الوفاء ليس حكرا ً ..... كنا و سنظل اوفياء ( الموضوع كمل )

[Golden Eagle]

بسم الله الرحمن الرحيم
بصوا كدا بصة ع الرابط دا هـــــــــنا
مش موضوعي الكلام
موضوعي الجدول اللي من تحت دا
دا جدول فيه البطولات بتاعت الدوري العام
الفترة من 1962 - 1974 دي ( 13 سنه ) الاهلي ما اخدش فيها بطولة
الـ 13 سنه دول منهم 7 سنين النشاط كان متوقف بسبب النكسة و الحرب
يعني كدا معاك 13-7 = 6 زي ما اخدناها ف الحساب
6 سنين الاهلي ما شمش فيهم بطولة و جماهيره كانوا اوفياء ع فكرة و ما قلبوش ولا حاجة
بعد الفترة دي كان في فترات عجاف ع الأهلي فترة 3 سنين من 91 لـ 93 الاهلي ما اخدش فيهم دوري و برضو كان ايزي و ما حدش قلب ولا حد راح شجع الترام مثلا ً
و في فترة تاني 4 سنين من 2000-2004 الاهلي ما اخدش فيهم دوري و جمهوره وفي
الموضوع مش طفرة و مش حاجة غريبة ان لما مشجعين تنقطع البطولات عن ناديهم انهم يفضلوا وراه
عادي جدا ً ف العالم كله
يعني مانشستر سيتي دا اظن آخر دوري ليه قبل اللي فات كان من 12 سنه او حاجة كدا و الناس ف انجلترا بتشجعه عادي
بس احنا عندنا ناس بتحب تكبر كل حاجة
عندنا قطبين ف مصر آه
بس الفرق بينهم شاسع
يعني كدا زي ما يكون الأول ف فصل جايب 99.9% و التاني جايب 75% مثلا ً
هانقول ان الاتنين دول اشطر اتنين ف الفصل
بس الفرق بين الأول و التاني شاسع
و الناس مهوله ف الزمالك لسبب بالنسبالي مجهول ( يمكن إرضاءً لجماهيره )
يعني بيقولوا الزمالك تاريخ
اول حاجة ف التاريخ هم ما كانوش عارفينها لما ييجوا يعملوا المئوية يعملوها يوم كام
البطولات اقل من نص بطولات الأهلي و بيقولوا ابطال علي مين
و من التهويل برضو لما الاهلي كسب ريال مدريد ف ماتش مذاع و عليه كاس قالك دا ماتش ودي ايه يعني لما تكسب ريال مدريد ف الودي ( انا فاكر ان روبيرتو كارلوس كان ف الملعب ساعتها و اي لاعيب يابانيه يعرف مين هو روبيرتو كارلوس )
و لما الاهلي كسب الفريق الايطالي ( مش فاكر مين بس الماتش خلص 2-1 و كان باتيستوتا بيلعب ) قالوا برضو ودي + حظ
ظهرت الكبيرة بقي لما الفيفا اجرم و اعلن النادي الأهلي هو نادي القرن العشرين في افريقيا
قالوا ازاي الاهلي ابو مش عارف كام و عشرين بطولة دوري و كام و تلاتين بطولة كاس و كام بطولة افريقية يبقي نادي القرن دا احنا اللي معانا 10 دوري و مش عارف كام كاس و كام بطولة افريقية المفروض نكون اولي و احنا نادي القرن الحقيقي
و سبحان الله نفس الناس دي سكتت لما موقع غريب كدا قال ان كوتوكو هو نادي القرن و قالوا آه كوتوكو فعلا ً هو نادي القرن لكن الأهلي لأ و احنا لأ
بعد كدا قصة الحضري و المطبلاتيه اللي قالوا من حقه يشوف مستقبله بعيد عن الأهلي و ما نلومش عليه
و لما نفس الحضري حب يشوف نفس مستقبله بس بعيد عن الزمالك قالوا لأ دا الزمالك هو اللي لمك و عملك اسم
لا اله الا الله !!!
يا جدعان و ربنا في موقع اسمه يوتيوب بقي بيتحط عليه كل حاجة
كلامك قبل و بعد
كلامك ف الموقف دا و الموقف دا
يعني احنا عرفنا ان ما عندكش دم و منافق دا بقي موضوع مفروغ منه
لكن حتي بجح و مش بتكدب ع المتغطي ؟؟؟
و كان من اكبر الناس دي شلبوكا
و القيعي ف اتصال معاه قالهاله ف وشه
قاله انت موقفك كان كذا كذا لما الحضري هرب م الاهلي و بقي كذا كذا لما حب يمشي ( او يهرب مش متذكر الوضع بالظبط ) م الزمالك
كمالة التهويل برضو اللي بيعمله الاعلاميين لما كام لاعيب انتقل م الاسماعيلي للأهلي
و في حين ان ف كل الدنيا دا اسمه احتراف عندنا اسمه تكويش ( زي الاوضاع السياسية ف مصر كدا برضو بيقولوا تكويش و الظاهر ان قالب الاعلاميين واحد )
و في موضوع قديم كنت ناقله من موقع الاهلي و اضفت عليه شوية لاعيبة ( الموضوع ف موقع الاهلي كان قديم و انا جددته ) كان بيتكلم بالارقام عن عدد المنتقلين من الأهلي للإسماعيلي و العكس و كان واضح ان عدد المنتقلين للإسماعيلي اكتر ( الموضوع انا مش لاقيه بس لو عايز تتأكد اكتب ف جوجل علاقة الاهلي بالاسماعيلي هل هي حب من طرف واحد )
يلا
بس كدا كدا احنا عارفين ان القافلة بتسير ف الأخر ع رأي البوب ( المشرف مش بتاع السياسة )