ارجوكم حد ينصحني

[ayoya32]

ربنا يكرمكو يارب انا نفسيتي بجد تعبانه اوي انا ف 3 ثانوي وكنت بذاكر كويس وكل ما الامتحانات تقرب بحس اني بخيب وحاسه اني مذاكرتش اي حاجه واني مش هعرف احل حاجه انا مش عارفه اعمل ايه دلوقتي وباقي 3 شهور علي الامتحانات ارجوكم بما انكو مريتو بالمرحله دي وعديتوا بنجاح ارجوكم حد يكلمني ويقولي اعمل ايه انا حاسه ان مستقبلي بيضيع يارب يوفقكو ردوا عليا عشان دي مش اول مره اكتب ومحدش بيرد عليا خالص

[DrMostafa2015]

المشاركة الأصلية كتبت بواسطة ayoya32

ربنا يكرمكو يارب انا نفسيتي بجد تعبانه اوي انا ف 3 ثانوي وكنت بذاكر كويس وكل ما الامتحانات تقرب بحس اني بخيب وحاسه اني مذاكرتش اي حاجه واني مش هعرف احل حاجه انا مش عارفه اعمل ايه دلوقتي وباقي 3 شهور علي الامتحانات ارجوكم بما انكو مريتو بالمرحله دي وعديتوا بنجاح ارجوكم حد يكلمني ويقولي اعمل ايه انا حاسه ان مستقبلي بيضيع يارب يوفقكو ردوا عليا عشان دي مش اول مره اكتب ومحدش بيرد عليا خالص

ربنا يكرمكو يا رب : واياكم
انا نفسيتي بجد تعبانه اوي :دي اول غلطة حضرتك عملتيها انك تركزي على المشكلة اكثر من سبب المشكلة لازم ما تركزيش على نفسيتك التعبانة حاولي تشتغلى اكثر حاجة في مثل بيقول لا تضع العربة امام الحصان يعني مش لازم النفسية تبقى خفيفة و مستريحة عشان نمشي و نشتغل لا ابداي شغلك و مذاكرتك و واحدة واحدة و الله هتلاقي النفسية اتظبطت لوحدها خلى موضوع النفسية دة زي الطفل الصغير لو قعد يعيط و سمعتي كلامه كل مرة هيعمل كدة و لو صبرتيه و قعدتي تحمسي نفسك و كدة برضه هيسكت شوية و يرجع اما لو تجاهلتيه تماما تماما هيعيط اكتر و اكتر و يتعب و ينام و ييئس و خلاص استمري على مبدا العربة و الحصان و تجاهل الطفل البكاء و ان شاء الله تستريحي ... ثانيا سبب النفسية التععبانة اكيد مش بدرجة اساسية المذاكرة و ضعف الانجاز اكيد لا السبب في الزعل هو ان افكارك مش متفائلة بشكل كافي و تركيزك على الافكار السلبية و الله اعلم يعني مثلا انتي بتفكري " انا عاوزه اذاكر عشان اجيب مجموع انا خايفة مجبش مجموع مجموع طب عالي و الله اعلم انا هزعل لو مجبتش مجموع طب "تفكير زي دة لازم يخلي نفسيتك تعبانة مش بس كدة دة ممكن لاقدر الله اللي خايفة منه يحصل -- طب نعمل ايه اولا لازم يبقى تفكيرك ايجابي جدا ركزي على هدفك و تخيليه كانه حصل

و دة رد على زميلة نفسها تدخل طب و بتسال على الحفظ :

""اهم حاجة التعب في الحفظ و التكرار و خلاص النتيجة على الله نحن مطالبون بالسعي لا النجاح

ثانيا اركز على التكرار = الحفظ مش قدرات خالص خالص خالص و الله الشناقطة " طائفة من موريتانيا او بلد يعني " عشان يحفظوا القران بيكرروا الصفحة 500 مرة و اي حاجة تانية 300 مرة عندهم صبر عجيب على التكرار لكن لازم نعرف ان ما تكرر تقرر مع التركيز الشديد كل حاجة تمام ان شاء الله

ثالثا حاجة بخصوص تفكير حضرتك الشكوى شئ سئ جدا ليه لانه بيخلي تفكيري يدور حوالين اللي انا خايف منه مش هقول ما نخافش لا نخاف عادي من لا قدر الله اي حاجة وحشة لكن تفكيرنا يبقى منصب حوالين النجاح في كتاب اسمه السر تناول الموضوع دة بالتفصيل و هو من انجح الكتب عالميا بيقول ان الرغبة في شئ ما يربطك بيه و التوقع""" يجذبه و كل حاجة احنا فيها دلوقت نتيجة توقع سابق قيسي الكلام دة مع كلام سيدنا محمد صلى الله عليه و سلم "تفاءلوا بالخير تجدوه" لازم نتوقع النجاح بدرجة اننا نعيش كانه اتحقق انا فاكر لما كنت في تالتة ثانوي كنت بقول لصاحبي المقرب انا مش متخيل نفسي في المستقبل الا دكتور و لا ولادي الا ولاد دكتور و مش قادر اتخيل عكس كدة و الحمد لله ربنا اداهالي ربنا كريم بس لازم نحسن الظن فيه لابعد الحدود اتصرفي على انك دكتورة و سمي نفسك مثلا على البلوتوث او اكونت الفيس او اي حاجة دكتور / .. تأكدي انها جاية جاية ان شاء الله عيشي التفكير في الخير فقط
و بالمناسبة كتاب السر بيفسر نجاح المرشح السياسي اللي الناس مش عايزاه في الانتخابات لان تفكيرها بيبقى منصب عليه و اي حاجة بنفكر فيها بتحصل بإذن الله اقصد تبقي مسيطرة على تفكيرنا تماما

و مفيش داعي للخوف من الافكار السيئة ليه ؟؟ ببساطة نقدر نغيرها .. ازاي في مؤشر للافكار هو المشاعر وقت ما تلاقي نفسك زعلانة اعرفي ان افكارك سيئة فتبداي تستبدليها بافكار احسن و اكثر خير و تفاؤل ثانيا قبل النوم استرجعي اليوم و اى لحظة عدم توفيق تخيليها تاني و كانها حصلت بتوفيق ثالثا لما نصحي من النوم نقول الحمد لله و نحمد ربنا على اللي احنا فيه و نحس بالامتنان و قولى كتير الحمد لله ان انا بقيت دكتورة برضه حتى و انتي لسة مادخلتيش الكلية اينشتاين كان بيحمد ربنا 100 مرة في اليوم عشان كدة هو نجح او بمعنى اصح كان عارف سر الحياه ان الافكار بتنعكس على الواقع و لو ملى دماغه بافكار حلوة هينجح ان شاء الله و اديه نجح اهو ..

وربنا يوفقنا و اياكم

نرجع لمشاركة حضرتك

انا ف 3 ثانوي وكنت بذاكر كويس وكل ما الامتحانات تقرب بحس اني بخيب وحاسه اني مذاكرتش اي حاجه واني مش هعرف احل حاجة : دة احساس طبيعي ليه؟؟ اكيد حضرتك لسة مخلصة المناهج و لسة ممشيتيش في المراجعة اوي و اهم اهم حاجة المراجعة مرة و اتنين هي اللي بتثبت المعلومة دي معادلة صارمة و على رأي الاجانب لا غداء مجاني عمرك ما هيبقى مستواكي عالي اوي الا بمراجعة و تامل كبير جدا و لا اي انسان شاطر الا بدول هي بس بتفرق ليه دة بيوصل و دة لا في مين هيـ give up و الممتاز هو اللي يفضل يذاكر اوييي لحد اخر السنة و انتي متطلبيش من نفسك مستوى عالي دلوقتي فقط اطلبي من نفسك مجهود عالي و ان شاء الله قبل الامتحانات باسبوعين و على شهر 5 كدة هتلاقي نفسك استاذة ان شاء الله و انصحك اقري المشاركة دي /http://www.thanwya.com/vb/showthread.php?t=583445

انا مش عارفه اعمل ايه دلوقتي وباقي 3 شهور علي الامتحانات :مذاكرة و مجهود جبار و سيبي الباقي على ربنا احنا مطالبين بالسعي لا النجاح ; النجاح على رب النجاح

ارجوكم بما انكو مريتو بالمرحله دي وعديتوا بنجاح ارجوكم حد يكلمني ويقولي اعمل ايه انا حاسه ان مستقبلي بيضيع يارب يوفقكو ردوا عليا عشان دي مش اول مره اكتب ومحدش بيرد عليا خالص : اخيرا و عشان متتنسيش و هى الاولى لكن عشان تفضل في دماغك اهم حاجة ربنا و علاقتك بربنا و ثقتك في ربنا هي فعلا سر قانون الجذب طول مانتي بترضي ربنا في كل شئ و كل وقت هتلاقى التوفيق جاي ان شاء الله و هتلاقى النتيجة احسن ما تتوقعي تفاءلي و ان شاء الله الخير جاي قومي دلوقتي صلي ركعتين و متفوتيش صلاة و اقري قران و لو صفحتين بس داومي عليهم فعلا كل يوم مهما كان و افتحي كتابك و اعرفي ان معادش فاضل على المعلومة عشان تتطحن و تتهضم و تتفهم الا مرة ولا مرتين مذاكرة و ان شاء الله تكوني دكتورة و كل طالب قدك و كل طالبة كلكم تحققوا احلامكم و تحمدوا ربنا ان شاء الله فيزيدكم و تبقوا من الاوائل ع الكلية كمان و تفضلوا طول عمركم في خير و تفوق ان شاء الله

[ayoya32]

شكرا لحضرتك بس انا مشكلتي اني ببقي عايزه حد علطول يسسني ان لسه في امل وان ال 3 شهور دول ممكن انجز فيهم حاجه لان انا لما بفكر ف ان غيري كان بيذاكر من اول السنه بقول ان اكيد ربنا هيكرمه اكتر مني فبيأس اكتر

[الاولى ان شاء الله]

الله ينور عليك يا د/مصطفى