نصائح هامة من دفعة الثورة للدفعات القادمة

[ningooooo]

بسم الله الرحمن الرحيم

بداية من منطلق أننا المفروض دفعة الثورة وأننا مرينا بتجارب كتير جدا فالمفروض لا نبخل بالخبرة اللي اكتسبناها و بطلب من كل واحد يكتب اللي استفاده في صورة نصائح علشان نفيد بيها الدفعات القادمة و نقلل من قلقهم و كان نفسي طبعا يكون موجود معانا كل الأعضاء اللي كانوا موجودين من بعد ما خلصنا امتحانات ثانوية عامة مرورا بانتظار نتيجة الثانوية العامة و اللحظة الفارقة في حياتنا و بعد كده كل واحد كان بيشوف ترتيبه و يختار الكلية المناسبة ليه و يكتب رغباته و يستني نتيجة التنسيق و الناس اللي كانت عاوزة تحول و انتظار التحويل الالكتروني و بعدين نقدم في التحويل الالكتروني و الناس اللي تحويلها اترفض كانوا مستنين التحويل الورقي لغاية لما فتح و نروح في رمضان وسط زحمة كبيرة و نقدم في التحويل الورقي و بعدين نفضل مستنين فوق ال 20 يوم لغاية لما الكشوفات تنزل الكليات و نطمن ان تحويلنا اتقبل و بعدين اخيرا نقدم و تنتهي الرحلة دي بحلوها و مرها .

و علشان يكون الموضوع منظم أنا بطلب من أعضاء المنتدي الكرام أنهم يكتبوا نصائحهم للدفعات القادمة في صورة نقاط هكذا :

نصائح النتيجة :
نصائح اختيار الرغبات :
نصائح انتظار نتيجة التنسيق :
نصائح التحويل الإلكتروني :
نصائح التحويل الورقي :
نصائح التقديم :

و أنا عارف انها هتاخد وقت طويل منكم بس أحنا بنعمل كده لوجه الله علشان نساعد غيرنا

و بقول للدفعات الجاية القسم ده يعتبر تراث علشان هتلاقوا حاجات كتير مفيدة جدا و عمرها ما هتخطر علي بالكم و هتريحكم جدا

[ningooooo]

و أنا هكون أول واحد

نصائح النتيجة :
1 - استمتع بالفترة اللي بين الانتهاء من الامتحانات و النتيجة كويس و متشلش هم النتيجة خالص .
2 - أوعوا حد يزعل من النتيجة مهما كانت و اعرف ربنا بيدي كل واحد علي قد عمله و ان المجموع اللي تجيبه بمجهودك افضل مليون مرة من المجموع اللي بتجيبه بالغش .
3 - لو حسيت انك مظلوم في حاجة اعمل تظلم بس لازم تكون متردد لان النصف درجة بتفرق جامد جدا عن تجربة شخصية و علي فكرة التظلم غالبا محدش بياخذ فيه درجات اللي لما يكون سؤال مش متصحح او خطا في الجمع لكن محدش بيصحح سؤال مرة تانية .

نصائح اختيار الرغبات :
1 - بعد ما النتيجة تظهر هيبدأ موقع معين يحط ترتيب الطلاب و هو غعلا مفيد لكن مش هو ده الاساس اللي تختار عليه رغباتك .
2 - تأني جيدا و انت بتختار الرغبات و متضيعش العشريين اختيار علي الفاضي و خلي حد يكون معاك يساعدك .
3 - الاختيار بيكون طبقا للتوزيع الجغرافي علشان كده حط الاول الاماكن القريبة و بعدين البعيدة .
4 - بعد ما تسجل رغباتك هتلاقي كل الجرائد بتفتي و يقلك كل يوم حد ادني للكليات مختلف و من الآخر سيبك منهم لأنهم اشتغلونا السنة دي جامد أوي و كل الكلام اللي كان فيها معظمه فتي و هيتعب اعصابك علي الفاضي و انت اصلا في الفترة دي هتكون قلقان جدا فالحاجات دي هتزيد توترك .

نصائح التحويل الإلكتروني :
1 - التحويل الإلكتروني بيفتح بعد نتيجة المرحلة التانية من التنسيق و بتختار فيه كلية واحدة لتقليل الأغتراب .
2 - غالبا في التحويل الألكتروني هما بياخذوا فرق النصف درجة بس و بالكتير اوي فرق درجة او درجة و نصف و هم بيقبلوا فيه 10 % بس من عدد طلاب الكلية و النسبة دي ممكن تتغير بس هي غالبا بتبقي كده .
3 - التحويل الالكتروني بيكون للمنطقة الجغرافية أ بس .

نصائح التحويل الورقي :
1 - هتسمع كلام كتير ان مفيش تحويل ورقي بس الكلام ده غلط .
2 - التحويل الورقي بيكون في الجامعة اللي عاوز تحول ليها يعني لما التحويل الورقي يفتح انت بتروح للجامعة اللي عاوز تحول ليها و لازم يكون معاك وصل نور او غاز او تليفون او ماء باسم ولي الامر في المحافظة اللي عاوز تحول ليها و بيكون بفلوس مش بتزيد عن 200 جنيه .
3 - النتيجة بتظهر في الكلية اللي انت حولتلها و غالبا كل التحويلات بتقبل و ده اللي حصل في سنتنا .
4 - التحويل بيستمر لفترة طويلة و بيختلف من جامعة لاخري .
5 - النتيجة بتاعة التحويل بتظهر بعد حوالي 20 يوم من فتح باب التحويل الورقي يعني ممكن الدراسة تبدأ و نتيجة التحويل لسه مابانتش و يكون الحل انك هتقدم في الكلية اللي جاتلك بس تستني قبل ما يقفلوا التقديم علي طول و تحضر في الكلية اللي انت محول ليها بس الكلام ده محصلش معانا علشان الدراسة اتاجلت و كان اللي قدم اضطر يروح يسحب ورقه .
6 - بيكون في في بعض الكليات مبلغ تبرع للكلية بتاع 2000 جنيه كده بس معظم الكليات مفيهاش .

نصائح التقديم :
1 - ما تستعجلوش علي التقديم لانه بيكون بعد بتاع شهر من نتيجة التنسيق و ساعات بيفضل فاتح بعد ما الدراسة تبدأ كمان .
2 - اتاكد كويس من الورق المطلوب و اوعي تنسي حاجة علشان مترجعش البيت تاني .
3 - يتدفع بس مصاريف الكلية و استلام كارنيه الجامعة بيكون بعد ما الدراسة تبدأ .

[highlight]

نصائح النتيجة : اقبل باللى ربنا اداهولك و احمد ربنا على كل شئ مهما كان مجموعك...دا قدرك ودا اللى ربنا اداهولك...قدر الله ما شاء فعل...بس اهم حاجة عييييييييييييييييييش الصيف وصيف والعب واوعى تشيل فى نفسك اى حزن طبعا
نصائح اختيار الرغبات : اختااااااااااار اللى انت عايزه ونفسك فيه بجد مش اعلى حاجة وخلاص وان شاء الله يقدم اللى فيه الخير ليك.......واهتم اول حاجة بترتيب الرغبات الاولى
نصائح انتظار نتيجة التنسيق : اولا تدعى ربنا فى كل وقت انه يسهل الامور و تكون فى مكانك الصح
نصائح التحويل الإلكتروني : حاول على قد ما تقدر تفهم شروط التحويل الالكترونى عشان مش تخسره وتاخد منه اكبر استفادة ممكنة
نصائح التحويل الورقي : اوعى تضيع الصيف (زى ما عملنا) انك تبقى قاعد متوتر مستنى النتيجة....لا خليك فريش كده وانسى خااااالص وعيش لحد ما النتيجة تطلع.......وان شاء الله خير وتكون اتقبلت..وبردو اعمله صح عشان محدش يتلكك
نصائح التقديم :لما نتيجتك تظهر و كل حاجة تمام ابقى شوف المطلوب منك ايه وروح قدم فى اى وقت
واتاكد من المطلوب منك

وكده فل اوى اوى واوعى تزعل على اى اى حاجة وربنا يكرمك
وقبل اى حااااااااااااااااااااااجة الف مبروووووووووووووك انك خرجت من الهم الذى لا ينتهى طبعا
الثـــــــــــــانوية العـــــــــــــــــامة المصـــــــــــــرية
اسوا مرحلة مريت بيها فى حياتك اكيد... ومتقوليش لا كانت حلوة
بتضحك على نفسك من الاخر............انا عن نفسى شوفت ايام سودة
وخصوصا فى تالتة...مش عايزة افتكرها اساسا ربنا ما يعيدها تانى
هو انا اه لسه مش فى الكلية ولا جربتها........وهومت واجرب الصراحة
بس اكيـــــــــــــــــد مرحلة جديدة و وهتقابل ناس جديدة وطريقة معاملة مختلفة
مفيش بقى لا يونى فورم ولا تحية العلم ولا تحيا مصر
ولا هات الواجب والكراسات تتصحح
لالالالالالالالا .........عالم تانى بجد وان شاء الله يكون حلو عليك وعلينا
وعيــــــــــــــــش ايامك.......

وشكـــــــــــــــرا يا دكتـــــــــــــــــور ننجو على الموضوع الجميل (تصدق والله كنت فا**** فى هندسة طول الفترة دى)
الف شكر

[امة الله3]

نصائح النتيجه _اكيد بعد لما بتخلص الامتحانات بتبدا تحسب فى درجاتك وانا غلط فى السوال دا وهيروح منه كام درجه وتزعل بقى وتكون عايش ومش عايش وايامك كلها قلق انا بقى بقولك اوعى تعمل كده خالص وتعيش نفسك فى توتر واحيانا امل لان الدرجات بتظهر غير المتوقع تماما لان كل مصحح وبيكون ليه وخهة نضر فى الاجابه اللى ادامه


نصائح الرغبات-دى بقى وانتى بتقدمها لازم يكون مغاك حد فاهم وعارف مش اى حد كده يقدملك لان انتى اولا بتبدا تتكب الاماكن حسب التوزيع الجغرافى للمحافطة بتعتك وبعدين فى المحافطات التانيه لازم بتكتب من المكان الاقرب لى الابعد علشان كده بقولك لازم يكون معاك حد فاهم وعارف ترتيب الاماكن من الاقرب للابعد لان واحد صحبتى كان حد قدملها وكتبلها اسيوط قبل حلوان وجتلها اسيوط ومجموعها اصلا جايب صيدلة حلوان


نصائح التنسيق _الفتره دى بتكون صعبه بسبب ان كل وسائل الاعلام بتكون عامله حرب توتر على الطالب مين يقدر يوتر الطالب اكتر وكل واحد بيقول تنسيق وحد ادنى للكليات بمزاجه وفى الاخر بيطلع كل كلامهم غلط انصحكم اوعى تسمعوا اى كلام من دا ولا تصدقوه خالص وان شاء الله بعد كده ربنا بيوفق كل طالب للخير وما حدش يزعل لو الكليه اللى بيتمنهاها مش قدر يوصلها كفايه انك خلاص طلعت من الثانوى ولسه عايش زى ما انتى كل حاجه بتكون نصيب وما حدش عارف الخير فين وافتكروا دايما الايه دى قال الله تعالى _وعسى ان تكرهوا شيئا وهو خير لكم وعسى ان تحبوا شيئا وهو شر لكم والله يعلم وانتم لا تعلمون.

نصائح التحويل الالكترونى_بالنسبة للتحويل الالكترونى اول لما تعرف ان باب التحويل فتح حاول تقدم بسرعه والتحويل بيكون حسب التوزيع الجغرافى يعنى ما ينفعش تقدم لكليه فى محافظه تانيه وحاول ما تضيعش على نفسك الفرصه دى

نصائح التحويل الورقى_لو لا قدر الله ما قبلتش فى التحويل الالكترونى اوعى تزعل خالص لسه قدامك فرصه تانيه وهى التحويل اليدوى او الورقى ودا بتاخد وصل كهربا اومياه او تليفون او غاز وصوره من بطاقةالترشيح وشهادة الميلاد و شهادة النجاح و200جنيه وتروح تقدمهم فى الكليه اللى انتى عايز نروحها وبعدين تستنى نتيجة التحويل ودى بتظهر على اول الدراسه تقريبا وكل الكليات مش زى بعدها يعن ممكن تظهر فى كليه قبل التانيه


نصائح التقديم_بعد النتيجه لما تظهر ان شاء الله وتقبل بتاخد شهادة الميلاد واستمارة النجاح وصورة من بطاقه الترشيح و6 صور وتروح تقدم

وربنا يوفق كل الطلبه ان شاء الله

[222ahmed222]

نصائح النتيجة :1_من اجل اكمال عام كامل من الاصرار والاستذكار الفعال عليك بأخذ قسط من الراحه بعد ظهور النتيجه ما بين اللعب والترفيه والتثقف وما إلى ذلك من وسائل التسليه.
2_عدم قضاء فترة الاجازه في الندم او التحسر فيما قد فاتك في العام الماضي ولكن عليك التفكير فيما يخبئه لك المستقبل.
3_عليك ان تعرف ان كل ما قد وصلت إليه انت وما وصل إليه زملاؤك انما هو قدر وقد كتب عليك قبل دخولك إلى الامتحانات منذ البدايه.
4_عدم التفكير وتأريق البال في كيفية الوصول للكليه وما إلى ذلك وإنما كل ما عليك هو التفكير في كيفية الاستذكار ولا شيء غير الاستذكار وتذكر قول الله تعالى ( إن الله لا يضيع عمل عامل منكم من ذكر أو انثى)صدق الله العظيم . او كما قال ( إن الله لا يضيع أجر من أحسن عملا) صدق الله العظيم.
5_إعلم ما حييت ان التوفيق في العمل لا يتوقف على الكليه التي ضممت إليها وإنما على حسب اجتهادك ثم اجتهادك فقط فكم من اطباء وكم من مهندسي بترول لم يعملوا وظلوا كما هم وكم من خريجي كليات لا اسم لها بل اصحاب مؤهلات متوسطه عملوا واصبحوا رجال اعمال كبار دون ذكر اسامي ومنهم من هم ( اشهر من نار ع العلم ).
نصائح اختيار الرغبات :انتبه جيدا اثناء اختيارك للرغبات التي قد تكون احد اسباب تحديد مستقبلك فيما بعد بإذن الله وخذها محمل الجد فلي صديق وهو هنا ع المنتدى احزنني كثيرا ما عرفته عنه قد فاتته كلية هندسة بترول على نصف درجه لأنه استهتر بها ف البدايه وقال انه لا يريدها فهي التي تركته وهو قد قابلته في جامعة القاهره من قبل وحالفني الحظ ان اتعرف عليه واراه لثاني مره هنا على المنتدى وهو (abdou93) واعتذر له عن ذكر اسمه ولكني احببت ذكر مثال ولكن الحق يذكر فإنه فتى مجتهد كما يكون الفتيان فله الله وكم تشرفت بمعرفته.

نصائح انتظار نتيجة التنسيق :عليك أن تكون قد حددت وجهتك في كافة الاحتمالات ولا تقلق ولا تتوتر حيث أنه يقال ( المكتوب ما منه هروب ) فما كتب لك سوف تجده مهما فعلت ولكن فقط عش حياتك دون أي خوف.
نصائح التحويل الإلكتروني :عليك قبل الدخول للتحويل أن تفهم أولا شروط التحويل لأني قد حاولت التحويل من خلاله ولكني حقا لم أفهم أي شيء فيجب عليك ان تفهم كل متطلباته وان تستفيد منه حق الاستفاده
نصائح التحويل الورقي :1_ قبل أي شيء قم بتجهيز كل ما تريد حتى تنهي كل شيء في يوم دون الذهاب والعوده وارهاق نفسك ولا تتحرك دون ان تتأكد ان باب القبول قد تم فتحه فالباب يظل مفتوحا لفتره طويله فلا تقلق.
2_عش حياتك ولا تفكر فيما إذا كنت ستقبل ام لا فهو نصيبك وفي الأغلب كل التحويلات الورقيه تقبل بإذن الله إذا ما تم تمريرها خلال مكتب التحويلات في الجامعه التي تريد التحويل إليها .
3_لا تذهب من اجل التحويل لجامعه فلا تذهب الى الجامعه التي اتاك التنسيق فيها بل يتم التحويل من الجامعه التي تود التحويل إليها.
4_عليك تجهيز :1 -صورة شهادة شهادة الميلاد
2-صورة شهادة تفصيل الدرجات
3-صورة بطاقة الترشيح
4-اثبات سكن في المحافظه التي تود ان تنتقل الى الجامعه الموجوده فيها وقد سبق على معاد اثبات السكن ستة أشهر ويكون اثبات السكن بإسمك او اسم والدك او اسم والدتك على ان يكون احد هذه الاشياء ( فاتورة كهرباء_فاتورة غاز طبيعي_فاتورة مياه_فاتورة هاتف أرضي).
نصائح التقديم :لا تخاف ولا تقلق من تأخر ظهور نتيجة التحويل ولا تخاف من قفل باب التقدم للكليات فقط عليك تجهيز اوراقك وانتظر والباب مفتوح حتى آخر لحظه فأبواب مصر تختلف عن ابواب الخوف فهي لا تغلق :D.

واخيرا آسف على الاطاله واتمنى للجميع دوام التوفيق وعسى ان تجدوا ثمار الثورة لكم االاعوام القادمه ولا تروا ما رأيناه من استهتاروعدم رغبه على العمل في المصالح الحكوميه وكأننا لم نقم بثورة من الاصل ولكن فعلا في ظل هذا الاستهتار علينا اكمال هذه الثورة التي لم نرى أيا من ثمارها حتى الآن. وشكرا وتقبلوا مروري
اخوكم احمد

[alsakr30]

نصائح النتيجة :ما حدث قد حدث فلا تندم على ما فات ولكن ابدا صفحة جديدة مليئة بالامل والتفائل وان شاء الله تجيب مجموع كبير وهذا يعتمد على تعبك فى المذاكرة والجدية فيها وانا بنصحك بالجد من الاول ومذاكرة كل شى فى وقتها ولا تؤجل اى حاجة ودى نصيحة من مجرب وكمان لا تقعد تحسب فى درجات الامتحان وتقعد تقول انا هجيب كام وانا لو جاوبت دى وتحسب فيها زى ما انا حسبت فيها كتير لغاية لما جانى احباط وياس وفى الاخر النتيجة طلعت اكتر ما كنت انا حاسب والحمد لله على كل شى
وعلشان كده بقولك لا تفكر فى الماضى ولكن استفيد من اخطائك منه وفكر فى المستقبل
وربنا يوفقكم يا شباب مصر الاعزاء .

نصائح اختيار الرغبات : بخصوص الرغبات اختار اللى انت بتحبه لانو ده مستقبلك انت مش مستقبل حد تانى يعنى فكرة كويس قبل ما تختار لانك بتختار طريقك اللى هتمشى عليه طول عمرك ولا تختار رغبة علشان فلان ولا فلان اختار اللى انت عايزه وكمان عايز اقولك مش عيب انك تتناقش مع العائلة فيها لانهم اقرب ناس ليك وكمان اكيد فيهم حد مرة بهذه التجربة وطبعا الراى الاخير لك يا صديقى.

نصائح انتظار نتيجة التنسيق : الفترة دى بالنسبة ليا كانت فترة صعبة جدا عليا لانها فترةواحدة فى العمر وهى دى فترة عمر الواحد كلها كانت اجمل فترة فى الحياة قبل الجامعية وفترة المسؤلية

نصائح التحويل الإلكتروني : التحويل الالكترونى او تقليل الاغتراب حسب تجربتى بيعتمد على الدرجات يعنى انا مثلا كان فرق الدرجات كبير حتى يحولنى الى الكلية القريبة منى وكمان بيقولو والله اعلم انو كان فى عطل فى النظام وعلشان كده قبل ناس وناس لا بس الحمد لله فى تحويل ورقى سوف اشرحه فى الفقرة القادمة

نصائح التحويل الورقي : بصوا يا حلوين التحويل ده بيكون لو لا قدر الله التحويل الالكترونى فشل لا قدر الله والتنسيق رشحك الى كلية بعيدة عنك علشان مجموعك فانت بتروح الى الكلية اللى عايز تحول ليها وتاخد معاك
-----------------------------------------------------
1- وصل نور او كهرباء او تليفون بس الافضل الكهرباء
2- صورة من شهادة النجاح بتعاتك
3- لو انت عملت تحويل الالكترونى وفشل لا قدر الله انت بتطبع بطاقة الترشيح الجديدة ودى بيكون عليها تاريخ جديد غير تاريخ بطاقة الترشيح الاولى لك
4- فلوس حسب الكلية يعنى فى حدود 150 الى 250 او 200 حسب الكلية
------------------------------------------------------
والكلية المناظرة حسب ما سمعت فى الكلية بيكون من غير مجموع والكلية المناظرة يعنى مثلا انت اترشحت الى حقوق القاهرة وانت فى اسيوط وعايز تحول الى حقوق اسيوط فدى تسمى كلية مناظرة يا حلوين

نصائح التقديم :
فى هذه الفترة صعبة على اللى بيسافر علشان يروح الكلية لسبب انو الواحد هيتحتاج انو يتاقلم على ناس جديدة وممكن تكون الجامعة دى بعيدة يعنى مش هتشوف اهلك اللى على غير كل فترة كبيرة بس ربنا يوفقنا يا شباب .
-----------------------------------------------------------------------------------
ومن هذا المنبر
احب ان اشكر كل من عمل على اقامة هذا الموقع الجميل الذى استفدت منه انا شخصيا واستفاد منه كثيرين واشكر الشباب اللى كانوا هنا فى منتدى التنسيق لانهم فعلا اصدقاء بجد وناس بتحب الخير فشكر لكل من فى هذا المنتدى الجميل الذى حفر اسمه فى قلبى
شكرا جزيل لكم
وشكرا على صاحب هذه الفكرة الجميلة والرائعة فشكرا له
وشكرا لكم
مع تحياتى لكم يا جيل مصر القادم
حفظ الله مصر وشعبها وشبابها الذى نور العالم بثورته البيضاء
ثورة 25 يناير

[alsakr30]

شكرا لك على هذا الموضوع الجميل والرائع يا غالى
بارك الله فيك ولكل من دخل هنا
شكرا لكم جزيل الشكر على هذا العمل الجميل والمفيد
شكرا

[Eye Lighting]

انا نفسى اعرف النتيجة النهائية للكلية الحربية امتى

بالله عليكم حد يفيدنى عشان انا مش مركز خالص ف كليتى بسبب الزفته دى

... انا ف حقوق انجليزى جامعة الاسكندرية بمجموع 92%

ياريت لو حد عنده اى معلومه عن النتيجة يقول.................؟

[Bahy_Ahmed]

الصفحة دي جميلة وفادتني اوي مشكورين جميعا

[toty61]

جزاك الله كل خير

[eljocker]

ياجماعه ارجوكم اى معلومات ع المدينه الجامعيه ونصايح ليهااا

[احمد السطوحى]

طيب هل ينفع لو مثلا واحد دخل اسنان لانه كاتبها الاول فى الرغبات انه يحول منها لصيدله ولا لا؟

[قمه منه]

شكراااااااااااااااااااا