الفلانى مش هيجيب مجموع
يعنى لازم استاذ مشهور وكدة وده حاجة لازم اعترف بيها .

و انا لا انكر وجود مدرسين محترمين لكني الصراحة قلما اجد مدرس يهتم بالشرح في المدرسة و انما بتكلم عما رايته

انا مع حضرتك فى النقطة دى لانهم قلة جداا
الوزارة مش مهتمة بيهم من حيث المرتبات ولا بالطلبة
وهنقول ما هى البلد مسروق انتوا جايين على المدرسين وعايزين نزود لهم المرتبات ! طيب ما احنا قولنا هنبقى احسن ومش هنقبل بالرشوة وهنبقى احسن وهنشتغل
ده على سبيل اننا الجيل اللى طالع وان احنا اللى هنمسك البلد ان شاء الله .

و انا عارف ان اي ثورة لازم تصاحبها هذه الفوضي بس انا رايي اننا مش لازم نرمي كل حاجه علي الثورة لاننا السبب في هذه الفوضي و ليست الثورة و علي كل واحد انه يبدأ بنفسه فقط

تصحيح للمعلومة
لما اتكلمت على موضوع الفوضى انا كنت اقصد عدم التعجل بالاصلاح واننا فجاة نلاقى الطلبة فى مصر زى الطلبة فى الامارات الحقيبة المدرسية بتاعتهم عبارة عن حاملة للسيديهات . !!

انا اقصد يا دكتور ان الفوضى من حيث اننا ما نتعجلش ان فجاة المرتبات تزيد ان الشارع بتاع بيتنا يبقى مشجر ان المدسة تتملى اجهزة كمبيوتر وكدة .
لكن الفوضى انى ارمى - اعزكم الله - ورق فى الشارع وكدة دى ما لهاش دعوة بالفوضى دى ليها دعوة بثقافة الانسان .
ده اللى قولته نصل بدون تعديل

وم ناحية ثورة ثورة اى بلد لازم تعيش عضر من الفوضى بعد اى ثورة فلازم ما نتعجلش ولكن نبدأ بالخيرمن نفسنا مش نستناه من غيرنا

جزاك الله كل خير على تفاعلك فى الموضوع يادكتور

[ningooooo]

لا عادي مفيش مشاكل

و فعلا اي مشكلة عندنا سببها الرئيسي يتلخص في كلمة واحدة - الثقافة -