أقسام وتخصصات العلاج الطبيعى وأشهر الأمراض بالتفصيل

[DPT-Blue Phoenix]

أقسام وتخصصات العلاج الطبيعى وأشهر الأمراض بالتفصيل

ان شاء الله فى السلسلة دى هنتكلم عن الأقسام الى موجودة فى كلية العلاج الطبيعى وكل التخصصات الى موجودة وكمان اشهر الأمراض الى بيختص بيها كل تخصص ونبدأ

قلنا الأقسام الى موجودة فى الكلية هى :

1- العلوم الأساسية للعلاج الطبيعي
2- الميكانيكا الحيوية
3- العلاج الطبيعي للجراحة ( وحروق وجلدية وتجميل )
4- العلاج الطبيعي لأمراض الجهاز الدوري التنفسي والمسنين ( الباطنة )
5- العلاج الطبيعي لأمراض النساء والتوليد ( صحة المرأة )
6- العلاج الطبيعي لإضطرابات الجهاز العضلي الحركي وجراحتها ( العظام )
7- العلاج الطبيعي لاضطرابات الجهاز العصبي العضلي وجراحتها ( الأعصاب )
8- العلاج الطبيعي لاضطرابات مراحل النمو والتطور وجراحتها عند الأطفال ( الأطفال )

ونبدأ مع بعض بقى نتكلم عن كل واحد تفصيلا
----------------------------------------------------------------------------------

قسم العلوم الأساسية

Basic science department


أول قسم من أقسام الكلية هنتكلم عنه هو قسم العلوم الأساسية .. قسم العلوم الأساسية هو قسم يعتبر بيساعد كل الأقسام فى الكلية وقسم عام .. لأنه بيهتم بحاجتين اساسيين :


-- تدريس المواد الأساسية للطلاب زى بتعرف تعد لحد كام :


1- العلاج الكهربى
2- العلاج المائى
3- التمارين العلاجية
4- العلاج اليدوى
5- الاختبارات والمقاييس
6- فسيولوجى التمارين
7- الاحصاء الطبى
8- مبادىء الكتابة العلمية
9- قوانين وآداب المهنة
10- وممكن علم الأعصاب


وغيرهم .. طبعا مسئولية كبيرة جدا بتقع على قسم العلوم الأساسية بسبب تدريس كل الكم دا من المواد ..


وغيرها من المواد الأساسية فى الكلية والمواد العامة للعلاج الطبيعى الى هى مواد مش مخصصة لأى تخصص فى علاج طبيعى .. ومش بس كدا ..


-- قسم العلوم الأساسية بيشرف على تدريس باقى المواد الأساسية هههههههه كتير اوى بردو زى :


1- مواد الطب البشرى زى الاناتومى والفسيولوجى والهستولوجى والبوكمسترى وغيرهم
2- وممكن مواد أخرى زى باقى المواد التكميلية منها الفيزياء الحيوية وعلم الحياة وغيره ..



طيب هل فى تخصص اسمه علوم اساسية فى الكلية ؟!


لا طبعا مفيش حاجة اسمها متخصص فى علوم اساسية بصرف النظر عن دكاترة القسم نفسه الى بيكونوا هيئة تدريس قسم العلوم الأساسية يعنى لكن انا بتكلم على الحياة العملية .. لو انت حضرت ماستر فى علوم اساسية هتحضر فى ايه سعتها ؟!


زى ما احنا عارفين اننا مش زى الطب البشرى يعنى ممكن الطبيب البشرى يكون بيمارس الطب بس الى هو تشخيص مثلا ووصف ادوية وكدا لكن لا يمارس جراحة ..


لكن احنا لازم بنعالج بادينا ونمارس .. فانت فى علوم اساسية بقى ممكن تدرس اكتر عن مواد العلاج زى التمارين العلاجية والعلاج اليدوى والعلاج الكهربى او المائى او غيرهم وتحضر في حاجة معينة منهم رسالة الماجستير وفى علاج طبيعى ممكن تلاقى دكتور متخصص فى اسلوب علاجى معين وواخد كمان كورسات ودورات فى اسلوب العلاج المحدد دا .




-----------------------------------------------------------------------------------------------


قسم الميكانيكا الحيوية

Biomechanics department






دا تانى قسم هنتكلم عنه ان شاء الله ..
وعلى عكس قسم العلوم الأساسية الى اتكلمنا عنه قسم الميكانيكا الحيوية شغله كله ميكانيكا حيوية .. وعشان كدا هتلاقى القسم دا لو هتكلم فى نطاق كلية العلاج الطبيعى جامعة القاهرة قسم منظم جدا وشغله عالى





- طيب ايه هى الميكانيكا الحيوية ؟!


- الميكانيكا الحيوية Biomechanics : هى فرع من فروع علم الحركة Kinesiology وعلم الحركة هو العلم الى بيدرس الحركة بوجه عام وبما اننا بنتكلم عن الانسان فهو بيدرس حركة الانسان من كل النواحى و بيضم علوم كتير منها مثلا الميكانيكا الحيوية وغيرها .


- والميكانيكا هى فرع من علم الفيزياء .. وهى الفرع الى بيهتم بدراسة القوى المؤثرة على الجسم سواء فى حالة السكون او فى حالة الحركة .. وبما اننا بنقول ميكانيكا حيوية يبقى قصدنا الفرع الى بيدرس كل القوى المحيطة والقوانين الفيزيائية (الميكانيكية) الى بتأثر على الكائن الحى وبنتكلم هنا طبعا عن الانسان وقت السكون أو الحركة .. وعشان تفهم ميكانيكا كويس لازم تكون فاهم تشريح كويس وفاهم فسيولوجى كويس لأن ال3 مواد مرتبطين ببعض جدا .. وخاصة علم التشريح مفيش ميكانيكا من غير تشريح ابدا ..


- علم الميكانيكا الحيوية بيحلل كل حاجة من منظورين وهما :


1- التحليل الوصفى Kinematics : يعنى بيصف القوى الى بتاثر على جسم الانسان مثلا زى الوزن اقولك ان الجاذبية بتاثر على جسم الانسان وحاصل ضرب عجلة الجاذبية الأرضية فى الكتلة يساوى الوزن مثلا والجاذبية دى بتشد الانسان لتحت وفى رد فعل من الارض Ground reaction force بيدفع الانسان لفوق والقوتين متعادلتين وبالتالى الانسان مش هتلاقى بيغوص فى الأرض مثلا واحنا عارفين ان لكل قوة فعل قوة رد فعل مساوية لها فى المقدار ومضادة لها فى الاتجاه من قانون نيوتن الثالث


- قالك ودا فى منه نوعين اما تحليل وصفى نوعى او كيفى Qualitative ودا بيهتم باننا نقيم ونسمى عناصر الحركة لأن القوى زى ما هنعرف بعد كدا بتحلل لاكتر من مكون .. والجانب التانى هو الجانب الكمى Quantitative .. دا بقى انى بعمل مسائل حسابية ومعادلات وبحسب منها مقدار القوة دى ايه بالظبط ..


2- التحليل السببى Kinetics : دا بقى بيقولك تاثير القوة دى ايه على الجسم .. مثلا نفترض ان انا وانت بنشد قصاد بعض الحبل والنتيجة مثلا ان انا اقوى منك فشديت الحبل ناحيتى يبقى النتيجة انى شديت الحبل ناحيتى وهو دا التحليل السببى بيقولك اثر القوة دى على الجسم ايه ؟! وقالك فى نوعين لو القوة الى بتاثر على الجسم دى متزنة يعنى انا وانت بنشد الحبل وقوتنا قد بعض يبقى فى ثبات او اتزان Statics طيب لو قوة غير متساوية ينتج عنها حركة Dynamics ..


-- بوجه عام اى حد فى علاج طبيعى بيدرس الأول اساسيات الميكانيكا وبعد كدا بيدرس ميكانيكا اجزاء معينة من الجسم زى ميكانيكا المشى او العظام او العضلات او الغضاريف وغيرها ..


- هل دا المادة الوحيدة الى بيدرسها او بيشرف عليها قسم الميكانيكا الحيوية ؟!


قلتلك لأ فى حاجة تانية اسمها علم الارجونوميكس ( علاقة الانسان بالآلات ) Ergonomics


دا علم جديد بيهتم بالعلاقة بين الانسان والآلات التي يستخدمها في العمل..
.لتحقيق اقصي كفاءه ممكنه للعامل بدون التعرض لأي اخطار او مشاكل صحيه ..


مما يرفع كفاءه الانتاج ويحمي العمال او الموظفين من اصابات العمل وبالتالي تقل نسبة التغيب عن العمل.. وهو برده يعتبر علم ميكانيكا او فيزياء بس مخصوص بعلاقة الانسان بالآلات فمثلا وانا بتسعمل الكمبيوتر لازم اكون فى وضع معين وطريقة معينة عشان احمى جسمى واحمى ظهرى واحقق اعلى كفائة ممكنة فى الشغل ..


-- المعامل المتخصصة : قالك بقى لو انت اتعمقت فى الميكانيكا جامد تقدر ساعتها تفهم فى المعامل المتخصصة .. زى معامل تحليل الحركة Locomotion او معامل تحليل المشى Gait ****ysis او معامل تحليل الوضع Posture وغيرها .. دى بقى تقنيات حديثة جدا جدا جدا احدث من التقنيات الى بيستعملها اى مجال لتقييم وتشخيص الخلل فى الجهاز الحركى .. مثلا لو حللت وضع الجسم ممكن اعرف مثلا ان الانسان دا عنده تحدب Kyphosis او احلل المشى واعرف من خلال دراستى ان الانسان دا عنده مشكلة فى عضلات معينة وبيمشى مشية مش مظبوطة .. فى كمان معامل ال Isokinetics الى بتقيس قوة العضلات المختلفة وعزم الازوداج بتاعها وكل المعلومات عنها وتعرف هى سليمة ولا لأ .. وعلى اساس كدا اعرف احط برنامج علاج دقيق ومظبوط وقلنا العلاج الطبيعى مش بس علاج لا كمان فى تقييم وتشخيص وتاهيل ووقاية ..



-- طبعا لو انت هتحضر ماستر فى الميكانيكا المفروض انك بتتعمق أكتر فى النواحى دى وممكن سعتها تقدر تفتح مثلا معمل متخصص لكن هنا فى مصر تكاد تكون الحاجات دى مش منتشرة لأنها محتاجة تدريب كويس وامكانيات عالية فلوس يعنى لو هتعمل معامل مختصة انما فى تقنيات تانية بتبقى اقل فى الفلوس ..

-- بس عامة الميكانيكا الحيوية هى من المواد المميزة لمجالنا والى المفروض نكون احنا من افضل التخصصات على الاطلاق تعمق وفهم للمادة دى لأنها داخلة فى التمارين العلاجية والعلاج اليدوى والأوضاع ومعظم وسائل علاجنا وزيها من المواد المميزة لينا هى العلاج الكهربى فى وجهة نظرى =

-----------------------------------------------------------------------------------------------

قسم الجراحة
PT For surgery department


( والى بيضم كمان الحروق والجلدية - جلد وأغشية - والتجميل Integumentary disoreders )


أولا_بالنسبة_لمرضى_الحروق



- ايه هو الحرق !!!!


- الحرق : هو نوع من الإصابة في النسيج العضلي أو الجلد بسبب الحرارة او الكهرباء او المواد الكيميائية او الاحتكاك أو الإشعاع .. والحروق درجات الحروق السطحية أو حروق الدرجة الاولى و فى الحرق الى بيتمد شوية تحت الجلد ودا حرق الدرجة التانية وفى حرق الدرجة الثالثة الى بيشمل كل طبقات الجلد الدرجات دى الى بنسمع عنها كتير لكن فى البعض يقولك فى حرق الدرجة الرابعة الى ممكن بيوصل للعضلات او العظام حتى ..


- طيب ايه دور العلاج الطبيعى هنا يعنى هيعمل ايه يعنى !!!


- العلاج الطبيعى مع مرضى الحروق ممكن نقسمه لمرحلتين :


1- #المراحل_الحادة Acute ودى بنبدأ شغل مع المريض من #اليوم_الأول للحرق واهدافنا بتكون :


أ- تقليل الآلام بعد الحروق باستخدام وسائل العلاج الطبيعى Decrease pain
ب- استخدام الوسائل الى بتساعد على سرعة الالتئام وسرعة التعافى من الحروق Accelerate tissue healing
ج- منع التشوهات والمضاعفات الى ممكن تحصل بعد الحروق والمساعدة على ان الأنسجة ترجع بأفضل شكل جمالى ممكن ليها
د - التمارين العلاجية للمحافظة على مدى حركة المفاصل ROM
ه - وضع الجسم فى الأوضاع الصحيحة وعمل الجبائر اللازمة وغيرها من الأدوات الى ممكن بنستعملها ..



2- فى #المراحل_المزمنة Chronic بعد كدا بيكون من أهدافك :


أ- بتكمل فى التمارين الى تحافظ على مدى الحركة وتمارينات الاطالة Stretching
ب- بتبدأ تخلى المريض يعمل تمارينات Active ( موجبة ) وتبدأ تتدرج معاه لتقوية عضلاته تانى
ج- التقليل من التورمات والاديما ( تجمع سوائل بين الأنسجة Edema ) وغيرها
د- بتبدأ تانى تدربه على المشى والحركة وتمارينات الاتزان والاحساس
ه - بتحاول تدربه على استعادة كتير من الوظائف حياته الى فقدها
و- اخيرا اعادة دمجه فى حياته الطبيعية وشغله ويرجع يمارس حياته تانى
- طبعا وسائل العلاج فيها التمارين زى ما قلنا وفيها جزء خاص بالعلاج اليدوى وفيها جزء خاص بالوسائل الفيزيائية سواء تقليل الألم او تقليل الاديما او زيادة سرعة التشفى بعد الحروق ..



- #ثانيا_العلاج_الطبيعى_لباقى_مشاكل_الجلدية



هتلاقى العلاج الطبيعى بيدخل فى مشاكل كتير منها :


1- الجروح ومحاولة التقليل منها والمساعدة فى سرعة التشفى بعد الجروح الى بتصيب الجلد
2- علاج الندبات والآثار بعد الجروح
3- محاولة علاج سقوط الشعر ببعض الوسائل زى الليزر منخفض الشدة او الموجات فوق البنفسجية
4- علاج تجاعيد الوجه وهتلاقى برده عليها ابحاث زى استخدام ال Shortwave
5- حب الشباب والاكزيما والصدفية والبهاق وغيرها من الأمراض الجلدية الفطرية او غيرها
6- علاج قرح الفراش


وفى غيرهم بس نكتفى بدول فى رسائل كتير جدا معمولة فى القسم دا وخاصة عن تأثير العلاج الضوئى Phototherapy الى بيضم low-power LASER والموجات فوق البنفسجية Ultraviolet وغيرهم فى علاج الأمراض الجلدية ..
غير ادخال بعض الأيونات للجسم اما عن طريق الموجات فوق الصوتية أو التيارات الكهربية المباشرة المستمرة منخفضة الشدة .


- ثالثا_العلاج_الطبيعى_للجراحات_المختلفة : باستثناء جراحات العظام والأعصاب وحالات النساء والتوليد والقلب والجهاز التنفسى بتلاقى القسم دا بقى بيهتم بعمل تأهيل قبل وبعد العمليات الجراحية وبيضم اكثر من حاجة :


1- العلاج الطبيعى للجراحة العامة و جراحات التجميل
2- العلاج الطبيعى لجراحات زرع الأعضاء
3- العلاج الطبيعى و جراحات السمنة
4- العلاج الطبيعى و الجراحات السرطانية
5- العلاج الطبيعى و الجراحات التناسلية للرجل


- بالاضافة للحروق والجروح والأمراض الجلدية المختلفة الى قلناها فوق ..
وبوجه عام دورنا فى الجراحات المختلفة بينقسم الى :


1- دور قبل الجراحة Pre-operative : ودا بنقعد مع المريض فترة نحاول نحسن من حالته الصحية بأكبر قدر ممكن بحيث نأهله للعملية الجراحية وانه يخرج بأقل مضاعفات ممكنة منها .. وبنعمله الاختبارات اللازمة .. وكمان بنعلمه بعض التمارين العلاجية والحاجات الى يعملها بعد العملية .. وكمان بتديله نصايح واوضاع معينة يلتزم بيها بعد العملية .. وبرده ممكن بتعلم حد من الأسرة عشان لو هيكون فى برنامج فى البيت ..


2- بعد العملية الجراحية Post-operative : بيكون انك تحاول تمنع أكبر قدر من المضاعفات الممكنة وتقلل المضاعفات الى كدا كدا بتحصل زى آثار البنج والخياطة وغيرها وبتأهل المريض انه يرجع تانى لحياته الطبيعية ويندمج مع المجتمع ..



وكمان ممكن بيكون لينا تواجد اثناء الجراحة During operation



- بس طبعا برنامج التأهيل بيختلف على حسب نوع الجراحة الى هتتعمل فالحكاية كبيرة لكن الى قلناها الأهداف العامة ..


-- وهتلاقوا ابحاث ورسائل علمية كتير ومقارنات فى القسم دا : مثلا يقولك عمليات شفط الدهون احسن ولا اننا نستعمل الموجات فوق الصوتية التجويفية مع دهون البطن ؟!

وتلاقى مثلا ابحاث عن استعمال الأجهزة الكهربية فى تقليل الآلام العصبية او باقى انواع الآلام بعد العمليات المختلفة .. فالقسم دا نفسه فى مجالات كتير متسعة لأنه بيضم اكتر من حاجة سواء الجلدية والحروق والتجميل أو باقى أنواع الجراحات ومحدش يقولى اننا الى بنعمل العملية الجراحية دا دور الدكاترة البشرى .

---------------------------------------------------------------------------------------------


قسم الباطنة

PT For Cardiopulmonary Disorders



القسم دا بيضم عدد كبير جداااااا من التخصصات وعشان نتكلم عنه هنضطر نقسم القسم على الأقل لموضوعين بس تخصص خطير وممكن أقل لمسة غلط تموت المريض وتروح فى داهية ..

طيب قبل ما نتكلم عنه ،، حابب أسألك سؤال ..يا تري إيه اللي تعرفه عن القسم ده أو تتوقع يكون دورنا إيه ف القسم ده لأنه قسم محدش يعرف عنه كتير ؟!


■ القسم دا مش مشهور زى باقى الأقسام و معظم الناس حتى احنا كطلبة ممكن كتير مننا ما ييعرفش لازمته إيه ؟!!


عشان كدة النهاردة هنكلمكم عنه ونفهم مع بعض هندرس إيه ف القسم ده ودورنا فيه


■ أولا هكلمك كطالب علاج طبيعى عاوز تعرف انت هاتدرس إيييه ؟!


1* قسم #الباطنه بتدرس فيه :
#قلب و #صدر و #باطنة ( أوعية دموية و وتمثيل غذائى ) وعناية مركزة ومسنين :P يعنى اى حاجة خاصة بالأعضاء الداخلية ومشاكلها تقريبا وكمان مشاكل التقدم فى السن
♢ بتدرس بقى #التكوين و #الوظيفه و كمان #الملائمه_الوظيفيه بتاعت كووول جزء
٢* بتدرس #علم_الاشعه
■ حد ينط كدة ويسألنى ،، طب احنا كدا دورنا ايه ؟! ودكاترة علاج طبيعي ف القسم ده بيدرسولنا إيه ؟!
♢ و انت بتدرس اللى قلنا عليه فوق ف نفس الوقت بتكون بيدرسهولك دكاتره العلاج الطبيعى بتوع قسم الباطنه
1* بتدرس بقى #ازاى تعمل #فحص سواء ب #النظر أو ب #ايدك
أو ب #السماعة ( أيوة يا سيدى هتشتري سماعة بقي وتعمل فيها دكتور )
2* تتعلم ازاى تقرا #الأشعة و تعرف تميز أى تغير حاصل
3* بتتعلم ازاى تعمل #تقيم للحالة


■ طيب إيه الأجهزة اللى بنستخدمها ف العلاج الطبيعى ؟!

هانكتفى فى البوست دا اننا نقول أشهر الحاجات اللى كتير مننا هايكون عارفها
جهاز #رسم_القلب ?? و جهاز #رسم_القلب اثناء #التمرين و اجهزه تانيه كتيييييييير عشان تقيم حاله #الجهاز_التنفسى زى اشهرها ال Exercise Testing
و #تأثير_الأمراض على الأعضاء اللى درسناها


■ هتتعلم بقى بعد كدا ازاى العلاج الطبيعى بيعالج الحاجات دى ؟!
هاتتعلم طرق جديدة .. و هاتتعلم ازاى توظف اللى درسته فى السنين اللى قبل كدا فى العلاج



■ هااااااا مين عايز يعرف أكتر عن قسم الباطنة ؟!


■اتكلمنا عن #قسم_الباطنه و اللى بندرسه فيه



■ هنتكلم بقى عن الحاجات اللى بيخش فيها القسم دا و دوره مع المرضى
■ القسم ده بيضم أكتر من تخصص ،، قلب وصدر ومسنين وباطنة
■ هانتكلم ف الأول عن التخصص المختص ب امراض #القلب و #الصدر و دور العلاج الطبيعى فيها


■ الامراض دى بتكون زى اييييييييييييييييه ؟!


- بالنسبة لمشاكل الجهاز التنفسى :



الربو Bronchial_Asthma
و الأمراض الى بيكون فيها ضيق او اختناق فى الممرات التنفسية COPD
Suppurative lung diseases والأمراض الى بيكون معاها صديد او سوائل على الرئة
Restrictive lung diseases دى بقى الامراض الى بيكون فيها حاجة مانعة الرئة انها تكون بحجمها الطبيعى وبالتالى السعة التنفسية وكمية الاكسجين بتكون قليلة
غير مشاكل وتشوهات ال Chest wall وبعض مشاكل ال Pleura الى هى الغشاء الى بيحيط بالرئة وغيرهم ..


■ دورنا هنا اييييه ؟!


1* اننا بنعمل #فحص و #تقيم للحاله
2* و بنبتدى اننا نستخدم الاجهزة و الطرق اللى اتعلمناها فى اننا نخلى المريض يقدر يتنفس بشكل سليم
و يقدر يستخدم الرئه كلها ف عملية التنفس ،، امممم
مش فاهمين بردو دورنا ايه ف عملية التنفس ؟!
■ بص يا سيدى ،، بكل بسااااطة .. احنا بنزود التنفس و كمان كمية الاكسجين الى بتروح للمريض .. ودا عن طريق :
أ- اننا بنحط المريض فى #اوضاع معينة تساعده على التنفس كويس Positioning
ب- #تمارينات_التنفس عشان لو الرئة حصل فى بعض المناطق فيها انهيار ..
يعنى مبتقتش بتستخدم فى التنفس ودا عن طريق تمارينات التنفس Breathing exercises
ج_ عندنا تمارينات #الاسترخاء Relaxation Exercises .. ودى دورها إيه ؟؟
بتقلل من استهلاك الاكسجين بكميات كبيرة وتقلل التوتر ..
وطبعا المريض بيبقى مش محتاج يجهز الجهاز التنفسى اللى هو اصلا تعبان
د _ كمان بنطلع اى ماء او سوائل موجودة عل الرئة .. ازاااااي ؟!
باستعمال اوضاع معينة بحيث ان الجاذبية تسحب السوائل دى #Postural_drainage يعنى هنا احنا بنستفيد من خلال دراسة الشعيبات الهوائية دى ماشية ازاى وكمان من خلالة دراسة تأثير الجاذبية بنقدره نحطه فى اوضاع معينة والاوضاع بتختلف على حسب الجزء الى فيه مشكلة فى الرئة وبالتالى الجاذبية بتحسب السوائل دى لبرا وحتى بنعمله ازاى يكح عشان يخرج السوائل دى
Cough and huff
3- بنعمل تمرينات #تقوية وتمارينات #استطالة (استرتشات) عشان لو فى عضلات حصل فيها ضعف ..
او حصل فيها قصر بعد العمليات نتيجة انه قعد فى السرير لفترات طويلة



■ دورنا اكتر بيظهر لما المرضى دول بيكونوا محتاجين لعمليات .. ليه بقي ؟!


لانه بتزيد نسبه الخطورة لو مكنشى فيه #تأهيل قبل و بعد العمليه ..ليييه برضو ؟!
لان #الجاهز_التنفسى و #عضلات_التنفس و اهمها #الحجاب_الحاجز بيحصلهم ضعف
وده بيخلى المريض فى حاجه دايمة لجهاز #التنفس_الصناعى اللى بيبقى ليه أضرار خطيرة 0_o لو فضل المريض عليه فتره طويلة ....
■ كمان لينا دور مهم جدا جدا مع #مرضى_القلب
■ طبعا بيكون فيه اتصال دائم بين #دكتور_العلاج_الطبيعى و #دكتور_القلب المعالج و دا بيبقى دايما فى مصلحه المريض و بيحميه
لان الفريق الطبى كلللله✊
دوره انه يحافظ على حياة المريض و يحسن حالته الصحيه




■ مرضى #القلب

أو المرضى #بعد_العمليات او أى سبب تانى اللى بيبقوا فى العنايه المركزه ..
لينا دور مهم جدا معاهم .. اللي هو ايه بقي ؟!


تأهيل مرضى القلب بعد #ال***ات Angina pectoris و #الجلطات Myocardial infarction و #الفشل_القلبى Heart failure و #عمليات زرع القلب او استبدال الشرايين القلبية .


■ التأهيل القلبى بيمر ب 3 مراحل :


#المرحلة_الأولي : مرحلة اننا بنأهل المريض وهو فى #المستشفى لحد ما يقدر يمشى ويعتمد على نفسه ويخرج من المستشفى
#مدتها : ودى بتفضل من حوالى يومين ل 3 اسابيع
♡ وهنا بنخليه يقدر يقوم بوظائفه اليومية تانى .. و #تقليل المضاعفات بعد العمليات وتحسين حركة وتحمل المريض وتقليل الخوف والتوتر
♡ اثناء كل دا بنفضل نعمله الاختبارات اللازمة ونتابع تطور الحالة و نتابع #ضغط_الدم
و #معدل ضربات القلبو رسم القلب وكمان نشوف هل ظهرت عليه اى علامات مش مظبوطة او لا


# المرحلة_التانية :
#مدتها : من شهرين ل 3 شهور بقى بعد ما بيخرج من المستشفى
♡بنبدأ نخليه يحسن من كل الوظائف بتاعته تانى بدل ما كان بيطلع دور يطلع 2 و 3
♡ ويقدر يقوم بالاعمال الاصعب فى حياته ويعتمد على نفسه بدرجة اكبر


#المرحلة_الثالثة :


دى آخر مرحلة هى اننا بنحطله برنامج فى #البيت
#مدته : ودا بيكون من 6 شهور لسنة
♡ ان المريض بنديله برنامج فى البيت يعمله هو بنفسه لحد ما يرجع بأكبر قدر انسان طبيعى بعد ما كان نايم فى السرير
■ كمان لينا دور مهم اننا بنمنع #التيبس ف #المفصل او #الالتصاقات او غيره بنعمل ROM and Mobility exercises


#قسم_الباطنة_الجزء_الثانى


PT for Internal - Geriatrics - ICU
العلاج الطبيعى للباطنة والمسنين والعناية المركزة




- اتكلمنا عن دور أمراض الصدر والقلب وايه دور العلاج الطبيعى فيها .. دلوقت هنكمل باقى التخصصات الى هتدرسها فى قسم الباطنة


- #أولا : بالنسبة لتخصص المسنين Geriatrics فهو ممكن نعتبره كتخصص منفصل وقائم بذاته .. زى ما احنا عارفين ان مع التقديم فى السن وخاصة بعد سن ال40 سنة تقريبا بيبدأ يحصل تغيرات كتير فى الجسم من الناحية التشريحية والفسيولوجية والكيميائية كل حاجة فى الجسم بتختلف .. بنلاقى مثلا ان قوة الشخص بدأت تضعف عضلاته بتضعف تحمله بيضعف .. العظام بتكون أكتر عرضة للهشاشة .. سعة الرئتين بتقل وقدرة القلب على ضخ الدم بتقل .. الغضاريف بتكون اكثر عرضة للخشونة .. بتحصل مشاكل كتير فى القوام زى ان نلاقى الشخص ظهره انحنى كدا بيبدأ يحصل خلل شوية فى عملية التمثيل الغذائى والطاقة والبناء وبيكون معدل الهدم فى الجسم اعلى من البناء .. الجلد بيبدأ يظهر عليه اثار السن .. الشخص غالبا بيقعد فى السرير فترات طويلة وبيكون عرضة لحاجات كتير زى قرح الفراش مثلا ..


- وهنا بيتدخل دور العلاج الطبيعى الأساسى فى التأهيل :


1- نقدر عشان ضعف العضلات دا نعوض دا بتقوية العضلات الضعيفة Strengthening
2- نقدر نعوض نقص التحمل دا باننا نزودله التحمل بتاعه Endurance
3- نقدر نرجع الاتزان بأكبر قدر ممكن والتناسق العصبى العضلى Balance and coordination
4- تقدر بالنسبة لمشاكل العظام توصفله مجموعة من التمارين الى بتساعد على زيادة كثافة العظام وكمان تظطله الدايت بتاعه بحيث انه يحتوى على نسبة كويسة من الكالسيوم وفيتامين دى
5- تقدر لو حصل تيبس فى المفاصل انك تقلل التيبس دا بوسائل العلاج اليدوى المختلفة مثلا
6- تقدر تعمله تمارينات التنفس وتمارينات للجهاز الدورى بحيث يقدر يتنفس صح والقلب يضخ كمية دم كويسة ويقدر يعمل مجهود أعلى
7- تقدر تحلله مشاكل تشوهات القوام تقدر تساعده فى امراض كتير فى مراحلها الاولى قبل ما تطور



- #الخلاصة : انك هدفك هنا انك تأهل المريض وتحاول تخليه يعيش حياته بأكبر قدر ممكن معتمد على نفسه ويعتبر بتقلل بأكبر قدر من اعراض الشيخوخة والتقدم فى العمر


#ثاني بالنسبة للباطنة فهنقسمها ل2 حاجات :


1- أمراض #التمثيل_الغذائى أو التحول الغذائى ( الأيض ) Metabolism : زى مرضى السكر من النوع الثانى او الضغط المرتفع او المنخفض أو السمنة او الامساك او غيرها كتير ..
#دورنا : هنا بشكل أساسى أولا من خلال ال Diet انك بتظبطله نظام غذائى كويس وهنا يبرز دور التغذية العلاجية بقى Nutrition .. مثلا لو مريض سكر يبقى نشويات بشكل اقل شوية .. لو مريض ضغط مثلا هيبعد عن املاح الصوديوم لو مريض عنده امساك ياكل الياف اكتر وهكذا ..


- ومع الدايت دا بناءا على دراستك لعلم فسيولوجى التمارين Exercise Physiology بتقدر تحدد للمريض دا مجهود بدنى محدد يعمله بشدة معينة ومدة معينة وعدد مرات تكرار معين على حسب الحالة Physical Activity وبالتالى دا بيساعده مثلا فى خفض نسبة السكر او الضغط او غيرها ..
- بتقدر كمان تقلل المضاعفات او تمنعها ولو حصلت زى القدم السكرى مثلا Diabetic foot او مثلا مضاعفة من مضاعفات ارتفاع ضغط الدم تقدر تدخل مع المريض بوسائل كتير منها الوسائل الفيزيائية ليزر وموجات فوق البنفسجية وكهرباء وحرارة وموجات فوق صوتية وغيرها كتير .. ووسائل تمارين علاجية وعلاج يدوى كمان وكمان تأهل المريض .


- تقدر فى مشاكل زى الامساك تساعده من خلال مجموعة من التمارين والعلاج اليدوى والأجهزة برده الى بيكون ليها دور كبير فى علاج المرض


2- أمراض #الأوعية_الدموية : زى الدوالى ومشاكل الأوردة وبعض مشاكل الشرايين ومشاكل الجهاز الليمفاوى كمان ..
- بتقدر انت تعمل للمريض تأهيل فى بعض الحالات قبل وبعد العمليات الجراحية زى ما قلنا بالظبط مع مرضى القلب ودا فى بعض الحالات زى حالات ال Aneurysm



- تقدر تستعمل وسائل كتير حرارية او غيرها عشان تمشى الدورة الدموية كويس تانى ومجموعة كبيرة من التمارين العلاجية والعلاج اليدوى وبعض الأدوات الى اتكلمنا عنها زى بعض الشرابات الطبية او غيرها



- تقدر لو فى مشكلة فى الجهاز الليمفاوى ومشاكل ال Edema ( تجمع سوائل بين الأنسجة ) انك تخلى الجسم يتخلص منها زى وسائل ال Lymphatic drainage .


#ثالثا : دور فى #العناية_المركزة ICU فى الحالة دى انت لازم بتكون جنب المريض لانه بيحتاج تأهيل أول بأول للجهاز التنفسى والجهاز الدورى وغيره ونسبة كبيرة بتموت بتكون موجود عشان تمنع قرح الفراش وتعمل للمريض تجبير وتساعده على استعادة وظائفه بأكبر قدر ممكن .. وعامة العناية المركزة فى منها فروع كتير على حسب نوع المرض ..



------------------------------------------------------------------------------------

قسم النساء والتوليد

( صحة المرأة Woman's Health )



#طالبة_علاج_طبيعى_مستجدة : بقولك يا صديقتى أنا سمعت ان الكلية اللى دخلناها دى آخرنا فيها بعد التخرج #تخسيس و #تدليك.. يا نهاااار احوس.. يعنى بعد ما أقضى فيها أجمل سنين عمرى أطلع يقولولى.. #المدلكاتية راحت.. المدلكاتية جات!!!!!!


#طالبة_علاج_تانية : لاااا يا بنتى ايه اللى انتى بتقوليه دا؟!؟... أنا بقى قريت ليومك طبيعى .. ان #العلاج_الطبيعى ♡ دا بحر وااااسع وبيعالج #كتييييير من الأمراض وبيصلح أى #خلل موجود فى الجسم سواء فى #الحركة أو #الوظائف وبيحاول يرجع المريض #لحالته_الطبيعية.. وكمان له أقسام كتييير أوى... قريت بقى عن قسم #النسا_والتوليد وان
♥
العلاج الطبيعى♡ له دور مهم جدا فى #تأهيل الست الحامل #قبل_وأثناء_وبعد_الولادة.........


◆◆ فى وسائل معينة بتستخدم مع المرأة الحامل لتهيئتها جسمانيا #للولادة_القيصرية من خلال تقوية عضلات البطن أو تقوية عظام الحوض إذا كانت #الولادة_طبيعية.


◆◆ بالإضافة لأمراض النسا نفسها زى علاج آلام الطمث ومعالجة سقوط الرحم ومرض تكيس المبايض الناتج عن زيادة الوزن.



#نتكلم_بقى_بالتفصيل_شوية



#أولا.. قبل الولادة☆★


□ متابعة الحمل والعناية بالأم أثناء الحمل.
□ تقليل المشاكل اللى ممكن تتعرض ليها أثناء مراحل الحمل الأولى #كآلام_الظهر ومتلازمة النفق الرسغى ..#carpal_tunnel_syndrome.
□ فى تمارين معينة أثناء الحمل #لتقوية و #تحسين العضلات الخاصة بالولادة والمخاض.. زى #تمارين_الإطالة..
《طب فايدتها ايه؟《
#بشكل_مختصر_كدا..
☆ ليها دور كبير فى تسهيل عملية الولادة لأن عضلات الحوض تزداد مرونتها وقابليتها للمد أثناء عملية الولادة والمخاض★
□ فى تمرين اسمه #كيجل》فايدته》 بيعمل على تقوية عضلات قاع الحوض وبتزيد مرونتها.. وبالتالى》 تهيئها للولادة وتساعد فى عودتها لطبيعتها بعد الولادة..
□ تمرين #إمالة_الحوض.. بيقوى عضلات البطن وبيساعدها برردو فى العودة لطبيعتها بعد الولادة..
□ دا غير بقى تمارين لتحسين #الدورة_الدموية و #التنفس والحصول على الاسترخاء أثناء المرحلة الأولى من الولادة..

#ثانيا .. أثناء الولادة : اجهزه العلاج الطبيعي تساعد علي ولادة آمنه بدون الم



#ثالثا.. بعد الولادة☆★


● العلاج الطبيعى بيعالج مشاكل انقطاع الطمث واللبن.. أو مشاكل ما بعد الولادة #زى مثلا.. الولادة القيصرية دى بنمنع أثر قطع عضلات البطن زى تكون الكرش.. بالإضافة لإعادة تقوية عضلات قاع الحوض..


● لو الولادة طبيعية.. عندنا برردو تمارين ما بعد الولادة.. #وأهميتها هى..
¤ تقوية العضلات
¤ تحسين الصحة
¤ تحسين القوام
¤ منع سقوط الرحم
¤ شد العضلات الداخلية للرحم وإرجاعها للوضع السليم
¤ تخفيف آلام الظهر والبطن



#رابعا .. أمراض النساء والتوليد عامة : زى تكيس المبايض .. والسلس البولى .. سقوط الرحم والأعضاء التناسلية .. آلام الحوض .. هشاشة العظام بعد انقطاع الدورة الشهرية .. آلام الحوض ..
وعشان التخصص دا مش مقتصر بس على المرأة فى فترات الحمل الولادة فاسم التخصص دا فى أمريكا Woman's Health صحة المرأة بوجه عام


-- وطبعا بنستعمل كتير من الأجهزة الفيزيائية .. زى ال Shortwave الى ليها دور فعال فى مشاكل انقطاع الطمث .. وبنستعمل التيارات الكهربية للتقوية .. وبنستعمل كتير من الأجهزة مع الحالات المختلفة بالاضافة زى ما قلنا لبرامج التمارين المختلفة وكمان وسائل العلاج اليدوى ..



■ العلاج الطبيعى بيساعد فى #توعية المرأة الحامل بالحدود المسموح بيها لما تيجى تقوم بأعمال صعبة فى البيت.. على سبيل المثال.. 《 حمل الأشياء من الأرض》.. مطلوب من حضرتك..

◆ثنى الركبتين ◆القدمين متباعدتين ◆النزول لأسفل مع الحفاظ على الظهر مستقيما مع تجنب انحناء الظهر للأمام..

■ كمان المرأة الحامل نتيجة ان عندها وزن زائد بسبب الحمل فبتضطر ترجع بظهرها للوراء يعنى بتعمل compensatory effect.. عشان توازن نفسها أو تحافظ على ال stability بتاعتها.. ولأن دا بيستمر لمعظم شهور الحمل.. بيسبب آلام أسفل الظهر.. وكمان الحمل بيضعف عضلات البطن مع الوقت فبيعمل lordosis.. زى تكون الكرش كدا..... ☆ العلاج الطبيعى ★عندنا بقى بيعالج آثار الحمل دى.. ودا لأننا الوحيدين من كل الكليات الطبية اللى بندرس مادة بتسهلنا شغلنا وهى مادة الميكانيكا الحيوية.......
★☆ عرفتى بقى دورنا مهم قد ايه.. دا غير باقى الأقسام اللى لينا دور وبصمة كبيرة فيها ★☆

^^ ياااه دا العلاج الطبيعى دا له دور عظيم جدا... الحمد لله انك قلتيلى...
فعلااااا.. #أنا_علاج_طبيعى_وافتخر..


--------------------------------------------------------------------------------------------

العلاج الطبيعى للعظام

Orthopedic Physical Therapy



الاسم الكامل للقسم دا : العلاج الطبيعى لاضطرابات الجهاز العضلى الهيكلى Muscloskeletal system وجراحتها ..



- معنى كدا ان التخصص دا هو الى بيشمل مشاكل بعد جراحات العظام المختلفة والكسور وكمان اضطرابات وأمراض العضلات والأوتار والأربطة والمفاصل والغضاريف والعمود الفقرى يعنى الجهاز العضلى الهيكلى عامة .. والعلاج الطبيعى فعال جدا وليه دور مأثر فى مشاكل الجهاز العضلى الهيكلى ..

- تخصص العظام هو أول تخصص ظهر فى مجال العلاج الطبيعى زى ما كنا قلنا فى تاريخ العلاج الطبيعى فى العالم و الحقيقة التخصص دا متسع جدا وبيشمل مشاكل كتير جدا وبيعتمد على Biomechanics كتير وعلاج يدوى

Manual therapy .. من المشاكل الى ممكن تتعامل معاها فى التخصص دا :




1- تأهيل بعد الكسور وقبل وبعد جراحات العظام واستبدال المفاصل : ابسط الامثلة هو لو واحد حصله كسر واضطر يجبس رجله ويقعد مثلا 6 شهور او اكتر واكيد كتير جرب الكلام دا .. بيحصل ضعف جامد فى العضلات وحتى انت ممكن تشوفها ان العضلات الى كانت فى الجبس حجمها قل بالنسبة للعضلات التانية بيبدأ يحصل تيبس فى المفاصل ومبتقدرش تحركها كويس لو فى الطرف السفلى مثلا تلاقيك مش قادر تحافظ على اتزانك لانك مش حاسس برجلك بعد الجبس وهكذا .. دورك هنا أنك تأهل المريض دا بحيث يستعيد مدى حركة المفصل وتقوى العضلات وتحافظ على الاتزان وغيرها .


2- مشاكل وأمراض العضلات والأوتار والأربطة : زى المزق العضلى الجزئى او المزق فى الأربطة او التهاب العضلات والاوتار والتهاب الكيس الزلالى Bursitis .. عندنا وسائل كتير لتقليل الألتهابات وعندنا وسائل كتير برده عشان تزود سرعة الالتئام والتشفى من الجروح وكمان دورنا فى التأهيل زى ما قلنا .


3- مشاكل وأمراض المفاصل والغضاريف والعظام : زى خشونة المفاصل وهشاشة العظام ولين الغضاريف و الكتف المتجمد frozen shoulder .. مرض مرفق لاعب التنس او مرفق لاعب الجولف Tennis elbow and golfer elbow .. متلازمة النفق الرسغ carpal tunnel syndrome وغيرهم كتير ..


4- مشاكل الرقبة والعمود الفقرى : زى آلام الظهر والرقبة والانزلاق الغضروفي والام الظهر والديسك والتهابات المفاصل بين فقرات الظهر وغيرها ..
5- تشوهات القوام : الأمرض الى ممكن بتصيبك نتيجة الأوضاع الخاطئة لفترات طويلة او نتيجة خلل فى قوة العضلات ومنها كتير بقى على سبيل المثال مشهورين الجنف والحداب Scoliosis and kyphosis ودا معناه ان العمود الفقرى بيميل لناحية اليمين او الشمال .. مثلا نتيجة شيل شنطة تقيلة لفترات طويلة على الظهر فتعمل حداب او شيل الشنطة على ناحية واحدة .. وطبعا دا بيتضمن نصائح بالأوضاع الصحيحة والخاطئة وتبدأ تشتغل بقى على شغل الاسترتشات ( استطالة ) للعضلات الى فيها قصر وتقوية للعضلات الضعيفة .


6- مشاكل الفاشيا Fascia ودى عبارة عن طبقة كدا بين الجلد والعضلات : على سبيل المثال ال trigger points لما يحصل وتتجمع الفاشيا دى فى اماكن معينة وتعمل حاجة بارزة كدا اشبه بحباية الى اسمها trigger point تبدأ دى تعمل آلام وتعمل شد فى العضلات ومشاكل على المدى الطويل .. هنا بتستعمل تكنيكات منها ال Myofascial release ..


7- بعض مشاكل العظام الروماتيزمية
-- العظام فيها شغل علاج يدوى عالى Manual therapy والحاجات دى بتحتاج تدريبات مكثفة : منها أساليب تحريك المفصل Mobilization and manipulation وهتلاقى الحاجات دى فيها تكنيكات كتير منها ماتيلند وموليجان غير الماكينزى وباقى التكنيكس المشهورة .. وكل دا طبعا بيتطلب دراسة كويسة جدا لتشريح وميكانيكا المفاصل ..


-- ممكن بتستعمل وسائل كتير جدا من العلاج الكهربى : زى التيارات الكهربية لتقوية العضلات أو تقليل الآلام او المساعدة على التئام الجروح او الكسور الغير ملتئمة .. بتستعمل حاجات تقلل من الالتهابات مثلا زى الليزر عندنا بيدخل جهاز الموجات فوق الصوتية فى حالات كتير .. بتستعمل الحرارة والتبريد .. ممكن الموجات التصادمية Shockwave زى حالات الشوكة العظيمة فى الكعب heel spur


- دورنا فى القسم دا واسع جداااااااا لأنه بيتعامل مع الجهاز العضلى الهيكلى .. ومن أهم واشهر أقسام العلاج الطبيعى والى عليها شغل عالى هنا فى مصر .. معظم الحالات الى لسه فى البداية بتشفى بالعلاج الطبيعى او الحالات المتوسطة بتشفى بالعلاج الطبيعى مع بعض الأجهزة التعويضية زى مثلا الى عنده Scoliosis يبدأ يلبس نوع من البدل الخاص عشان تساعد انها ترجع العمود الفقرى لحالته الطبيعية .. الحالات المتأخرة بتتطلب تدخل جراحى زى مثلا لو مفصل الركبة تآكل تماما ..


- طبعا دورنا زى ما اتكلمنا قبل كدا مش مقتصر على العلاج ولا التأهيل بس انت كمان بتقدر تعمل تقييم وتشخيص للحالات المختلفة وهتلاقى حاجات كتير هتدرسها فى الكلية او بعد الكلية خاصة باختبارات الجهاز العضلى الهيكلى زى :


1- Examination of movement : حتى ممكن من مشاكل المشى او الحركة تتوقع نوع الخلل الى عنده المريض
2- Special tests : الاختبارات الخاصة لاجزاء معينة من الجسم
3- Reflexes and cutaneous distribution أفعال منعكسة
4- Joint play movements بعض الحركات الى بتحصل فى المفاصل
5- Palpation بتحس العضلة فيها انقباض ولا لأ
6- Diagnostic imaging التصوير والآشعة
7- Manual muscle testing and device as isokinetic devices اختبارات يدوية للعضلات
-- من التكنيكات المشهورة الى بنستعملها فى علاج حالات العظام مثلا :-
1- Pre and Post Surgical Care of all Orthopedic Conditions
2- Balance Rehabilitation الاتزان
3- Postural Training الأوضاع
4- Arthritis Management الخشونة
5- Back/Neck Rehabilitation الظهر والرقبة
6- Joint Pain Management الآلام
7- Headache Management الصداع
8- Spinal Stabilization العمود الفقرى
9- Myofascial Release الفاشيا
10- Auto Accident Injuries بعد الحوادث
11- Work Injuries اصابات ناتجة عن العمل مثلا فى وظيفة معينة
12- Muscle energy techniques بعد وسائل العلاج اليدوى المستخدمة
13- Maitland - mulligan - McKenzie من اشهر طرق العلاج اليدوى
- الحقيقة تخصص محترم وعالى جدا جدا من تخصصات العلاج الطبيعى


-----------------------------------------------------------------------------------------


قسم الأعصاب

Neurological Physical Therapy




- الحقيقة هو دا المفضل عندى من التخصصات من أعلى أعلى أعلى التخصصات الى بتحتاج دراسة عالية وتدريب عالى وعلم جامد والجهاز العصبى عامة من أعقد الأجهزة فى جسم الانسان دا اذا مكنش هو الأكثر تعقيدا يعنى الأعصاب يعنى المخ والحبل الشوكى والاعصاب والاتزان والحاجات دى ..

اسم القسم الكامل : قسم العلاج الطبيعى لاضطرابات الجهاز العصبى العضلى وجراحتها .


وبرده من الاسم كدا واضح القسم دا بيختص بايه او ايه هو تخصص الأعصاب .. هو التخصص الى بيهتم بفحص وبتقييم وتشخيص وعلاج وتأهيل مرضى الجهاز العصبى العضلى Neuromuscular وتأهيل قبل وبعد العمليات الجراحية للجهاز العصبى .


- أمراض الجهاز العصبى :


1- اصابات_و_أمراض_المخ_وجراحتها Brain : مثلا زى أمراض الشلل بوجه عام زى الشلل الرباعى والنصفى والرعاش وغيرهم و السكتات الدماغية فى المخ والتهاب الأغشية السحائية وبصفة عامة اصابة اى مركز فى المخ بيؤدى لمشكلة معينة على حسب وظائف المركز دا بتكون المشاكل و الأعراض وكمان تأهيل قبل وبعد عمليات المخ



2- اصابات_و_أمراض_النخاع_الشوكى_وجراحتها Spinal Cord : ممكن يكون التهاب فى الاغشية السحائية الى بتحيط بالنخاع الشوكى او ورم فى منطقة معينة او نتيجة صدمة او اصابة وعلى حسب مكان الاصابة فى النخاع الشوكى بتكون الأعراض والمشاكل برده وتأهيل قبل وبعد عمليات النخاع الشوكى



3- اصابات_و_أمراض_الجهاز_العصبى_الطرفى_وجراحتها Peripheral Nerves : وعلى حسب الوظائف الى بيقوم بيها العصب الى تمت اصابته بتكون الأعراض سواء حسية فيحصل مشاكل فى الاحساس و حركية وممكن توصل لشلل او ذاتية Autonomic على حسب الوظيفة .. وبرده التأهيل قبل وبعدها عمليات الأعصاب الطرفية


4-مشاكل_الاتزان وال Vestibular System الجهاز الدهليزى وجراحتها


- من_أشهر_الأمراض_الى_ممكن_يتعامل_معاها_العلاج_الطبي عى :


1- تأهيل مرضي السكته الدماغيه Stroke
2- تأهيل مرضى الشلل بأنواعه زى الشلل الرعاش Parkinson's disease او الشلل النصفى او الرباعى او غيرهم
3- التصلب المتعدد multiple sclerosis
4- chronic back pain
5- Charcot-Marie-Tooth disease (CMT)
6- الشلل الدماغى بس غالبا دا بيتعامل معاه تخصص الأطفال فى صغار السن مش المراهقين cerebral palsy
7- التهاب العصب الوجهى و الشلل فى الوجه facial palsy
8- Spasticity الشلل التشنجى
9- اصابات وأمراض النخاع الشوكى
10 - مشاكل الاتزان والتناسق العصبى العضلى
11- ومشاكل الأعصاب الطرفية
12- تأهيل قبل وبعد عمليات الجهاز العصبى


- دور_العلاج_الطبيعى :


1- بتعمل فحص تقييم وتشخيص للحالة : من خلال مجموعة كبيرة من الاختبارات زى Neurodynamic tension tests .. وتقدر تستعمل رسم الأعصاب والعضلات وغيرها من الوسائل .


2- بتعالج وتأهل مرضى الأعصاب وغالبا بتلاقى بعض أنواع الخلل دى موجودة فى المرضى :

أ- مشاكل فى الرؤية
ب- مشاكل فى الاتزان والتناسق العصبى العضلى
ج- مشاكل فى المشى وممارسة الانشطة اليومية
د- مشاكل فى العضلات سواء كانت ضعف فى العضلات او تشنج فى العضلات
- برنامج التأهيل بتاعك بينقسم ل3 مراحل فى المراحل الحادة ( الأيام الاولى للاصابة أو المرض ) والمراحل المتوسطة والمراحل المتأخرة .. وكل ما بيكون برنامج التأهيل والعلاج بدرى كل ما بتدى نتائج أحسن
و بالتالى بيكون من ضمن الحاجات الى بتستعملها مع مرضى الأعصاب :-


1- Balance exercises تمارينات الاتزان
2- Coordination exercises تمارينات التناسق العصبى العضلى
3- Neural mobilization and testing اختبارات
4- Strengthening and endurance exercises تمارينات لزيادة التحمل وقوة العضلات
5- Bobath concept
6- Frenkel exercises
8- Aerobic exercises تمارينات هوائية
9- Speech and breathing exercises تمارينات للتنفس والكلام
10- Gait re-education تدريب على المشى
11- Relaxation techniques تمارينات الاسترخاء
12- ROM exercises تمارينات لاستعادة مدى حركة المفصل
13- Proprioceptive training
14- Electrical Stimulation
15- Heat and Cold therapy
16- Ultrasound - shortwave - Low-power LASER .. etc
17- Hydrotherapy and Aquatic exercises العلاج المائى والتمارينات المائية
18 - Stretching and muscle energy techniques
وغيرهم كتير الحكاية واسعة
- احنا بنلعب بشكل كبيرة على خاصية فى الجهاز العصبى اسمها المرونة او اللدونة العصبة Neural Plasticity وهى ان المخ عنده القدرة انه بكون وصلات عصبية جديدة ويتعلم مهارات جديدة وبالتالى المريض الى حصل عنده مثلا شلل او غيره بتقدر انك انت تعلمه وتدربه على الحركات والمشى والأنشطة من اول وجديد انما المكان الى حصل فيه مشكلة فى المخ دا مش هتقدر ترجعه زى ما قلنا قبل كدا


- يكفى انك فى التخصص دا بتقدر تتعامل مع أمراض يعتبر مكنش ليها حل او انك تخلى مريض مشلول يرجع يتحرك تانى .. بس طبعا تخصص الأعصاب من أعلى التخصصات وبيحتاج تعمق وتدريب عالى جدا وغالبا حالات الأعصاب بتتأخر شوية على ما تدى نتيجة بتقعد من 6 شهور لسنين على عكس مثلا العظام او غيره من التخصصات .


---------------------------------------------------------------------------------------------

قسم الأطفال
Pediatric Physical Therapy

. . . .
عازين نتكلم ع فرع من فروع العلاج الطبيعي بعتبره من امتع اقسامه وفروعه وهو قسم الاطفال pediatric .....
.
اولا هو اكتر قسم بنحس فيه بدورنا واهميتنا كدكاتره انك تلاقي طفل صغير انت الامل الوحيد ليه انه يرجع يمشى تانى ويمارس حياته بشكل طبيعي ع قد ما يقدر . وبيكون اهله حاطين فيك امل كبير انك تخليهم يشوفوا ابنهم او بنتهم طبيعيه ذى بقيه الاطفال .... وفالحقيقه بالرغم من انه امتع قسم الا انه يعتبر من اصعب الاقسام فطبيعه عمله ... لان شغله بيبقي متعب وجلسه الطفل فالغالب بتكون ساعه كامله او اكتر كمان فبيكون في حمل كبير ع الدكتور المعالج ..ولكن تحسن الطفل جلسه بعد جلسه واكتسابه حركه جديده بيديك حافز قوى انك ترجع الطفل ده لحالته خاصه انه مش بيقعد معاك اسبوع او اتنين لا ده ممكن يبقي سنه او اتنين او 10 كمان في الامراض المزمنه ........
.
.
.
ولو جينا نتكلم عن الامراض اللى بنعالجها فالقسم ده فهى لا تعد ولا تحصى زى حالات الملخ اللى بتكون ناتجه عن خطا اثناء الولاده .... او اطفال cp ( cerebral pulsy ) و امراض ضعف العضلات و myasthenia gravis وحتى cancer والتوحد autism ومتلازمه داون وغيرها الكتيييير من الامراض اللى بتقابلك فسوق العمل .... ولكن ناس كتيييير تسال .. هو العلاج الطبيعي دوره ايه فالحالات دى ... ايه فايدته واهميته ...... وكمان الطلبه الجدد مننا اللى لسه العلاج الطبيعي مجال غامض بالنسبالهم وميعرفوش انه بحر واسع العلم الحديث اثبت انه داخل فعلاج اغلب الامراض فالوقت الحاضر ....... عشان كده خلونا نتكلم عن فوائد العلاج الطبيعي للاطفال ع سبيل الاجمال وليس الحصر :
ــــــــــــــــــــــــــــــــــــــــــــــ



تحسّين قدرات الحركات الضخمة (الجلوس - الوقوف - المشي - الحبو - التقلب......الخ)
- تحسّين قدرات الحركات الدقيقة ( حركة اليدين)
- تنبيه مهارات الوصول للأطراف العلوية
- تقوية العضلات الخاصة بمهارات الوصول الخاصة بالأطراف العلوية
- تدريب وإعادة تدريب الجهاز العصبي المركزي neural plasticity
- .زيادة التحكم في النغمة العضلية في الاتجاه الطبيعي من خلال neural plasticity
- تحسّين وضعية الجسم لأقرب ما يمكن إلى الطبيعي.
- الوصول إلى القدرة الوظيفية القصوى لدى المريض.
- يعيد الوظيفة الفسيولوجية الطبيعية للمفاصل.
- يعيد الوظيفة الفسيولوجية الطبيعية للعضلات. - يعيد الوظيفة الفسيولوجية الطبيعية للعظام.
- يقلل الحساسية المفرطة للمس .
- يعلم النمط الصحيح للحركة.
- ينبه الجهاز الحلزوني ( المسؤل عن الاتزان في الحركة و عن الانتباه في النواحي الذهنية)
- يحسّن الاتزان والتوافق العضلي العصبي.
- تدريب الطفل علي استعمال إمكانياته وقدراته القوية للتعوّيض عن قدراته الضّعيفة.
- تدريب الطفل على السيطرة علي تشنج العضلات، ونقص التوتر، والحركات اللاإرادية.
- تنبيه وزيادة مهارات الطفل المضادة للجاذبية.
- زيادة القوة المضادة للجاذبية عند الطفل
- تحسّين القدرات الخاصة بالإدراك الحسي.
- يحسّن الكلام عن طريق تقوية العضلات الخاصة بالتنفس و ايضا عن طريق زيادة الحركة و بالتالي زيادة المدارك و ايضا تقوية العضلات الخاصة بالكلام مثل الشفاه و اللسان و سقف الحلق.
.
.
.
وفي اساتذه لينا روااااااد وعلماء كبار في هذا المجال وما اكثرهم ويارب ان شاء الله نكون فيوم من الايام فنفس مكانتهم العلميه


-----------------------------------------------------------------------------

تخصصات أخرى فى العلاج الطبيعى

Physical Therapy For Polliative care and oncology
العلاج الطبيعى للرعاية التلطيفية والأورام



- ايه هى الرعاية التلطيفية Polliative Care : دا عبارة عن فرع من الرعاية الصحية و هدفه الأساسى التخفيف من آلام المريض والتقليل من معاناته .. ولما نقول التخفيف من معاناة المريض ييجى فى دماغك كل نواحى الانسان الناحية الجسدية والناحية النفسية والناحية الاجتماعية وحتى النواحى العاطفية والروحية تخيل ؟!


- ودا بيدخل فيها جزء كبير جدا من الفريق الطبى مش دكتور العلاج الطبيعى بس ..


- الرعاية التلطيفية نقسمها ممكن ل3 حاجات :


1- الانسان المريض بمرض ممكن يتشفى منه .. بس المرض دا آلامه ومعاناة قوية ..
2- رعاية المريض المصاب بمرض خطير ومزمن وبرده معاناة المرض والآلام قوية ..
3- المريض الى الطب شخص ان حياته هتنتهى ؟!


- لو هنتكلم عن الأورام الخبيثة او السرطانات يعنى فالمشكلة ان معظم الأفراد الى كانوا بيتعالجوا من السرطان بسبب العلاج الاشعاعى والكيماوى والعمليات الجراحية كانوا بيموتوا وبالتالى هنا بيتدخل دور العلاج الطبيعى ودوره عبارة عن 3 حاجات :


1--أول مرحله تأهيل المريض بدنيا قبل الجراحه أو قبل العلاج الكيماوى ،ف المرحله دى بيكون دورك انك تعمله تقوية بدنية لجسمه قبل العلاج عشان يقدر يصمد ويكمل


2--تانى مرحلة أثناء العلاج هدفها الوقايه من مضاعفات العلاج زى استقساء اﻷطراف وعشان يتحمل اﻷلم (عن طريق اﻷجهزة الكهربائية وتقنيات الحرارة والبرودة) يعنى بتحاول تقلل المضاعفات وتسيطر على كل الأعراض الى ممكن تسيطر عليها


3--تالت مرحلة بعد الشفاء ودى عشان يرجع يمارس حياته طبيعى زى اﻷول وأحسن كمان


- بالنسبة للمريض الى بيكون الطب شخص حالته انه هيموت انت بتحاول تخليه يعتمد على نفسه بأكبر قدر ممكن برده وتسيطر على الأعراض وتمنع المضاعفات وتأخر من الوفاة لأكبر قدر ممكن ان شاء الله




- فى تخصصات تانية موجودة فى العالم منها :


1- العلاج الطبيعى للحيوانات : Animal practice .. ونشر كتاب سنة 1967 عن العلاج الطبيعى للأحصنة



2- التخصص فى وسائل العلاج اليدوى المختلفة Manual Therapy


3- التخصص فى أماكن الوخز بالابر الصينية Acupuncture



4- التخصص فى الوسائل الكهربية الفيزيائية ( الالكترو ) Electrophysical Agents


5- التخصص فى مجال الصحة الذهنية والنفسية Mental Health
6- اخيرا مجال البحث العلمى Scientific research

- ولينا دور فى الأطرف الصناعية Prosthetic limbs ودور فى الجبائر Orthosis ( دي احد الوسائل المستخدمه ف العلاج الطبيعي عموما تستخدم ف الحالات العضليه والعصبيه زي الصلب المشقوق والشلل الدماغي والجلطات لانها تساهم ف تقليل الالم وزياده المدي الحركي وتثبيت المفصل والتأهيل ما بعد الكسور
يتم تصنيع الجبائر من الكربون والبلاستك والالياف ..
هناك العديد من الجبائر تستخدم تسمي حسب المكان المستخدم مثلا جبيره الكاحل والقدم تستخدم ف تثبيت مفصل الكاحل ... )
- وغير معامل تحليل الحركة والمشى ورسم الأعصاب والعضلات وغيرها كتير لو فضلنا نتكلم مش هنخلص اعتبر العلاج داخل فى كل حاجة من تخصصات الطب


- وبكدا انتهت كل تخصصات العلاج الطبيعى فى العالم والحمد لله وانتظرونا فى سلاسل جديدة عن العلاج الطبيعى باذن الله والسلام عليكم ورحمة الله وبركاته





فريق صفحة ( يومك طبيعى )
Amr Elsareih