عروسة لصديقى [ 8 ]

[عادل حسان سليمان]

عروسة لصديقى /زجل [ 8 ]
=====================
صاحبى جانى وقال الحقنى ....خلاص لقيتها
هى دى هتبقى شريكة حياتى اللى حبيتها
تعال معايا بسرعة .....دلوقتى نطلب ايديها
روحت معاه قابلنا ابوها وقعدت معانا مامتها
الست بتتكلم وتشرط والسكوت شعار والدها
وتطلب حاجات غريبة والراجل بس ....يأيدها
بنتها كل اسبوع يومين عندها والباقى لبيتها
وعريسها يسمع كلامها وعمره يوم ما يزعلها
والبنت الاولى لبنتها تكون على اسم مامتها
والبنت التانية شرط تكون على اسم جدتها
ولو واد على اسم ابوها والتانى جوز عمتها
والبنت كل سنة تختار مصيف شهر يسعدها
صاحبى قال لأبوها ..آيه رأيك فى شروطها
قال أبوها ما تغلطنيش أصل الكلمة كلمتها
قال صاحبى اسمعوا ....أنما مش قسمتها
دى عايزة تتجوز خروف ....يسمع طلباتها
لايقول ابدآ لا ويعيش فى عصمة ...مامتها
وقال لأمها أسلقيها .....وأشربى شوربتها
دا انتى عايزه لبنتك عريس لمؤاخذه لعبتها
****************************************
والى القصيدة الزجلية التاسعة من عروسة لصديقى