أسال ما تريد عن طب عين شمس

[shofolofo]

السلام عليكم،

و أنا بأبحث في Google عن موقع مدرسة المتفوقين الثانوي بعين شمس - مدرستي القديمة - وجدت موقع الثانوية بالصدفة ... أيامنا كان الأنترنت ينحصر في شريط عمرو دياب ( انا عايش و مش عايش ) و البوم انريكي جلاسييس ... انبسطت جدا ان شباب الثانوية " متنور " اكتر من ايامنا بكتير، على فكرة انا طالب في الفرقة السادسة بطب عين شمس دلوقتي بس ذكريات ثانوي لم تنقص بعد 6 سنوات من تركها ...

أما بعد؛
أنا مدير في موقع لكلية طب عين شمس حصريا مش عارف ايه سياسة وضع وصلات المواقع هنا بس احتياطا مش حاضع اسم الموقع .. بس بدلا منه ممكن اللي محتاج اي معلومة او إجابة أي سؤال في أي حاجة متعلقة بطب عين شمس بدءا من المصاريف و اوراق الالتحاق و النتيجة و اشتراك المترو و انتهاء بالمعادلات و الزمالات و الاكاديمية العسكرية و الشرطة أنا في الخدمة مرورا بالأسر و الأمن و وورق المذاكرة

عارف ان ده مش موسم الالتحاق بالكلية بس أديني حطيت الموضوع و خلاص في حالة الرغبة في اي مساعدة

شكرا..

[Dr-Mahmoud Ehab]

تحياتي علي المجهود الرائع
وبالتوفيق يارب
وعلي فكرة يمنع وضع الوصلات في المواضيع إلا بعد الإستئذان من الإدارة أولا
وإلا سوف يتعرض موضعك للحذف
وسؤالي الأول ليك
بعد الإنتهاء إزاي تلتحق بالإكاديمية سواء شرطة أو حربية وأيهما أفضل

[shofolofo]

دي إجابة خدتها كوبي و بايست .. بخصوص الاكاديمية الطبية العسكرية بتاعت الجيش


يتم الإعلان عن قبول دفعة جديدة من الأطباء " بشرى ـ أسنان" والصيادلة للالتحاق بالكلية الحربية كل ستة شهور .. مرتين في السنة .. ممكن ترسب طبيا مثلا و تقدم تاني في الميعاد التالي

1. اللياقة الطبية من اهم الشروط
2. التقدير جيد على الأقل ( في اشاعة بتقول انهم بدأوا يقبلوا بالمقبول عشان احتياجهم )
3. بالنسبة للأناث لا يقبل المتزوجات او من سبق لهم الزواج من قبل .. بالنسبة للذكور هذا الشرط ملغي منذ فترة
4. بالنسبة للاناث فلا يسمح بلبس الحجاب اثناء الدراسة كما تجبر على ارتداء جيبة تحت الركبة بمسافة قصيرة

• بتقعد 6 شهور في الأكاديمية شغل فيزيائي جدا .. لازم 3 قفزات بالمظلة .. لازم توصل لسرعة معينة في الجري ..
• خلال الست شهور في مرتب بس بتقبضه في الاخر بعد ما تخلص و اللي تقريبا 1400 في الشهر خلال دراستك و بيفضل كده في رتبة ملازم أول بعد التخرج

الرغبات

• بيتم كتابة رغبات الاماكن اللي عايز تشتغل فيها .. مثال ( المنطقة المركزية - العاصمة - و الجيش الثاني - المنصورة و دمياط .. الخ - و الجيش الثالث منطقة القناة و المنطقة الشمالية و اللي هي مرسى مطروح و اسكندرية الخ ..

المعاهد

• بعد الست شهور بتروح 3 شهور المعاهد و بيكون في كل يوم الصبح طابور لياقة بدنية و اليوم بيستمر لغاية 3 عصرا و بعدين بيروح البيت عادي و يوم الخميس اجازة و المرتب زي ما هو في الثلاث شهور 1400 جنيه في الشهر

النيابة

حسب الترتيب التراكمي بتاعك في الكلية بتختار النيابة بتاعتك في العمل طبيب مقيم في التخصص بإحدى مستشفيات القوات المسلحة التعليمية مثل " المعادي ـ كوبري القبة ـ غمرة ـ الحلمية ـ مصطفي ـ كامل بالإسكندرية".









تحضير الدراسات العليا

• بعد السنة اللي فاتت دي بيكون في سنتين تفرغ لتحضير الماجيستير .. بتشتغل 3 ايام بس في الاسبوع و بيكون في احد الجامعات القاهرة و عين شمس و الاسكندرية بس ..
• بعد السنتين دول بتبقى اتخصصت
• كل من حصل على درجة الماجستير يحق له التسجيل لدرجة الدكتوراه في مجال التخصص عن طريق الأكاديمية الطبية العسكرية ومن خلال الجامعات المصرية.

التشكيلات

• بعد التخصص بتروح سنة و نصف لما يسمى بالتشكيل في اي مكان الجيش محتاجك فيه و دي بترجع فيها تاني للحياة العسكرية و بعدها بترجع تاني للمستشفى بس حسب الرغبات اللي انت كنت كتبتها بعد الست شهور الاولانيين ..
• بعد اربع سنين حتروح تاني للتشكيل لمدة سنة و نص و بعدين ترجع تاني لشغلك في المستشفى و هكذا كل 4 سنين .. و طبعا في ترقية كل 4 سنين في شهر يناير و يونيو و يفضل كده لغاية رتبة عقيد
• التشكيل سمعته انه حياة في غاية القسوة و الملل .. حياة صحراوية بحتة

البعثات

• تقريبا من احسن مميزات الجيش .. بيبعتك بعثة لبريطانيا او المانيا او فرنسا ( تقريبا المعظم بيروحها ) او اي دولة متفوقة في التخصص بتاعك عشان تحضر ماجيستير .. البعثة بتبقى 6 شهور و بتاخد مبلغ لا بأس به عن اليوم
• يعقد الامتحان زمالة كل عام وفي حالة الحصول على الجزء الأول من الزمالة ودرجة الماجستير يتم إيفاد الطبيب في بعثة للحصول على الجزء الثاني.
• بخصوص الدكتوراة ممكن تطلع من القلة المحظوظة اللي تاخد بعثة لامريكا او دولة متقدمة اخرى عشان تحضر هناك و دول بيبقوا كريمة الكريمة ده لو الجيش محتاج تخصصك النادر .. زي طب الطيران .

الترقيات و المميزات

• يعامل الضابط الطبيب نفس معاملة الضابط المتخرج من الكليات العسكرية ويتمتع بكافة الإمتيازات التي تمنح للضباط زي العلاج له و اسرته في المستشفيات العسكرية و نوادي الجيش .. الخ
• يعين الطبيب في البداية برتبة ملازم أول مدة 6 أشهر ثم يرقى إلى درجة نقيب ثم يتدرج بعد ذلك في المناصب العسكرية مع باقي ضباط الجيش لان الضباط المتخصصين بيترقوا بطريقة خاصة و هي انهم بيعاملوا معاملة دفعة الثانوي العام بتاعهم اللي دخلت حربية .. يعني بيعتبروا السبع سنين طب .. 7 سنين منهم 4 حربية و 3 خدمة .. فبتترقى نسبيا بسرعة و بعد كده بتاخد السرعة العادية
• يمنح الطبيب علاوات على كل درجة علمية يحصل عليها كما يتحمل الجيش كافة النفقات اللازمة للحصول على الدرجات العلمية بما فيها إيفاده للخارج ويستمر مرتب الضابط حتى أثناء التفرغ الكامل للدراسة.

العيوب

• الحياة الميري للمعظم هي حياة صعبة جدا لان طاعة الامر حتى لو غلط شيء مقدس و ان شخص يتحكم فيك بقدرة كبيرة شيء مش سهل عالكل
• مش في كل الاحوال تعرف تفتح عيادة او تشتغل في مستشفى خاص و خصوصا لو بتشتغل في مكان بعيد
• ممكن تشتغل في مستشفى سيئة او متعرفش تتعلم كويس هناك
• في فترة التشكيلات ممكن تروح حتة بعيدة قوي في الصحراء او تروح مستفيات ميدانية تحت الارض او تروح وحدات طبية عادية قريب من مكانك . انت و واسط.. حظك !!
• مبقوش يدوا للظباط الاكاديمين زي الاطباء شقق الجيش

ترك الخدمة

1. من أراد ترك الخدمة يسمح له بتقديم طلب بذلك بعد 7 سنوات من الحصول على آخر درجة علمية، أو من تاريخ التصديق على السف في البعثة" وينظر في طلبه بالقبول أو الرفض.

[shofolofo]

بخصوص أكاديمية الشرطة



الاعلان عن فتح ابواب القبول

• يتم الإعلان عن الالتحاق بكلية الضباط المتخصصين كل عام في الجرائد.
• يتم قبول الأطباء بكلية الضباط المتخصصين

شروط القبول

• نفس شروط القبول في كلية الشرطة العادية فيما عدا الواسطة
• يشترط ان قرايبك محدش فيهم يكون له سوابق او واخد حكم
• كشف طبي مش جامد قوي زي بتاع أكاديمية الجيش

مدة الأكاديمية

• سنة - 9 شهور تحديدا - ( الجيش 6 شهور ) .
• تقديرك في الاكاديمية هو اللي بيحدد مكان تعيينك ( في الجيش التراكمي بتاع طب ) .

التخرج

• بتتخرج برتبة ملازم بنجمتين و تقعد شهر و تبقى نقيب ( باقدمية دفعة الثانوي بتاعتك ) .

التوزيع

• بيتقسم قسمين بعد التخرج .. اما سجون او خدمات ( مستشفيات الشرطة ) .
• المجموع الاعلى بيروح الخدمات بينما الاقل بيروح سجون .

التخصص

• لو رحت خدمات بتتخصص حسب احتياج الشرطة و حسب مجموعك .. زي النيابات كده .
• لو رحت سجون بتتخصص حسب مزاجك
• يقال ان التعليم افضل بكثير في الخدمات و انك غالبا بتعدي في التحضير
• لك يومين في الاسبوع اجازة تفرغ لتحضير الدراسات العليا

المرتبات

مفيش معلومة محددة عنها بس بيقال انها كويسة و لكن اقل من بتاعت الحربية











عامة ... الشرطة نفوذ مدني قوي جدا زي مانت عارف يضاف اليه هيبة الطبيب ....
بينما الجيش قدرة مادية افضل و تعليم افضل و خدمات افضل و احترام من نفسك و زوجتك و جيرانك اكتر ...

[Dr-Mahmoud Ehab]

تسلم أيدك علي الرد

[hawass007]

أهلا بيك يا شوفو و منور ف كل منتدى ان شاء الله

[Princess Dalia]

سؤآلي هو

ازاي اعادل شهادة الثانوية الكندي بالمصري ..

نفس الدرجات و لا النظام مختلف ؟

[hawass007]

مش عارف حد يجاوب

[كامبكامب]

ميعاد التقديم فى الكلية لسنه اولى امتى

[semsema.semsem]

المشاركة الأصلية كتبت بواسطة كامبكامب

ميعاد التقديم فى الكلية لسنه اولى امتى

التقديم إتأجل ولسه ما إتحددش الميعاد بالظبط
لو عرفت جديد هبلغ حضرتك

[semsema.semsem]

ممنوع وضع روابط

[احمدومحمد]

هل طب عين شمس هذا العام سوف ينزل الي 98في المائة

[ahmed khalid yehya]

اتمني منك الرد انا الان في تالتة ثانوي علمي علوم بمجموع 98% في تانية المهم ربنا يسهل و احاول اعوض و ادخل بأذن الله طب بشري انا كنت عاوز استفسر علي حاجتين مهمين بالنسبة اي :
الاولي :بأمانة ايهما الافضل القصر العيني و لا عين شمس في الدراسة يعني الدكاترة و كدا
الثانية:هل من الممكن بعد التخرج الاتحاق بالاكادمية الطبية العسكرية دي و لا بتبقي اثناء الدراسة و لا ايه معلش اصل اول مرة اعرف الموضوع دا و هل لها اختبارات لياقة زي الفنية العسكرية كدا (طول و وزن و كدا ....) اتمنمي ردك و ادعو لي