حل مشاكل واستفسارات الطلاب الجدد لكليه زراعه جامعه القاهره

amrsaso · #1 22-09-2011, 10:54 PM

مبروك لكل الى قبلو بكليه زراعه جامعه القاهره
الكليه دى ماشيه بنظام الساعات المعتممده المهم النظام ده بيخليك تختار المواد في كل ترم والمواعيد وحتى يوم الامتحان
وحكايه المهم انت لما بتقدم بتشترى كتاب الدليل وتانى يوم دراسه بتسجل المواد الى اختارتها وكده
المهم هنا بقى الموضوع ده خاص باي سؤال او استفسار خاص بالكليه وسنه دراسيه سعيده عليكم ان شاء االله

قلبي لربي · #2 23-09-2011, 08:13 PM

شكرااا لحضرتكـ
هو ايه المواد الـ المفروض اني اسجلها في الترم الاولـ
اختارها يعني علي اي اساس ؟

amrsaso · #3 23-09-2011, 09:56 PM

تحويلك قبل القاهره مبروووووووووووووووووووووووك

------------
بصي ياسيتى انت عندك 21 ماده اجباريه
قسميهم على اربع ترمات
وتختارى الى انت عيزاه زى منتى عايزه
بس الفكره انك اول ترم فبتبقى محتاجه مواد الى حد ما سهله عشان تكونى اتعودى على نظام الكليه
يعنى مثلا انت ممكن تاخدى نبات وحيوان وعضوى ورياضه واجتماع واقتصاد وانجلش
دول مواد مناسبين جدا لاول ترم
ولو عايزه اعملك الجدول بالمواعيد وكده عشان تسجليهم انا تحت امرك
وده الاكونت بتاعى على الفيس بك
لو عايزه تفاصيل اكتر
http://www.facebook.com/amr.saso

قلبي لربي · #4 24-09-2011, 12:46 AM

ااه الحمدلله , الله يبااااارك في حضرتك

اااهااا
اااه ياااريت لو مش فيها ازعااج لحضرتكـ

ما انا بعت رساله لحضرتكـ من زماااان بس شكلها مش وصلت

amrsaso · #5 24-09-2011, 10:37 PM

لا عادى مفيش ازعاج ولا حاجه
ومفيش حاجه وصلتلى
عموما انا هعملك الجدول ان شاء االله والمواعيد وكده وهبقى اققولك تعملى ايه في التسجيل وكده هسهر عليه تالنهارده ان شاء االله

قلبي لربي · #6 25-09-2011, 10:26 PM

تمام ان شااء الله الف شكر لحضرتك

انا حاولت ابعت رساله لحضرتك تاني بس في مشكله في الفيس
مش بيرضي يبعت لأي اكونت مش مضاف في الفريندز

amrsaso · #7 26-09-2011, 12:21 AM

انا مش عارف اققولك ايه عموما انا عمللتلك الجدول وبحضر شرح هتعملى ايه في يوم الارشاد والتسجيل هبقى احطه هنا

amrsaso · #8 26-09-2011, 10:24 AM

بصى انا عملتلك الجدول وشرحتلك هتعملى اي من طق طق لسلامه عليكو اول يوم وكمان التسجيل
واي حد كمان داخل زراعه يعمل زى ما مكتوب
ويارب اكون ساعد واى حاجه او سؤال اسئلى وهارد عليكى ان شاء االله

انت هتروح اول يوم دراسه يوم السبت
اول ماتدخل الكليه تروح على الشئون هتلاقى في طلاب متجمعين وزحمه اوى تروح داخل وسطهم هتلاقى في ورق متعلق مكتوب فيه اسامى الطلاب وارقامهم الموحده واسم المرشد الاكاديمى لكل طالب
المهم انت طبعا مستوى اول هدور على الكشف بتاع مستوى اول ودور على اسمك
هتلاقى مكتوب اسمك وجمبيه رقمك الموحد واسم المرشد الاكاديمى بتاعك والقسم بتاع المرشد الاكاديمى بتاعك
طبعا لازم تكتبهم في ورقه او تحفظهم عشان هتحتاجهم
الاول ايه هو الرقم الموحد ده ؟
ده رقم قيدك في الكليه وبتستخدمه في كل حاجه طول الاربع سنين يعنى في الغياب بتكتبه لما تيجى تقدم او تعمل اي حاجه بتكتبه مهم جدا وبتستخدمه في كل حاجه طول الاربع سنين
وهو بيبقى بالشكل ده
11230036
11 ---- الى في الشمال دى بتمثل السنه الى انت دخلت فيها الكليه سنه دفعتك وطبعا هي 2011 واختصارها 11 ده الرقم الخاص بيك انت ونصيبك زى مايجي ---- 36 ى
والرقم الى في النص ده 2300 رقم ثابت ملهوش لازمه وبعد كده هيبقى رقمك الموحد
يتكتب بالشكل ده
36 / 2011
وبس
نكمل بقى
المهم انت تعرف رقمك الموحد واسم الدكتور والقسم بتاعه فعلى طول جرى تروح تسال عن القسم الى مكتوب بتاع الدكتور وتروح القسم وتسال على الدكتور هناك وتقابله وتقوله انا فلان معاك في الارشاد الاكاديمى هيقولك اه فعلا اهلا ولو عايز تساله عن حاجه اسئله اي حاجه
واهم حاجه بقى في الحوار ده تقوله ادينى الاستماره
وشكل الاستماره اهوه
شوف الصوره وانت هتفهم كل حاجه في الاستماره

]المهم انت هتكتب فيها المواد بتاعتك والكود بتاع كل ماده ومعاد السكشن بتاع كل ماده وهتروح القسم بتاع كل ماده تسجل هناك
وبعد ماتسجل كل المواد
تروح رايح على المرشد بتاعك تانى عشان يمضيلك على الاستماره وبعدين تروح تصورها نسختين نسخه ليك ونسخه تديها للمرشد والاصل تسلمه للشئون وكده براءه وانا عملت جدول لاى حد محتار يختار المواد والمواعيد وكمان كتبلك المواعيد والكود بتاع كل ماده عشان تحطهم في الاستماره على طول بغير مادور وتتعب نفسك
وده الجدول بتاعك دول مواد بسيطه وباذن الله مش صعبين خالص
وكمان متفادى مشكله الفروق بين الامتحانات مفيش غير الانجلش ماده هابله مش عايزه وقت كبيير للمذاكره
وكمان متفادى انك تمتحن امتحانين ميد ترم او عملى في نفس اليوم
وكمان بتخلص السكاشن بدرى عشان لو بنات
وكمان مفيش فروق بين المحاضرات والسكاشن كبيره عشان طبعا الواحد بيبقى اول ترم متعرفش على ناس كتيير وميقعدش لواحده كتيير
باذن الله هيكون جدول مناسب جدا
وده الجدول

وده الترتيب والكود والمعاد الى هتكتبهم في استماره التسجيل مش عايزك تتعب خالص ولا تقلق

واي سؤال او استفسار انا موجود على الفيس على طول
عمرو حامد
مستوى تانى

[/b]

قلبي لربي · #9 26-09-2011, 10:34 PM

تمااام اوي انا نقلت الجداول والحمدلله الحكاية وضحت شوية
بس انا روحت اقدم قالولي علي نهاية الاسبوع ولما كلمت الشؤن انهاردة قالولي اول يوم ف الدراسة ابقي اقدم
فا هل ده عادي كده
وهل ده مش هيعطلني عن تسجيل المواد وكده