ازاي بقي نوصل لبيطري وعلوم ولا هنتووووه ؟!!!! لا مش هتتوه تعالي وانا اقوللك

[SENDRILLA]

المره دي بقي انا اللي هكتب
يعني مش منقول
الدراسه قرب كل سنه وانتو طيبين
ولازم الصوره تتضح
ونعرف هنروح فين ونيجي منين
وكده يعني
مبدئيا هشرحلكو ازاي توصلو للكليه القديمه والجديده وعلوم كمان
للي بيركب مترو واللي بيركب مواصلات
تمام
علووووووووووم
نبتدي بعلوم عشان هتروحوها اول يومين
اولا انتو المفروض هتروحو فين في علوووووووم
هنروح مدرج والي او مشرفه حسب المجموعه بتاعتكو
هتروحو قسم مش متذكره اسمه عشان سكاشن الزولوجي والبوتاني
هتروحو ملحق البيوفيزيكس عشان السكاشن
حلو كده
دلوقتي لو هتركبو مترو
هتنزلو محطة الجامعه اكيد جامعة القاهره مش حلوان مثلا
هتتمشو قدام شويه هتعدو وانتو ماشيين علي اعلام ودار علوم
توصلو عند المكتبه المركزيه عند كلية تخطيط عمراني كده
قدامها علي طول هتلاقو مبني دور واحد ابيض هو ده ملحق البيوفيزيكس
تمام ؟
تمشو بقي في شارع طويل كده لحد ما توصلو لمكان فيه برجولات كتير كده عند تجاره
بصو علي مرمي البصر هتلاقو سور كده فيه بوابات صغيره
ومكتوب عليه يافته ممنوع الجلوس علي السلم والا هنسحب منك الكارنيه
لو دخلتو الباب الشمال بقي هو ده القسم اللي مش عارفه اسمه اللي بقوللكو عليه
سكاشن البوتاني هتبقي في الدور الاول يعني هتطلعو سلمتين بس كده
الزولوجي بقي ربنا ما يوريكو
هتطلعو اخر دور تدخلو في نف صغير كده وهتلاقو هناك مكان سكاشن الزولوجي
بس بيبقي فيها تلاجات ومسموحلكو تشربو منها كمان مش منر بس يعني
تمام كده
احنا كده وصلنا عند السور اللي مكتوب عليه اليافته اللذيذه مش كده
انزلو السلم وامشو يمين
بعد شويه هتلاقو امدرجين علي نفس الصف
واحد قدام كافيتريا الجوكر
والتاني قدام كافيتريا مش فاكره اسمها ماعلينا
كده متهيألي علوم تمام
نتكلم بقي علي نظام الدراسه فيها عشان نخلص منها لمره اصلها هم تقيل اوي
احنا عندنا مادتين التيرم الال فيها البيولوجي وده زولوجي وبوتاني واليوفيزيكس
النظري هتتقسمو مجموعتين كل مجموعه هتاخد في ميعاد ومدرج معين
لكن العملي قصه طويه حبتين
البيوفزيكس هتتقسمو سكاشن كل سكشن ليه ميعاد مش محتاجه فهم دي
الزولوجي والبوتاني بقي
هتقسم مجموعتين
مثلا مجموعه أ هتبتدي ببوتاني تاخد فيه 6 سكاشن وتمتحن العلي وتحول زوولوجي
اما المجموعه ب هتاخد زولجي الاول 6 سكاشن وتمتحن وبعدين تحول بوتاني
يعني انتو مش هتاخدو زولوجي وبوتاني عملي مع بعض تمام
كده خلصنا من علوم
الكليه القديمه بقي
الكليه القديمه عاره عن كام مبني ده
مبني الكيمياء الحيويه وده فيه مدرج 1 اللي فيه بعض محاضراتكو
وده مدرج رخم وصغير وكئيب وكل الدكاتلاه هتعد تقول عليه كلام لذيذ اول ما تدخله
تمام
وفي مبني كمان ده اللي فيه المشرحه ومعامل الهستولوجي وحاجات تانيه لسه مدخلتهاش
المهم ودي نوصللها ازاااااي
دي ليها 3 طرق
2 لو بتركب مترو
و 1 لو مواصلات
لو مترو حاجهمن 2لو انت نشيط هتنزل مترو فيصل وتدخل زراعه تفض ماشي لحد ما تخرج من الباب التان بتاعها وده بيبقي مشوار لذيذ لو معاك حد
لو بقي مش عايز تمشي
انزل محطة الجامعه هتلاقي ميكروباصات بتقول جيزه وتايه بتقول مدينه
اركب اي واحده فيهم مش هتفرقلو رايح القديمه
وقولله نزلني عند زراعه عشان مش كتير يعرفو ان في بيطري في الميدان غير اللي عند المدينه
تمام
هتنزل عند زراعه او في الميدان بالظبط
بس لو نزلك في اموقف اللي هو عند مسجد الاستقامه هترجع شويه وانتو لسه مترفوش الطريق فخليه نزلك عند زراعه احسن
هتعدي الشارع هتلاقي الكليه
لو انت بقي بتركب ميكروباص
غالبا بينزلك عند الموقف اللي عند عمر افندي
بترجع لورا شويه من اي شارع
سواء شارع مراد او شارع الجامعه
هتلاقي باب للكليه في اي شارع فيهم
بس لو دخلت من شارع الجامعه هيقابلك اول مبني بتاع المدرجات
لكن لو دخلت من شارع مراد هيقابلك اول مبني بتاع لمشرحه
شفتو العبقريه
خلصنا من الكيه القديمه
نيجي للجديده بقي
برده في 3 طرق
2 مترو
و 1 مواصلات
هتنزل مترو فيصل وعلي نزله السلم هتكمل لقدام شويه يعني مش كتير 5 دقايق مشي كده
هتلاقي باب للكليه
في ناس كسوله زي واحده معانا هنا كده مش بتحب تمشي
دي بقي تنزل مترو الجامعه وتركب ميكروباصات المدينه هينزلها قدام باب الكليه
لو مواصلات بقي
ممكن لو مكروباص هتنزل الميدان وتسأل هتمشي شويه كتير بس مش اي يعني
حلو
ول دخلتو من عند الباب اللي ناحية المترو
اول دخله شمال هتلاقو مكان سكاشن الرعايه
لو دخلتو من الباب اللي جنب المدينه هتمشو علي طول هتلاقونفسكو عند الباب الخلفي لمبني المدرجات اللي فيه مدرج 5 اللي هتاحخدو فيه
شفتو برده العبقريه
مكانمعامل الكمبيوتر بقي دي في مبني الاداره الي انتو قدمتو فيه اخر دور
اظن مفيش اسهل من كده
واللي هيتوه ميجيش يقوللي عشان هزعله
الغريبهبقي ان انا مبروحش الكليه بولا طريقه من دول
انا بركب اتوبيس
بينزلني عند الباب الرئيسي للجامعه
وبينزلني عند الميدان واعدي الشارع ابقي في الكليه القيديمه
وبينزلن يا اما قدام باب الكليه الجديده الاولاني او التاني
يا اما عند موقف اكتوبر كده واتمشي دقيقتين
ولو كنت نسيت اقول حاجه قولولي وانا مش هقولها
ولو كان حد مش فاهم يوصل ازاي برده يقوللي وانا مش هقولله
بس كفايه رغي بقي
ياللا ويارب تكون سنه سعيده عليكو
ملحوظه : انا عملت المره دي توبيك منفصل عشان يسهل علي الكل انه يلاقيه وقت ما يحتاجه
وكمان لو حد بيبحث في جوجل يقدر يلاقيه بسهوله
وبسسسسس