نبدأ منين .. ابدأ ايه ؟ ... احنا هنفضل نتكلم ع الباب كدا .. ادخل

[احمد رضا]

السلام عليكم ورحمة الله وبركاته


ازيكم ياشباب عاملين ايه ؟
انا عايز اتكلم في موضوع كنت بتكلم فيه انا واستاذتي
استاذة / رانيا
وهو مسألة مين أين ابدأ ؟
سؤالكم العقلي .. ابدأ ايه ؟
الإجابة : ابدأ الدين او ابدأ اني انصح حد
طبعا الإجابة هتكون من خلال اخونا ( س ) واخونا ( ص )
ده حوار بين س ، ص
س عنده فكره معينه .. وص بيستفر عن الفكرة وبيرشحها
------------------------------
س : ازيك يا ( ص ) مش انت كنت سألتني عن ليه احنا مش عارفين نعمل طفره كبيرة في الدين او نجذب شباب مسلم من مرحلة ( الغير إلتزام ) إلي مرحلة ( الإلتزام ) وبشرط ان الشباب ده او الأشخاص دول ميرجعوش لعدم الإلتزام تاني ؟

ص : ايوه فعلا كنت سألتك وانت جاوبتني إجابه مشوشه وكنت متعارض معاك فيها .. لان فكرتي كانت اني بنصح في الدين وبأمرهم بالعبادات والأوامر والنواهي ..
------------------------------
س : بص ياسيدي الجديد اني عايز اسألك انا سؤال . ياتري ممكن ؟
ص : اتفضل طبعا .. ايه سؤالك ؟
------------------------------
س : مين أكتر في بلدنا او في مجتمعنا [ الملتزمين ] أو [ الغير ملتزمين ] ؟
ص : والله للأسف الغير ملتزمين هما الأكتر في البلد دي .. وبصراحه شئ محير إزاي نغيرهم ؟
------------------------------
س : طيب اما انت بتقول ان [ الغير ملتزمين ] أكتر ازاي بقي بتنصح غير الملتزمين بطريقة صعبه وجامدة علي عقل واحد أصلا موصلش لمرحله حب الدين عشان يسمع كلامه ؟
ص : فعلا .. بس تقصد ايه من كدا ؟
------------------------------
س : أقصد لو ان فيه علبه ومغلفه بغلاف وحش جدا ومنفر .. ومتعب اوي عبال ما تشيل الغلاف ده .. والأحسن انك تبعد عن العلبه دي وتريح دماغك .. ايه اللي يخليك تقرب منها ؟
ص : يا عم ( س ) فهمني أكتر الله يكرمك ايه علبه ومش علبه ونظام العلبه دي فيها فيل والكلام ده ؟
------------------------------
س : هههههههههه يا ( ص ) مش فيل ولا حاجة .. بص ياسيدي ، لما شاب يفتح التلفزيون وكدا ويلاقي واحد بيدعوه للصلاه والصوم والذكاه والتعب وكل الإرهاق ده ( بالنسبة لغير ملتزم إرهاق ) وبيقوله اطلق لحيتك واعمل واعمل ( وهو شاب جان بقي ومش سكته لحيه ) .. قولي بالله عليك هيسمع كلامه ازاي .. مهو عايش حياته مرتاح بدون ده ؟
ص : صح ودي نقطه فعلا مفروض ناخد بالنا منها ان معظم الدعاة بيكلموا طبقة معينه من الملتزمين ومش واخدين بالهم ان فيه فئه تانيه بتنفر منهم وبياخدوا الدين من الوهلة الأولي ..
------------------------------
س : اللـــه ينور علييك هو ده اللي أقصده بقي .. تعرف يا ( ص ) ان بطبيعة البشر منذ نعومة أظافرهم وهما بيدوروا علي [ اللذة والمتعه ] .. ولما بيلاقي شئ هيسلب متعته ولذته بيكرهه جدا ً .. ولكن بيبقي في حالة واحدة متقبل ان شئ يسلب جزء من متعته .. تعرف الحالة دي ايه ؟
ص : ايه ؟
------------------------------
س : الحالة دي انه يحب الحاجة اللي هتسلبه متعته دي .. ولما يحبها هتبقي ( متعته سلب متعته ) او انها بتفيده بحاجة أحسن .
فاهمني ؟ .. يعني لو انا بعمل حاجة حاببها حتي لو هيا مجهدة .. هتبقي بالنسبالي متعه .. زي الأب اللي بيشتغل ليل نهار وبيطلع عينه وبيسايس في ده وده يدوس علي كرامته وده يخنقه في التعامل و.. و .. تفتكر ان ده شئ بيسعده .. لكن الشئ اللي بيسعده بجد انه يشوف ابنه وهو لابس لبس جديد ومش نفسه في حاجة .. بتبقي متعته انه يجهد نفسه .. اهو احنا عايزين كدا في الدين
------------------------------
ص : طيب وده ياعم ( س ) هيكون إزاي ؟

س : والله ياباشا انا ليا رأي قد يكون صحيح وقد يكون خطأ
اننا نعمل حالة جذب لـ[ الغير ملتزمين ] ونحببهم في الدين .. ونوصلهم بخطوات بطيئة لمرحلة [ الإلتزام ] .. بمعني تاني .. اننا هنختار الموضوعات الغير مجهدة في الدين اللي سهل يعملها أي شخص وبعد ما تبقي سهله نديله حاجة أصعب بالتدريج .. لغاية ما يوصل لمرحلة إلتزام
------------------------------
ص : طيب تصدق فعلا والله شئ كويس .. لان علي حد كلامك لما الإنسان بيفقد المتعه اللي فيها بسرعه بيزهق بسرعه بردو وممكن تحصل نكسه ويبقي ضاع خالص ؟

س : فعلا وده اللي بتكلم عليه يا ( ص ) اني مثلا لو قولت للشاب المسلم الغير ملتزم .. لو لقيت مثلا حاجة في الأرض وممكن تكعبل حد شيلها لان من الإيمان إماطه الأذي عن الطريق .. لان ممكن يكون شيخ او عجوزة مسنه ماشية وتتكعبل فيها .. فيبدأ يحب عمل الخير ..

وابدأ انتقل معاه بالتدريج واقوله عامل الناس كويس .. ساعد الناس باقل شئ حتي .. حب الناس وعاملهم كويس .. عشان الرسول كان بيعامل كل الناس كويس .. هيبدأ يحب الرسول ويحب الدين .. لان نتيجه لتصرفه ومعاملته للناس كويس .. الناس هتعامله كويس .. طبيعي ومنطقي .. هيبدأ يعرف انك بتقوله الكلام الصح .. ويبدأ يثق فيك .. وبعد كدا ازرع في دماغه اي فكرة من أفكار الإسلام وتكليفاته هيقبلها لانه عرف انك بتساعده وبتوجهه للخير .. لكن تبدأله بحاجات هو مش عارف معناها او مش مُدرك معناها بشكل مادي دلوقتي .. دي طريقه مش بتبقي مجدية أوى

لان حالة إثراء المعلومات دي .. بتحصل لما يكون الواحد عنده معلومات أصلا
ازاي واحد يادوبك بيعوم بالعافيه
اقوله غوص في 20 متر تحت سطر البحر ؟!
ولما ميغوصش اقول عليه خايب ومش فاهم حاجة ولا هيفلح ؟
------------------------------
ص : والله فعلا عندك حق .. الاهم من اني اشرحله ايه في الطريق الصحيح .. اني امشي معاه الطريق الصحيح خطوة بخطوة .. لانه زي الطفل الصغير لازم واحد يمسك ايده وهو بيكتب لغاية ما يشد عصبه ويكتب لوحده .. وزي الطفل الصغير اللي لسه بدربه علي الكلام .. لما باجي ادربه مش بقوله قول " أحلامهُا مستشزرات ٌ. للعـُلا. شَدَّت حمولة َ قلبـِها. في هودج ٍ. حلو اللمَى. وحداؤها: غيم ٌ. وأقمارٌ مُشعْشَعة ٌ. بكأس ٍ من دجى "
لاء ده يموت فيها مني ويصرخ ويقولي وربنا ما انا متكلم ياعم انا هبقي اخرس
لا بقوله " قول بابا .. قول ماما .. قول تيته "
حاجات بسيطه لغايه ما يشد
وبعدين ابدأ اقوله جمل كبيرة يقولها .. لان مفيش حاجة بتيجي مره واحدة
------------------------------

س : صح والله يا ( ص ) كلامك بجد واقعي .. مفيش حاجة بتيجي مره واحدة .. متعرفش انا سعيد بكلامك ده اد ايه
ص : انا اسعد والله يا ( س ) وهاخد بنصيحتك في الدعوة إن شاء الله
-----------------------------
س : ربنا يوفقك يارب وينصر كل داعي للخير
ص : اللهم آمين
-----------------------------
ايه رايكم ؟