نصائح للجدد+موقع المناهج+آلة كاسيو..هديه!!

الأمير الرقمى · #1 28-08-2009, 11:14 AM

السلام عليكم ياشباب....
وألف مبروك لكل اللى اتحقق حلمه ودخل كلية الهندسه....

على فكره أنا خريج كلية الهندسه قسم كهرباء وأحب تسمعوا منى النصائح دى لأنها هتنفعكوا جامد (عن خبره

)

1-طبعا المذاكره من أول يوم عشان فيه حاجه اسمها الميدتيرم ,,, يعنى التيرم الواحد فيه امتحانين...فعشان متزنقش نفسك...لازم تذاكر من أول يوم.

2- سيبك من الكورسات والكلام الفاضى ده...أهم حاجه المحاضرات والسكاشن...خلاص احنا كبرنا على موضوع الدروس

.

3- لازم تبيض محاضراتك أول بأول....يعنى نكش الفراخ

اللى بتكتبه ورا الدكتور...لازم تلخصه وتظبطه لما تروح يوم بيوم

4-هات آله حاسبه كويسه من كاسيو ممكن fx570 تقريبا سعرها من سنه يعملله 120 جنيه..هتنجز معاك كتير...
شوف الآله دى كده....لو عرفت تجيب زيها يبقى انت جبت كمبيوتر مش مجرد آله حاسبه

5-ملاحظه هامه:أصعب وأتقل سنه هى إعدادى هندسه....بعد كده لما تتخصص هتلاقى العمليه سهله خالص

6-المناهج اللى بتدرسها هتلاقيها تقريبا متشابهه مع المناهج اللى فى كل الدنيا...عشان كده النت هينفعك كتير
أنا عن نفسى اعتمادى الكلى على مناهج السعوديه لأنها بالعربى وسهله و بتفهمنى المناهج اللى احنا بناخدها بالانجليزى... وده الموقع اللى عليه الكتب الهندسيه باللغة العربيه

عموما أنا عندى كلام لسه كتييييييير....لو حد عنده أى استفسار ممكن يكتبه وانا أرد عليه

جعلتني مهندسا · #2 28-08-2009, 01:10 PM

متميز والى الأمام

منتظرينك

جعلتني مهندسا · #3 28-08-2009, 01:15 PM

طب دلوقتي أنا لم آجي أذاكر

أذاكر منين بالضبط

الأمير الرقمى · #4 28-08-2009, 01:33 PM

اقتباس:

المشاركة الأصلية كتبت بواسطة جعلتني مهندسا

طب دلوقتي أنا لم آجي أذاكر

أذاكر منين بالضبط

بص يابشمهندس....مصادر المذاكره ممكن تقسمها كالتالى:

1-مصادر أساسيه:

وهى المصادر التى لابد وحتما تذاكر منها لأن الامتحان مش هيخرج منها وهى :

*كتاب الماده+
*المحاضرات اللى انت كاتبها+
*السكاشن اللى هتاخدها+
*ورق الكورسات اللى هتصوره من زملاتك اللى بياخدوا كورسات.

ومادام أنا قلتلك انها أـساسيه....يبقى لو فيه محاضره أو سكشن فاتك....لازم تصوره أو تنقله من واحد زميلك....بجد متستهترش بالحاجات الصغيره دى...والله بتفرق...صدقنى.

_______________________________

2-مصادر اضافيه:

وهى المصادر اللى ممكن متحتجلهاش قوى...بس لو بتطمح للجيد جدا أو الامتياز...يبقى لازم تستخدمها وهى:

*المراجع الخارجيه (استشير الدكتور عن أفضل مرجع خارجى لمادته)+
*الانترنت(هشرح ان شاء الله بعض المواقع اللى ملكش غنى عنها فى وقت لاحق)

ومن هنا يجب تغير نظرتك للانترنت....النت مش وسيله للداون لود للجيمز و الأغانى....النت كنز غنى بالمعلومات الشيقه...وصدقنى....فيه بعض المواد فهمتها بالكامل أو بعض النظريات اللى درسناها عن طريق مواقع وكتب نزلتها وقريتها .
_______________________________

فى انتظار تساؤلاتكم يا شباب المهندسين....مع تحياتى

EnG.Mohammed · #5 28-08-2009, 01:34 PM

شكرراااااااا على المجهود العظيم ده ياراجل

califora · #6 28-08-2009, 01:57 PM

هوانت هندسة اية

Eng M-Adel · #7 28-08-2009, 01:58 PM

موضوع جميل جدا ... قولنا يا بشمهندس عن الأنترنت وازاي كنت بتستخدمه وفي ايه وايه رأيك لو الواحد اخد كورس انجليزي !!
وجزاك الله كل خير

الأمير الرقمى · #8 28-08-2009, 02:13 PM

اقتباس:

المشاركة الأصلية كتبت بواسطة califora

هوانت هندسة اية

الزقازيق

اقتباس:

المشاركة الأصلية كتبت بواسطة eng m-adel

موضوع جميل جدا ... قولنا يا بشمهندس عن الأنترنت وازاي كنت بتستخدمه وفي ايه وايه رأيك لو الواحد اخد كورس انجليزي !!
وجزاك الله كل خير

بالنسبة لموضوع كورس الانجليزى ده

*فلو انت هتخده عشان فاكر ان الدراسه بالنجليزى صعبه ومعقده ومحتاجه جهابذه فى اللغه...فمتحملش هم....الانجليزى فى الدراسه هو انجليزى مصطلحات وليس جملا تحتوى زمن مضارع وتام ومبنى للمجهول وكلام من ده....الموضوع كله محتاج شهر بس فى الكليه وهتلاقى نفسك (لبلب)...متقلقش

*أما إذا كنت محتاج اثراء معرفتك اللغويه الانجليزيه...فمفيش مشاكل....إيدى على كتفك....واتوكل على الله...أكيد هتستفيد....بس لو الكورس هيطول...بلاش منه عشان ميشغلكش عن الدراسه لأن دلوقتى بقى عندك أولويات.

بالنسبة للنت:

معلش اصبر عليا شويا...تابع بس الموضوع ...وان شاء الله هكتب عنه قريب

___________
بالتوفيق ياشباب....مع تحيات الأمير الرقمى

Its My Life · #9 28-08-2009, 02:13 PM

جوووووود
..........

Eng_lfc · #10 28-08-2009, 02:30 PM

ممتاز ............

بروف انس · #11 28-08-2009, 10:35 PM

شكرا يابرنس علي الكلام الحلو ده وارجو منك اثرائنا بموضوعاتك الجميله

Medo abdo · #12 29-08-2009, 05:04 PM

انته شكلك فاهم يا نصه
طب بم انك من هندسة الزقازيك وانا كمان من هندسة الزقازيق يعنى احنا مع بعض بس الفرق انا لسه هادخل اعدادى ومعرفش حاجة خالص فيريت تكون موجود معانا دايما وتفيدنا وفى موضوع جديد انا لسه عامله ياريت تبقى معايا فيه عنوانه هندسة الزقازيق http://www.thanwya.com/vb/showthread.php?t=149751

Medo abdo · #13 29-08-2009, 05:10 PM

وياريت تقول عن المواقع اللى هتفدنى وتفيد الجميع وجعله الله فى ميزان حسناتكم

الأمير الرقمى · #14 29-08-2009, 05:24 PM

مقوله سمعتها من عميد كلية هندسة الزقازيق لما كنا فى اعدادى هندسه:

"ياولاد...الهندسه دى ماراثون....يعنى أهم حاجه توصل لخط النهايه بسلام"

معناه إيه كلامه؟

بصوا ياجماعه.....ان شاء الله لما تخلصوا الدراسه عارفين كام ماده هتكونوا درستوها؟

معدل 6 مواد فى التيرم يعنى 12 ماده فى السنه يعنى 5*12=60 ماده وده رقم تقريبى.....عشان كده لازم يكون عندكم العزيمه الكافيه لمواصلة المارثون لنهايته.....

واحد هيقوللى....ياعم دنا لازم أجيب امتياز أو جيد جدا ع الأقل عشان ألاقى شغل!

هرد عليه: آسف...انت غلطان تماما!

عارفين ليه؟

جوهر الموضوع .... انك تكون فاهم اللى بتدرسه وعندك قابليه لتطبيق اللى درسته لما تشتغل...سواء بقى كنت جايب مقبول ولا حتى امتياز.....
دى مش دعوه للكسل....مهو برضه المقبول مؤشر لمشكلة من نوع ما...وكذلك الامتياز تلميح لنبوغ ما...مش كده برضه؟

مثالين:

الأول:طالب تقديره العام مقبول:

اتخرج صاحبنا ده...ودور على شغلانه ولقاها و الحمد لله...كان بيقبضله 700 أو 800 جنيه بكتيره....بس حس انه متمكن من شغلانته قوى فى المصنع اللى هو فيه.....فصاحب المصنع لاحظ ده....ورشحه لدوره تدريبيه ساهمت فى (توديك) المهندس ده فى الشغل...وبعد سنتين أو يمكن تلاته...مسك القسم اللى كان شغال فيه......وبالصدفه بيدور على النت...لقى شغلانه بره بمرتب 5 آلاف ريال ....اتقدم ونجح فى المقابله....وسافر....ودلوقتى بيقبض ب(الشوال) اللهم لاحسد

حد بقى فى القصه دى سأل صاحبنا ده....إنت تقدير تخرجك كام؟....لأ طبعا....أهم حاجه اتقانك ومهارتك فى الشغل...

الثانى:طالب تقديره العام جيد جدا:
صاحبنا خلص من هنا وقدم السيره الذاتيه له للشغل...واتقبل...وقبض برضه من 700ل 800 جنيه فى الشهر...وعاش نفس قصة الأولانى.......الخلاصه....هو مقبضش بتقديره....ده قبض باجتهاده فى الشغل

أعتقد كلامى واضح

وأحب أأكد تانى: لازم طبعا تتجدعنوا وتطمحوا للامتياز....بس اللى مقدرش ....ميفقدش الأمل.....أهم حاجه انك تكون واثق من نفسك....طور من معارفك العلميه.....متترددش انك تسأل حتى لو حسيت ان سؤالك ملوش لازمه

انت مهندس....يبقى لازم تكون جدير باللقب ده

تحياتى للمهندسين والمهندسات الجدد

الأمير الرقمى

yasasa · #15 30-08-2009, 01:49 AM

موضوع الكتب العربى حلو اوى