رافق عزيز النفس واترك الانذال

[لافانيا]

كان الذكا في منهجك تخدع النـاس

يومـك تفاخـر بالخـداع وتباهـا

الله يقطع صحبتـن مالهـا سـاس

صحبة مصالح لاجل حاجة بناهـا

كيف المبادئ يااهل العرف تنـداس

صارت توجها المصالـح وراهـا

ماعاد للصحبـة مشاريـه وقيـاس

عند الذي هانـت عليـه ونساهـا

كرهت صحبتهم مثل دم الاضراس

وعلاقتـي معهـم نـزل مستواهـا

في حالهم صاروا مثل طابخ الفاس

اللي تظاهـر بالذكـا مـن غباهـا

افكارهم عنـد المهمـات تحتـاس

مع قلـة الافعـال كثـرة احكاهـا

اتعب على اللي صحبته ترفع الراس

دنيا ودين وعـز نفسـه رضاهـا

يذهلك الالباب ويحبـس الانفـاس

نفسه رفعها ماخضع فـي هواهـا

ترى المواقف فالمواجيـب نومـاس

مواقفـن يفـرح لهـا مـن لقاهـا

انا بليت بقلـب طيـب وحسـاس

في وقت طيب اقلوبنا هـو عناهـا

بعض البشر لامن غلط قلت لاباس

يشفع لهـا عنـد الخطايـا غلاهـا

اصحابنا اللي بالوفا مالها اجنـاس

نغفر لها الزلـه وندمـح خطاهـا

ماني على هفوات الاجـواد بـلاس

نذكـر محاسنهـا وننسـى رداهـا

بقلوبنا تسوى الجواهـر والالمـاس

نرفـع مكانتهـا ونشكـر وفـاهـا

افعالهـم تبقـى مفاخـر ونبـراس

الله لحسنـات الامـور ايهـداهـا

من خلقة الدنيا ترى الناس للنـاس

والكل بالله فـي مساعـي رجاهـا

مما راق لي،،

مـــنـــــقولـــــة