أكاديمية بنى سويف لها السبق

[داود احمد]

بالنسبة لمحافظة بنى سويف

الاسماء فعلاً كانت موجوده فى الاكاديمية والاسماء تم مراجعتها من الوزارة وإرسالها مرة اخرى الاكاديمية من أجل استخراج رخصة مزاولة المهنة انتظار صدور قرار التعيين انا عاوز أذكر الناس بحاجه مهمة جداً وهى ان نتيجة اختبار كانت يوم 14/2 العام الماضى وقرار التعيين صدر 14/2 هذا العام وده مش صدفة وده معناه مرور عام على النجاح وده يا جماعة كان شرط أساسى من شروط التعيين اللى مذكورة عندنا فى عقودات بنى سويف واللى كمان فى قانون الكادر 155 يعنى إحنا اللى كنا مستعجلين الى حداً ما ولنا العذر فى ذلك .

طيب ايه فايدة الكلام اللى انا بقوله دلوقت فائدة فعلاً ان كل اللى استطاع انه يشوف اسمه موجود فى الاسماء اللى الاكاديمية كانت متكتمه عليها بعد ما اتبعتت من الوزاره ضمن 2618أسم من أصل 4000أسم فى بنى سويف هو ده اللى وصلتلهم رسائل تهنئة صدور قرار التعيين

طيب ناس كتير هتقول ايه عرفك ؟ سؤال وجيه
أنا عرفت من شهرين ان الاسماء دى جات من مصادر فى الاكاديمية وحاولت ووصلت وكشفت عن اسمى ولكن علشان يكون الكلام يكون بالدليل القاطع قاعدة البيانات اللى جات من الوزاة البحث فيها كان عن طريق الكود كود المعلم فقط لا غيره .
الوقت الحالى ايه اللى بيحصل : القرار صدر بالتعيين وجه المديرية بالأسماء ... المديرية كإجراء طبيعى هتبعت للإكاديمية علشان تتأكد من شهادات أو رخص مزاولة المهنة لكل معلم وكل الكلام ده حصل والاكاديمية فعلاً انهت عملها وبعت أسماء 2618إسم للمديرية تمهيداً لأعتماده من وكيل الوزارة وإصدار كشوف لكل الاسماء فى كل الادارات بمديرية بنى سويف وده خلال ايام معدودة على يد واحدة بإذن الله تعالى .

وحق واجب
اقول ان الاكاديمية فى بنى سويف نشيطة جداً وكلهم ناس محترمه مع أبناء بنى سويف وغيرهم

ونشكرهم جميعا وعلى رأسهم أ/ مهاب - أ/سامح أ/ أشرف - أ/سيد

[تامر الفاضل]

طيب قولنا لحد المرحلة كام في الا سي دي ال هم اللى اسمهم نزل وشكرا

[داود احمد]

المشاركة الأصلية كتبت بواسطة تامر الفاضل

طيب قولنا لحد المرحلة كام في الا سي دي ال هم اللى اسمهم نزل وشكرا

مع ان الكلام ده هيعمل ضجه كبيره بس عرفت اسماء ناس موجوده لحد شهر أغسطس والله أعلم فيه ناس بعديهم ولا لأ بس انا عن نفسى قدمتها وانا بقدم اوراق الامتحان وطلبوها منى تانى علشان يتأكدوا فى المرحلة الاولى

[Azhar Aly]

طيب ايه معنى عبارة
وتهيب بالسادة المعلمين المساعدين الذي اجتازوا الاختبارات والحاصلين على شهادة قيادة الحاسب الالى icdl سرعة تسليم ملفاتهم الى فروع الأكاديمية التابعين لها حتى يمكن للوزارة إتخاذ اجراءات تعيينهم فى وظيفة " معلم".
هل مطلوب مننا نكمل ورق تانى و لا ايه الحكاية لان ف قسم الاحصا ف مديرية التعليم بالمنيا قالوا لنا مطلوب ورق تانى يروح الاكاديمية واخر معاد يوم 27/2

[داود احمد]

سألنا فى الاكاديمية مفيش ورق مطلوب من الناس اللى جاءت لهم رسالة التهنئة بصدور القرار أما الناس اللى امتحنوا فى الكادر ونجحوا و مقدموش ال اى سى دى ال لازم يقدموها وهم عددهم كتير فى بنى سويف انا مدرستى بس فيها مايزيد عن 12 واحد بهذه الطريقة لأن التقديم بيقى على مراحل فى أوقات معينة

[Miss Ola]

طيب انا قدمت كل الاوراق ف اول مرحلة
انا تابعة لبنى سويف
ومع ذلك رسالة التهنئة ظهرت لكل اصحابى الا انا
مش عارفة انا المفروض اعمل ايه
وف نفس الوقت معرفتش اشوف اسمى فى المديرية
ياريت حضرتك تقوللى ايه الحل

[Azhar Aly]

المشاركة الأصلية كتبت بواسطة داود احمد

سألنا فى الاكاديمية مفيش ورق مطلوب من الناس اللى جاءت لهم رسالة التهنئة بصدور القرار أما الناس اللى امتحنوا فى الكادر ونجحوا و مقدموش ال اى سى دى ال لازم يقدموها وهم عددهم كتير فى بنى سويف انا مدرستى بس فيها مايزيد عن 12 واحد بهذه الطريقة لأن التقديم بيقى على مراحل فى أوقات معينة

جزاكم الله كل خير ومعنى كده اننا مش هنروح بنى سويف غير لماالادارة تبلغنا

[ahmed772007]

بقولك حضراتك ايه أنا برده من بني سويف
هو احنا لازم نروح الاكاديمية نقدم ورق
ولا هم هيبعتوا للادارة التعليمية
ارجوك قولي؟؟؟؟؟؟؟؟؟؟؟؟؟

[داود احمد]

المشاركة الأصلية كتبت بواسطة miss ola

طيب انا قدمت كل الاوراق ف اول مرحلة
انا تابعة لبنى سويف
ومع ذلك رسالة التهنئة ظهرت لكل اصحابى الا انا
مش عارفة انا المفروض اعمل ايه
وف نفس الوقت معرفتش اشوف اسمى فى المديرية
ياريت حضرتك تقوللى ايه الحل

عندى زميل له نفس المشكلة وده حصل لأن يمكن الاكاديمية مقسمة بنى سويف 7 ادارات لكل إدارة واحد مسئول عنها وكان الادارة بتعتنا ليها دفتر كبير فيه أسماء كل المتعاقدين فى الادارة الدفتر ده كان لآزم يتعلم امام اسمك انك حصلتى على ال اى سى دى ال .......... زميلى ده راح من فتره لأنى نبهته لحاجة زى كده على سبيل الاحتياط وفعلاً اسمه مكنش متعلم امامه انه حاصل على الشهاده لكن انا كان متعلم امام اسمى انى سلمت الشهاده بس بعد ما الاكاديمية كانت أرسلت الاسماء الى الوزارة مع انه مسلم الشهاده بس ده خطأ عادى يمكن تداركه إن شاء الله طالما انت قدمتيها فى الاوراق ممكن الاكاديميه هتبعت ورقة بأسمائكم للوزارة لأن انتم مستوفيين الشروط وتتعينوا مع الدفعة الاولى بإذن الله .

[Miss Ola]

عموما هروح بكرة ان شاء الله ومعايا ايصال استلام الورق ومعايا كل الاوراق اصول
وربنا يسهل

[المعلم الحزين]

سؤال الي الاستاذ داوود هل معني كلامك ان كل شخص وصلته رسالة التهنئة مش هيعمل اي حاجه غير الانتظار طيب هيعرف ازاي او هيتم اخطار ازاي ارجو التوزضيح

[احمد الكوامي]

ا\ داود اانا مقدم كل الاوراق والمسئول عن استلام الورق اقسملي بالله لني ورقي راح كامل اكثر من مرة وبعتة المدرية عشان يذهب الي القاهر ة وانا كتت متابع معاة قبل السفر الي القاهرة وعرفت اني ورقي سافر وكامل وحتي الان المسئول باكد اني ورقي كامل


ومع ذلك لم تاتي التهنئة

انا عاوز عالم يحل الغز دة هل التهنئة لازم منها ام بتفرق من محافظة لاخرة

بس ارجو الرد

[داود احمد]

المشاركة الأصلية كتبت بواسطة معلم مساعد حزين2

سؤال الي الاستاذ داوود هل معني كلامك ان كل شخص وصلته رسالة التهنئة مش هيعمل اي حاجه غير الانتظار طيب هيعرف ازاي او هيتم اخطار ازاي ارجو التوزضيح

بالنسبة لحضرتك يازميل يا عزيز
يا استاذ سيد يحيى أو معلم مساعد حزين 2
وبالرغم من إن معظم ردودك فى معظم الموضوعات بتحمل نوع من السخرية والتهكم وبتتهمنى بالتعالى والفوقية وكمان وبتقول ان اكاديمية بنى سويف نعسانه فى موضوعات قبل كده.
لكن

أولاً :أحب اقولك ان أهل بنى سويف طول عمرهم كرمه وعمرهم مايتعالوا على حد.

ثانياً : بالنسبة للإستفسار حضرتك ممكن تروح الادارة اللى تتبعها تسأل على ميعاد وصول الاسماء ولو حضرتك مش قادر أنا ممكن أسألك لأن انا حبيبى فى المنيا من بنى مزار لحد مالوى أما بالنسبة للإكاديمية حضرتك مش مطلوب منك حاجه حتى هذه اللحظة ومحدش عارف ايه اللى ممكن يحصل بكره.

ثالثاً: نصيحة أخوية من أخ ليا وليك ولكل أعضاء المنتدى أحنا كلنا أخوه فى بعض لازم نهدأ من حدة الكلام مع بعض وكمان أحنا معلمين أى حد من الزوار بيشوف اسلوبنا فى الكلام بيصدم من اللهجه والحوار والمستوى الفكرى اللى بيظهر فيه بالرغم من اننا على كفاءه عاليه جداً فحرام نظلم نفسنا : أنا بقول الكلام ده لنفسى قبل أى عضو .
وأرجو من الجميع أن يتقل كلامى بصدر رحب

[mrmohie]

انا برده ورقى كامل ومع ذلك الرسالة مجتليش وياريت حد يكون متأكد ويعرفنا الرسالة دى معناها أيه وأيه أهميتها

[drfayoum2010]

أ . أحمد دواود لك كل الشكر والتقدير على التوضيح " بس بيني وبينك أنا سبقتك بالتوضيح ده من شهر وخمس أيام بالظبط" بس ما تقولش لحد

بس ليا سؤال هو حضرتك كنت ساكت ليه طول الفترة اللي فاتت ، المفروض انك كنت تطمن زمايلك ، يعني انا أول ما عرفت ان اسم زوجتى موجود من تاريخ 17/1 كتبت ردود على موضوعات كتير وقلت فيها هذا الكلام ، على الرغم طبعا انه فيه ناس كتيييييييييييير مكنتش مصدقه .. بس مش مشكلة أهم حاجة انه الواحد كان لازم يعمل اللي عليه ويطمن الناس
ومرة تانية بقولك ألف شكر على مجهودك