اتحدى كتاب القصص بها

شاعر الليل · #1 02-04-2008, 02:22 AM

كان ياما كان مملكة قديمة قوي اسمها " وطنستان " ، في المملكة دي كان نظام حكمها ملكي جمهوري ، وديموقراطي شمولي ، وديكتاتوري جزئي ، واشتراكي حر ، ورأسمالي متعفن وعشان كده قرر ملك ملوك المملكة انه يعمل نظام جديد ، مفتكس وجديد من نوعه ، قرر انه ياخد رأي الرعية في طريقة حكمه للبلاد ، بحيث انه بدل ما يبقي مسئول عنهم قدام ربنا سبحانه وتعالي لوحده ، يبقوا شركاء معاه في الجريمة ... أقصد طريقة حكم البلاد ، وأظن مفيش ديموقراطية احسن من كده ...
المهم عمنا الملك ده ، جمع الحاشية بتوعه كلهم وأخد رأيهم في التغيرات الجديدة والأفكار المفتكسة اللي مفروض الرعية بتاعته تبوس ايديها وش وظهر عشان ربنا فتح علي الملك العظيم بيها ...

أسطورة الصندوق الزجاجي ..
(المواطنة مصرية)

كان ياما كان مملكة قديمة قوي اسمها " وطنستان " ، في المملكة دي كان نظام حكمها ملكي جمهوري ، وديموقراطي شمولي ، وديكتاتوري جزئي ، واشتراكي حر ، ورأسمالي متعفن وعشان كده قرر ملك ملوك المملكة انه يعمل نظام جديد ، مفتكس وجديد من نوعه ، قرر انه ياخد رأي الرعية في طريقة حكمه للبلاد ، بحيث انه بدل ما يبقي مسئول عنهم قدام ربنا سبحانه وتعالي لوحده ، يبقوا شركاء معاه في الجريمة ... أقصد طريقة حكم البلاد ، وأظن مفيش ديموقراطية احسن من كده ...
المهم عمنا الملك ده ، جمع الحاشية بتوعه كلهم وأخد رأيهم في التغيرات الجديدة والأفكار المفتكسة اللي مفروض الرعية بتاعته تبوس ايديها وش وظهر عشان ربنا فتح علي الملك العظيم بيها ...
حاشية رقم 1 :- أفكار عظيمة جلالتك ، لكن الرعية أبسط من انها تقول رأيها سعادتك ، إحنا لو قولنا لهم إن النظام هيتغير من ما ناخد رأيهم يبقي أفضل ..
حاشية رقم 2 :- ايوه جلالتك فعلا ... هما مفروض يفهموا ان جلالتك تعرف مصلحتنا اكتر مننا .. ضروري يوافقوا بالإجماع ..
حاشية رقم 3 :- لو اخدنا رأيهم المرة دي .. ممكن يطمعوا حضرتك .. وكل مرة يطالبوا بالحق ده ... ساعتها هنعمل ايه بقه ..
الملك :- يا جماعة الرعية لازم تحس إن رأيها مهم .. عشان المملكة دي بتاعتهم .. لازم يحسوا انهم أصحاب رأي ..لازم يبقي فيه بينا وبينهم شفافية ... عشان يخلصوا للمملكة من قلبهم بجد .. وبعدين هما ممكن ميوافقوش ولا ايه .. حد يجاوبني ؟
الوزير :- ازاي جلالتك .. ده لا يمكن يحصل ابدا ... طول ما فيه اجماع علي حكمك .. أكيد فيه إجماع علي سياستك يا أفندم .. والدليل علي رأي هيبان في تجميع آراء الشعب أثناء الاستبيان ..
الملك :- يا وزيري انا مش هتكلم كتير الموضوع ده يخلص في أسبوعين .. لأ .. أسبوعين كتير .. الرعية كده هتلحق تاخد وتدي مع نفسها في التغيرات .. قدامك يومين .. قول تلاتة .. وطبعا الأول تجمع رأي الحاشية ..
الحاشية كلها بصوت واحد :- إجماع يا جلالة الملك ..
الوزير :- تحت أمر جلالتك ، يوم نجمع رأي الحاشية واهم الحمد لله وافقوا ، ويوم نعلن عن الاستبيان ، والتالت نعرف رأي الرعية ونبلغه لسيادتك .
الملك :- بهدوء يا جماعة ... العالم بقي صغير دلوقتي .. ومش عاوز إعلام الممالك التانية يستغل الحكاية دي ضدنا .. عاوز عملية نضيفة 100 لـ 100 .
الوزير :- زي ما جلالتك تؤمر .
وبعد 3 ايام دخل الوزير علي جلالة الملك وهوه بيستجم في المقاطعة الشرماوية متهللا مبروك جلالتك .. الف مبروك .
الملك :- قول اللي عندك يا وزيري .. وايه اللي انت شايله ده ... اختراع جديد ده ولا ايه ..؟
الوزير :- ده يا افندم صندوق استبيان زجاجي ، هيئة البصاصين عملته مخصوص عشان تبقي الشفافية متبادلة بينا وبين الرعية زي ما جلالتك أمرت .. والصندوق العجيب ده جلالتك سحري .. بمجرد لمسة واحد من أي حد من رعيتك يتملي استبيان موافقة علي التغيرات.. و كلام في سرك وساعات من غير ما يلمسه كمان ..
الملك :- ازاي يا وزيري ؟
الوزير :- احنا فكرنا في حل ميتعبش الرعية ... مش لازم ينزلوا بنفسهم للاستبيان .. احنا بنقف جنب الصندوق .. نقول اسم الرعية من دول والصندوق يعلم موافق لوحده ..
الملك ( بجدية ) :- هــــا وعلي كده يا وزير حد اعترض علي التغيرات ؟
الوزير :- عيب جلالتك موافقة بالإجماع 100 بال 100 .. هوه حد من الرعية أتأخر عن الاستبيان .. حتى الأطفال الصغيرين يا أفندم والله .. صوتوا بالموافقة .. بمجرد ما نقول الاسم الصندوق يعلم موافق .. إجماع يا أفندم إجماع ..
الملك :- طيب كويس ... جهزوا نفسكم بقه عشان نسجن العملاء والمتواطئين واللي اعترضوا علي الاستبيان .. الرعية لازم تتربي من أول وجديد ...
الوزير :- بس مفيش حد اعترض سيادتك ..
الملك :- ازاي مش كان في ناس من الرعية ماتوا قبل الاستبيان .. وده في حد ذاته اعتراض .. أهلهم يتجرجروا في السجون عشان محدش يعملي بالو بعد كده .. مش كل يوم هصرف قد كده في الاستبيانات .. كفاية بعزقة ..
الوزير :- أوامر جلالتك ..
توته توته خلصت الحدوتة وادي صورة الصندوق للي يحب يشوفه منكم .

احمد رضا · #2 02-04-2008, 04:16 PM

شوفناه ودايقينه
عارفين المر وشاربينه
عجبنا الهم ومحناش عجبينه
فين الضمير يازمن قولي علي مكانه .. فينه

شكرا يا شاعر الليل علي الموضوع الجميل والرساله الاجمل بجد
نورت القسم

شاعر الليل · #3 03-04-2008, 08:41 PM

[quote=احمد رضا;409051]شوفناه ودايقينه
عارفين المر وشاربينه
عجبنا الهم ومحناش عجبينه
فين الضمير يازمن قولي علي مكانه .. فينه

منور بحضرتك يا فندم والله وانا شاكر جدا على رائيك الجميل

light_sky · #4 04-04-2008, 12:22 AM

هاى يا شاعر بشكرك على الاسلوب الجميل والمنظم عجبنى اوى ودى مش مجمله ويا ريت متحرمناش من حاجاتك الحلوه دى