اهلا وسهلا بك فى بوابة الثانوية العامة ... سجل الان

العودة   بوابة الثانوية العامة المصرية > الجامعات المصرية > كليات المجموعة الرياضية > كلية الفنون الجميلة وكلية الفنون التطبيقية

إضافة رد
 
أدوات الموضوع انواع عرض الموضوع
  #1  
قديم 30-09-2011, 10:57 AM
bahaaeldeen bahaaeldeen غير متواجد حالياً
مشرف متميز قسم كلية الفنون الجميلة والتطبيقية
 
تاريخ التسجيل: Jun 2008
المشاركات: 1,127
معدل تقييم المستوى: 17
bahaaeldeen is on a distinguished road
Impp نظام إمتحانات القدرات 2023 (فنون جميلة/تطبيقية/تربية فنية/نوعية) كل ماتريد معرفته هنا حصرى ومتجدد


1/ إيه هو إمتحان القدرات؟

دة إمتحان بيقيس قدراتك فى كلية فنون جميلة او تطبيقية او تربية فنية ونوعية لمعرفة قدرات التخيل والإبداع يعنى من الأخر بيعرف إيدك تمشى فى الكلية ولا لا, ودة مش صعب نهائى بس عايز تدريب وتركيز كويس ومش شرط تكون رسام بيكاسو يعنى ولا يشترط موهبة فذة,
بس الاهم يكون عندك نسبة وتناسب وازاى تقدر تحول الشكل اللى قدامك او اللى متخيله لرسم فى الورقة ودة هنشرحه فى الموضوع دة.
وشرط أساسي علشان تدخل كلية فنون جميلة او تطبيقية او تربية فنية ونوعية انك تكون ناجح فى القدرات وجايب مجموع الكلية, وخلى بالك مش هينفع تكتبها في التنسيق او تحويل الا لما تكون ناجح الاول في القدرات
وطبعا مستقبل الكليات دى ممتاز جدا ومجالاتها تضمنلك الشغل في كل مكان وتقدر تسافر برة مصر بسهولة, ولازم تكون ممتحن وانت مخلص ثانوية عامة مينفعش تستنى النتيجة لان الامتحانات تكون خلصت,والامتحان مرة واحدة بس بعد انتهاء امتحانات ثانوى بتقدمله اونلاين


2/ إيه أنواعه؟


يعتبر إمتحان القدرات لفنون جميلة حاجتين عمارة وفنون ملهمش علاقة ببعض نهائى
انما فنون تطبيقية ليها امتحان واحد فقط وتربية فنية ليها امتحان واحد ونوعية ليها امتحان وعلى حسب كل كلية,
واما الكليات الخاصة ليها امتحان واحد على حسب الكلية زى تطبيقية 6 اكتوبر والتجمع الخامس واكاديمية الفنون والجامعة الالمانية.

3/إية نظام الامتحانين ل(فنون جميلة) وهل لازم أمتحن الأتنين؟

إمتحان عمارة فنون جميلة (لطلبة علمى رياضة بس) وبيأهل لقسم عمارة فقط
إمتحان فنون جميلة فنون (لطلبة علمى رياضة وعلوم وادبى) بيأهل لقسم جرافيك ونحت وتصوير وديكور ولكن قسم الديكور لعلمى فى كل الكليات عدا اسكندرية من ادبى.

امتحان فنون تطبيقية بياهل لفنون تطبيقية بكل اقسامها وتربية فنية بتاهل لتربية فنيه.

وممكن تختار أى حاجة بس المهم لو عايز تضمن ادخل عدد براحتك من الامتحانات لأنك بتمبحن قبل ما تعرف نتيجة امتحان ثانوية عامة والمجموع وكمان قبل نتيجة القدرات والظروف ف امتحن وسيبها ع ربنا لان الفرصة مرة واحدة بس
وقبل التنسيق
بالنسبة (لفنون تطبيقية) بيأهلك لكل الاقسام لانك بتدخل اعدادى وبعد كدة بتتاهل على حسب تقديرك ل14 قسم وتنسيق القسم الداخلى بعد اعدادى وعلى فكرة تطبيقية مش فيها قسم عمارة ولكن فيها ديكور بيسموه هناك (تصميم داخلى واثاث) ودة بياخد اعلى تنسيق ومفيهوش تخصصات (عكس فنون جميلة ديكور من اعدادى وفيه شعبتين)

بالنسبة (لتربية فنية) و(نوعية) امتحانهم سهل جدا وبيأهلك للكلية نفسها
طبعا خلى باااااااااااااالك ان امتحان القدرات لازم تكون مخلص 3 ثانوى ومينفعش بعد كدة تمتحن قدرات (بيكون مرة واحدة بس وعدد براحتك من الامتحان عايز تمتحن فنون جميلة وتطبيقية براحتك بس هتمتحن كل امتحان مرة واحدة فقط وفرصة واحدة فقط) والامتحان بيكون قبل متكتب التنسيق

4/ إزاى أقدم فى إمتحان القدرات؟



بص انت هتابع القسم معانا والجرائد وهيعلنوا عن مواعيد سحب استمارات امتحانات القدرات (اونلاين) وبتكون بعد انتهاء امتحانات الثانوية العامة بايام واحيانا اسبوع او اكثر وبيستمر التقديم 14 يوم ع موقع التنسيق
ف لما يتم الاعلان هتحجز امتحان القدرات من خلال موقع التنسيق بتاعك وبياناتك وتسجل الاستمارة وتختار ميعاد امتحانك اونلاين ودة احسن واوفر بكتير من النظام القديم ولازم تاخد كورس لان الامتحان بعديها ومفيش وقت وتابع الجرايد وقت بوقت لحد ما يعلن الوزير مواعيد الامتحان قبليها بفترة واياك تروح قبل ما يعلنوا مواعيد امتحانات القدرات
ملحوظة مهمة جدااا: طبعا فى مشكلة هتسمعها دايما انك هتقرا فى الاخبار والجرايد يقولك اعلان مواعيد امتحان القدرات ودى جميلة غلط, لانها بتبقى مواعيد سحب استمارة امتحان القدرات ع النت اونلاين, والامتحان الطالب هو اللى بيحدده لما بيقدم فى الكلية وليس مواعيد امتحان
ونصيحة منى قدم واسحب استمارتك فى مواعيدك ع النت واخلص ومتستناش مجموعك ولا تستنى التنسيق, لان الامتحانات لما بتخلص مش بتتعاد تانى, ولو الميعاد فاتك خلاص راح عليك للابد ومش هينفع تعمل تحويل للكلية
واحنا فى المنتدى هننزل كل حاجة قبليها فى المواعيد المناسبة.

فيه كورسات جامدة جدا ودى احسن كورسات عن تجارب كتير, تبع دكتور في الكلية احمد رشاد ممتاز جدا وبس شغالين من زمان, وهيبدئوا السنة دى بعد الامتحانات مباشرة ركزوا معاهم جدا, لانهم بيعلنوا كل المواعيد قبل الامتحانات وبيظبطوا كل الامور انا نفسي بتابع معاهم المواعيد وبيساعدوا الناس فى امتحان القدرات وناس كتير بتنجح حتى لو مش بتعرف ترسم
وبسعر كويس ورخيص جدا واحسن من اى اماكن تانية لان الباقى بيعملوا حصة وحصتين ومكثف ودة رسم محتاج تدريب وحصص واطول الحصة معاهم 6 ساعات وبيتحاسبوا بالحصة وبيكملوا كمان ع النت 24 ساعة للكورس, انا نفسي كنت معاهم ونجحت ودى صفحتهم احسن كورسات بيقدموها بتضمنلكوا امتحان القدرات اضغط هنا لمتابعتهم واخبار القدرات اول باول ودى استمارة حجز عاملينها ببلاش لانهم هيبدئوا اول ما تاخدوا اجازة الثانوية العامة من هنا


5/ ايه طيب نظام الامتحان بالنسبة لعمارة فنون جميلة؟؟

فى (فنون جميلة حلوان) بس
امتحان عمارة ملوش علاقة بانك تكون رسام او لا لانه عبارة عن رسومات هندسية ومناظير نقطتين او نقطة او كروكى بظلال ونور ((وفى اخر سنتين)) فى الزمالك جاب شبكة مرسومة بمنظور وطلب رسم مجسمات هندسية زى مكعب او هرم وبالتكرار ورا بعض وبالتظليل
يعني باختصار بيجبلك سؤالين بس
اول سؤال رسم بمنظور هندسى بيطلب منك ترسم بوابة مدرسة -تجمع مبانى سكنية-استاد- وهكذا.. ودة رسم بالمسطرة واقلام رصاص 3b/ 6b واول ما الاجازة تيجى هنشرح على المنتدى ازاى ترسمه
تاني سؤال بيديلك اشكال هندسية مجسمة (شكلين او تلاتة) وبيقولك ارسم تكوين بالاشكال الهندسية دي بالتكرار ورا بعض وبارتفاعات ومقاسات مختلفة وبتعمل حذف واضافة للكتل (منظوريا)


طبعا النظري بيبقي اسئلة عامة عن قوانين الرياضة والفيزياء ووحدات القياس زي مثلا الكيلو كام متر، والبوصة كام سم، وايه وحدة قياس الطاقة مثلا + معلومات معمارية
وطبعا اوعى تنسى ان عشان تنجح لازم تحل النظري والعملي وتنجح في كل جزء منهم بنسبة 50% يعني اوعى تسيب النظري


طب ايه نظام امتحان قدرات فنون لفنون جميلة فنون وتطبيقية وفنية ونوعية؟؟[/SIZE]

امتحان فنون جميلة فنون وفنون تطبيقية وتربية فنية وتربية نوعية شعبة فنية نفس الاسئلة بس كل كلية ليها امتحانها وعايز تركيز ومحتاج تمرين

خلى بالك شرط النجاح انك تكون معدى ال50% في كل الاسئلة حتى النظري يعني متحلش حاجة وتسكت لان الموضوع دة عمل مشاكل كتير
عبارة عن 4 اسئلة

اول سؤال (تعبير فني) هيقولك ارسم في مقاس ربع فرخ 50 في 35 سم عن موضوع معين زى حرب اكتوبر او البيئة او اثار الحروب او فرح وطبعا لازم ترسم مجسمات وتظليل وتبين شغل محترم ودة مش هتتمرن عليه ف يوم ولا يومين دة عايز ع الاقل كورس 4 ايام وترسم اشخاص

تانى سؤال (تصميم ابتكاري) ودة مهم وبييجي فى كل امتحانات فنون جميلة وتطبيقية وتربية فنية ونوعية عدا عمارة طبعا هيقولك صمم كارت 14سم فى 20سم (مثلا) عن ترشيد المياة بالالوان

هتجيب الوان خشب معاك ودة زى رسم اولى حضانة سهل مش محتاج منك اى مجهود غير القدرة على تخيل بسيييييييييط برموز معبرة عن التصميم زى الدعايا والاعلان وخلى بالك السؤال دة بييجى فى كل الامتحانات حتى تربية فنية ونوعية لانه سؤال مهم جداااااااااااا

الامتحان وقته طويل جداااااااااا 4 ساعات واكتر كمان ولو رسمت بالرسم المريح دة هيتبقى معاك ساعة او نص ساعة اهم حاجة متكونش مستعجل ابدااااا وسيبك من الغش وانك تساعد حواليك لانك هتضيع وقت جامد

وباذن الله متخافش من الامتحان لانه كويس وجميل بس عايز تركيز شوية ومش محتاج موهبة اوى يعنى بس محتاج تدريب كويس وصح وطبعا بنحذركم من الكورسات اللى اى كلام ويقولك حصة وحصتين ومكثف لان دة امتحان رسم وعملى مش نظرى وبتكتشف انك ضيعت فلوس ع الفاضي واضمن كورسات اللى قولتلكو عليها قبل كدة

7/ طب ايه مستقبل الكلية؟

كلية فنون جميلة: بالنسبة لعمارة ممكن تاخدها تمرين لو عايز تدخل هندسة ولو مجموعك فرق على درجتين تلاتة اقل من هندسة قدم عمارة وبتاخد نفس الشهادة وبتبقى تبع نقابة المهندسين ومستقبلها احسن من هندسة عمارة لانك بتدرس جانب هندسى وتذوقى وفنى يعنى قدرات ذات طاقة دفع ثلاثية
بالنسبة لديكور لو مجموعك اقل من هندسة ب 15 درجة مثلا بتقدم ديكور وبتدرس نفس مواد عمارة بس عمارة داخليه وبتكون مهندس فنان ومش شرط دخولها موهبة بس ديكور اقل من عمارة فى انها متتبعش نقابة المهندسين للاسف مع انها كانت تتبع بس قريب باذن الله هتتبع النقابة ومستقبلها ممتاز جدااااااا برة مصر وجواها وحاليا تتبع نقابة هندسة الديكور وتقدر تكتب لقب مهندس فى البطاقة بدون اى مشاكل لديكور

عدد مهندسين العمارة اكتر من مهندسين ديكور احسبها انت مع نفسك
باقى اقسام فنون محتاجة موهبة اكتر من عمارة وديكور علشان فرص العمل تكون زيهم او اكتر انما عمارة وديكور مش محتاجين موهبة اوى
وديكور بيدرس مواد هندسية ومواد فنية زى عمارة فى حاجات
يعتبر قسم الديكور اسمه البديل عمارة داخلية وتصميم داخلى وبيخرج لقب مصمم معمارى وهندسى وديكورى وداخلى
وقسم جرافيك مش مجرد رسومات بالكومبيوتر وخلاص انما هو عبارة عن رسم بالسيراميك مثلا وبالتطبيقات والادوات والخامات وبيدخل فى تصميم الدعايا والاعلانات وكل الحاجات الثرى دى والفوتوشوب ومحتاج موهبة

اما بقى لكلية فنون تطبيقية اقسام ممتازة لانها عملية جدا متقلش عن فنون جميلة طبعا ولا تزيد بس تطبيقية بتهتم بالجانب التطبيقي اكتر من فنون جميلة بتهتم بالجانب المجالى والفنى اكتر
وبالنسبة لتربية فنية ونوعية مفهومين غلط لانه مش بيجبرك على انك تكون مدرس ولكن ممكن تطلع فنان تشكيلى وبتختار فى الكلية عايز قسم تربوى للتدريس ولا تثقيفى للفن
ودى مواد فنون جميلة لكل قسم شوفها بنفسك
خلال الرابط دة
http://www.thanwya.com/vb/showthread.php?t=444596


8/ايه ترتيب اقسام فنون جميلة من حيث الافضلية للطالب المتوسط؟؟

أ/ عمارة- مجموعها اقل من هندسة بفروق بسيطةجدا -افضل من هندسة معمارى نظرا لدراسة الجانب الفنى.


ب/ديكور-مجموعها اقل من عمارة بقليل ولو عايز ديكور بتدخل امتحان قدرات فنون فنون ومش عمارة -دراستها مستمدة من عمارة ويمكن بالكورسات توفر فرص عمل عمارة لديكور يعنى تشتغل مهندس معمارى - علمى فقط ماعدا جامعة اسكندرية وفيها تخصصين على حسب رغبة الطالب اول تخصص هو عمارة داخلية ودة بيدرس كل انواع التصاميم لو الطالب حابب جانب هندسى اكتر- وشعبة فنون تعبيرية لو الطالب حابب الجانب الفنى اكتر ودة تصميم ازياء وديكور مسرح وتليفزيون وسينما وبيخرج مهندسين ديكور ومصممين عمارة داخلية وكمان شغل ديكور قوى جدا ومضمون لان الطلبة بتاخد خبرة قوية جدا فى الجانب الفنى والهندسى يعنى م الاخر ديكور بيدرس كل اللى الاقسام بتدرسه وعلشان تدخل قسم ديكور لازم تمتحن قدرات فنون مش عمارة وتكون علمى والكلية بتخليك فى قسم ديكور من اعدادى يعنى تقدر تقول ان ديكور شامل كل الاقسام

ج/جرافيك- محتاجة موهبة وحب مجال - ادبى وعلمى

د/تصوير - محتاجة موهبة وحب مجال - ادبى وعلمى

ه/نحت - محتاجة موهبة 100% وحب مجال اكتر - ادبى وعلمى

والترتيب دة بالنسبة للطالب المتوسط الموهبة اغلب الناس انما لو واحد موهوب فى الجرافيك مثلا يبقى الترتيب بالنسباله مركز اول جرافيك وهكذا

9/ ازاى بعرف الاقسام فى الكلية؟

لعلمى:
عمارة وديكور قسمين مختلفين من اول سنة بيتم دراستهم اعدادى(اعدادى ديكور وفيه اعدادى عمارة) يعنى كلهم 5 سنين زى هندسة بالظبط وتنمح شهادة بكالريوس فنون جميلة قسم كذا وتقدر تشتغل فى اى مكتب او موقع هندسى بسهولة
ولاحظ انك لو امتحنت فنون جميلة فنون وانت علمى بتدخل اعدادى ديكور مش اعدادى عمارة
ولو انت ادبى هتدخل اعدادى فنون وتانى سنة تتاهل لتلات اقسام (جرافيك او تصوير او نحت)

ادبى:
بتدرس الاول اعدادى فنون يعنى بتدرس جرافيك ونحت وتصوير ووبعد اول سنة بيتم اختيار القسم سواء بتقدير او التقدم بطلب

جامعة الاسكندرية اصبحت تمنح قسم الديكور لادبى من اول سنة شرط ليها تنسيق داخلى اعلى من مجموع الكلية الادبى بس خلى بالك لو قدمت ديكور فى اسكندرية مينفعش تعمل تحويل لحلوان لاى سبب مهما يكن

جامعة حلوان بياخدوا علمى بس فنون فى ديكور وعمارة ليها تنسيق لوحده

اما فنون تطبيقية بتدرس اعدادى وتانى سنة تتاهل ل 14 قسم على حسب تقديرك والتنسيق الداخلى بعد نتيجتك ف اعدادى

طبعا كل سنة يعملوا كلية جديدة ودلوقتى بقى فيه فنون جميلة حلوان/اسكندرية/المنصورة/المنيا/اسيوط/الاقصر

اى استفسااااااااااااااااااااار اسالوه هنا وشكرااا اتمنى انى اكون قدرت افيدكم



آخر تعديل بواسطة bahaaeldeen ، 09-01-2023 الساعة 11:56 PM سبب آخر: تحديث المحتوى للعام الجديد
رد مع اقتباس
  #2  
قديم 01-10-2011, 09:17 PM
emy iglasias emy iglasias غير متواجد حالياً
عضو مجتهد
 
تاريخ التسجيل: Jul 2011
المشاركات: 81
معدل تقييم المستوى: 13
emy iglasias is on a distinguished road
افتراضي

انا كنت فكراه حاجه اصعب من كده طلع سهل اوي
رد مع اقتباس
  #3  
قديم 05-10-2011, 04:24 AM
دحيح ولكن دحيح ولكن غير متواجد حالياً
عضو جديد
 
تاريخ التسجيل: Sep 2010
المشاركات: 5
معدل تقييم المستوى: 0
دحيح ولكن is on a distinguished road
افتراضي

ممكن بعد ازنك تشرح حكاية قسم الديكور من ادبى دى تانى بتوسع..
وشكرا لحضرتك
رد مع اقتباس
  #4  
قديم 13-10-2011, 04:21 PM
lolyyyy lolyyyy غير متواجد حالياً
عضو جديد
 
تاريخ التسجيل: Oct 2008
المشاركات: 7
معدل تقييم المستوى: 0
lolyyyy is on a distinguished road
افتراضي

'طب سؤال انا اخدت عمارة وجبت لائق بس ماجبتش مجموع قسم عمارة
ينفع ادخل ديكور من غير قدرات فنون؟؟؟؟؟؟؟؟؟؟؟؟؟؟؟؟؟ ارجو الرد
رد مع اقتباس
  #5  
قديم 14-10-2011, 06:51 AM
mai fathalla mai fathalla غير متواجد حالياً
عضو جديد
 
تاريخ التسجيل: Oct 2011
المشاركات: 4
معدل تقييم المستوى: 0
mai fathalla is on a distinguished road
افتراضي

طب انا عاوزه اعرف انفع فى قسم ايه انا ادبى بس برسم كويس و لو قدامى صوره بنقلها هى هى و عاوزه اعرف هو انا اللى بختار مكان الكليه انا تانيه ثانوي لسه و ميرسي اوى اوى على الموضوع و فادنى كتييييييييييييييييير لانى كنت مرعوبه من امتحان القدرات دا
رد مع اقتباس
  #6  
قديم 16-10-2011, 07:48 PM
bahaaeldeen bahaaeldeen غير متواجد حالياً
مشرف متميز قسم كلية الفنون الجميلة والتطبيقية
 
تاريخ التسجيل: Jun 2008
المشاركات: 1,127
معدل تقييم المستوى: 17
bahaaeldeen is on a distinguished road
افتراضي

اقتباس:
المشاركة الأصلية كتبت بواسطة mai fathalla مشاهدة المشاركة
طب انا عاوزه اعرف انفع فى قسم ايه انا ادبى بس برسم كويس و لو قدامى صوره بنقلها هى هى و عاوزه اعرف هو انا اللى بختار مكان الكليه انا تانيه ثانوي لسه و ميرسي اوى اوى على الموضوع و فادنى كتييييييييييييييييير لانى كنت مرعوبه من امتحان القدرات دا


تنفعى فى جرافيك وتصوير ونحت
ولو من اليكس تنفعى ف ديكور لانه بياخد ادبى هناك بس
رد مع اقتباس
  #7  
قديم 20-10-2011, 02:21 PM
lolyyyy lolyyyy غير متواجد حالياً
عضو جديد
 
تاريخ التسجيل: Oct 2008
المشاركات: 7
معدل تقييم المستوى: 0
lolyyyy is on a distinguished road
افتراضي

3/إية نظام الامتحانين وهل لازم أمتحن الأتنين؟
[/size] [size=4]
إمتحان عمارة بيأهل لقسم عمارة وديكور لعلمى فقط
إمتحان فنون بيأهل لقسم جرافيك ونحت وتصوير وديكور لعلمى وادبى


على فكرة حضرتك قولت معلومة غلط انا سألت على قسم ديكور
مش بيقبل غير اللى اجتازو امتحان الفنون فقط وملوش علاقة بأمتحان العمارة

آخر تعديل بواسطة bahaaeldeen ، 25-10-2011 الساعة 11:37 PM
رد مع اقتباس
  #8  
قديم 22-10-2011, 12:36 AM
Hazem41 Hazem41 غير متواجد حالياً
عضو مجتهد
 
تاريخ التسجيل: Mar 2011
المشاركات: 66
معدل تقييم المستوى: 14
Hazem41 is on a distinguished road
افتراضي

أنا اتخرجت من تربية نوعية انجليزى بس نفسى ادرس فنون جميلة وأقدم لامتحان القدرات ينفع والمفروض أعمل ايه
رد مع اقتباس
  #9  
قديم 25-10-2011, 11:38 PM
bahaaeldeen bahaaeldeen غير متواجد حالياً
مشرف متميز قسم كلية الفنون الجميلة والتطبيقية
 
تاريخ التسجيل: Jun 2008
المشاركات: 1,127
معدل تقييم المستوى: 17
bahaaeldeen is on a distinguished road
افتراضي

اقتباس:
المشاركة الأصلية كتبت بواسطة lolyyyy مشاهدة المشاركة
3/إية نظام الامتحانين وهل لازم أمتحن الأتنين؟
[/size] [size=4]
إمتحان عمارة بيأهل لقسم عمارة وديكور لعلمى فقط
إمتحان فنون بيأهل لقسم جرافيك ونحت وتصوير وديكور لعلمى وادبى


على فكرة حضرتك قولت معلومة غلط انا سألت على قسم ديكور
مش بيقبل غير اللى اجتازو امتحان الفنون فقط وملوش علاقة بأمتحان العمارة
مع احترامى لكلامك صح بس اللى عايز يتأهل وميلاقيش صعوبة ويكون متدرب فى المناظير لانه هيتدرس فى اسقاط هندسى ومنظور حر طوال السنين
كلامك صح قانونيا لكنه ممكنش ميكونش مظبوط فعليا
دى اول حاجة وتانى حاجة ان التنسيق ميكونش لسة طلع يعنى الطلة ميعرفوش هيدخلوا الكلية ولا لا
وديكور كدة ف حلوان بتاخد علمى بس
يعنى يقدموا فى الاتنين لعلمى رياضة
عمارة وفنون
رد مع اقتباس
  #10  
قديم 26-10-2011, 12:30 PM
posyyy posyyy غير متواجد حالياً
عضو مجتهد
 
تاريخ التسجيل: Aug 2009
المشاركات: 50
معدل تقييم المستوى: 15
posyyy is on a distinguished road
افتراضي

ميرسي اوي علي مجهودك انا كنت بسال عن الحاجات دي انا في تالته ثانوي ادبي و جبت في تانيه ثانوي 87% لو انشاء الله قدرت ازود المجموع ده السنه دي اقدر ادخلها؟؟و انا محتاجه يكون مجموعي في السنتين كام عشان اقدر ادخل قسم جرافيك في جامعه حلوان؟؟
رد مع اقتباس
  #11  
قديم 01-11-2011, 08:41 PM
posyyy posyyy غير متواجد حالياً
عضو مجتهد
 
تاريخ التسجيل: Aug 2009
المشاركات: 50
معدل تقييم المستوى: 15
posyyy is on a distinguished road
افتراضي

يا جماعه ياريت لو حد عنده فكره يرد عليا
رد مع اقتباس
  #12  
قديم 02-11-2011, 05:57 PM
eng.nana eng.nana غير متواجد حالياً
عضو جديد
 
تاريخ التسجيل: Sep 2011
المشاركات: 16
معدل تقييم المستوى: 0
eng.nana is on a distinguished road
افتراضي

اقتباس:
المشاركة الأصلية كتبت بواسطة posyyy مشاهدة المشاركة
يا جماعه ياريت لو حد عنده فكره يرد عليا
السنة اللى فاتت فنون جميلة فنون حلوان اخدت من 87%تقريبا فان شاء الله تلحقيها اما عن دخول قسم الجرافيك فدة مبيتحددش الا بعد دخولك الكلية ولازم تجيبى تقدير كويس فى اول سنة عشان تقدرى تخشى القسم يعنى قسم جرافيك بيتحدد بتقدير السنة الاعدادية فى الكلية بس خلى بالك احتمال السنة اللى جاية المجاميع تبقى مرتفعة قوى فحاولى على قدر الامكان تزودى مجموعك
رد مع اقتباس
  #13  
قديم 07-11-2011, 10:45 AM
story.ending story.ending غير متواجد حالياً
عضو مجتهد
 
تاريخ التسجيل: Sep 2010
المشاركات: 60
معدل تقييم المستوى: 14
story.ending is on a distinguished road
افتراضي

لو سمحت انا فى تالته ثانوى علمى رياضه ونفسى ادخل فنون جميله قسم ديكور ابقى مهندسه ديكور فكنت عاوزه اعرف بتاخد من كام واول ما اخلص امتحانات على طول اروح اقدم فى امتحانات القدرات قبل النتيجه ولا بعدها
رد مع اقتباس
  #14  
قديم 10-11-2011, 05:37 AM
posyyy posyyy غير متواجد حالياً
عضو مجتهد
 
تاريخ التسجيل: Aug 2009
المشاركات: 50
معدل تقييم المستوى: 15
posyyy is on a distinguished road
افتراضي

اقتباس:
المشاركة الأصلية كتبت بواسطة eng.nana مشاهدة المشاركة
السنة اللى فاتت فنون جميلة فنون حلوان اخدت من 87%تقريبا فان شاء الله تلحقيها اما عن دخول قسم الجرافيك فدة مبيتحددش الا بعد دخولك الكلية ولازم تجيبى تقدير كويس فى اول سنة عشان تقدرى تخشى القسم يعنى قسم جرافيك بيتحدد بتقدير السنة الاعدادية فى الكلية بس خلى بالك احتمال السنة اللى جاية المجاميع تبقى مرتفعة قوى فحاولى على قدر الامكان تزودى مجموعك
ميرسي اوي و انشاء الله اقدر اجيب مجموع اكبر و ربنا يوفق كل الناس و يدخلو اللي عايزينو
رد مع اقتباس
  #15  
قديم 13-11-2011, 10:37 PM
vray3d vray3d غير متواجد حالياً
عضو جديد
 
تاريخ التسجيل: Dec 2009
المشاركات: 12
معدل تقييم المستوى: 0
vray3d is on a distinguished road
افتراضي

والنبى عندى سؤال مخوفنى لحد دلوقتى ..
الحمدلله نص كلامك طمنى ,, بس انا عايز اقول حاجة بس ..
انا فى تالتة ثانوى حاليا , والحمدلله ربنا مدينى موهبة انى اقدر اصمم ثرى دى ( شغاال فى المجال دا اكتر من 8 سنين ) وكنـت علمى ومع الاسف مجموعى طلع قليل ( 84% ) وحولت ادبى لأن فرصتى فيها اعلى ان شاء الله ..
تمام والحمدلله ماشى كويس فى الدرااسة وربنا يسهلها يارب واقدر اوصل لـ فنون جميلة جامعة اسكندرية ..
السؤال بقى ,, انا سمعت ان فيه تنسيق داخلى تانى جوة الجامعة عشان تدخل هندسة ديكور ,, او بمعنى تانى ..
بياخدوا بالأولوية للى درجاتهم اعلى ..
انا مش فااهم .. يعنى انا لو مثلا جبت 90% فى مجموع السنتين .. وربنا كرمنى ودخلت جامعة اسكندرية .. هل دا معناه ان هندسة ديكور متوفرة لى ؟؟

وربنا يكرمك يارب
هشـام ..
رد مع اقتباس
إضافة رد

العلامات المرجعية

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


جميع الأوقات بتوقيت GMT +2. الساعة الآن 02:52 PM.