التفاصيل عن العلاج الطبيعى ( كل الى انت محتاج تعرفه عن المهنة والكلية )

[DPT-Blue Phoenix]

(( التفاصيل عن العلاج الطبيعى ))
تعريف العلاج الطبيعى عالميا - أساليب ووسائل العلاج الطبيعى - الأقسام والتخصصات والماستر - ال DPT - ال GEP - نقابة العلاج الطبيعى ولجنة القطاع - أشهر الأسألة واجابتها النموذجية - باقى الأشياء الهامة عن المجال

قبل ما نبدأ كلام تقدروا حضراتكم تشوفوا الفديو بتاعنا الشامل عن العلاج الطبيعى على اليوتيوب

https://www.youtube.com/watch?v=Vswm6gQmJGU

------------------------------------------------------------------

(( الجزء الأول - تعريف العلاج الطبيعى وفقا لرابطة العلاج الطبيعى الأمريكية ومنظمة الصحة العالمية ))


-- دلوقت بقى عايزين فى السلسلة دى نعرف بالظبط كل حاجة عن العلاج الطبيعى لو انا داخل الكلية أو فى الكلية والفرص المتاحة قدامى




طيب نبدأ هو يعنى ايه العلاج الطبيعى لما حد يسألنى يعنى ايه علاج طبيعى اقدر اقول ايه ؟!


- الأول لو اخدنا تعريف منظمة الصحة العالمية WHO واخدنا بتعريف رابطة العلاج الطبيعى الأمريكية APTA نقدر نبسط تعريف العلاج الطبيعى فى اكتر من نقطة والعلاج الطبيعى تعريفه كبير جدا لدرجة انه يوصل تعريفه لكتاب 400 صفحة لكن نقدر نقول :


‫‏العلاج_الطبيعى‬ هو : واحد من مهن الرعاية الصحية Healthcare الموجودة فى مصر هو عبارة عن مجال وسط بين كلية الطب وبين كلية العلوم يعنى علوم الأحياء بطعم الفيزياء والميكانيكا هو مجال بيستخدم الوسائل الطبيعية فى العلاج بدون جراحات او أدوية او كيماويات بهدف الحصول على أفضل نتائج واقل آثار جانبية ممكنة .. وهو مهنة مستقلة مش تابعة لحد .. طيب ايه مهام دكتور العلاج الطبيعى ؟! دكتور العلاج الطبيعى يقدر يقدملنا ايه ؟!


1- الوقاية والتحسين من جودة الحياة والتعليم Prevention-Promotion-Education : وقاية للانسان المريض من انه يصاب بمشاكل تانية او المرض يتطور ووقاية للانسان السليم .. والوقاية هنا شاملة كل حاجة تقريبا من غرف العناية المركزة لأبسط العادات الخاطئة الى بتعملها فى حياتك زى الاوضاع الغلط والاوضاع الصحيحة .. وكمان تحسين الحياة من خلال النصائح والعادات الصحيحة الى نقدر نعملها والخاطئة الى نقدر نتجنبها وكمان نقدر نعلم الانسان المريض دا بعض التمارين او وسائل العلاج تلة يعملها لنفسه فى البيت او نعلم الى حواليه او نعلم الانسان السليم كمان بعض العادات الصحيحة ونبعده عن الخاطئة .


2- الفحص وعمل الاختبارات اللازمة والتقييم والتشخيص Screening-Examination-Evaluation-Diagnosis : دكتور العلاج الطبيعى من خلال دراسته يقدر يفحص المريض ويعمله بعض الاختبارات اللازمة وبناءا عليه يقدر يقيم حالته ويوصل للتشخيص الملائم للمريض بناءا على طرق معينة خاصة بينا احنا بعيدا عن الوسائل الى بيستعملها دكاترة الطب البشرى .


3- وضع خطة العلاج وتنفيذها والتنبؤ بحالة المريض مستقبلا Planning - Intervention ant treatment - prognosis : بعد ما بتوصل لتقييم وتشخيص معين بتقدر بناءا عليه تحط خطة العلاج وتنفذها وكمان تقدر تتوقع حالة المريض دى هتكون عاملة ازاى بعد انتهاء فترة العلاج دى ؟ّ!


4- التأهيل Rehabilitation : انك تقدر تقلل او توقف من نمو خلل معين او اعاقة معينة سواء كان الشىء دا بسبب مرض معين او بسبب حتى البيئة المحيطة وكمان تحاول تحسن من الوظائف الى موجودة بحيث المريض يستعيد اكبر قدر منها ..



‫‏مثال‬ : واحد مثلا حصله كسر فى رجله وجبس رجله فترة لمدة 6 شهور أو ازيد بالتالى هيحصله ضعف فى العضلات جامد بسبب عدم استخدام العضلات دى وكمان بيحصله تيبس فى المفصل وميقدرش يحركه وكمان ممكن لو جه يقف على رجله دى يحصله فقدان فى الاتزان ويقع .. انت هنا بتقدر انك تزيل التيبس وتقويله عضلاته الضعيفة وتخلى المفصل المتيبس يتحرك فى المدى الطبيعى بتاعه تانى وترجع للمريض اتزانه وبالتالى هيقدر يرجع لحياته الطبيعية .. مريض الشلل تقدر تحاول تخليه يتحرك وهكذا .


5- التعاون مع باقى فريق الرعاية الصحية - وتحويل الحالات الى ميقدرش يتعامل معاها Coordination - Referral : فى حالة ان فى مريض انت مقدرتش تتعامل معاه او تشخصله حالته وهو جايلك مباشرة بتحوله لدكتور بشرى او اى تخصص طبى آخر وبتقدر تتعاون مع باقى الفريق الطبى وتشتغلوا كفريق لتوصيل أفضل رعاية للمريض .


‫‏ملاحظة‬ : حتى الآن فى مصر الحالة مش بتجيلك انت مباشرة لازم قانونويا تروح لدكتور بشرى الأول وبعدين تتحولك تمام وهنرجع للنقطة دى بعد كدا لكن دا التعريف العام طبقا لرابطة العلاج الطبيعى الأمريكية ومنظمة الصحة العالمية .. وهنقول على كل نقطة تفصيلا لواحدها ان شاء الله .
- وبناءا على التعريف الى فات دا فالعلاج الطبيعى مهنة مستقلة بذاتها وليست مهنة مساعدة


-----------------------------------------------------------------------------------------

(( الجزء الثانى - أساليب ووسائل العلاج الطبيعى ))


- احنا قولنا فى سلسلة تاريخ العلاج الطبيعى ان العلاج الطبيعى يعتبر اقدم واحدث المجالات المتاحة وقولنا ليه هو أقدم وعرضنا تاريخ العلاج الطبيعى ؟! طيب ليه هو احدث عشان بيستعمل احدث الوسائل فى العلاج ونقدر نقسم الأساليب الى بنستعملها فى العلاج والتأهيل ل3 فروع رئيسية :


1- العلاج اليدوى Manual Therapy : وهو عبارة عن حركات دقيقة ‫‏انت_بتعملها_بايدك‬ للمريض يعنى العلاج اليدوى مهاراتك اليدوية الى بتعملها للمريض بناءا على معرفتك الدقيقة بعلم التشريح وعلم الفسيولوجى وعلوم الحركة زى علم الميكانيكا الحيوية تقدر تستعمل الحركات دى فى العلاج وتقليل الآلام وتكسير الالتصاقات وتقليل التيبس وغيرها من الاستعمالات من اشهر الأساليب الى بنستعملها فى العلاج اليدوى هى الشد وتحريك المفاصل والعمود الفقرى او عمل اوضاع معينة للعلاج بانك بتعتمد على قوة الجاذبية مثلا .
Mobilization - manipulation - Myofascial release - Manual Traction
ودى ليها طرق كتير جدا هتتعلمها فى الكلية وبعد التخرج ان شاء الله .


2- التمارين العلاجية Therapeutic Exercises : هى عبارة عن مجموعة من التمارين او الانشطة الى بتتعمل بناءا على مجموعة مع العلوم الطبية زى التشريح والفسيولوجى والميكانيكا الحيوية وفسيولوجى التمارين وغيرها وبالتالى فى الحالة دى اى تمارين بيبقى بهدف العلاج وتقليل الآلام وغيره ..


والتمارين دى ممكن تكون سالبة انت الى بتعملها للمريض Passive
او موجبة ان المريض يعملها بنفسه Active


3- الفرع الثالث عندنا هو الوسائل الفيزيائية او الوسائل الفيزيائية الكهربية Electrophysical Agents الى انت هتدرسها فى الكلية على هيئة مادتين هما العلاج الكهربى والعلاج المائى ومن ضمن الوسائل الى بنستعملها :


1- الحرارة Heat : والحرارة ليها استعمالات كتير جداااااااا فى العلاج لأنها بتأثر على الدورة الدموية و سرعة التفاعلات الكيميائية جوا الجسم والعضلات .. من وسائلها مثلا الكمادات الساخنة Hot packs وشمع البرافين Paraffin Wax والأشعة تحت الحمراء Infrared وغيرها


2- التبريد Cold : وليه وسائل كتير جدااااا وبيكون فعال فى مراحل الاصابة الأولى على سبيل المثال زى ما بتشوف لما لاعب يجيله شد فى الملعب بيجروا عليه بالثلج ويقعدوا يعملوله بعض التمارين كدا عشان العضلة تفك ؟!


3- العلاج الصوتى Phonotherapy : زى الموجات فوق الصوتية Ultrasound او الموجات التصادمية Shockwave


4- العلاج الضوئى Phototherapy : زى الأشعة فوق البنفسجية Ultraviolet و الليزر منخفض الشدة Low-Power LASER


5- عندنا باقى الاشعاعات الكهرومغناطيسية Electromagnetic radiations : زى الموجات القصيرة والقصيرة جدا Shortwave and microwave diathermy



6- العلاج المغناطيسى Magnetic Therapy


7- العلاج المائى Hydrotherapy : وهو اننا بنستعمل خواص الماء الفيزيائية فى العلاج زى قوة دفع الماء وارشميدس والضغط والكلام بتاع الفيزياء دا

8- العلاج بالتنبيه الكهربى Electrical Stimulating Currents : ودول كتيييييير جدااااااا وبيستعملوا فى حاجات كتير جدا =D لدرجة انهم منهج ترم كامل لواحدهم


9- العلاج بالوسائل الميكانيكية Mechanical Modalities : ممكن يكون علاج بزيادة الضغط Compression او بتقليل الضغط على اماكن معينة Traction


10- ادخال بعض الأيونات أو المواد الكيميائية للجسم عن طريق الموجات فوق الصوتية Phonophoresis


11 - ادخال بعض الأيونات أو المواد الكيميائية او للجسم عن طريق التيار الكهربى المستمر قليل الجهد Iontophoresis


12- وفى بعض الوسائل التانية من وسائل العلاج الضوئى او الأكسجين او الأوزون او غيرها ممكن بنستعملها غير التغذية العلاجية وحاجات تانية هنتكلم عنها بعد كدا .. طبعا الوسائل كتير جدا وكلها وسائل حديثة ومتطورة جدا جدا فى العلاج وهنشوف أمثلة للوسائل دى فى الصور

------------------------------------------------------------------------------------

((الجزء الثالث - أقسام وتخصصات العلاج الطبيعى والماستر ))



الكلية فيها 8 أقسام الى هما :


1- العلوم الأساسية للعلاج الطبيعي .
2- الميكانيكا الحيوية .
3- العلاج الطبيعي للجراحة ( وحروق وجلدية وتجميل )
4- العلاج الطبيعي لأمراض الجهاز الدوري التنفسي والمسنين ( الباطنة )
5- العلاج الطبيعي لأمراض النساء والتوليد ( صحة المرأة )
6- العلاج الطبيعي لإضطرابات الجهاز العضلي الحركي وجراحتها ( العظام )
7- العلاج الطبيعي لاضطرابات الجهاز العصبي العضلي وجراحتها ( الأعصاب )
8- العلاج الطبيعي لاضطرابات مراحل النمو والتطور وجراحتها عند الأطفال ( الأطفال )


- طيب كل قسم من دول ممكن تلاقى فيه أكتر من تخصص فهنتكلم دلوقت عن أشهر الامراض والتخصصات داخل كل قسم وهما كالتالى :


1- العلوم الأساسية للعلاج الطبيعي :


بيدرس المواد الأساسية للعلاج الطبيعى زى العلاج الكهربى والمائى والتمارين العلاجية والعلاج اليدوى وغيرها وبيشرف على مواد طب الأساسية زى التشريح والفسيولوجى والهستولوجى والبيوكمسترى وغيرهم


2- الميكانيكا الحيوية :


بيشرف على تدريس علم الميكانيكا الحيوية وعلم الارجنوميكس وهو علم دراسة علاقة الانسان بالآلات


3- العلاج الطبيعي للجراحة ( وحروق وجلدية وتجميل ) :



ودوره تأهيل قبل وبعد الجراحات العامة
وتأهيل مرضى الحروق ..
وعلاج كتير من مشاكل الجلدية باستعمال أحدث الوسائل زى الصدفية وحب الشباب وتساقط الشعر والاكزيما والبهاق


4- العلاج الطبيعي لأمراض الجهاز الدوري التنفسي والمسنين ( الباطنة ) :

فى تخصص الصدر وهنا بيدخل دورنا فى امراض زى الربو
وكمان تخصص القلب وتأهيل المرضى بحيث يرجعوا طبيعين بأكبر قدر بعد عمليات القلب ..
وتأهيل المسنين زى مشاكل الاتزان وهشاشة العظام ..
وعلاج وتأهيل مرضى الأوعية الدموية زى الدوالى ومرض رينود ..
وبعض أمراض التمثيل الغذائى زى السكر والضغط والامساك من خلال نظام غذائى معين وبرنامج تمارين محدد وبعض الوسائل الحديثة لعلاج المضاعفات وتأهيل المرضى ..
دا غير دورنا فى العناية المركزة ICU


5- العلاج الطبيعي لأمراض النساء والتوليد ( صحة المرأة ) :


متابعة الحمل وتقليل آلام الحمل وبعض المشاكل الى بتقابلها الأم زى متلازمة النفق الرسغى Carpal tunnel syndrome



واثناء الولادة فى بعض اجهزة العلاج الطبيعى الى بتساعد على ولادة آمنة
وبعد الولادة وهو تخفيف مشاكل بعد الولادة وتأهيل الأم ..
غير علاج بعض مشاكل النساء زى تكيسات المبايض والسلس البولى .. وانقطاع الطمث وسقوط الرحم وغيرها


6- العلاج الطبيعي لإضطرابات الجهاز العضلي الحركي وجراحتها ( العظام ) :
تأهيل الكسور وتأهيل بعد عمليات العظام زى عمليات استبدال المفاصل وعلاج مشاكل الرقبه والعمود الفقري ومشاكل المفاصل زى التهابات مفصل الركبه واصابه اربطة الركبه والغضاريف
ومشاكل الظهر زى الانزلاق الغضروفي والام الظهر والديسك والتهابات المفاصل بين فقرات الظهر وغيرها


7- العلاج الطبيعي لاضطرابات الجهاز العصبي العضلي وجراحتها ( الأعصاب ) :

تاهيل مرضي السكته الدماغيه ومن اشهر الحالات الشلل النصفي وباقى الشلل بانواعه والشلل الرعاش والشلل الوجهى
وعلاج الامراض المتعلقه بالاعصاب الطرفيه للجسم Peripheral nerve diseases وأمراض أخرى زى التصلب المتعدد Multiple sclerosis


8- العلاج الطبيعي لاضطرابات مراحل النمو والتطور وجراحتها عند الأطفال ( الأطفال ) :

يتهم باكثر مرض يعتبر ملوش اي علاج غير العلاج الطبيعي وهو الشلل الدماغي cerebral palsy .. وأعداد الأطفال المعاقين فى مصر بالملايين
وكمان حالات تانية زى ملخ الولادة Erb's palsy
وحالات الداون


‫فى_تخصصات_تانية_زى‬ : اصابات الملاعب Sports Injuries - الأورام والرعاية التلطيفية Polliative Care and Oncology - العلاج الطبيعى والطب النفسى والمشاكل العقلية - العلاج الطبيعى وأماكن الوخز بالابر - التخصص فى الوسائل الفيزيائية ورسم العضلات والأعصاب والتشخيص الكهربى أو وسائل العلاج اليدوى والتمارين العلاجية المختلفة - العلاج الطبيعى للحيوانات - غير بقى مجال البحث العلمى - ولينا دور فى الأطرف الصناعية Prosthetic limbs ودور فى الجبائر وغير معامل تحليل الحركة والمشى ورسم الأعصاب والعضلات وغيرها كتير لو فضلنا نتكلم مش هنخلص اعتبر العلاج داخل فى كل حاجة من تخصصات الطب


‫الماستر‬ ( الماجستير ) :


- انت بتقدر تحضر ماجستير فى اى تخصص او قسم من الأقسام الى فاتت دى .. وبتقدر تفتح عيادتك او مركزك يعنى بعد اما 5 سنين من التخرج او تحضير ماجستير وفى بعض التخصصات زى ما زكرت فى الآخر مش موجودة كتخصصات فى مصر ..

- عشان تحضر ماجستير فى تخصص معين لازم تكون جايب على الأقل فى ‫‏مادة_التخصص‬ تقدير ‫‏جيد_جدا‬ ولو انت جايب تقدير عام ‫‏جيد‬ ممكن بتحضر الأول حاجة اسمها ‫‏دبلومة‬ وبعدها بتكمل وتحضر ماجستير ودكتوراه ..


لكن هل معنى انك اخدت ماجستير فى تخصص معين انك مجبر تفتح مركز فى التخصص دا بس ؟!



لأ طبعا



هل انت محتاج ماجستير اجبارى اساسا عشان تفتح المركز ؟!


لأ طبعا انت ممكن تفتح مركز بعد 5 سنين من التخرج مباشرة بدون ماجستير .. وممكن تفتح مركزين كمان وكل مركز يحتوى على كل التخصصات

- والماجستير دا عبارة عن : 3 ترمات وبتعمل حاجة اسمها بروتوكول وبتناقش رسالتك فى الآخر الماستر متوسطه من 2 ونص : 3 سنين ونص
لكن الحد الادنى والاقصى من 2 : 5



لكن الحد الأدنى دا مش هتخلص فيه بالظبط لان بيكون فى فترة كدا بين الدراسة فى الماجستير والرسالة .

-------------------------------------------------------------------------

(( الجزء الرابع - الدكتوراة المهنية DPT ))


- اتكلمنا عن الأقسام والتخصصات الى ممكن بتحضر فيها الماجستير ( الماستر ) دلوقت جه الدور على ال


‫‏الدكتوراه_المهنية‬ DPT يعنى ايه دى بى تى ؟!


- ال DPT هى اختصار ل Doctorate of Physical Therapy الدكتوراة المهنية فى العلاج الطبيعى Clinical Doctorate .. هو برنامج اتعمل اصلا لتحسين مستوى خريجى العلاج الطبيعى على مستوى العالم بحيث ان برنامج الدى بى تى بيعمقك اكتر فى المواد الطبية والمواد العلاجية وغيرها من المواد اللازمة .. وبتكون حاجة مركزة على ‫‏الحياة_العملية‬ بشكل اكبر يعنى الجانب العملى Clinical



- طيب ايه أنواع ال DPT ؟!


- عندنا الدول برا زى أمريكا مثلا فى نوعين للدى بى تى :


1- نظام الدكتوراة المهنية الكلية Entry-Level DPT .. ودا معناه انك بتتخرج معاك دى بى تى تلقائيا يعنى بتدرس كل المواد اللازمة بالدى بى تى اثناء فترة الدراسة فى الكلية يعنى بيتحول بكالريوس العلاج الطبيعى لنظام الدى بى تى .


2- نظام الدكتوراة المهنية الانتقالية Transitional DPT او tDPT : ودا معناه انك بتحضر الدى بى تى بعد ما بتتخرج من الكلية ودا الى موجود حاليا فى مصر .


- طيب ايه الفرق ؟!


الفرق برا زى امريكا مثلا انك لو دخلت علاج طبيعى دلوقت هتاخد نظام ال Entry-Level DPT طيب لو واحد اتخرج على نظام قديم وعايز يحضر دى بى تى او يدرس المواد دى بياخد نظام ال

Transitional DPT


- طيب هو ليه اتعمل البرنامج دا وايه مميزاته ؟!




1- نظام الدى بى تى بيخليك تتخرج بلقب دكتور رسميا لأن اسمك بيكون
Doctor of Physical Therapy ( DPT )
بدلا من Physical Therapist ( PT )
يعنى بتفرق فى المسمى المهنى نفسه وكدا انت هنا فى مصر هتاخد لقب دكتور مهنى او اكلينيكى رسميا قبل باقى الكليات الطبية الى موجودة فى مصر



2- براااااااااا نظام الدى بى تى بيسمح للخريج بأن المريض يجيله مباشرة بدون تحويل من أى تخصص آخر وانه يتعامل مع المريض بشكل مباشر Direct Access ويقدر يكتب روشتة وحديثا فى أمريكا يطلب ويقرأ الآشعة لكن دا قانونيا لم يطبق فى مصر لسه



3- بتزود من المعرفة العلمية لدكتور العلاج الطبيعى فى النواحى العملية خاصة والتدريب العملى وبتخلى شغله على اسس أقوى فى ناحية الشغل العملى Clinical


‫‏الشهادات_المهنية‬ Vs ‫الشهادات_البحثية‬
( دى بى تى Vs ماستر )


- قلتلى طيب ايه الفرق بين شهادات زى الماجستير والدكتوراه وبين الدى بى تى ؟!


- قلتلك عندك نوعين من الشهادات حاجة اسمها الشهادات ‫‏البحثية‬ زى الماجستير Master والدكتوراة الفلسفية PhD .. يعنى بتدرس مثلا 3 ترمات ماجستير وبعدين تعمل رسالة بحثية او بحث وتناقش الرسالة دى .. وهدف الرسايل دى هدف بحثى انك راجل بتقدر تبحث وتخرج بنتيجة بحث جديدة المفروض .. ودى بيتميز فيها غالبا الأكاديميين يعنى زى دكاترة الكلية كدا .. الناس الى عايزه المفروض تكمل فى الاتجاه دا .


- الحاجة التانية هى الشهادات ‫‏المهنية‬ زى الدى بى تى وفى بعدها كمان الدكتوراه العلمية ممكن تاخدها بس دا مش موجود فى مصر DSc .. والشهادات دى من غير رسالة بحثية وهدفها أكتر الممارسة العملية وشغل العيادات زى ما قلنا يعنى الناس الى بتحب جانب الممارسة العملية بشكل أكبر وعايزه تتعمق فيه .. والدى بى تى بتعتبر دلوقت برنامج اساسى فى الدول المتقدمة زى امريكا وكندا وغيرها .


- برنامج Transitional DPT فى مصر
عبارة عن :


‫‏أولا‬ : مواد ‫‏اجبارية‬ .. لازم كله بيدرسها


‫‏ثانيا‬ : مواد ‫‏اختيارية‬ .. بتختار منها حاجات تدرسها


‫‏ثالثا‬ : مواد ‫‏تخصص‬ معين بتدرسها بتختار برده لكن اجبارى تختار تخصص طبعا .. والتخصصات الى موجودة هى :


1- اضطرابات الجهاز التنفسى والدورى ( بندرس عن دا تبع قسم الباطنة ) Cardiovascular and Pulmonary Disorders
2- التشخيص الكهربى Clinical Electrodiagnosis
3- عظام Orthopedic Disorders
4- اصابات ملاعب ( الاصابات الرياضية ) Sports Injury
5- أطفال Pediatric Disorders
6- أعصاب Neurological Disorders
7- صحة المرأة Woman's Health
8- مسنين Geriatrics
9- Integumentary management العلاج الطبيعى للجلدية
10 - دا من ضمن وسائل العلاج اليدوى Manual Soft Tissue Mobilization
وغيرها


- بتدرس 4 ترمات لمدة سنتين وبتمتحن عادى
- وبكدا نكون وضحنا كل حاجة عن الدى بى تى والفرق بينها وبين الماستر والفرق بين الشهادات البحثية والشهادات المهنية أو الاكلينيكية ..
وهنا الموقع الرسمى لبرنامج DPT لمزيد من الاطلاع
http://fptcu.org/dpt/

-----------------------------------------------------------------------------------

(( الجزء الخامس - النظام الحديث ونظام ال GEP ))


- فى سنة 2013 تم تطبيق النظام الحديث فى مصر طيب ايه هو النظام الحديث دا ؟!


- النظام الحديث هو نظام ال6 سنين يعنى الكلية بقت عبارة عن : 5 سنين دراسة + سنة امتياز .. أول سنتين نظرى - بعد كدا سنة ثالثة بتكمل فيها المواد الأساسية وبتدرس روند الباطنة بعد كدا اخر سنتين بتدرس باقى الروندات .


- طيب هو ايه فايدة النظام الحديث عن النظام القديم يعنى احنا هنستفيد ايه ؟! هل فى فايدة ولا ملوش فايدة النظام دا ؟!


- قلتلك لأ النظام الحديث ليه فايدة وفايدة كبيرة كمان ازاى يعنى ؟! بص يا سيدى :


1- انت بتدرس مواد جديدة مكنتش موجودة قبل كدا وهما كتير فعلا المواد الى اتضافت ولايحة قوية جدا من حيث المواد الموجودة حاجات كنا هنضطر ناخدها بعد كدا لو بنفكر فى السفر لدولة زى أمريكا


2- زاد عدد الساعات الى انت بتدرسها عن النظام القديم ودا برده ليه فايدة انك لو بتفكر تسافر كدا بتعادل عدد ساعات أقل


3- تقدر تطالب بعد كدا ان العلاج الطبيعى يدخل شريحة كادر أعلى لأن الكلية بقت 6 سنين مش 5


4- ان شاء الله دا يكون خطوة نحو تطبيق نظام ال Entry-Level DPT


- طيب ترجع وتقولى ايه فايدة انى ادرس مواد زيادة وعدد ساعات ازيد ؟!

- هقولك لو شفت الفديوهات الى نزلناها هتعرف اننا نعتبر بعد أمريكا وكندا فى عدد الساعات الدراسية واننا بنحاول نلحقهم ..


من فترات كانت شهادة العلاج الطبيعى المصرية تعتبر معادلة للشهادة الأمريكية .. لكن دلوقت انت بتحتاج عشان تسافر انك تدرس المواد الى مأخدتهاش فى الكلية وتعادل عدد الساعات بتاعتك وبعدها لازم بتمتحن امتحان الرخصة عشان تزاول المهنة مثلا فى أمريكا ..


- وبالتالى انت لما درست فى النظام الحديث يبقى هتحتاج تعادل عدد ساعات أقل وكمان عدد مواد أقل ؟! طيب تعرف حاجة عن نظام ال GEP فى كلية العلاج الطبيعى جامعة القاهرة

ايه دا ايه الكلام الغريب الى انت بتقولوا دا ؟!

- فى سنة 2015 كلية العلاج الطبيعى عملت نظام اسمه ال GEP الى هو General Education Program وهو نظام للخريجين بيأهلهم للحصول علي رخصة مزاولة المهنة في الولايات المتحدة الأمريكية O.o وبتقدر انت تختار المواد الى انت محتاجها وعدد الساعات الى محتاجها فيها وبتدرسها .. النظام دا بيكون كله Online ..

والمواد الى فيه بتكون حاجة من 7 :


1- Humanities .. علوم انسانية زى اللغات
2- Physical sciences .. العلوم الطبيعية زى الفلك والفيزياء والكيمياء
3- Mathematics .. العلوم الرياضية زى الأحصاء
4- Behavioral sciences .. العلوم السلوكية زى علم النفس
5- Social sciences .. العلوم الاجتماعية زى الاقتصاد
6- Biological sciences .. العلوم الحيوية زى التشريح والفسيولوجى والأحياء وعلم الحركة وعلم الوراثة
7- Modules .. زى ال emergency procedures

طيب عشان نعرف عن أمريكا بشكل أكبر والنظام هناك نقدر نسمع فديوهات ايفنت تذكرتى رايح جاى للدكاترة الى جربت بالفعل ..


https://www.youtube.com/channel/UCJj...GoiMO9vriz_vsg


- طبعا كل دا بيدى فرصة سفر كويسة للعلاج الطبيعى فى مصر والحمد لله ان العلاج الطبيعى هو الرائد فى المنطقة ودا بيدى فرص أعلى للسفر والأنظمة دى كلها بتسهل وبنحاول دائما نلحق بالدول المتقدمة .. ولو سمعنا كلام الدكاترة فى الفديوهات هتلاقيهم بيقولوا لازم قبل ما تسافر تحدد الأول انت عايز تكمل فى طريق بحثى ولا مهنى ؟! انت عايز اى تخصص مثلا ؟! انت هتسافر فين بالظبط اى ولاية واى جامعة ؟! وايه متطلباتها ؟! لأنها بتختلف من ولاية للتانية .. وبالتالى مفيش حاجة اسمها انا عايز اسافر كدا عامة لأ لازم بتحدد ؟! يبقى الحكاية مش عشوائية لازم التخطيط والفهم والمعرفة ..

احنا مش قليلين وان شاء الله المستقبل للعلاج الطبيعى وباذن الله من تقدم لتقدم دائما ان شاء الله تفائلوا



هنا الموقع الرسمى لكلية العلاج الطبيعى جامعة القاهرة
http://fptcu.org/index.php/g-e-p
وهنا الموقع الرسمى لل GEP
http://fptcu.org/gep/


--------------------------------------------------------------------------------------------


(( الجزء السادس - نقابة العلاج الطبيعى ولجنة قطاع العلاج الطبيعى ))


- فى بعض الناس تقولك العلاج الطبيعى ملوش نقابة ؟! او ان العلاج الطبيعى الى بيشرف عليه نقابة الاطباء .. ودا كله مش حقيقى .. العلاج الطبيعى مر بمشوار طويل وكفاح لحد ما بقى لينا نقابة عامة ونقابات فرعية .



- فى سنة 1994 زى ما قلنا القانون رقم (209) قرر مجلس الشعب انشاء نقابة عامة للعلاج الطبيعى مقرها القاهرة .. ودلوقت حديثا عندنا مبنى قديم للنقابة .. ومبنى جديد فعلا يعنى حاجة تشرف فى التجمع الخامس الى صورته تحت دا


-والنقيب العام الحالى 2016 للعلاج الطبيعى هو : دكتور سامى سعد



- طيب هى النقابة دى ايه وظائفها ؟!


قلتلك هى الجهة الى بتهتم بكل ما يخص مهنة العلاج الطبيعى يعنى هى الى بتعمل على رفع مستوى العلاج الطبيعى فى مصر ورفع مستوى الخدمات العلاجية الى بتتقدم للمرضى واقتراح المشروعات ويفترض يكون ليها دور فى تطوير المناهج والتعليم والاهتمام بمصالح الاعضاء وتهيئة فرص عمل جديدة ليهم وكمان دورها فى التعاون مع باقى الجمعيات والهيئات والاتحادات الدولية الى ليها علاقة بالعلاج الطبيعى لرفع مستوى المهنة وتبادل الخبرات وكمان هى الى بتحارب الدخلاء على المهنة ..


- قلتلى طيب ايه شروط القيد فى النقابة دى وانى أمارس مهنة العلاج الطبيعى ؟!


الشروط هى انك تكون مصرى وانك تكون حاصل على ترخيص بمزاولة المهنة من وزارة الصحة .. ومفيش حد يقدر يمارس المهنة قانونيا الا لما يكون مسجل اسمه فى جداول النقابة .. يعنى مش من حق اى حد غير خريجى كليات العلاج الطبيعى يشتغلوا فى العلاج الطبيعى .





- وقالك النقابة دى ليها 6 جداول :
1- الجدول العام : للمارسين .. 2- جدول للاخصائيين .. 3- جدول غير المشتغلين .. 4- جدول غير المصريين .. 5- جدول أخصائى العلاج الطبيعى للخبراء الأجانب 6- يقال ان النقابة فيها جدول للاستشاريين هذا والله اعلم



- طيب هى النقابة دى بتتكون من ايه ؟!


نقدر نقسمها ل 3 مكونات رئيسية :


1- النقابة العامة للعلاج الطبيعى
2- النقابات الفرعية فى مختلف المحافظات
3- اجتماع الجمعية العمومية



- النقابة العامة طبعا هى الأساس ومقرها فى القاهرة وبعدين بتمثل المهنة فى مختلف المحافظات النقابات الفرعية التابعة للنقابة العامة .


- قلتلى طيب ايه اجتماع الجمعية العمومية دا يعنى ؟!

- دا عبارة عن اجتماع بيحضر فيه كل المسجلين بجداول النقابة من ممارسين واخصائيين وغيرهم دا بيتعمل المفروض كل سنة فى مقر النقابة العامة فى شهر يونيو .. ودا الى بيتم فيه انتخاب نقيب جديد ..ومناقشة المسائل الى تهم النقابة .. ويشوفوا فيه الاقتراحات المقدمة من الاعضاء وغيرها ..





‫لجنة قطاع العلاج الطبيعى


- فى حاجة تم انشائها حديثا اسمها لجنة قطاع العلاج الطبيعى وكان لدكتور علاء بلبع عميد كلية العلاج الطبيعى جامعة القاهرة دور كبير فى انشائها زى ما كان ليه دكتور كبير فى تطبيق الدى بى تى ووضع حجر الأساس لمشروع لا اعاقة العالمى .. قالك عشان شهادة زى الدى بى تى كان يتوافق عليها لازم بتمر على لجنة فى المجلس الاعلى للجامعات وهى توافق عليها كانت اللجنة دى من الاطباء البشرى !!!!!!!!


وبالتالى كانوا بيوقفوا لينا الدى بى تى او غيرها ومش بيتوافق عليها .. ولكن حديثا فى 2013 انشاء لجنة قطاع مكونة من دكاترة علاج طبيعى واتوافق على الدى بى تى والحمد لله


- ودكتور علاء بلبع هو أمين لجنة قطاع العلاج الطبيعي – المجلس الاعلي للجامعات .


---------------------------------------------------------------------------------

(( الجزء السابع - أهم الأسألة عن مستقبل المهنة ومستقبل خريجها فى مصر والعالم ))


1- هى الكلية 6 سنين بس يا ترى بنعمل ايه فى ال6 سنين دول ؟!


- أول سنتين فى الكلية دول سنتين بتدرس فيهم معظم المواد الأساسية سواء مواد بشرى او مواد علاج طبيعي بيشرف عليهم بشكل اساسى قسم العلوم الأساسية وغير مادة الميكانيكا الحيوية وهى سنين نظرية او اكاديمية .. من سنة 3 بتبدأ تنزل مستشفيات سنين عملى وتطبيقى براكتيكال يعنى وسنة 3 تعتبر مرحلة انتقالية يعنى بتدرس فيها باقى المواد الأساسية وبتدرس فيها روند باطنة وسنين العملى بيكون فيها محاضرات للنظرى وعملى بتطبقه فى السكاشن مع زمايلك وتطبيقى فى المستشفيات عشان تشوف الكلام الى درسته على الحالات .. واخيرا سنة الأمتياز دى بتشتغل فيها فى المشتشفى بأجر رمزى كدا يعنى بس طبعا سنة ضرورية للتخرج من الكلية .


----------------------------


2- طيب ايه هى طبيعة العمل هنا فى مصر ؟!


- اما عمل حكومى ودا داخل أقسام العلاج الطبيعى بالمستشفيات ودا زى اى شغل حكومى فى مصر أو الشغل الخاص فى عيادات ومراكز العلاج الطبيعى اللى بيديرها دكتور علاج طبيعى وانت معاه لحد ما تقدر تقتح عيادة باسمك بعد التخرج ب 5 سنين او انك تعمل ماجستير ..
وفى البعض بيفتح العيادة او المركز بتاعته باسم دكتور تانى ( بس نبعد عن الحاجات دى الله يكرمكم )


----------------------------


3- طيب ومين هما المرضى اللى بتعامل معاهم ؟؟


- بص هو عامة العلاج الطبيعى بيتعامل مع 4 مجموعات من المرضى :
أ - المجموعة الاولى Group 1 .. زى مثلا ال soft tissue injuries يعنى مثلا واحد رجله اتقصعت وتعباه وهيحتاج علاج طبيعى وهيخف ان شاء الله ودا ان شاء الله هيخف تماما full recovery
ب- المجموعة التانية Group 2 .. وهى الى بيشكل العلاج الطبيعى منها جزء من العلاج زى مثلا الكسور Fractures المريض لازم هيجبس الجزء المكسور وبعد ما يفك الجبس لازم علاج طبيعى ولازم يشترك اعضاء الفريق الطبى مع بعض وتكون مهارتهم عالية عشان يحصل Full recovery .. او يعنى نقول
Recovery with correct management يعنى هيخف لما يتعمله علاج صح ويشرتك أعضاء الفريق الطبى
ج- المجموعة الثالثة Group 3 .. وهى الى بيكون فى اعاقة حصلت ومينفعش ترجع زى مثلا مرضى الشلل الدماغى Cerebral Palsy أو لو اتعمل لمريض بتر لجزء من اعضائه ودا بيتطلب برده اشتراك الفريق الطبى مع بعضه ودور اساسى وكبير للعلاج الطبيعى بأنه يأهل المريض ويرجعله معظم الوظائف الى فقدها بأكبر قدر بحيث يقدر يعيش انسان طبيعى ومعتمد على نفسه بأكبر قدر .. بس المريض هيفضل ليه جزء من الأعاقة حتى ولو بسيط يعنى Residual deformity or irreversible damage
د- المجموعة الرابعة Group 4 .. والمجموعة دى برده بتتطلب اشتراك الفريق الطبى و بتضم المرضى الى المرض بتاعم دائما بتطور للأسوأ غصب عننا Progressive deterioration .. مثال على المجموعة دى مثلا التهاب المفاصل الروماتويدى Rheumatoid Arthritis

وهنا دورنا الأساسى مع باقى الفريق الطبى اننا نحاول نمنع الأعرض بأكبر قدر ولو حصلت نقللها ونسيطر عليها ونحاول نحافظ على وظائف المريض ولو فقد وظيفة معينة انه يمشى مثلا مساعده انها يرجعها بأكبر قدر ممكن ونحاول نخلى المريض يتأقلم مع حالته المرضية بأكبر قدر من خلال النصائح وتعليم المريض حاجات يعملها باستمرار .

- لو هنتكلم عن الحال فى مصر هنا " ودا لأن الدور متأخر شويتين لسه بس احسن من الأول كتير والحمد لله "

- فالشغل اما شغل كبار او بالغين يعنى : ودا ياما شغل عظام فأشهر الحالات بتكون اصابات العمود الفقرى والركبة واصابات العظام عامة زى الكسور وحالات ضعف العضلات ..

و حالات أعصاب زى الشلل بكل انواعه وانت بتعملهم تأهيل بحيث يرجعوا يتحركوا تانى باذن الله ويستعيدا الوظائف الى فقدوها ..

- واما شغل الأطفال زى الشلل الدماغى وملخ الولاد والداون والبله وحالات تأخر النمو بأسبابها المختلفة .. وهنا دورك تساعدهم يكتسبوا الوظائف اللى مش موجوده عندهم سواء كان الطفل مبيقدرش يمشى مثلا او اى حاجة تانية ..

- وطبعا دا بيتم بوسائل مختلفة سواء تمرينات علاجية أو علاج يدوى أو وسائل فيزيائية او اى وسائل تانية بتكتسبها انت من الكلية والخبرة بعد كدا ..

- باقى التخصصات موجوة برده لكن بشكل أقل لكن احنا محتاجينها فى مصر هنا جدا جدا جدا ولو انت اشتغلت فيها هتبقى مميز لأن يعتبر مفيش حد بيشتغل فيها هنا ..


----------------------------


4- طيب وايه وضعك داخل المنظومة الطبية بقى ؟؟


- تنظيم عملك معاهم بيتم ضمن قوانين ثابته ومضمونها ان الحالة اللى بيتعملها تحويل للعلاج الطبيعى بعد تشخيصها من الطبيب المعالج بتتعرض عليك تشوف تشخيصها وتشوف الاشعة والتحاليل اللى تؤكد ليك التشخيص دا وبعدها تعمل برنامج العلاج اللى هتمشى عليه وتبدأ انت فى تنفيذه .. وبرده بتكون على اتصال بالطبيب المعالج لو ظهرت اى اعراض او مضاعفات جديدة .. لحد دلوقت دا المفروض هنا فى مصر لكن احنا فى مصر يعنى هتلاقى حالات بتروح لدكتور العلاج الطبيعى مباشرة والناس بتكتب روشتات وهتلاقى بعض الناس بتحاول تدخل فى شغلنا رغم ان دا مش قانونى .. لكن مثلا فى امريكا هتلاقى ان فى أكتر من ولاية الحالة مش بتحتاج تحويل من دكتور بشرى وليك بعض الأدوية بتكتبها عادى وكدا بس ما علينا من دا دلوقت ..
----------------------------


5- فرصة العمل ايه وضعها هنا !!!


- أولا انت بتخلص فى الكلية 5 سنين وبعدها سنة امتياز وبعدها ليك سنتين تكليف .. وكدا كدا عدد خريجى العلاج الطبيعى قليل جدااا مقارنة بباقى الكليات الطبية فانت المستشفيات اساسا الى محتاجاك وكمان الشغل الى محتاجك ..


- دا غير شغلك فى العيادات والمراكز الخاصة ودا برده مضمون جدا باذن الله لأن العيادات على مستوى الجمهورية عددها قليل بالنسبة لعدد الحالات يبقى انت برده الشغل هو اللى عاوزك بس الى يمكن مشكلة شوية ان العلاج الطبيعى مش منتشر الا فى مناطق معينة زى القاهرة مثلا ..


- أو انك تسافر خارج مصر واتكلمنا كمان عن نظام ال GEP وان فى مصر احنا الثالث من حيث عدد الساعات الدراسية وخليك فاكر ان مصر هى الرائدة فى العلاج الطبيعى والعلاج الطبيعى فى المناطق المحيطة لسه بيقول بسم الله الرحمن الرحيم يعنى الخريج المصرى اعلى من الدول العربية والدول المحيطة .. وبالتالى انت الى هيبقى ليك الأولوية فى السفر والشغل غير ان عددنا بسيط والاحتياج للعلاج الطبيعى عالى ..


----------------------------


6- طيب الأمتياز دا باخده فى محافظتى ولا اى محافظة ؟!


- الامتياز بتاخده فى محافظتك او فى القاهرة كل واحد على حسب رغبته والامتياز دا هو عبارة عن سنة تدريب اجبارى فى المستشفيات بعد ما بتخلص ال5 سنين دراسة وسنة لازمة عشان تتخرج من الكلية



----------------------------


7- طيب انا مش فاهم يعني ايه سنتين تكليف ؟؟


- بعد ما بتخلص الامتياز ليك سنتين تكليف وبيوزعوا الدفعة على المستشفيات علي حسب رغباتك وتقديرك بعد ما تخلص سنتين التكليف فى المستشفيات بقى بعد كدا انت بتتعين فى المستشفى الى انت عايزها .. او تحضر دراسات عليا او حتى لو عايز تسيب الشغل الحكومى خالص .



----------------------------


8- والشغل فى سنتين التكليف دول دا بأجر بقي ولا بدون اجر ؟


- بأجر طبعا


----------------------------


9- بس الشغل دا لكل الطلبة ولا الى جايبين تقديرات بس !!


- لأ لكل الدفعة بس مثلا نفترض ان انا جيب امتياز وانت جايب جيد جدا وفى مستشفى متبقى فيها مكان واحد بس يبقى ياخدونى انا وانت تروح مستشفى تانية على حسب رغباتك الى انت كاتبها يعنى حاجة زى نظام تنسيق كدا .. ودى يعنى تعتبر من ضمن مميزات التقدير .. بجانب برده من مميزات التقدير انك لازم تكون جايب مجموع معين المفترض لو عايزة تحضر ماجستير فى قسم معين تجيب فى مادة التخصص مجموع معين تقريبا اقل حاجة جيد جدا وكدا يعنى .. او بتحتاج تحضر دبلومة الأول ودى قصة تانية ..


----------------------------


10 - طيب التخسيس والسمنة والنحافة والأعشاب والحجامة والحاجات دى كلها تبع مجالنا ولا لأ ؟! (( أكذوبة التخسيس ))



- بص مفيش حاجة اسمها قسم تخسيس او سمنة ونحافة فى الكلية .. لكن فى ناس بتاخد دبلومات متخصصة بعد الكلية .. انت كل الى بتعرفه عن التغذية العلاجية هو مادة بتدرسها ترم فى الكلية فى قسم ‫‏الباطنة‬ ..
- وبتستخدم التغذية العلاجية Nutrition مع التمارين العلاجية والمجهود البدنى Physical activity لبعض الأمراض زى السكر والضغط وغيره بالاضافة لباقى الوسائل الأساسية الى اتكلمنا عنها


- بس عامة مجال التغذية والسمنة والنحافة دا مش مقتصر على البشرى ولا عليك .. يعنى الدكتور البشرى ممكن يكمل دراسة ويعمل عمليات سمنة وغيرها .. لكن لو جينا لشغل الأجهزة الأولى الى يشتغل بالاجهزة الى فيها موجات فوق صوتية او حرارة او غيرها فى حالات السمنة يبقى انت ..


-- فى نوعين من الناس هتلاقيهم :


- فى ناس بتقدر مجالها وتحترمه وتاخد دبلومات التغذية دى كحاجة اضافية .. لأن المراكز غالبا بتكون اكتر من تخصص .. فبيستعملوها كحاجة اضافية .. وبتفيد فى علاج بعض الحالات مثلا واحد عنده خشونة فى الركبة ووزنه زايد يبقى انت تقلل وزنه الأول عشان تقدر تعالجه هنا دى حاجة كويسة ..




- وفى فئة تانية من الناس معندهاش معلومة اساسا ولا بتاخد حتى دبلومة ويشتغل بكلمتين حفظهم وقلدهم وينسى كل الى درسه فى الكلية ودا بيسىء لمجالنا .. يا خسارة على الكلية الى هيقعد فيها 6 سنين وكمان بيخلى الناس تاخد فكرة مش مظبوطة عن المجال .. والبصمجية فى كل حتة كتير .. ومفيش حاجة اسمها دكتوراه علاج طبيعى وسمنة ونحافة يا سلام قال يعنى محضر دكتوراه فى كل تخصصات العلاج وكمان سمنة ونحافة حاجة تضحك يعنى



- والأعشاب والزيوت والحجامة والحاجات الباقية دى كلها مش تبعنا دى كلها سبوبة واكل عيش .. وكل الى حصل دا لأن كان العلاج الطبيعى لسه فى أوله ومكنش فى وضعه الحالى .. لكن دلوقت الوضع اتغير سواء من حيث وضع الكلية او التدريس فى الكلية او غيره فالأمل فى الأجيال الجديدة باذن الله


----------------------------


‫‏ملاحظة‬ : ممكن بتاخد دبلومات تانية زى الليزر وغيره والتقدير فى الكلية تقدير تراكمى .


- وهنلاقى صورة تحت من ضمن الصور بتقول ان العلاج الطبيعى هيتقدم عن وضعه فى 2012 بنسبة 36% زيادة بحلول عام 2022 وخاصة فى بلاد زى أمريكا يعنى المهنة بتتقدم بسرعة الصاروخ والحمد لله

----------------------------------------------------------------------------------------------

(( الجزء الثامن والأخير - العلاج الطبيعى أوسع من كدا بكتير ))


- أولا هل انا ممكن اتخصص فى اكتر من تخصص فى العلاج الطبيعى ؟!


- الاجابة اه ممكن انت مش مجبر فى العلاج الطبيعى انك تتخصص فى حاجة معينة زى البشرى مثلا لأن عدد خريجى العلاج الطبيعى حتى الآن فى العالم كله قليل جدا جدا جدا


- طيب هو المركز ممكن يتكلف كام ؟!

- بص المركز ممكن من ابسط الامكانيات وانك تعتمد على الشغل اليدوى والتمارين العلاجية بشكل اكبر لمركز يتكلف ملايين بحيث انك تجهزه بافضل الامكانيات والاجهزة ودى ميزة العلاج الطبيعى انك تقدر تبدأ باقل امكانيات والمهم مهارتك وطبعا بتختلف على حسب المكان الى هتفتح فيه من حيث حالة الناس المادية .. وكمان الأفضل انك بتشارك مع اكتر من زميل ليك وبتعملوا مركز محترم وبيكون بيضم اكتر من تخصص وافتكر انت مسموحلك تفتح مركزين علاج طبيعى باسمك ويكون كمان فيهم كل التخصصات بمزاجك


- طيب احنا قلنا ان عندنا 3 وسائل علاج اساسية اما وسائل فيزيائية او علاج يدوى او تمارين طيب مفيش حاجة تانية بنستخدمها ؟!



لا طبعا فى
- ‫‏الفحص_التقييم_التشخيص‬ : احنا بنعمل تقييم وتشخيص للحالة باساليب كتير جدا ودى اهم حاجة انك تعمل فحوصات وتقييم وتشخيص للحالة تانى حتى لو متحولة من دكتور بشرى عشان تقدر تحط ليها برنامج العلاج المظبوط وتحقق اعلى نتائج باذن الله .. ممكن يكون التشخيص ‫‏تشخيص_كهربى‬ زى اجهزة رسم العضلات والأعصاب .. ممكن يكون تقييم وتشخيص ‫#‏ميكانيكى‬ زى المعامل المتخصصة زى تحليل المشى وال Isokinetic وغيرها وهتلاقوا ليها صورة تحت .. ممكن بتعمل اختبارات ومقاييس من الى انت بتدرسها وغيرها كتير من الحاجات الى هتدرسها فى الكلية أو تتعلمها بعد التخرج وهنشوف صور لحاجات كتير من دى بنستخدمها زى حاجة عاملة زى المتر اسمها measurement tape او جهاز اسمه manual goniometer دا عامل زى المنلقة كدا بتقيس بيه كل مفصل بيتحرك قد ايه .


- طيب هل التمارين والعلاج اليدوى دى نوعين 3 بس ؟!


- لا طبعا التمارين دى بتتنوع من اول تمارين لمدى حركة المفصل ROM لتمارين للاسترخاء Relaxation لتمارين لفك التشنج والشد العضلى الى اسمها Stretching وتماين للحفاظ على التوازن والتناسق العصبى العضلى balance and coordination وتمارين هوائية ولا هوائية وغيرها انواع كتير .. وكمان بنستعمل أدوات كتير ممكن تساعدنا فى عمل التمارين دى زى ما ظاهر فى الصور .. ووسائل العلاج اليدوى كتير جدا وهى مدارس وكل مدرسة ليها اساليبها وطرقها الخاصة وعندنا مثلا اللاصقات الى بتتعمل بطرق معينة زى ال Kinesio taping وبرده فى بعض انواع الادوات بنستعملها زى ما ظاهر فى الصور .


- ‫‏التأهيل_و_الوقاية‬ : هتلاحظ اننا بنستعمل ادوات كتير جدا فى عملية التأهيل وخاصة مع حالات الأطفال وحالات الشلل الى اسمعها الاجهزة التعويضية والاطراف الصناعية والجبائر Arthosis وغيرها وهتلاقى برده بنستعمل بعض انواع المعدات والغرف لمساعدة المرضى على المشى او عمل تمارينات معينة وبرده هتلاقى بعض انواع البدل والداعمات بنستعملها للأطفال .. هتلاقى فى الصور برده اوضاع وحركات صحيحة واوضاع وحركات خاطئة نقدر نقول لأى حد عليها بحيث يعمل وقاية لنفسه او حتى يستعمل وضعه معين بهدف العلاج .


- ممكن انت بتتعمق اكتر فى التغذية العلاجية Nutrition لو هتشتغل مع حالات الباطنة مثلا عندك مرضى السكر والضغط لازم بتقول للمريض دا على Diet معين بجانب انه بيعمل مجهود بدنى محسوب Physical activity بحيث يساعده فى التحكم فى الضغط والسكر من النوع التانى .. ممكن بتستعمل بعض انواع الشرابات العلاجية زى فى حالات الدوالى .. وفى معامل متخصصة للعلاج الطبيعى للتقييم والتشخيص



------------------------------------


‏مدارس_العلاج_اليدوى‬


- فى الدول المتقدمة فى اكتر من كلية بتشترك فى وسائل العلاج اليدوى Manual Therapy زى حاجة اسمها ال Osteopathy زى الطب الصينى او غيره ..
والحاجات دى احنا ممكن بنعرف فيها برده وندرس فيها بعد التخرج كزيادة للمعرفة بتاعتنا بس هى مش من اساس المجال .. فى عندنا كمان استعمال اماكن الوخز بالابر الصينية فى العلاج Acupuncture .


- (( أكذوبة المساج أو التدليك ))



ومن ضمن الحاجات دى فى حاجة اسمها ال Massage Therapist اهو دا الى بتاع المساج براااااااااا كل الى بيعمله انواع مساج استرخائى وعلاجى مش احنا يا جداعان وعندك الى بيشتغلوا ممكن فى حكاية المساج دى شوية هنا التربية الرياضية



---------------------------------


فريق الرعاية الصحية Healthcare Team

‫
- قلتلك تعرف ان فى كليات كبيرة جدا من كليات الرعاية الصحية مش موجودة فى مصر !!!!!! بس المفروض ان كل دول بيشتركوا عشان يعالجوا المريض ؟!


مثلا
Physical Therapist : دكتور العلاج الطبيعى وظائفنا كل الى قلناه بالاضافة لانك رئيس فريق التاهيل الى هييجى بعدك بقى
- Physical Therapy assistant : مساعد دكتور علاج طبيعى والمفروض انك الكبير الى بتحط البرنامج والناس دى بتنفذ وتساعدك
- Occupational Therapist : العلاج الوظيفى دا بيحاول يخلى المريض يستعيد بعض الوظائف الى فقدها الى هو محتاجها فى حياته .. زى الانشطة الدقيقة ازاى يعرف ياكل ويشرب ويغسل اسنانه مثلا
- Vocational Counselor : التدريب المهنى .. لو المريض دا مضطر يتعلم مهنة جديدة بعد عملية معينة مثلا او كدا
- الدكتور النفسى وطبعا تخصص بشرى يحاول يأهل المريض نفسيا
- دكتور التغذية ..
- غير بقى باقى المهن الى احنا بنسميهم هنا الفنيين وخريجى المعاهد الصحية وكدا ..
- حتى خريج الخدمة الاجتماعية ليه دور فى انه يحل مشاكل المريض
Physician .. طبيب بشرى وطبعا كل التخصصات بتاعتهم دورهم الاساسى فى الطب بمعنى تشخيص الحالات عن طريق بقى التشخصيات الطبية المختلفة او الجراحة وغرف العناية المركزة مثلا ..
Nurse .. الممرضة هى الى بتتابع مع المريض كل فترة وتعيد ليه التشخيصات الى الدكتور عملها وتتابع الحالة والعلاج الى بياخده وكدا
Pharmacist .. الصيدلى وظيفته طبعا غير تصنيع الأدوية انهم يحددوا الجرعة المناسبة للدواء الى المفروض المريض ياخدها وانسب الادوية
Dentist .. دكتور الاسنان طبعا وظيفته بيهتم بصحة الاسنان وعمل التقويمات اللازمة وخلع الاسنان والحشو وغيره
Dental Hygienist .. دى وظيفة مساعدة لدكتور الاسنان مش موجودة فى مصر مهتمية اكتر بنظافة الاسنان
Dental assistant .. مساعد دكتور الاسنان
Physician assistant : مساعد الدكتور البشرى


- طيب دا الحكاية طلعت كبيرة بقى ومطلعش زى ما احنا فاهمين فى مصر او مفهمنا ان الحكاية كلها طب وصيدلة واسنان وعلاج طبيعى ؟! وان كل واحد ليه دور دقيق ومهم ودكتور العلاج الطبيعى من أهم الأدوار فى الفريق والحمد لله

---------------


‫‏اخيرا العلاج الطبيعى والمجتمع


- العلاج الطبيعى بشكل خاص وكل المهن الى ليها دور فى تأهيل المرضى بوجه عام السبب فى ظهورها وتقدمها هو ان الانسان المعاق او الى مش قادر يتحرك او يعمل حاجة دا او الى بيفقد وظايفه بيكون طول عمره عالة على اسرته وعلى مجتمعه .. ومفيش مجتمع بينتج بدون افراد .. فكان هنا السبب الرئيسى مع انتشار الحالات دى بشكل كبير الدافع الاساسى لنشئة المجالات دى وتطورها انها تحول الانسان المعاق دا من انسان عالة على مجتمعه لأنسان منتج قادر يشارك فى المجتمع بدور فعال وقادر يعتمد على نفسه بأكبر قدر وطبعا دى رسالة عظيمة جدا والحمد لله ان شاء الله نكون قدها وبكدا انتهت السلسلة بتاعنا والسلام عليكم ورحمة الله وبركاته

Amr Elsareih
صفحة ( يومك طبيعى )