ابنـى بيتــك .... خطوة بخطوة علشان نعيشها صح (( مرحلة الأساس ))

[حياتى وقف لله]

الحمد لله والصلاة والسلام على رسول الله وبعد ...

لا يخفى أننا مخلوقون لعبادة الله تعالى ولطاعته ولإقامة دينه ومفيش سبب تانى لوجودنا إلا هذا السبب

قال الله تعالى : " وَمَا خَلَقْتُ الْجِنّ وَالإِنسَ إِلاّ لِيَعْبُدُونِ "


إذن فالسير إلى الله تعالى هو وظيفة العمر والإلتزام بدين الله تعالى هو الغاية العظمى من الوجود

فربنا سبحانه وتعالى خلق الخلق وأمرهم بإخلاص العبادة له وإفراده سبحانه وتعالى بها ابتلاءا وإمتحانا منه سبحانه وتعالى " الّذِي خَلَقَ الْمَوْتَ وَالْحَيَاةَ لِيَبْلُوَكُمْ أَيّكُمْ أَحْسَنُ عَمَلاً وَهُوَ الْعَزِيزُ الْغَفُورُ "

ووعد السعداء الذين استقاموا على دينه بالجنة
" وَأَمّا الّذِينَ سُعِدُواْ فَفِي الْجَنّةِ خَالِدِينَ فِيهَا مَا دَامَتِ السّمَاوَاتُ وَالأرْضُ إِلاّ مَا شَآءَ رَبّكَ عَطَآءً غَيْرَ مَجْذُوذٍ "

وتوعد الأشقياء الذين عصوا بالنار
" فَأَمّا الّذِينَ شَقُواْ فَفِي النّارِ لَهُمْ فِيهَا زَفِيرٌ وَشَهِيقٌ "

فالإلتزام بالدين شئ حتمى وإجبارى مش إختيارى

وقبل ما نقول أى حاجة لازم نتفق على إن الإلتزام بالدين مش معناه أبدا أن الواحد يدروش ويعتزل الناس ولا يلبس هدوم قديمة ولا ..... إلى آخر الصور اللى بيشوهوا بيها الدين فى المسلسلات والأفلام

ببساطة الإلتزام إنك تعيش حياتك بس تراعى ربنا فى كل حركاتك وسكناتك وتتأكد ساعتها إنك هتعيش أحلى حياة وهو ده شعارنا أحلى حياة فى طاعة الله سواءا كنت طالب أو فلاح أو مدرس أو حتى وزير

يبقى دينك هو منهجك حياتك وهمك فى الدنيا



طب ياترى ايه الأسباب اللى بتخلى الناس بتبعد عن الإلتزام وعن طريق ربنا سبحانه وتعالى وميبحبش السكة دى مع أننا قولنا إنها السكة الوحيدة اللى مفيش ولا سكة غيرها تنفع ؟

أسباب كتيرة جدا لكن كلها فى الآخر بتتلخص فى سبب محورى واحد وهو :

" بَلْ تُؤْثِرُونَ الْحَيَاةَ الدّنْيَا * وَالاَخِرَةُ خَيْرٌ وَأَبْقَىَ "

إيثار الدنيا الفانية والتمسك بها على حساب الآخرة والمصير الأبدى

الآخرة مش على باله
آه هو معتقد أنه فيه جنة وفيه نار بس مش مستشعر الحاجات دى بقلبه ومش مقدرها مقدارها الحقيقى

إزاى ؟
تخيل لما يعرف مثلا إنه عنده إمتحان ومزنوق تلاقيه بيسهر الليل كله ويشترى كوفى مكس علشان ما ينامش ويسكت الناس اللى حواليه علشان يعرف يذاكر وقلبه مفيهوش حاجة غير الإمتحان

فلو قدر إهتمامك بالإمتحان الكبير إمتحان الآخرة زى إمتحان الدنيا هيبقى قلبك من الخوف من النار والطمع فى الجنة زى قلبك أيام الإمتحانات

والمحور ده كان محور مهم جدا فى تربية النبى صلى الله عليه وسلم لأصحابه , دائما يذكرهم بالجنة والنار وينقلهم من جو الدنيا إلى جو الآخرة حتى قالوا : نكون عند رسول الله فكأننا نرى الجنة والنار رأى العين

فحب الدنيا بما فيها من شهوات ولذات لما يطغى على القلب أكيد هيبعده عن طريق الإلتزام اللى هيحرمه من الشهوات والنزوات النفسية المحرمة ودائما كل ممنوع مرغوب

يعنى مثلا واحد ماشى فى الشارع ولا يغض بصره عن المحرمات مع إنه عارف إن النظر حرام بس لذة النظر أحب إلى قلبه .

واحد تانى تقوله أنت مش عايز تلتزم ليه يقولك انا مبحبش الخنقة عايز أبقى حر فبيفضل راحة نفسه فى الحرية الوهمية الكاذبة على رضا ربنا سبحانه وتعالى وناسى أن ممكن الحرية دى ممكن تكلفه السجن فى نار جهنم لمدة لا يعلمها إلا الله

ومن ضمن الأسباب برده شبهات شيطانية يلقيها الشيطان علشان يعرقل الشخص ده ويبعده عن طريق ربنا سبحانه وتعالى

فتلاقى واحد يقولك :
يا عم هو أنا بعمل حاجة غلط . دى غيرى بيعمل بلاوى

وواحد تانى يقولك :
يا عم أنا مش بتاع السكة دى , اديك شايف ظروف الحياة المهببة ربنا عالم بينا , أنا مش هانفع فى السكة دى انا عارف نفسى

وواحد تانى
ممكن الشيطان يدخله من باب القنوط من رحمة سبحانه وتعالى بس بطريقة خفية فتلاقيه بيقولك : انا حاسس إنى مطرود من رحمة ربنا , أنا مستحيل اتغير , أنا من اللى ربنا قال فيهم :
" أُوْلَـَئِكَ الّذِينَ لَمْ يُرِدِ اللّهُ أَن يُطَهّرَ قُلُوبَهُمْ "

آه النوعية دى موجودة فعلا وفيه ناس محرومة من طريق ربنا , بس دول أكيد جاتهم الفرصة مرة واتنين وعشرة علشان يقربوا بس هما اللى بعدوا

ولو عادوا إلى الله تعالى ما ردهم لأن بابا التوبة مفتوح مالم تطلع الشمس من مغربها

بالعكس ده من أكبر الذنوب إنك تقنط من رحمة ربنا سبحانه وتعالى : " قَالَ وَمَن يَقْنَطُ مِن رّحْمَةِ رَبّهِ إِلاّ الضَّآلّونَ " وقال تعالى : " إِنّهُ لاَ يَيْأَسُ مِن رّوْحِ اللّهِ إِلاّ الْقَوْمُ الْكَافِرُونَ "

ومن ضمن مداخل الشيطان برده إنه يكرهك فى الملتزمين أو اللى بيبدوا عليهم على الإلتزام والصلاح

يقولك : شوف فلان الملتحى اللى يعرف ربنا بيغش الناس ,

ولا فلانة المحجبة بص بتعمل ايه فى جوزها ومطلعة عينه وكل شوية مشاكل مع أهله ........ إلخ

وطبعا النوع ده من الملتزمين موجود وكلنا بشر وبنغلط ومحدش فينا ملاك , والدين حجة على الجميع ومحدش حجة على الدين

يعنى مش علشان فلان وحش يبقى الدين وحش , هو مقصر آه ذنبه على جنبه وتنصحه بالمعروف

لكن أنت هتتحاسب على نفسك وبس ومش هينفعك كعذر تعتذر بيه قدام ربنا سبحانه وتعالى .


أخــــــى الحبــيـب
الدين مش لعبة بنلعب بيها لو عجبتك اديها فى اديك ولما تزهق منها ترميها

الدين منهج حياة

الدين أمانة فى رقبتنا

الدين هو طوق النجاة فى وسط أمواج الفتن والشهوات العارمة
صحيح الزمن ده ممكن الإلتزام فيه يكون مكلف نوعا ما لكن الأجر على قدر المشقة وكما قال النبى صلى الله عليه وسلم :إن من ورائكم زمان الصبر للمتمسك فيه أجر خمسين شهيداً منكم
وعن أنس بن مالك رضي الله عنه قال: قال رسول الله صلى الله عليه وسلم : "يأتي على الناس زمان القابض على دينه كالقابض على الجمر" رواه الترمذي

والنعيم لا يدرك بالنعيم ومن آثر الراحة فاتته الراحة


نيجى بقى لظاهرة التفلت من الإلتزام أو الفتور , يعنى واحد ما شاء الله عليه صوام قوام وبعدين يروح يقلب 180 درجة أو يبدو عليه التراجع والفتور أو يصاب بالملل

أحد السلف سئل : إن قوما ذهبوا ثم رجعوا , مشوا ثم عادوا , فقال : لو وصلوا لما رجعوا "

اللى هيمشى فى سكة الدين صح يبقى مش هيرجع تانى عنها
فلازم تبدأ صح وتلتزم بالدين إلتزام على أصوله

طب إزاى ؟
هو ده موضوع سلسلتنا بإذن الله تعالى
خطوة خطوة وطوبة طوبة نبنى بيت الإلتزام
استنونا

همسة
التزم صح .... تعيشها صح

[Mr. Medhat Salah]

[حياتى وقف لله]

جزاك الله خيرا