شوية ملاحظات ونصايح مهمة جداً للمقبلين على الثانوية الأزهرية

سيف-الاسلام · #1 01-09-2008, 01:38 AM

بسم الله الرحمن الرحيم
السلام عليكم ورحمة الله وبركاته

كيف حالكم أيها المقبلين على الثانوية الأزهرية؟

أرجو أن تكونوا بخير.

اليوم أنا معكم بشوية ملاحظات هامة وشوية نصايح مهمة على قد تجربتى:

أولاً: هقوللكم ان اللى يعمل بالملاحظات والنصايح دى بإذن الله هيكون من الأوائل على الجمهورية.
ثانياً: سؤال سيطرح نفسه: طب انت يا سيف الاسلام ما طلعتش من الأوائل على الجمهورية ليه؟
أقوللكم: أولاً أنا بحب أذل نفسى شوية علشان ما تتكبرش على حد فكنت بدعى ربنا انى أجيب مجموع حلو بس ما أطلعش من الأوائل أبداً.
وثانياً إنى ما عملتش اللى عليا وما عملتش كل الملاحظات دى وكانت نيتى بها بعض السوء وغششت الولاد فى مادة الصرف فكانت جزاتى انى لازم أنقص لأنى ما عملتش اللى عليا.

تعالوا بينا بقا نشوف الملاحظات والنصايح اللى انا استفدتها (وطبعاً كما تعودت أن أقول: التجربة الواحدة لا تكفى لاثبات نظرية)

أولاً: انت عايز فى الثانوية الأزهرية تدخل تحل فى الامتحان وتجيب النهاية وبس. وبعد كده تبقى تذاكر اللى انت عايزه فى أى سنة تانية.
فتعالوا بينا ناخد المختصر المفيد فى الثانوية الأزهرية.

نمسك مادة مادة:
- القرآن الكريم:
الامتحان التحريرى: دا بقا مكشوف أوى فى الأزهر ومحتاج جهد بسيط علشان تجيب النهاية فيه. ازاى يعنى؟
أقلك ازاى؟
الامتحان التحريرى عبارة عن أربع أسئلة:
السؤال الأول والثانى فى المنهج: وطبعاً واحد عاوز يتفوق لازم يحفظ المنهج زى اسمه.
السؤال الثالث: ودا يستحق يبقى فى الماضى كله ولكن هو بيبقا دايماً فى:
1- أول البقرة لغايت المنهج (ودى بتبقا نقطة من السؤال)
2- آل عمران كاملة (ودى بتبقى نقطتين من السؤال)
يعنى مطلوب منك للسؤال الأول والثانى والثالث: حفظ سورتى البقرة وآل عمران.
نيجى للسؤال الرابع: السؤال الرابع ده دايماً بيبقا فى أوائل السور ودايماً تلت آيات أو خمسة: فحضرتك هتمسك القرآن من أوله لآخره وتحفظ أول خمس آيات فقط من كل سورة. أكد عليهم وبلاش تزود عن كده علشان ما تنساش الخمسة دول.
وخد بالك دايماً بيجيب سورة من السور اللى فى السؤال الرابع من السور اللى بتبدأ ب "حم"
فخد بالك من السور دى واوعى تتلخبط فيهم لتضيعلك درجتين.

يعنى مطلوب منك تحفظ البقرة وآل عمران ومطلوب منك كل يوم تحفظ خمس آيات من أول السورة.
كل يوم تحفظ خمس آيات من أول سورة
فف100 يوم هتلاقى نفسك خلصت أوائل سور القرآن .
وترجع تعيد عليهم.
كده يبقا ضمنت بإذن الله الامتحان التحريرى فى القرآن الكريم.

- الامتحان الشفوى: دا بقا مشكلة صعبة جداً: لأنها تتوقف على تقدير الأستاذ لك. ولكن تعال ناخد بردوا شوية ملاحظات عليه.
لو دخلت لأستاذ وسألك: حافظ ايه يا ابنى أو يا بنتى؟
وانت طبعاً ممكن تكون مش حافظ القرآن كله أو حافظه بس مش حلو (ودا غالب الطلبة)
انت بقا ترد على الأستاذ وبثقة وتقوله: حافظ القرآن كله بإذن الله تعالى يا أستاذ.
أهم حاجة الثقة فى النفس. اوعى تنهز قدامه.
ولو سألك تانى: متأكد يا ابنى؟ قله بثقة: متأكد طبعاً يا أستاذ.

وبعد كده هيسألك وأسئلة الاساتذه دول هتبقا على قسمين:
فى أساتذه: يبدأ يسألك فى كل سورة من سور القرآن (وطبعاً حضرتك هتجاوب فى سورة آل عمران والبقرة وأوائل السور لأنك حافظهم للتحريرى وغير كده مش هتجاوب)
مش مشكلة اوعى تنهز. وصدقنى لو سألك فى كل سورة من سور القرآن يبقا هيديك النهاية حتى لو ما جاوبتش الا فى البقرة بس.

وأهم حاجة انك ترتل وانت بتقرأ. وتقرأ بثقة عالية فى نفسك. واوعى تقول للأستاذ كلمة غلط أو كلمة استعلاء أو تكبر.

وفى أساتذه: يسألك فى المنهج وبس. ودا تخاف منه جداً. ممكن يديك تسعة من عشرة. والدرجة دى هتضيع منك كتير.

وممكن الأستاذ اللى بيمتحنك مش يسألك: حافظ ايه؟
ودا تخاف منه جداً لانه تقريباً وغالبا دا بيحصل: هيحط للجنة كلها درجة واحدة. ييحط للكل عشرة ، ييحط للكل تمانية أو تسعة.

ربنا يوقعك فى واحد من اللى بيسألوا فى السور كلها بس يديك النهاية. آه هيتعب أعصابك لكن هيديك النهاية.

وواحد منكم هيخطر فى باله سؤال ويقول: طب يا سيف الاسلام انت ناقص فى الشفوى درجتين ليه؟
هقله: أنا ناقص لسبب: ان الأستاذ اللى كان بيمتحنى كنت متخانق فيه يومها.
جه قالى: غشش الواد اللى جنبك. قلتله: لأ.
قالى: دا جزاتنا اننا بنساعدكم وفى الآخر تعملوا فينا كده.
قلتله: جزاتكم طبعاً لأن دى مش شكل لجنة ولا دول شكل مراقبين وهتتحاسبوا على كده يوم القيامة واعمل اللى انت عايزه يا أستاذ. أنا ما بخافش إلا من ربى.

خلصت اللجنة طلعت رحت الشفوى لقيته فى وشى.
هو ادانى 8 علشان انا كنت حافظ والحمد لله مفيش سؤال مش جاوبته مع انه سأل فى كل سورة من سور القرآن.
ولكن نقصنى درجتين علشان قليت أدبى عليه.

فنصيحة منى: سايسهم وتعامل معاهم حلو.
وتصدقوا انى بتكلم معاهم حلو خالص بس اليوم ده زعقت فيه لأنى كنت فى الامتحان وفى حتة شاكك فيه وخايف لتطلع غلط فكانت أعصابى تعبانة وهو جاى يقلى: غششه.

ثانياً: التفسير:
دا بقا يا أستاذى ويا أستاذتى بيسموه عندنا: بعبع الثانوية الأزهرية.
ولكن أنا اكتشفت انه اليف جداً وطيب وزى العسل وفيه علم كتير جداً.
بس عاوز شوية تنظيم ويكون التنظيم ده من أول السنة. علشان ما تتزنقشى فيه فى آخر السنة زيى.
تنظيم ازاى يعنى من أول السنة؟؟؟؟؟
أقلك: كتاب التفسير فيه حاجات كتيرة ممكن تلخبطك فى الامتحان حتى لو مذاكره وحافظه زى اسمك. بس هتتلخبط.
فهنعمل حاجة لطيفة ظريفة:
هنجيب من أول السنة دستة ورق فلوسكاب (الورق الكبير المسطر)
وهنكتب فى ورقة منهم من فوق:
تجميع لآراء الجمل فى كتاب التفسير.
وتروح جاى عامل جدول كاتب فى الخانة الأولى منه اسم السورة (ما انت عليك سورتين فى العلمى)
وفى خانة تكتب رقم الفقرة أو الدرس يعنى (لأن المفروض فى الامتحان انك هتتذكر حتى شكل الدرس)
وفى خانة تكتب الآية اللى الجمل ليه رأى فيها.
وفى خانو تكتب رأيه فى الآية.

وهكذا.
وملاحظة هتلاقى رأيين للجمل فى سورة محمد.
خد بالك من الرأى الصغير اللى الناس بتنساه ده.

ونجيب ورقة تانية ونكتب فوق: تجميع لآراء القرطبى.
وتجمعهم زى الجمل

وتجيب ورقة تالتة ونكتب فوق: تجميع لآراء الطبرانى.
وتجمعهم.

أما عن الكشاف فآرائه كتيرة وصعب ان يجى فى الامتحان يقلك هات رأى الجمل فى الآية دى ويسكت من غير تبيين ولا توضيح.

أما الجمل والطبرانى والقرطبى فبيجى فى الامتحان يحطلك آيات ويقلك: ما رأى الجمل فى هذه الآيات؟
وانت تقعد تعصر فى ذاكرتك عن أول كلمة من الراى. ولو حد قالهالك هتكمل.
لكن مش هتلاقيها فى ذاكرتك أبداً.
لكن لو عملت زى ما انا بقلك وجمعت آرائه فى ورقة وراجعتها ليله الامتحان. هتدخل الامتحان أسد.

وتجيب كمان ورقة رابعة تكتب فيها: المقصود من قول الله تعالى " الذين كفروا"
هتلاقى فى السورة كذا " الذين كفروا" وكل واحدة وليها مقصود.
فتجمعهم علشان ما تتلخبطش.

وتجيب ورقة خامسة وتكتب فيها: اعراب الفاءات.
لأن هتلاقى عندك كذا فاء فى السورة وكل واحدة ليها اعراب (واحدة للترتيب والتانية للعطف وكده يعنى)

وتجيب ورقة سادسة وتكتب فيها : اعرابات ومعانى بتلخبط فيها.
اكتب كده فوق.
وتكتب فى الورقة دى الحاجات اللى حضرتك حاسس انك ممكن تنساها أو تتلخبط فيها.

وممكن تلاقى مثلاً فى تجميع الطبرانى أو القرطبى أو غيره هياخد أكتر من ورقة.
فمن البديهى ومن غير ما أقول: هتجيب ورقة كمان وتكمل فيها وبعدين تدبسهم فى بعض.

وطبعاً: التفسير علشان تضمن فيه النهاية لازم يتحفظ بالنص. اعتبر اللى بيصحح ما بيفهمش وحطها بالنص ليه فى ورقة الاجابة علشان مش يبقى ليه حجة.
حتى المعنى العام للآية او شرحها يعنى. دا يتحفظ برضوا بالنص.
احنا عاوزين أى درجة.
ومش عاوزين مصحح غبى ينقصنا درجة ولا درجتين لأنه مش فاهم حاجة.
تصدقوا والله فى التفسير ده كان بيبقا هاين عليا أكتبله رقم الصفحة كمان.

أكملكم المواد التانية بعدين لأنى ورايا شوية مشاغل.
تابعوا معى فى هذا الموضوع.
وأظن انى بتكلم بأسلوب سهل جداً.
أسلوب لم اعهد أن أتكلم به قبل ذلك.
ولكن لا أعرف لماذا أتكلم به معكم؟
فسامحونى على ذلك الأسلوب العامى.

وبإذن الله لنا عودة ومع باقى المواد.

أيمن الوزير · #2 01-09-2008, 02:35 PM

يا عبقرينو نصايحك تودي وراء الشمس

سيف-الاسلام · #3 02-09-2008, 05:22 AM

ليه كده يا أستاذى؟؟؟؟؟؟؟؟؟؟؟؟
ما أنا عملت كده.
والحمد لله ربنا وفقنى.
تودى ورا الشمس ليه؟؟؟
أرجو توضيح وجهة نظر حضرتك وياريت بلاش تريقة.

أيمن الوزير · #4 02-09-2008, 02:47 PM

يا أخ سيف لماذا أخذت كلامي من وجهة نظر فيها تريقة لا والله بل شكرا وألف شكر علي معلوماتك العبقرية

ولكن اسمعني

أولا أنا معلم لغة عربية ومن السهل والحمد لله أقدم منهج أي مادة في أقل من ثلاث أو أربع ورقات بمعني أنه يمكن أن أضع منهج النحو مثلا أو الصرف أو حتي النصوص في ثلاث ورقات وأتحدي أنه من خلال الثلاث ورقات ينجح الطالب ويحصل علي ما لا يقل عن خمسين بالمائة بل قد يصل إلي سبعين وثمانين بالمائة ليس كلام بل عن تجربة مدرس خبرة يعرف كيف يكون الامتحان وكيف يمكن للطالب أن يتعامل مع الامتحان

كما فعلت أنت في مادة القرآن

ولكن للأسف هذه الطريقة تفيد من يبحث عن النجاح لا من يبحث عن التميز والتفوق فمن أراد التميز في القرآن مثلا لابد أن يكون حافظا له جيدا بصرف النظر عن الظروف التي قد تخدم بعض الفشلة

مثلا من أراد أن ينجح في النحو أو باقي الفروع العربية قد يتعامل مع الورقات الثلاثة ( شغل الثلاث ورقات ) يختار من المنهج أشياء ويترك أشياء
أما البارع المتفوق الذي يبحث عن التميز وما أكثرهم في طلاب الأزهر فإنه لابد أن يلم بكل كبيرة وصغيرة في المنهج بل إن استطاع أن يعود إلي مراجع أخري فليفعل

والخلاصة وعذرا علي كلامي الكثير فأنا أريد أن أوضح وجهة نظر معينة فطريقة الثلاث ورقات هذه قد تفيد في النجاح فقط وقد يصاحبها شوية حظ لا في التميز وبالتالي فلا نقول بهذه الطريقة نحصل علي ترتيب علي الجمهورية

وفقك الله أخي في الجامعة وأعزك ونفع بك ولا تنسي أن تكمل لنا باقي المواد كي نستفيد من تجربتك وننصح بعض الطلاب الضعاف الذين لا يعرفون كيف ينجحون في المادة

Dream girl · #5 02-09-2008, 08:50 PM

شكرا على المعلومات دى ومستنية الباقى

احمد فاروق1991 · #6 02-09-2008, 09:34 PM

اعتقد انك تقصد من دة كلة انك لازم تقعد طول النهار تحفظ فى الدروس ومش مهم انت فاهم ولا اية

لامهم انك تدخل الامتحان ترص الكلام اللى انت حفظتة فى قلب الورقة

على فكرة انا مش بهاجمك هو دة فعلا حال التعليم فى الازهر
شعارنا الاساسى لا للفهم عليك فقط انت تحفظ وشوية فهلوة وخفة ايد

سيف-الاسلام · #7 02-09-2008, 11:21 PM

اقتباس:

المشاركة الأصلية كتبت بواسطة أيمن الوزير

يا أخ سيف لماذا أخذت كلامي من وجهة نظر فيها تريقة لا والله بل شكرا وألف شكر علي معلوماتك العبقرية

ولكن اسمعني

أولا أنا معلم لغة عربية ومن السهل والحمد لله أقدم منهج أي مادة في أقل من ثلاث أو أربع ورقات بمعني أنه يمكن أن أضع منهج النحو مثلا أو الصرف أو حتي النصوص في ثلاث ورقات وأتحدي أنه من خلال الثلاث ورقات ينجح الطالب ويحصل علي ما لا يقل عن خمسين بالمائة بل قد يصل إلي سبعين وثمانين بالمائة ليس كلام بل عن تجربة مدرس خبرة يعرف كيف يكون الامتحان وكيف يمكن للطالب أن يتعامل مع الامتحان

كما فعلت أنت في مادة القرآن

ولكن للأسف هذه الطريقة تفيد من يبحث عن النجاح لا من يبحث عن التميز والتفوق فمن أراد التميز في القرآن مثلا لابد أن يكون حافظا له جيدا بصرف النظر عن الظروف التي قد تخدم بعض الفشلة

مثلا من أراد أن ينجح في النحو أو باقي الفروع العربية قد يتعامل مع الورقات الثلاثة ( شغل الثلاث ورقات ) يختار من المنهج أشياء ويترك أشياء
أما البارع المتفوق الذي يبحث عن التميز وما أكثرهم في طلاب الأزهر فإنه لابد أن يلم بكل كبيرة وصغيرة في المنهج بل إن استطاع أن يعود إلي مراجع أخري فليفعل

والخلاصة وعذرا علي كلامي الكثير فأنا أريد أن أوضح وجهة نظر معينة فطريقة الثلاث ورقات هذه قد تفيد في النجاح فقط وقد يصاحبها شوية حظ لا في التميز وبالتالي فلا نقول بهذه الطريقة نحصل علي ترتيب علي الجمهورية

وفقك الله أخي في الجامعة وأعزك ونفع بك ولا تنسي أن تكمل لنا باقي المواد كي نستفيد من تجربتك وننصح بعض الطلاب الضعاف الذين لا يعرفون كيف ينجحون في المادة

شكراً أستاذى العزيز على كلامك الجميل.
وجزاك الله خيراً.
وأنا آسف إنى حطيت الموضوع ده.
آسف جداً.

بس معلومة لحضرتك:
محمد عاطف عبد الحفيظ السيد.
التالت على الجمهورية السنة اللى فاتت.

اللى وصله لكده الملاحظات دى.

ايهاب نهاد فرحان.
الأول على الشرقية السنة دى.

اللى وصله لكده الملاحظات دى.

محمد عاطف محمد غمرى (اللى هو سيف-الاسلام)
100.8%

اللى وصلنى الملاحظات دى.

وتعليقاً على كلامك وأنا أكرر أسفى على نشر الموضوع:

ما فيش مدرس لغة عربية ممتاز يحط تلت ورقات فيهم المنهج والطالب يدخل يجيب تمانين فى الميه.
أبداً.
اللغة العربية لغة فهم.
يعنى النحو ده.
فهمته وبس.
دخلت جبت النهاية.
ودى كانت هتبقى فى ملاحظات النحو.

الصرف ده فهم مع حفظ.
تشوف الكلمة الأول: ايه اللى انقلب فيها.
تبدأ تشوف المواضع اللى انت حفظتها.
وبفهمك تطبقها على الكلمة.
توصل لنتيجة رائعة.
وطبعاً فى كلمات هتلاقى الطلاب فاكرينها من غير تطبيق من غير ما يشوف ايه اللى انقلب فيها.
بس لازم يركز وإلا هيضيع فى الصرف.
الصرف عاوز تركيز جامد وواحدة واحدة.
وبالراحة جداً.
والوقت طويل مع الطالب.

أما عن اللى عملته فى القرآن فمش معنى كده ان الطالب يعمل ده وبس.
لكن دا الأساس.
دا اللى يأكد عليه.
وطبيعى اللى وصل تالتة ثانوى لازم يبقى حافظ القرآن كاملاً بتجويده.
ولكن مع ضغط الثانوية وضغط الامتحان ممكن ينسى.
فلازم يعرف ايه اللى يركز عليه جداً جداً علشان مش ينساه مهما كانت الظروف.
يحفظه زى اسمه.

وبعدين أنا أتحدى أى طالب أزهرى ملم بكل صغيرة وكبيرة فى المنهج ويدخل الامتحان ما يتلخبطش.
أنا كنت لامم المناهج.
ولكن فى حاجات لازم نركز عليها.
لأن عمر ما عقلك يقدر فى سنة واحدة يركز على كل المواد دى بكل كلمة وكل حرف فيها وما يتلخبطش.

أنا كان معايا طلاب بيبقوا حافظين الكتاب زى اسمهم وفاهمينه جداً.
أنا كان معايا طالب بيسمع الكتاب وفاهم كل كلمة فيه.
لكن مش مركز على الأساسى.
والله والله العظيم كان بيدخل الامتحان يتلخبط فى نقطة.
آه هى نقطة واحدة.
لكن دى تضيعه.
طالب مركز على القرآن كله.
دخل الامتحان يدور فى دماغه على تالت آية فى سورة الأحقاف.
مفيش.
ضاعت درجة منه.
ودرجة على درجة.
يضيع مستقبل الطالب كله.

ومع احترامى لحضرتك إلا أن طريقتك فى الكلام معى ليست طريقة تربوية.
أخطأت فصوبنى بلا تريقة.

وأنا آسف وياريت حد يطلب من الادارة حذف الموضوع كاملاً وأوعدك يا أستاذى الفاضل إنى مش هضايق حد فى المنتدى ده تانى.

وبوركت يداك التى كتبت.
وجُزيت خيراً.
وحفظك الله ورعاك وأدخلك وأسرتك الفردوس الأعلى بغير حساب ولا عذاب اللهم آمين.

وأشكرك جداً أستاذى الفاضل.
ولكن منى كل تقدير واحترام.
وسامحنى إن كنت قد أخطأت ولكن أعدك بأنى لن أضايقك أبداً.

طالبة ازهرية · #8 03-09-2008, 04:08 PM

اولا جزاك الله خيرا يا سيف الاسلام
وربنا يجعله فى ميزان حسناتك
وانا متفقة مع كل كلامك
انا حاصلة على 99.2 % والحمد لله
وكنت بعمل اللى بتقول عليه فعلا
انا هقول حاجه جايز بعض الناس تندهش منها ولكن تاكيدا لكلامك
انا حافظه سورة البقرة وال عمران والنساء وجزء عم فقط ... وربنا يكرمنى بحفظه كاملا
ولكنى عرفت طريقة الامتحان بتيجى ازاى
فجمعت الايات الاولى من كل سورة فى ورق وحفظتهم وطبعا انا حافظة سورتى البقرة وال عمران
وجبت 30 من 30 فى القران والحمد لله على الرغم انى مش حافظه القران كاملا
فى نظير بنات حافظات للقران كله ولكنهم نقصوا درجتين فى التحريرى وربنا يكرمهم ...ومش معنى كلامى ان الطلاب والطالبات مش يحفظوا القران كاملا ولكن يركزوا على نقط معينة
اما ماده التفسير فعملت مذكرات بردو
ولكن كل درس اطلع منه المعانى والاعرابات خصوصا الفاء والاستفهامات وما المقصود بالاية والاسئلة المشهورة فى كل درس واسئلة الكتاب كمان
وفى كل المنهج على كده

وبجد عن تجربة منى كل كلامك مظبوط مائه فى المائه
وانا حبيت انى ارد فى الموضوع تاكيدا لكلامك وان ده الطريق للوصول الى التفوق
ولكنى اطالب انك تكمل بقيت ملاحظاتك ونصائحك
حتى تفيد الاخرين من المقبلين على الشهاده الثانوية الازهرية
وربنا يجعل ذلك فى ميزان حسناتك

سيف-الاسلام · #9 04-09-2008, 12:11 AM

اعذرينى أختى طالبة أزهرية ولكن قد قررت أن أترك منتداكم بلا رجعة.
وسامحينى ولكن لا أستطيع أن أكمل هنا.
ومبروك على مجموعك الهايل ده ويا رب أشوف حضرتك أستاذة دكتورة فى كليتك بإذن الله تعالى.

وأنا مع إنى قررت أن أترك المنتدى إلا أننى أرد عليكم فى هذا الموضوع احتراماً لمن أتعب نفسه وقدرنى ورد على موضوعى.
ورجاء من الإدارة ان تقوم بمسح الموضوع فوراً.

وشكراً لك أختى طالبة أزهرية وجزاك الله خيراً وأسكنك الفردوس الأعلى بغير حساب ولا عذاب وجعلك من الأوائل الفائزين يوم القيامة فهم الأوائل حقاً.

زهرة الاسلام · #10 04-09-2008, 01:18 AM

على فكرة النصايح دى بجد صحيحة 100% وبجد ليا صحبتى من اوائل الجمهورية وكانت بتعمل كدة.امشوا ورا النصايح دى وانتوا بجد هتكسبوا

طالبة ازهرية · #11 04-09-2008, 01:42 AM

اقتباس:

المشاركة الأصلية كتبت بواسطة سيف-الاسلام

اعذرينى أختى طالبة أزهرية ولكن قد قررت أن أترك منتداكم بلا رجعة.
وسامحينى ولكن لا أستطيع أن أكمل هنا.
ومبروك على مجموعك الهايل ده ويا رب أشوف حضرتك أستاذة دكتورة فى كليتك بإذن الله تعالى.

وأنا مع إنى قررت أن أترك المنتدى إلا أننى أرد عليكم فى هذا الموضوع احتراماً لمن أتعب نفسه وقدرنى ورد على موضوعى.
ورجاء من الإدارة ان تقوم بمسح الموضوع فوراً.

وشكراً لك أختى طالبة أزهرية وجزاك الله خيراً وأسكنك الفردوس الأعلى بغير حساب ولا عذاب وجعلك من الأوائل الفائزين يوم القيامة فهم الأوائل حقاً.

اللهم امين
ولكن المنتدى بجد محتاجك
محتاج من يرتقى بالمستوى الفكرى وكما ترى بعض الاعضاء الازهريون ناقمون على الازهر بل و يسئون اليه
لا اعلم ما السبب ولكنى افتخر باننى ازهرية

فارجوك دع هذه الافكار واتركها
وكمل مسيرتك وموضوعك ونحن فى انتظار المزيد منك

سيف-الاسلام · #12 04-09-2008, 11:24 PM

اقتباس:

المشاركة الأصلية كتبت بواسطة زهرة الاسلام

على فكرة النصايح دى بجد صحيحة 100% وبجد ليا صحبتى من اوائل الجمهورية وكانت بتعمل كدة.امشوا ورا النصايح دى وانتوا بجد هتكسبوا

شكراً لك أختنا زهرة الإسلام على تأييدك لموضوعى ولنصايحى وملاحظاتى.
وجزاك الله خيراً وبارك فيك وهداك إلى طريق الفردوس الأعلى ثم أسكنك اياه اللهم آمين.

سيف-الاسلام · #13 04-09-2008, 11:49 PM

اقتباس:

المشاركة الأصلية كتبت بواسطة طالبة ازهرية

اللهم امين
ولكن المنتدى بجد محتاجك
محتاج من يرتقى بالمستوى الفكرى وكما ترى بعض الاعضاء الازهريون ناقمون على الازهر بل و يسئون اليه
لا اعلم ما السبب ولكنى افتخر باننى ازهرية

فارجوك دع هذه الافكار واتركها
وكمل مسيرتك وموضوعك ونحن فى انتظار المزيد منك

شكراً لك أختنا الكريمة الأزهرية.
ولكن يا أختى الكريمة:
من يرتقى بالمستوى الفكرى؟؟؟
أنا.
هو أنا عارف حاجة أصلاً علشان أرتقى بالمستوى الفكرى.
نحن دائماً نتعلم منكم وفقط ولم يبلغ بنا العلم إلى أن نرتقى بالمستوى الفكرى لكم أو حتى نقول كلمة أمامكم.
فأنتم أساتذتى.
وانما ذهب عقلى وأردت أن أصبح لبعضكم أستاذاً يعطى نصائح.
ولكن لم يحن الوقت ليصبح التلميذ أستاذاً.
فما زلت تلميذا أتعلم.

ولذلك فقد آثرت أن أرجع إلى صفوف المتعلمين لأتعلم من أمثال حضرتك وأمثال أستاذنا الكريم الفاضل أيمن الوزير وليسامحنى ان كنت قد أخطأت فى حقه أو قلت كلمة تضايقه.
فلتسامحنى أستاذى الكريم فوالله إنى أحبك فى الله.

ولكنى كطالب أزهرى وكتلميذ عند الأزهريين أمثال حضرتك (منهم أتعلم):
فأنا أرى بنظرتى المتواضعة أن الأزهر منارة مصر كلها.
فوالله لو لم يكن الأزهر فى مصر لضاع الدين والعلم بها.
وألتمس ذلك واضحاً عندما يأتى طالب الثانوية العامة بعقله الكبير ليقرأ فى كتب التفسير والفقه وغيرها ويقف أمامها عاجزاً لا يفهم شيئاً.
فكفى شرفاً للأزهر أنه يعلمنا كيف نقرأ فى علوم ديننا.
وكفى بالتربية والتعليم قلة شأن عن الأزهر (وإن كان لها شأن عظيم ولا أنكر ذلك ولكنها أقل شأناً) أنها ما اهتمت بكلام ربها وبعلوم دينها.
فجدير بالمسلم الحريص على آخرته قبل دنياه أن يحرص على طلب العلم الدينى مع العلم الدنيوى.
وأفضل طريق إلى ذلك فى مصر هو الأزهر الشريف.

ومنكم أيها الأزهريون يتعلم الناس الدين.
ومنكم أيها الأزهريون يتعلم الناس القرآن.

وكفى بالأزهر شرفاً وعلواً وقدراً تعليمه للقرآن بتجويده.
ولن يقدر طالب التربية والتعليم أن يعلم من الدين ما علمه الأزهرى أبداً.

وإنى لأشعر بالحزن والفرح فى وقت واحد عندما أرى طالب التربية والتعليم حافظاً للقرآن وهذا ما يفرحنى لكنه جاهلاً بكيفية قرائته وأحكامه مع انها فرض وواجب عليه وهذا ما يحزننى.

وأين يتعلم أحكام القراءة وعلوم الدين إن لم يتعلمها فى مدرسته ومنهل العلم ومحضن التربية ومنبع الثقافة.
أين يتعلمها؟؟؟؟؟؟؟؟؟؟؟؟.

وسامحينى أختى الكريمة ولكنى ما زلت تلميذاً وما حان الوقت قط لأصبح معلماً.
ولكن يكفينى فخراً أن أنقل لكم العلم من العلماء.
ولذلك فقد قررت أن أضع لكم بعض الموضوعات الدينية وفقط من كلام علماء الدين.
أما عن كلامى ونصائحى فأتركها لكم فأنتم أساتذتى وأنتم أعلم منى بالنصيحة.

وأتمنى أن أرى موضوعاتك أختى الكريمة طالبة أزهرية فى هذا القسم وأتمنى أن أتعلم منك.
وطلاب الأزهر بحاجة ماسة إلى من يرشدهم فهل أنرتِ لهم الطريق بعلمك؟؟؟؟؟؟؟؟؟؟؟؟

وأخيراً:
سامحونى أيها الأعضاء وأيتها العضوات إن كنت قد أخطأت يوماً فى أحدكم.
ولكم منى كل احترام وتقدير.

زهرة الاسلام · #14 05-09-2008, 01:40 AM

ليس المرء بسنه إنما المرء بأصغريه قلبه ولسانه.ونتمنى إكمال هذه النصائح القيمة ليستفاد منها الاخرون

أيمن الوزير · #15 09-09-2008, 12:13 AM

شكرا أخي سيف الاسلام علي الموضوع الرائع وسامحك الله علي قولك :

اقتباس:

ومع احترامى لحضرتك إلا أن طريقتك فى الكلام معى ليست طريقة تربوية.

أخي سيف والله أري فيك خير كثير وأري أنك مثال للرجل المحب لغيره الناصح في الله
فلا تفكر في ترك المنتدي لعلنا نستفيد منك

وأخيرا لا تأسف علي موضوع كتبته بقرارة نفسك فهو بالفعل رائع وأنا والله أثناء الجامعة كنت مطالب بحفظ القرآن كله فكنت أفعل طريقتك هذه ولكن

نفعلها في التركيز علي موضوعتك التي قلتها مع عدم إهمال غيرها
لكنك للأسف حينما أثرت الموضوع شعرت منه أن يأخذ الطالب ما تشير إليه ويترك الباقي