عاجل و هام رجاء

[Black memory]

سلام عليكم ورحمه الله وبركاته

انا كنت حابه اسال شويه اسئله لاختي

اولا حالا احنا كشفنالها علي 4 مواد اخدت في العربي نص درجه و لباقي قالنا معرفش ليها حاجه و لا لا

فهترح بكره مع بابا يشوفوا الموضوع ده و تجيب الشيك المهم بقي في الفيزيا عندها اسئله مش متصححه فهل معني كلام المدرس اللى اتصل بينا انه ميعرفش حاجه ان ورق العربي بس اللى جه و لسه الفيزيا و المواد الباقيه لا و لا ده معناه انها خلاص كده هي نص درجه بس اللى اخدتها ؟؟

ثانيا هي جالها بيطري القاهره و حولت المنصوره بس لسه التحويل مظهرش النتيجه فماما بتقولها ندخل علاج طبيعي خاص فايه الافضل بيطري المنصوره و لا تدخل اي كليه خاص لان هي لو اخدت حقها في المواد اللى كشفت عليها المفروض مجموعها حسبناه وصل لاسنان بس حسبي الله و نعم الوكيل فيهم بجد

و ياريت لو الخاص افضل من بيطري المنصوره قولولي ليه و مصاريفه كام و كليات ايه و كده

[To Be Is To Do]

بالنسبه لأولاً : طالما أسئله مش متصحهه يبقى تضمن بقدر كبير جداً جداً إنها حتاخد درجات لما تتصحح إن شاء الله
وبنسبه كبيره اوى العربى هو الـِ إتكشف عليه ولسه الباقى موصلش ... فـ خير إن شاء الله

أمّا بالنسبه لثانياً : أنا الحقيقه معنديش معلومات

[Black memory]

المشاركة الأصلية كتبت بواسطة to be is to do

بالنسبه لأولاً : طالما أسئله مش متصحهه يبقى تضمن بقدر كبير جداً جداً إنها حتاخد درجات لما تتصحح إن شاء الله
وبنسبه كبيره اوى العربى هو الـِ إتكشف عليه ولسه الباقى موصلش ... فـ خير إن شاء الله

أمّا بالنسبه لثانياً : أنا الحقيقه معنديش معلومات

يارب ان شاء الله نتمني دعواتك

[اية ابراهيم]

انا كان جايلى بيطرى بنها ودخلت علاج طبيعى فى جامعة مصر للعلوم والتكنولوجيا بس الحقيقة الى اعرفة التقديم قفل فيها وفى جامعة اكتوبر مش عارفة باقى الكليات صراحة اية اخبارها

[donia h]

اعتقد ان الجامعات الخاصة هتكون مكلفة شوية يعني في حدود 20 او اكتر دة غير مصاريف الادوات
وكمان بيطري مش وحش وربنا يوفقها ويرجعولها الدرجات

[alaamiah]

[Dr.Mohamed Attia]

فلوس الجامعات الخاصه كتير يعنى دلوقتى اسنان بتدخلها فى 45 الف و صيدله 40 وكدة فا مالهاش لازمة هى جايبه بيطرى يبقى خلاص لان كدة كدة هى بنت وهتتجوز فى الاخر واللى هتدفعه فى خاصه مش هتعرف تجيبه مهما اشتغلت هى كدة دكتوره و تكون جنبكم مش هتحتاج لسفر ولا حاجات من دى وبيطرى كويسه جدا بس للى يحبها ويعرف قيمتها ومايسمعش كلام الجهلاء

[vℓαмηcσ]

معنى كلام الاستاذ ان المواد التانيه لسه هو معرفش اذا كان ليها ولا لا يعنى تتصل بيه كل كام يوم كده تشوف اخبار المواد دى (زى ما حصل مع صحابى )

[mody_mw]

بيطرى حلو جدا وربنا يوفقك

[Black memory]

الحمد لله هي راحت مع بابا يوم السبت و فعلا المواد الباقيه لسه مجتش فربنا يسهل عندنا امل فى ربنا اصله حرام و الله ليها درجات كتير فى اسئله متصححتش يعني فى الفيزيا جزئيات من اسئله و علم النفس اسئله كامله مفيهاش قلم احمر مش فاهمه ايه التسيب ده و الاستهتار بمستقبل الناس ربنا يسامحهم

[Black memory]

ما هي خايفه من الخاص علشان كده انه مكلف جدااااااااااااااااااااااااااااا و كل سنه حامله هم بابا هيوفرلها الملبغ ازاى و مصاريفها الشخصيه غير مصاريف الكليه كلها فقلقانه و تعبانه و تعبتنا معاها و الله فعلشان كده قلت اسالها هنا يمكن اللى عنده معلومات يفيدنا لاني هندسه معرفش اصلا اقولها ايه و لا افيدها بايه

[Dr.Mohamed Attia]

بالتوفيق ليها ان شاء الله
بس هى مجموعها كام بالظبط دلوقتى بعد النص درجه العربى ده ؟

[Black memory]

بقت 393 بعد النص درجه دي