مصلى المدرسة :: جربتي تدخليه قبل كده ؟

[حياتى وقف لله]

السلام عليكم ورحمة الله وبركاته

ــــ***ـــــــــــــــــــ




عايزين نتكلم النهاردة عن موضوع مهم جداً







(( مصلى المدرسة ))



كلنا يا إما بيدرس فى المدرسة أو فى الكلية أو فى أى حتة







وأكيد فى المكان ده ( سواء المدرسة أو الكلية أو الشغل )





أكيد فى مبنى كده مخصص للصلاة مكتوب عليه مصلى النساء






سؤالى بقى ..





جربتي تدخليه قبل كده ؟





طب سؤال تاني




أكيد وإنتى فى المدرسة أو الكلية بيأذن عليكي صلاة الظهر وأحيانا العصر كمان



وممكن المغرب لو انتى فى كلية




فهل جربتي قبل كده تدخلي المصلى تصلي الصلوات دى ؟





ولا لما بتروحي بتصليهم كلهم على بعضهم ؟

وساعات كمان ممكن تروحي تعبانة ومش قادرة تصلي فتنامي وتضيعي الصلاة فى اليوم ده










طب سؤال أخير

ليه مش عايزة تدخلى المصلى ؟






عشان مش نضيف

ولا عشان ما تفوتيش حصة أو حاضرة

ولا .... ؟














طيب خلونا نتكلم شوية عن مصلى النساء






أكيد وانتى فى المدرسة أو الكلية بتيجي عليكي فترات بتحسي إنك مرهقة جدا ومخنوقة




ونفسك تجددي نشاطك





طيب دى فرصتك إنك تروحي مصلى المدرسة




تريحي شوية




تصلي ركعتين




تاخدى كتاب من الكتيبات اللى موجودة فى المكتبة وتقرأيه





أو تراجعي الواجب بتاعك





أو لو عندك امتحان تراجعي قبل الأمتحان





تقرأي شوية قرآن





أو تصلي الظهر





وكمان إنتى فى المصلى ده هتلاقي الصحبة الصالحة





اللى ممكن ياخدوا بإيدك ويساعدوكي





ويحاولوا يحلوا مشاكلك





وتحكيلهم عن همومك






وكمان إنتى لما تروحي المصلى وتبقى مواظبة على الصلاة فى وقتها





هتبقى قدوة صالحة بالنسبة لزمايلك والكل هيبصلك بإحترام




والكل هيتسابق عشان يصاحبك




وهتحسي بسعادة وراحة نفس وطمأنينة عجيبة








- ماشي الكلام ده حلو أوى بس ساعة الصلاة بيكون فى حصة/محاضرة ؟




- بسيطة جدا .. روحي للمدرس / الدكتور وقوليله بمنتهى الأدب والإحترام .. لو سمحت ممكن أروح أصلي وهاجي على طول بإذن الله ؟



وأنا بصراحة ماشوفتش أستاذ منع طالبة من كده
بل بالعكس بيقولها بمنتهى الفرح والإنبهار .. أيوة إتفضلي طبعا ؟









- ماشي بس بصراحة المصلى عندنا مش نضيف خالص ومش بحب أروحه




- طيب أكيد هتلاقي فيه مكنسة .. صح ؟

ليه ما تخديش المكنسة وتكنسي المكان ؟









- يعع .. أنا أكنس لا طبعا ده لايمكن!!




- طب أقولك على حديث حلو أوى

( هل تدرون أول من يدخل الجنة من خلق الله قالوا الله ورسوله أعلم قال أول من يدخل الجنة من خلق الله الفقراء والمهاجرون الذين تسد بهم الثغور ويتقى بهم المكاره ويموت أحدهم وحاجته في صدره لا يستطيع لها قضاء فيقول الله عز وجل لمن يشاء من ملائكته ائتوهم فحيوهم فتقول الملائكة نحن سكان سمائك وخيرتك من خلقك أفتأمرنا أن نأتي هؤلاء فنسلم عليهم قال إنهم كانوا عبادا يعبدوني لا يشركون بي شيئا وتسد بهم الثغور ويتقى بهم المكاره ويموت أحدهم وحاجته في صدره لا يستطيع لها قضاء قال فتأتيهم الملائكة عند ذلك فيدخلون عليهم من كل باب { سلام عليكم بما صبرتم فنعم عقبى الدار }

الراوي: عبدالله بن عمرو بن العاص المحدث: أحمد شاكر - المصدر: مسند أحمد - لصفحة أو الرقم: 10/77
خلاصة حكم المحدث: إسناده صحيح




عارفة يعني إيه تتقى بهم المكاره ؟


يعني لو فى حاجة الناس كلها مش بترضى تعملها ( مقروفين منها يعني ) هو يعملها عادى لله



شوفتى منزلته أد إيه ؟






- أمم ... أنا أول مرة أسمع الحديث ده .. سبحان الله !



وعلى الهموم لو مش عايزة إنتى تكنسي ممكن تقولى للعاملة تكنسه ولو مارضيتش ممكن تديها شوية فلوس

وتذكري إن النبي صلى الله عليه وسلم: " رأى في جدار القبلة مخاطا أو بصاقا أو نخامة فحكها " رواه البخاري 407 ومسلم 549 .



وتخيلي بقى أى حد هيدخل المسجد عشان يصلي هيكون فى ميزان حسناتك إن شاء الله






ها .. لسة برضه مش عايزة تدخلى مصلى المدرسة ؟









ياريت تشاركونا بآراكوا وتعليقاتكوا : )

[,, أَمـــَـة الله ,,]

موضوع جميل جداً ومهم
والحمد لله أنا بحافظ على الصلاه في المصلى بتاع المعهد وبيكون في وقت " الفسحه "

لكن عندي تعليق بسيط على جزئيه في الموضوع وهيَّ :




- ماشي الكلام ده حلو أوى بس ساعة الصلاة بيكون فى حصة/محاضرة ؟




- بسيطة جدا .. روحي للمدرس / الدكتور وقوليله بمنتهى الأدب والإحترام .. لو سمحت ممكن أروح أصلي وهاجي على طول بإذن الله ؟



وأنا بصراحة ماشوفتش أستاذ منع طالبة من كده
بل بالعكس بيقولها بمنتهى الفرح والإنبهار .. أيوة إتفضلي طبعا ؟


وده رأي الشيخ محمد حسان في الجزئيه دي



وهي إنه " لا يجوز "

بــارك الله فيكِ حبيبتي في الله

وجزاكِ الله خيراً

[طالبة الحب فى الله]

بارك الله فيكِ يارب

[أم عمار قائد الأحرار]

يا جماعه احمدو ربنا احنا معندناش مصلي اصلا هههههههههههههه

والاخت جمانه تشهد بكده ههههههههههه



بس مين الحمد لله كنا بنروح نصلي ع ورق ف فصل فاضي هههههههههه



ربنا يصلح حالنا وحال بنات المسلمين اللهم امييييييييين

[warda2011]

هههههههههههههههههههههههه
لا احنا الحمدلله عندنا فى المدرسه مصلى ونضيف كمان ولينا مكان مخصص كده مدارى بنتوضا فيه
وحطين اسدالات صلاه

[حياتى وقف لله]

المشاركة الأصلية كتبت بواسطة !.فــراشــة.!

موضوع جميل جداً ومهم
والحمد لله أنا بحافظ على الصلاه في المصلى بتاع المعهد وبيكون في وقت " الفسحه "

لكن عندي تعليق بسيط على جزئيه في الموضوع وهيَّ :




- ماشي الكلام ده حلو أوى بس ساعة الصلاة بيكون فى حصة/محاضرة ؟




- بسيطة جدا .. روحي للمدرس / الدكتور وقوليله بمنتهى الأدب والإحترام .. لو سمحت ممكن أروح أصلي وهاجي على طول بإذن الله ؟



وأنا بصراحة ماشوفتش أستاذ منع طالبة من كده
بل بالعكس بيقولها بمنتهى الفرح والإنبهار .. أيوة إتفضلي طبعا ؟


وده رأي الشيخ محمد حسان في الجزئيه دي



وهي إنه " لا يجوز "

بــارك الله فيكِ حبيبتي في الله

وجزاكِ الله خيراً

جزانا الله واياكى ياحبيبتى وربنا يزيدك ياحبيبتى

انا شوفت الفيديو ماشاء الله ربنا يباركلك

بس منعا للفهم الخطأ

الشيخ قال لايجوز ان تترك الصلاه بسبب محاضره

ربنا يعينا جميعا وفعلا مفيش استاذ يمانع ماشاء الله

[حياتى وقف لله]

احنا صراحة كمان ماشاء الله عندنا مصلى كويس فى كليتنا

اللهم بارك

انا بزعل اوى لما الاقى كليه او مدرسه مفيهاش مسجد والله

سبحان الله ربنا يهديهم

[همسة امل]

موضوع رائع ...بارك الله فيك
بس للاسف احنا معندناش مصلى في المدرسة و في الفسحة بيكون الظهر لسة مأذنش فلما برجع للبيت بصلى و الحمد لله بيكون العصر لسة فضلوا شويه كتار

[حياتى وقف لله]

حبيبتى ممكن تخلى دايما فى شنطتك سجاده الصلاه المحموله

اول ما الاذان ياذن بين الحصة والتانيه ممكن

تفرشى السجادة وتصلى الفرض فى وقته كمان

اعانكم الله يااارب

[لولو الدلوعة]

بس انا سمعت انى صلاة المراة خارج البيت عادة مش مستحبة
يعنى ممكن تستنا لما تروح وبعدين تصلى عادى

[هالة محمد 2]

بارك الله فيكى

[Alyaa Dfnany]

جزاكى الله خيرا

موضوع جميل ....

لكن احنا برضو للاسف ما عندناش مصلى فى المدرسة

بس بيبنوه دلوقتى ... و ان شاء الله ينتهى عما قريب و نروح نصلى فيه و نحافظ على صلاتنا