قبل أن تدخل كلية سياحة وفنادق المنصورة

[Eslam_Tourism]

بسم الله الرحمن الرحيم

طبعا فى ناس هنا ممكن تكون عارفانى انا مشرف قسم كلية السياحة بس يعتبر سابقا لانى معدتش قادر ادخل المنتدى الفترة اللى فاتت دى كلها لاسبب خارجة عن ارادتى .

الحقيقة انا عملت الموضوع ده عشان اعرفكوا شوية حاجات عن كلية السياحة فى جامعة المنصورة باعتبارى متخرج منها ,,, انا عارف ان فى ناس كتير اول ما دخلتها اندهشت من شكلها اللى مينفعش يبقى شكل كلية فى جامعة كبيرة زى جامعة المنصورة وايضا المستوى التعليمى وكدة يعنى ....

الحقيقة انا هقولكوا الخلاصة او الزيتونة بمعنى أصح , يعنى بحكم خبرتى المتواضعة فى الكلية دى وبعد ما دخلت سوق العمل , هقولكوا عيب الكلية بتاعتنا اية ؟ وان شاء الله هابقى عمل موضوع تانى عن اللى واجهته فى سوق العمل بعد ما اتخرجت من كلية السياحة .

الحقيقة ! كلية سياحة وفنادق جامعة المنصورة كلية شكلها فعلا زى مدارس الثانوية العامة واللى مزود كمان الحكاية دى انها فى محاطة بالمدارس بحكم انها بتقع فى شارع الثانوية طبعا اللى راح الكلية فاهمنى .

طبعا انا عارف ان شكل الكلية لازم يكون يليق بمستوى الجامعة وكل الكلام ده .

عشان انا بطبيعتى مبحبش الموضوع يبقى سايب كدة هسهل الموضوع شوية هتكلم عن كل جانب بالتفصيل فى صورة نقط :

اولا : مظهر الكلية : شكل الكلية فعلا مش جميل لكن ده طبيعى فى جامعة المنصورة لان الكلية لسه جديدة ( تقريبا 6 سنوات ) وبعدين كلية تربية رياضية وطب بيطرى كانوا فى المكان ده قبل كدة , ده حتى فى مدرجات باسمهم فى الكلية عندنا وبعدين الجامعة دلوقتى عملت مساحة او مشروع انشاء كلية الاداب وكلية السياحة والفنادق داخل الجامعة عشان الجامعة اصلا عايزة تدخل كلياتها كلها جوة الحرم الجامعى فلازم تعرفوا ان المقر ده مقر مؤقت بس طبعا الحكاية حكاية وقت مش أكتر .

شكل الكلية والموقع والمظهر الجمالى والفنى للكلية اشياء ثانوية كلها بتنفع فى حكاية برامج الجودة والاعتماد والكلام ده بس طبعا كليتنا لسه طالعة من الفرن فالموضوع موضوع وقت مش اكتر وبعدين كلية صيدلة المنصورة زمان خالص كانت كلية تعبانة جدا اما دلوقتى فبقت واخد شهادة الـiso وليها مبانى كتيرة جدا فى الجامعة .

ثانيا : المستوى التعليمى : برضو عشان الكلية جديدة فطبيعى تلاقى النظام التعليمى مش جامد اوى يعنى يعنى عيوبة فى ان مفيش معامل لغات فى الكلية وايضا مفيش تدريب على تنظيم البرامج السياحية وانظمة الحجز الالكترونية زى اماديوس وجاليليو وكمان فى مواد كتير هتتذاكر وهى ملهاش اى لزمة وطبعا كأى كلية سياحة وفنادق فى مصر مش هتتخرج فاهم لغة كويس اوى فياريت تعتمد على نفسك فى اللغة لان الدكاترة نفسهم كانوا بيقولولنا كدة

ثالثا : وجودها فى جامعة المنصورة : طبعا جامعة المنصورة جامعة عريقة جدا وجامعة ليها اسمها وخصوصا الفترة الاخيرة دى لانها واخدة المركز التالت على مستوى جامعات مصر بعد جامعة القاهرة والجامعة الامريكية والمركز ده بيتكرر بقاله اكتر من خمس سنين وكمان الجامعة متطورة جدا فى انظمتها وخدماتها وده طبعا من مميزات الكلية انها فى جامعة زى دى .

نصيحة اخوية : كلية سياحة وفنادق المنصورة كلية شكلها ومظهرها اى نعم لا يليق بشكل كلية كبيرة لكن طالما كانت كلية زى كلية تربية رياضية اللى هى دلوقتى من احسن كليات الجامعة وكلية طب بيطرى برضو كانوا مكان كلية السياحة حاليا فانا بعتبر ان حكاية الشكل دى حكاية وقت مش اكتر .

اهم حاجة لازم تركز عليها قبل ما تدخل اى كلية هو المجال اللى ناوى تشتغل فيه وطبعا لازم تحب المجال اللى هتشتغل فيه ولو حتى التنسيق اجبرك على اختيار معين , يعنى انا مثلا كان نفسى ادخل طب اسنان بس اعمل اية بقى النصيب ودخلت سياحة الحمد لله .

عالعموم متخافوس يا اللى دخلتوا سياحة وفنادق المنصورة فالشكل والمظهر والكلام وحتى المستوى التعليمى مش محور اهتمام بالنسبة لسوق العمل لان المحور الاساسى والمهم جدا هو شهادتك طبعا يعنى المهم بكالوريوس سياحة وطبعا ميمنعش تقدير كويس وجامعة محترمة والاهم بقى الخبرة والمهارة زى اللغات والكمبيوتر والدورات والشهادات .

اتمنى ان اكون افدتكوا و ان شاء الله ممكن ابقى عمل موضوع تانى هيفيدكوا ان شاء الله .