اهلا وسهلا بك فى بوابة الثانوية العامة ... سجل الان

العودة   بوابة الثانوية العامة المصرية > الجامعات المصرية > المجموعة العلمية > كلية العلاج الطبيعي

إضافة رد
 
أدوات الموضوع انواع عرض الموضوع
  #1  
قديم 28-07-2016, 05:15 PM
DPT-Blue Phoenix DPT-Blue Phoenix غير متواجد حالياً
عضو ممتاز
 
تاريخ التسجيل: Jul 2014
المشاركات: 253
معدل تقييم المستوى: 10
DPT-Blue Phoenix is on a distinguished road
New لطلاب الثانوية العامة تعرف على كلية العلاج الطبيعى


" لطلاب الثانوية العامة تعرف على كلية العلاج الطبيعى "

العلاج الطبيعى Physical Therapy or physiotherapy : وهو مجال من ضمن المجالات الطبية الموجودة فى مصر الى بتقيم وتعالج كتير من الأمراض المختلفة او بتصلح اى خلل موجود فى الجسم سواء الخلل دا فى الحركة او الوظائف المختلفة وكمان تعمل وقاية للانسان السليم وتحسن من صحة الأفراد ومش بس كدا بيحاول يرجع الانسان الى عنده اعاقة لحياته الطبيعية عن طريق عملية التأهيل
- يعنى باختصار : هو الطب بطعم الفيزياء والميكانيكا هو كلية طب مع كلية علوم هو علاج‫#‏الألم_بدون_ألم‬ ( Treatment of pain without pain )

●● يعنى ايه برردو؟؟
○○ يعنى احنا اللى نقدر نخلى الجسم يعالج نفسه بدون أى تدخل ‫#‏جراحى‬ أو ‫#‏كيميائى‬ وعشان الاسباب دى هتلاقى دراسة علاج طبيعى ممتعة

‫#‏العلاج_الطبيعى‬ يعتبر اقدم واحدث مجال طبى ازاى يعنى ؟! اقدم لأن الناس كانت بتستعمل وسائل العلاج الفيزيائية دى من زمان جدا فى العلاج زى بعض وسائل العلاج اليدوى او الحرارة او الضوء الى جاى من الشمس او الماء او غيرها قبل استعمال باقى الوسائل .. وظهر دا فى نقوش القدماء المصريين والصينيين ومن الاطباء الى كانوا بيستعملوا وسائل العلاج الطبيعى فى العلاج ابقراط من سنة 460 وجالينوس .

وسائل العلاج الطبيعى :

1- العلاج اليدوى Manual Therapy : عبارة عن حركات دقيقة ومعينة ‫#‏انت_بتعملها_بايدك ‬للمريض بهدف العلاج بناءا على علوم طبية زى علم التشريح والفسيولوجى والميكانيكا الحيوية وغيرهم
2- التمارين العلاجية Therapeutic Exercises : عبارة عن مجموعة من التمارين برده قائمة على مواد طبية زى علم الحركة وعلم فسيولوجى التمارين والميكانيكا والتشريح وغيرهم
3- الوسائل الفيزيائية Electrophysical Modalities : زى العلاج بالحرارة والتبريد والصوت ( موجات فوق صوتية وموجات تصادمية ) والضوء ( الليزر والأشعة فوق البنفسجية ) والاشعاعات الكهرومغناطيسية والعلاج المغناطيسى والعلاج المائى ( زى مبادىء ارشميدس وباسكال والضغط ) والتنبيه الكهربى ( أنواعه كتير ) والضغط وممكن كمان الأكسجين والأوزون
4- غير استعمال الأطراف الصناعية والأجهزة التعويضية والجبائر وبعض الأدوات لمساعدة المعاقين


أقسام العلاج الطبيعى فى مصر وأشهر الأمراض :

1- العلوم الأساسية للعلاج الطبيعي : بيدرس المواد الأساسية للعلاج الطبيعى زى العلاج الكهربى والمائى والتمارين العلاجية والعلاج اليدوى وغيرها وبيشرف على مواد طب الأساسية زى التشريح والفسيولوجى والهستولوجى والبيوكمسترى وغيرهم

2- الميكانيكا الحيوية : بيشرف على تدريس علم الميكانيكا الحيوية وعلم الارجنوميكس وهو علم دراسة علاقة الانسان بالآلات

3- العلاج الطبيعي للجراحة ( وحروق وجلدية وتجميل ) : ودوره تأهيل قبل وبعد الجراحات العامة وتأهيل مرضى الحروق .. وعلاج كتير من مشاكل الجلدية باستعمال أحدث الوسائل زى الصدفية وحب الشباب وتساقط الشعر والاكزيما والبهاق

4- العلاج الطبيعي لأمراض الجهاز الدوري التنفسي والمسنين . ( الباطنة ) : فى تخصص الصدر وهنا بيدخل دورنا فى امراض زى الربو وكمان تخصص القلب وتأهيل المرضى بحيث يرجعوا طبيعين بأكبر قدر بعد عمليات القلب .. وتأهيل المسنين زى مشاكل الاتزان وهشاشة العظام .. وعلاج وتأهيل مرضى الأوعية الدموية زى الدوالى ومرض رينود .. وبعض أمراض التمثيل الغذائى زى السكر والضغط والامساك من خلال نظام غذائى معين وبرنامج تمارين محدد وبعض الوسائل الحديثة لعلاج المضاعفات وتأهيل المرضى وكمان دور العلاج الطبيعى فى العناية المركزة .

5- العلاج الطبيعي لأمراض النساء والتوليد. ( صحة المرأة ) : متابعة الحمل وتقليل آلام الحمل وبعض المشاكل الى بتقابلها الأم زى متلازمة النفق الرسغى Carpal tunnel syndrome واثناء الولادة فى بعض اجهزة العلاج الطبيعى الى بتساعد على ولادة آمنة وبعد الولادة وهو تخفيف مشاكل بعد الولادة وتأهيل الأم .. غير علاج بعض مشاكل النساء زى تكيسات المبايض والسلس البولى .. وانقطاع الطمث وسقوط الرحم وغيرها

6- العلاج الطبيعي لإضطرابات الجهاز العضلي الحركي وجراحتها. ( العظام ) : تأهيل الكسور وتأهيل بعد عمليات العظام زى عمليات استبدال المفاصل وعلاج مشاكل الرقبه والعمود الفقري ومشاكل المفاصل زى زى التهابات مفصل الركبه واصابه اربطة الركبه والغضاريف ومشاكل الظهر زى الانزلاق الغضروفي والام الظهر والديسك والتهابات المفاصل بين فقرات الظهر وغيرها

7- العلاج الطبيعي لاضطرابات الجهاز العصبي العضلي وجراحتها. ( الأعصاب ) : تاهيل مرضي السكته الدماغيه ومن اشهر الحالات الشلل النصفي وباقى الشلل بانواعه والشلل الرعاش والشلل الوجهى
علاج الامراض المتعلقه بالاعصاب الطرفيه للجسم Peripheral nerve diseases وأمراض أخرى زى التصلب المتعدد Multiple sclerosis

8- العلاج الطبيعي لاضطرابات مراحل النمو والتطور وجراحتها عند الأطفال. ( الأطفال ) : يتهم باكثر مرض يعتبر ملوش اي علاج غير العلاج الطبيعي وهو الشلل الدماغي cerebral palsy .. وأعداد الأطفال المعاقين فى مصر بالملايين وكمان حالات تانية زى ملخ الولادة Erb's palsy وحالات الداون

- فى ‫#‏تخصصات_تانية‬ زى : اصابات الملاعب Sports Injuries - الأورام والرعاية التلطيفية Polliative Care and Oncology - العلاج الطبيعى والطب النفسى والمشاكل العقلية - العلاج الطبيعى وأماكن الوخز بالابر - التخصص فى الوسائل الفيزيائية ورسم العضلات والأعصاب والتشخيص الكهربى أو وسائل العلاج اليدوى والتمارين العلاجية المختلفة - العلاج الطبيعى للحيوانات - غير بقى مجال البحث العلمى

تنسيق الكلية :

#تنسيق_الكلية : الكلية غالبا بتاخد من حوالى 96 : 98 % على حسب ظروف التنسيق ممكن يقل أو يعلى الله أعلم وهى من كليات القمة فى مصر

عدد الكليات :

11 كلية 7 خاص و4 عام
وهما : القاهرة - كفر الشيخ - بنى سويف - جنوب الوادى
والخاص : مصاريف جامعة 6 أكتوبر - جامعة مصر للعلوم و التكنولوجيا - جامعة بدر - الجامعة الحديثة - مصروفات جامعة الدلتا - مصروفات جامعة فاروس - جامعة دراية

نظام الكلية :

- الكلية 6 سنين : 5 سنين دراسة وسنة امتياز .. أول سنتين ‫#‏نظرى‬ وسنة ‫#‏ثالثة‬ بتبدأ تنزل مستشفيات وتكمل المواد الأساسية وسنة 4-5 كلهم ‫#‏روندات‬ وعملى ومستشفيات
- المواد 3 أنواع : مواد طبية الى هى مواد الطب البشرى بس بشكل اقل شوية - مواد العلاج الطبيعى - المواد التكميلية زى علم الاجتماع وعلم النفس وعلوم الادراة وغيرها

مميزات الكلية والمجال :

1- عدد الخريجين قليل على عكس طب وصيدلة
2- كويسة للناس الى مبتحبش الجراحة والأدوية وبتحب الفيزياء والميكانيكا
3- فيها تخصصات كتير على عكس مثلا صيدلة او اسنان
4- مصر هى الرائدة فى العلاج الطبيعى فى الوطن العربى
5- العلاج الطبيعى فى أمريكا طبقا لموقع U.S News فى سنة 2015 كان هو المهنة رقم 6 بين أفضل 100 مهنة فى أمريكا وانه رقم 5 فى نفس السنة بين ال Healthcare jobs وانه من أعلى المهن فى العائد المادى فى 2015 فى تصنيف الولايات المتحدة !!!

عيوب الكلية والمجال :

1- عدد المواد كبير بتدرس حوالى 9-11 مادة فى الترم
2- المجال مش معروف بالنسبة لناس كتير وحواليه بعض الاشاعات من تدليك او تخسيس او غيره
3- فى بعض المشاكل الى بتقابل المهنة لسه فى مصر
4- معظم الكليات مركزة فى نطاق القاهرة وبالتالى غالبا هتضطر تتغرب

طبيعة العمل فى مصر وفرص الشغل :

اما عمل حكومى ودا داخل أقسام العلاج الطبيعى بالمستشفيات ودا زى اى شغل حكومى فى مصر =D أو الشغل الخاص فى عيادات ومراكز العلاج الطبيعى اللى بيديرها دكتور علاج طبيعى وانت معاه لحد ما تقدر تقتح عيادة باسمك بعد التخرج ب 5 سنين او انك تعمل ماجستير .. وتقدر تسافر برا وان شاء الله دا متاح


مين المرضى الى هتعامل معاهم هنا :

- غالبا اما شغل ‫#‏بالغين‬ ودا حالات العظام والأعصاب بأنواعها
- أما شغل ‫#‏اطفال‬ المعاقين غالبا
- أما بتاخد بعض الدبلومات زى التغذية العلاجية وتقدر تشتغل فى المجال دا

ايه وضعك داخل المنظومة الطبية :

- شغلك مع باقى التخصصات الطبية بيتم بمجموعة من القوانين ومفادها انك الحالة بيتعملها تشخيص من الطبيب المعالج وبعدين تتحول لدكتور علاج طبيعى ويشتغل معاها ..
- النظام دا فى الدول المتقدمة زى امريكا وانجلترا مبقاش موجود وهناك نظام ال DPT متفعل من فترة طويلة والمريض يقدر يجيلك مباشرة بدون تحويل .. والنظام دا لسه متطبق جديد فى مصر بس لسه متفعلش ان المريض يجيلك مباشرة ودا يحتاج تعديل قوانين و DPT اختصار ل Doctorate of Physical Therapy .

الامتياز والتكليف والشغل :

الامتياز دا بتاخده فى محافظتك او القاهرة على حسب رغبتك وبتشتغل بأجر رمزى - التكليف دا كل الدفعة بتتعين على حسب رغباتك وتقديرك ولازم تاخد السنتين دول وبتشتغل بأجر طبعا - وبعدها بتتعين زى أى مهنة طبية .

انا دكتور ولا اخصائى :

لقب دكتور بيتقال لخريجى الكليات الطبية ‫#‏بالعرف‬ بشرى او صيدلة او اسنان او بيطرى او علاج طبيعى .. انت زيك زى البشرى بتتخرج ‫#‏ممارس‬ وبعد الماجستير او خمس سنين بتاخد لقب ‫#‏اخصائى‬ وبعد 20 سنة من التخرج او 15 سنة من الماجستير او 10 سنين من الدكتوراه بتاخد لقب استشارى زى البشرى بالظبط .. والى بيحصل على لقب دكتور هو الى واخد‫#‏دكتوراه‬ PhD .. او عندنا كمان لما تاخد DPT دكتور مهنى فى العلاج الطبيعى

نصيحة :

العلاج الطبيعى مهنة جميلة جدا ودراسة ممتعة لكن لازم انت ما دام ناوى تدخل علاج طبيعى تكون بتحب المواد الى قلنا عليها وتكون دائم البحث والقراءة والتدريب .. وتعرف كمان ان المهنة مش بشهرة طب او صيدلة وحواليها بعض الاشاعات والمشاكل فى مصر

#لمتابعة مزيد من التفاصيل : زوروا صفحتنا على الفيس بوك (( يومك طبيعى )) او ايفنت (( اعرف عن العلاج الطبيعى 2 ))
بالتوفيق
#Amr_Elsareih

__________________



http://ask.fm/Elsareih

Hope + Faith + Love = Change
رد مع اقتباس
إضافة رد

العلامات المرجعية

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


جميع الأوقات بتوقيت GMT +2. الساعة الآن 03:48 PM.