[ قــــــــلب اللــــــــــهب ] رواية أكثر من رآئـعة !

[مسلمة متفائلة]

إنتقيتُ لكم اليوم رواية أكثر من رائعة ..
للكاتبة الأستاذة / سامية أحمد

بعنوان

(((( قــــلـــب اللــــهــــب ))))

جرت أحداث هذه القصه فى القرن الجديد
محمد ............ محمد............محمد............ محمد
اطلع من ورا الستاره .......أنى عارف انك هنه
خرج الولد الصغير الهارب من بيت أبيه خوفا من بطشه الى
بيت جده الموجود فى نفس الحى فى احدى قرى الشرقيه
والذى تجاوز عمره الثامنه ببضعة أشهر من وراء الستاره :
جدى ..........خبينى يا جدى
ضحك الجد بحنان :انت مش هاتبطل شقاوه يا محمد.....
يا ويلك من أبوك....عملت ايه المره دى؟
يلقى محمد بنفسه فى حضن جده : والله ما عملت حاجه
الجد بحنان : كده طيب ....مانت كل مره مابتعملش حاجه
ابدا
الله الوكيل أبوك هاينجن من عمايلك
يلا نتغدى الأول ..زمان ستك حضرت الغدا ....وبعدين
نشوف أنهى عمله سوده عملتها
بعد الغداء جلس الجد مع حفيده فى حجرة القعاد فى انتظار
فنجان القهوه اليومى الذى لا يشربه الا من يد الجده الحنون
ها ايه رأيك بقى ..أكملك حدوتة السلطان نعمان؟
محمد : لا ..عاوز حدوته تانيه
الجد : هه! حدوتة ايه ؟
أشار محمد بإصبعه الى صورة شاب فى أوائل العشرينات
وسيم ذو شعر بنى ناعم وعينين خضراوين وملامح أقرب
للغربيه منها للشرقيه
محمد : حدوتة ده
الجد : يوه يا محمد ! مانى حكيتهالك ميت مره
محمد بعناد : ماليش دعوه أنى عاوز الحدوته دى
دخلت الجده حامله صينية عليها فنجان القهوه : أنى
هاحكيهالك يا محمد
وضعت الصينيه على المنضده أمام الجد ووقفت تتأمل ملامح
الشاب الذى فىالصوره وقالت بحنان جارف :
دى حكاية محمد !
ثم غاصت نظراتها فى العينين الخضراوين المتقدتين ببريق
شديد يزيده انعكاس الضوء عليه توهجا
كما لو كانتا جمرتين مشتعلتين ......من ...قلب ...اللهب




تابعونا .. لكي نعرف قصة محمد !

[مسلمة متفائلة]

(( 1 ))

كانت منهمكه فى تحضير طعام الإفطار
انتفضت بشده مطلقه شهقة فزع ...عندما نزل فوق رأسها
كالسهم...قفزا من سلم السطوح فى وسط الدار القديمه
صباح الخير يام محمد
الأم : بسم الله الرحمن الرحيم .......
كده يا محمد ؟ جعزتنى يا وله
محمد بمرح : بعد الشر عليكى يا ست الكل (يقبل
يدها)...أجيب لك طاسة الخضه؟
الأم : فايق ورايق ؟
دا جدك هايطينها على دماغك..وامبارح قلب عليك البلد
كلها..كنت فين امبارح يا وله
محمد : مانى قايلك امبارح يامه انى رايح الزقازيق
ياسلام يامه لو كنت جيتى معايه ...وشوفتى المحافظ وهو
بيسلمنى مداليه البطوله
الأم : مدالية ايه يا عين أمك !
محمد : بطولة المحافظه يامه ابنك بطل المحافظه فى الكنغ
فو
الأم : آه لو جدك عرف !
محمد : لااا وانى مجنون أقوله..الله الوكيل ده كان يحدفنى
فى الترعه ....هو كان بيدور عليا ليه امبارح ؟
الأم : عشان تروح معاه دار الخلايفه
محمد : ليه ؟
الأم : عشان يخطب لك زينب بنت سماعين خليفه
محمد : (بطريقه تمثيليه جدا ) ايه ....لا......لا....
كده يامه ! عاوزين تخلصوا منى !
تعالالى يابا ....هايجوزونىىىىىىىى
الأم : يا وله عاوزين نفرح بيك
محمد : لا....انتوا عاوزين تخلصوا منى ....مش عاوزين
تصرفوا على علامى ....(يندمج فى الفيلم الذى يمثله)
أنى أول ما هاشوف جدى هاقوله أنا......



يلتفت فيفاجأ بجده واقف ينظر اليه بغضب
يكمل بمرح خائف : أنا المصرى.........كريم ال.....
يعتدل بجديه : احم ........صباح الخير يا جدى
الجد الغاضب : صباحك زى وشك ........طول عمرى
باقول عليك أراجوز ومشخصاتى ....من وانت عيل بتلعب
مع العيال فى الحاره كنت تعملهم أراجوز عشان تضحكهم
عمرك ما هاتبقى راجل
هربت امبارح من البلد كلها عشان ما تتجوزش؟
محمد بخوف واحترام : ياااا ...جدى ...انى عاوز أكمل
علامى
الجد بغضب : ياخى ان شالله ما عنك اتجوزت .والله مانت
فالح ......علام ايه يا وله .... بقى انت وش علام
مش كفايه العمله السوده اللى عملتها ‍‍‍‍‍‍‍‍‍‍‍‍‍‍‍‍‍‍‍؟
فيه حد فى الدنيه يجيب 90 فى الميه ويدخل الآداب ؟
امال الطب عملوه لمين يا وله ؟ماترد .....
لكن هاترد تقول ايه ؟أحسن لك تسكت وتحط على خيبتك جله
تعالى هنا يا وله (يشده من شعره ليريه مجموعه من الصور
معلقه على الحائط) بص للرجاله دول ...بص واتعلم منهم
محمد أى ....أى .......أى .....أىىىىىىى
شفتهم .شفتهم 80 مره يا جدى ...وعارف حكايتهم واحد
واحد
الجد بغضب : لكن ماتعلمتش منهم حاجه ...هاتفضل طول
عمرك عيل ...عمرك ما هاتبقى راجل
يخرج بغضب متكئ على عصاه : جتكوا نيله على سنينكوا
السوده عيال ناقصه ربايه


الأم : كده زعلت جدك ؟ يعنى كان فيها ايه لما تدخل كليه
قريبه بدل الغربه ياضنايه ؟
محمد : يامه انى عاوز اشوف مصر...ام الدنيا
يسرح مع نفسه فى الأحلام ........
يمكن يوسف شاهين يشوفنى ويكتشفنى ..يا سلام يا ولاه
دانى ساعتها ها مثل فى السيما.............الله الوكيل
.هابقى اجدع من حسين عبد العزيز ومحمود فهمى
الأم بغضب : بينك اتخبط فى نافوخك ...يبقى جدك عنده
حق .........والله مانت فالح ‍‍‍‍‍‍‍‍‍‍‍‍
_________________

تابعونا...

[مسلمة متفائلة]

((2))
:: أيام الجامعه ::


ضج مسرح الجامعه بالتصفيق الشديد للعرض المسرحى
الرائع الذى قدمه طلبة الجامعه ومع دخول محمد لتحية
الجمهور ازداد التصفيق بشده وصحبه صفير وعبارات اعجاب
انظلقت من جميع أنحاء المسرح
بعد العرض ............
فوزى صديق محمد : ايه ده,ايه يابنى ده
دانت الليله بدعت, ده ما فيش حد الا وعجبه دورك ... .مع
انه دور شرير, دور واحد يهودى
محمد بثقه : طبعا يابنى, دى مسألة موهبه وقدرات, مش
مهم الدور ايه, المهم بتأديه ازاى.
فوزى : و الدور ده محدش يقدر يعمله زيك
محمد :.مفيش حد فى الجامعه كلها يعرف ينطق اللغه زيى
فوزى : أيوه ...وكل ما يجيلهم دور واحد يهودى فى
مسرحيه محدش يمثله غيرك, بقيت أشهر يهودى فى الجامعه
محمد : ده اسمه التقمص
فوزى : أيوه يا خويا مانت رحت خيبت نفسك ودخلتلى قسم
لغات شرقيه ــ عبرى ..
والمصيبه, انك الأول على الكليه 3سنين
دا أنا نفسى أسألك سؤال حارقنى من زمان ..... بعد ما
تتخرج هاتشتغل ايه بالعبرى بتاعك ده ؟
محمد : هاشتغل واحد يهودى
يضحك الإثنان معا : هاهاهاهاهاهاها

[مسلمة متفائلة]

((3))
:: الرحله ::

ينزل الشباب من الحافله لمشاهده معالم سيناء وينتشروا فى
أرجاء المكان مستمتعين بالرحله
فوزى ينادى بأعلى صوته : محمد ....محماااااااااااد
يا رجب ..مشفتش محمد ....ايه محدش شاف محمد ؟
يظل يبحث حتى وصل الى محمد الواقف فى الشمس شارد
تماما واحدى ساقيه تستند على صخره والأخرى تغوص فى
رمال سيناء
فوزى : ايه يابنى انت دايما كده مدوخنى وراك .افتكرتك تهت
محمد : هه...بتقول حاجه
فوزى : لااااااااا دانت مش هنا خالص ...سرحان فى ايه ؟؟
محمد دون أن يحول عينيه عن السور السلكى الذى يبعد عنه
مئآت الأمتار : فى اللى ورا السور
ياعم احنا مالنا ومالهم, ماتخلينا فى اللى قدام السور أحسن
دا الستات هنا ايه ..قشطه
بالحق, البت داليا سألتنى عنك امبارح, انت كنت فين ؟
محمد : كنت باخد درس خصوصى
فوزى : درس خصوصى ؟فين ؟
محمد : فى السفاره
فوزى : سفارة ايه ؟
محمد : لا دى حاجات كبيره عليك, مش للى فى سنك
فوزى : والبت داليا ؟ دى سألتنى عليك كذا مره
محمد : يا عم أنا فاضيلها ؟ أنا ورايا مذاكره
داحنا فى سنه رابعه
فوزى : طول عمرك فى حكاية البنات دى بالذات قفل
مصوجر ...
والله مانت فالح
يالله .. يالله لاحسن الأتوبيس هايمشى
يسير محمد مع صديقه بضعة خطوات, ثم يلتفت ليلقى نظره
أخيره على السور, وتتوهج عينيه الخضراوين ببريق
عجيب...وكأنما اشتعل فيهما اللهب
فوزى يشده : يالله يابنى المشرف بينادى


((4))
::.الأم.::

قضى محمد أجازة نصف العام فى بيت جده ولم يخرج للتنزه
فى أى مكان على غير عادته حتى شارفت الأجازه على
الإنتهاء
الأم : مالك يا ضنايا ؟
انت متغير بقالك مده وانى مش عاوزه أكلمك
محمد : عشان قاعد فى البيت يعنى, أبدا يامه دانى بس
نفسى أقعد معاكى انتى وجدى, أصلكوا بتوحشونى قوى وانى
لوحدى هناك فى مصر
الأم بحنان : يا ضنايا يابنى..تحب اجى اقعد معاك فى مصر؟
محمد : ماينفعش يامه انى قاعد مع اصحابى, وبعدين هانت,
كلها كام شهر وتلاقينى عندك هنا على طول
حضرتيلى الشنطه يامه ؟
الأم : طبعا يا عين أمك, وفيها شرز تقيل زى ما طلبت
ولاونى مش عارفه لازمته ايه ؟ دا الشتا قرب يخلص
محمد : لا ماهى الدنيا ساعات بتبرد بالليل فى مصر
وقف محمد على باب البيت مودعا أمه مقبلا يديها
محمد :ادعيلى يامه ...ادعيلى جامد قوى
الأم تقول والدموع تحاول أن تهرب من عينيها :
قلبى بيدعيلك فى كل صلاه يا قلب أمك
محمد : لو غبت عليكى ماتقلقيش عليا.أصلى ناوى أجيبلك
هديه حلوه قوى معايا وانى راجع.أحلى هديه فى الدنيا
الأم وقد غلبتها دموعها : أنى هديتى انك تاخد بالك من
صحتك ومذاكرتك وترجعلى بسرعه
محمد : ماتقلقيش عليا يامه, هارجعلك ان شاء الله
هارجعلك بسرعه
ودعته الأم وهى تحاول التغلب على ذلك الشعور الغريب
بالإنقباض فى صدرها وحاولت أن تطمئن نفسها
سافر محمد الى القاهره .........
بعد عدة أيام رن جرس التليفون فى منزل الحاج طه حسن
الشرقاوى
ردت الأم على التليفون, وكان المتحدث فوزى
أيوه يا خالتى أم محمد ...محمد عندك ؟ عاوز أكلمه
الأم بلوعه : ايه! دا سافر مصر من كام يوم هو موصلش
عندك
فوزى مذعورا : لا ماوصلش, راح فين المجنون ده ؟
دى الجامعه كلها مقلوبه عليه, بكره بطولة الكنغ فو
والمدرب هايتجنن
الأم تبعد التليفون بحده شديده وتنظر الى احدى الصور
المعلقه على الجدار, تنظر اليها نظره غريبه وكأنما تطلب
منها المساعدة..!

___________________
تابعونــا...

[مسلمة متفائلة]

(5)
:: التيه ::

أعاد محمد النظر فى الخريطه للمره العشرين ثم نظر الى
البوصله ....كان يحاول تحديد موقعه بدقه
لقد عبر السور خلسه فى الليل أى من عدة ساعات مرت اذا
لابد أن يكون فى رفح
لكن ............................
انتابه شعور قوى أن هناك شئ خطأ
ظل يرتب أوراقه وخرائطه وأعياه البحث عن أى علامات فى
الطريق
كان شعوره أن هناك شئ خطأ يزداد ويزداد
حتى تأكد حدسه بما لا يدع مجالا للشك
تأكد مع صوت سياره قادم يشق الصحراء
اختبأ بسرعه حتى يتبين ما هو الشئ القادم
أطل بعينيه من مخبأه ليتأكد ظنه عندما رأى السياره تحمل
جنود يضعون شارات تحمل شكل مميز لنجمه زرقاء
اعتقد محمد زمنا طويلا أن الخوف هو ذلك الشعور الذى
ينتابه كلما غضب منه جده
لكنه أدرك أخيرا ومن خلال تجربه حقيقيه أن هناك فرق كبير
بين الخوف والهيبه
وكانت هذه هى أول تجربه له مع الخوف
تسارعت دقات قلبه, وارتجفت أوصاله
وجرى عرقه كالأنهار ......
وبدأ يسأل نفسه
يا وقعتك السوده يا محمد
ياترى لو العربيه وقفت هنا هايحصل ايه
ياترى لوحد منهم لمحك هايعملوا فيك ايه
بدأ يقوى من عزيمته
جرى ايه يله, ما تسترجل ....هى موته ولاأكتر
هاتعيط من أولها؟
لكن ما كان يخاف منه لم يحدث ابدا ...وسارت السياره فى
طريقها حتى توارت عن الأنظار
التقط محمد أنفاسه ........وبدأ يدرس أبعاد الموقف
لقد أخطأ فقط فى بضعة كيلوا مترات
بضعة كيلوا مترات ألقته بعيدا عن هدفه ... فى قلب الصحراء
فى مكان مجهول , لايدرى من أين يأتى الخطر
أخذ يردد آيات وأدعية الكرب كما علمته أمه
أمسك بالخريطه للمره ال............لم يعد يستطيع العد
قال بغيظ : حتى الخرايط مغشوشه ؟ مزق الخريطه بمنتهى
الغيظ
وبعدين يا محمد ؟هاتعمل ايه دلوقتى ؟
........ظل يفكر حتى غابت الشمس وأظلمت الدنيا
تدثر بالبلوفر الصوف الذى وضعته أمه مع الملابس
لكن هيهات أن يدفع عنه البرد ..كان البرد قارس
ولم يكن باستطاعته أن يشعل نار ...فهو لا يعرف أين هو
بالتحديد ولا من الذى يمكن أن يرى ضوء النار
قضى الليل مستيقظا من شدة البرد والخوف
أشرقت الشمس أخيرا......وبعد أن صلى الفجر
استسلم لقدر الله
بدأ ينظم أفكاره..أخرج كل أغراضه من الحقيبه وبدأ يفتشها
بمنتهى الدقه والتأنى وكلما وجد علامه أو ورقه أو كلمه تدل
على هويته مزقها ودفنها فى الصحراء بعنايه
بعدها خلع ملابسه قطعة قطعه وفتشها مثل الأغراض
مر وقت طويل قبل أن ينتهى من مهمته
توكل على الله...............
وبدأ يسير فى الصحراء على غير هدى...يحاول أن يجد أى
علامه
بدأ الطعام ينفذ والماء يقل
ولا يلوح له أى أمل فى الأفق
مر يوم ..........والثانى ..............والثالث........
وكلما نفذ منه شئ يدفنه فى الرمال حتى لايجده أحد
انتهى الطعام والماء تماما......................
لكنه لم يجد بدا من السير والا.فسوف يموت فى الصحراء
تخفف من حمله ودفن حقيبته وأغراضه, ثم الساعه, ثم
النظاره الشمسيه..........
لم يبق معه شئ
بدأ يجف جسده ...خلع قميصه ووضعه على رأسه ليحميه
من الشمس
بدأ جسمه ينهار من التعب والإعياء والعطش والجوع ...
.سقط القميص وهو يجر نفسه جرا
سقط على الأرض, ولاح له شبح الهلاك ......
انهارت مقاومته تماما
خيل اليه انه يسمع صوت سياره قادم من بعييييييييد
ضاع من عينيه ضوء النهار....وسقط فى قاع بئر مظلم

___________________
تابعونا ...