طالبة فى تالته ثانوى وعايزة المساعده

[ايمى الادهم]

السلام عليكم ورحمه الله وبركاته
انا عضوة جديده هنا وبصراحه عجبنى هنا ترابط اسرتكم وانا طمعانه انكم تساعدونى
انا طالبه فى تالته ثانوى وجبت سته وتسعين ونص وكان نفسى فى طب ومش عارفه انا هجيبها وللا لا
انا كملت علوم عشان انا اللى وقعنى الرياضه عشان بتوتر منها والادبى صعب جدا بالنسبالى فاضطريت اكمل احياء على امل صيدله
المشكله ان انا خايفه جدا ولما باجى اذاكر بعيط على طول ومش عارفه انام وبالتالى مصدعه دايما حاسه ان انا فاشله بس انا مكنتش كدة بس خوفى من ان انا مش هقدراجب طب دة قالقنى بشده
ارجوكم ساعدونى

[احمد عبدالشكور]

إبنتى العزيزة ...
اجعلى لنفسك طريقا للمستقبل يملأه الأمل والتفاؤل
ثقى بالله
ذاكرى دروسك بجد واجتهاد
حاولى التركيز فى كل كلمة أثناء المذاكرة
المذاكرة أولا بأول
اجعلى لنفسك وقتا للراحة الذهنية والبدنية حتى تتمكنى من المداومة على استعادة النشاط أثناء المذاكرة
اعتنى جيدا بالنوم لفترات كافية
وفقك الله تعالى وبارك فيكى
وجعلك ابنة نافعة لأهلك ووطنك
تحياتى

[منه الله(منمن)]

كملى وسلمى امرك لله اصل ماهو مدام انتى مش بتحبى الرياضه اودامك حلين ياتحولى ادبى وده استحاله ولا رياضه تنفع يبقى علمى واعملى ال عليكى عشان تجيبى 100%كمان وان شاء الله تلحقى خلى املك ف ربنا كبير

[Dr.Nariman]

تقدري والله تلحقي طب اسنان او صيدلة كمان بس انتي شدي حيلك جدااااااااااااا وبالمستوى الرفيع كمان تقدري تقفلي

الخوف دا من الشيطان احسني الظن بالله وهو معاكي وهيعينك وافتكري ربنا مش بيضيع تعب حد

اتوكلي على الله ومراجعة تراكمية علطول وحلي كتير وربنا معاكي دايما

قبل ماتذاكري استغفري الله مية مرة واقرأي صفحة قرآن أو صلي ركعتين

وهتلاقي صدرك انشرح

[red-code]

بكل بساطه مجموعك حلو ماشاء الله يعنى

طيب ماتفكرى كده بتركيز شوفى لو انتى تقدرى تجيبى 99 فى 3 يبقى مجموعك الكلى 97.7 طيب زودى عليهم درجه ونص مستوى رفيع يبقى كام يبقى 99 وشويه يبقى ان شاء الله تلحقى طب وانتى مستريحه كمان ان شاء الله احسبيها مع نفسك شوفى الدرجات الى تقدرى انتى تجيبها يعنى مثلا لو هتجيبى فى الاحياء 50 والفيزياء 50 ........وكده يعنى احسبيهم وشوفى المجموع الكلى هتلاقى ان شاء الله تقدرى تلحقى وربنا معاكى ومعانا ان شاء الله

[highlight]

بصى يا ستى
والله انا كنت فى 2 ثانوى جايبة 96 وبردو اللى وقعنى الرياضة 4 درجات
وكملت علمى علوم و دخلت صيدلة
ووالله العظيم ليا صاحبتى جابت 96 فى 2 وفى 3 جابت 98.3 وحبت تدخل طب
ودخلت والله العظيم طب
وفى فواحدة كانت جايبة 96.8 وجابت فى 3 ........99% ودخلت صيدلة معاايا
يا رب اسمع انك فى طب او صيدلة
بالتوفيق ان شاء الله

[karimadel7]

انا جو الاكتئاب و اليئس ده مبيعجبنيش خالص علي فكرة
مجموعك جميل جدا و لو عايزه طب هتدخلي طب
انتي مجموعك حلو جدا جدا و تقدري تحسنيه في تالته و تدخلي اللي انتي عايزه
استعيذي بالله من الشيطان و اجتهدي و ربنا هيوفقك

[ahmed doula]

96.5%

اممممممم

لو افترضنا ان الطب 98.5%

يبقى عايزه 100.5% السنادى بالمستوى ودى درجه مش صعبه انك تجيبيها لو شاطره ومصممه تدخلى طب وتقدرى تضحى بحاجات كتير عشان تزاكرى كويس زى التلفزيون والكمبيوتر واللعب والخروج وكده يعنى انما لو حسيتى ان الموضوع مش فارق معاكى للدرجادى يبقى صعب تجيبى المجموع وبالذات السنادى لان الامتحانات هتيجى صعبه وده مش كلامى ده كلام الوزير بنفسه لان ببساطه كل كليات الطب بتاخد 5000 طالب كل سنه والسنادى اللى جايبين مجموعها 35000 طالب فقال لازم نجيب امتحانات صعبه عشان نققل العدد الكبير ده ونخلى العدد السنادى فى المستطاع اللى الكليات تقدر تستحمله

يعنى شدى حيلك وشوفى امكانياتك ايه !!!