خدعونا فقالوا (( اشاعات عن العلاج الطبيعى ))

[DPT-Blue Phoenix]

خدعونا فقالوا (( اشاعات عن العلاج الطبيعى ))
معا لتصحيح المفاهيم حول العلاج الطبيعى

أكيد انت كطالب ثانوية عامة او كطالب لسه داخل علاج طبيعى سمعت كلام كتير عن العلاج الطبيعى مش عارف مرة انه تخسيس ومرة تانية انه اعشاب وتدليك ومرة ثالثة انه مش دكتور وعشان نوضح المعلومات الصح هنوضح اهم الأسألة فى السلسلة دى وفى سلسلة تانية هنشرح عن العلاج الطبيعى تفصيلا عشان الى عايز معلومات اكتر عن الكلية والمهنة هنتكلم هنا عن اشهر 5 معلومات غلط عن العلاج الطبيعى يلا نبدأ

‏خدعونا_فقاااااااااااالوا‬ (( الأكذوبة الأولى ))
‫أخصائى_مش_دكتور‬ !!!!!

- طيب انت أكيد عمال تسأل هو خريج العلاج الطبيعى دكتور ولا اخصائى انا مش فاهم !!!!!!!


- ‫‏قصة_كلمة_أخصائى‬



قلتلك عشان اجاوبك على السؤال دا .. محتاج اقولك ان فى حاجة اسمها التدرج الوظيفى ( مسمى وظيفى ) ؟! وهو كالتالى :


1-ممارس علاج طبيعى
2-اخصائى علاج طبيعى
3-اخصائى اول
4-كبير اخصائيين
5-استشارى ب و أ ( فى سجلات النقابة )
ودا مشابه الى حد ما للتدرج الوظيفى للبشرى ..


قلتلك انت اول ما تتخرج من الكلية بتتخرج بلقب ممارس .. بعد 5 سنين من التخرج او لو انت حضرت رسالة الماجستير ( الماستر ) بيبقى اسمك اخصائى .. طيب لو انت فضلت 20 سنة بعد التخرج او 15 سنة بعد ما اخدت الماجستير .. او 10 سنين بعد ما اخدت الدكتوراه الفلسفية تاخد لقب استشارى .. والحاجات الى فاتت دى اسمها ‫#‏المسمى_الوظيفى‬ زى ما قلنا ودا معناه ان كلمة أخصائى دا حاجة زى الفل مش وحشة ولا حاجة زى ما احنا كنا فاكرين

برده البشرى وهو متخرج اسمه ممارس عام وبعد الماجستير اسمه اخصائى وبيتدرج ويبقى استشارى مش قصة يعنى يبقى هو كدا أخصائى او ممارس ومش دكتور مثلا !!! وتقدر تشوف الكلام دا على اى يافطة لعيادة دكتور بشرى هتلاقى اسمه دكتور كذا اخصائى او استشارى مثلا امراض الجهاز الهضمى



- طيب ايه قصة ‫‏لقب_دكتور‬ ؟!


- لقب دكتور فى حد ذاته بتاخده بعد الدكتوراه الفلسفية PhD ..
او انك تاخد DPT ويضاف ‫#‏ليك‬ اسم دكتور مهنى او اكلينيكى فبدل ما اسمك Physical Therapist يبقى اسمك Doctor of physical Therapy ..


- ‏المسمى_المهنى‬ ( طبقا لاسم مهنتك ) :


خريج هندسة : اسمه مهندس صح دا اسم مهنته ؟!
انما انت أكيد سمعت بكلمة دكتور مهندس لأنه أخد دكتوراة PhD صح برده ؟!
تمام كدا
‫‏يبقى_نفرق‬ بين : البشرى اسمه المهنى طبيب بشرى .. مسماه الوظيفى ممكن بقى ممارس عام او اخصائى او استشارى مثلا امراض النساء والتوليد او غيره .


- طيب هو ليه بيقولوا لخريج البشرى والعلاج الطبيعى والبيطرى والأسنان والصيادلة يا دكاترة ؟!


- ‏العرف‬ : العرف فى مصر ان خريج الكليات الطبية زى علاج طبيعى وبشرى واسنان وصيدلة وبيطرى وكدا الناس تقوله يا دكتور .. والعلاج الطبيعى ب4 أحكام محكمة كسبانهم العلاج الطبيعى يتقاله يا دكتور عرفا




------------------------------------------------------------------------------------------------

‏خدعونا_فقالوا‬ (( الأكذوبة الثانية ))


‫‏الروماتيزم_أو_التربية_الرياضية_ممكن_يشتغلوا_علاج _طبيعى‬ !!!


- طيب هنوضح بعض النقط المهمة :
- ‫‏العلاج_الطبيعى_باختصار‬ Physical Therapy زى ما قلنا فى مواضيع قبل كدا : مجال كامل ليه وسائل علاج زى العلاج اليدوى و التمارين العلاجية و الوسائل الفيزيائية وغيرها .. ليه اقسام زى العظام - الأعصاب - الأطفال - الباطنة و الجهاز التنفسى و المسنين - الجراحة و الحروق و مشاكل زراعة و استئصال الأعضاء - نساء و توليد ... غير بقى التخصص فى الطب الرياضى و اصابات الملاعب غير اتكلمنا على دبلومات التغذية و كل الكلام الى قولنا عليه ؟!


‫‏الروماتيزم_والتأهيل‬ ( طب طبيعى سابقا )
- ايه هو الروماتيزم والتأهيل ؟!


- ‫‏الروماتيزم_و_التأهيل‬ ؟! دا مجرد ‫#‏تخصص‬ من كلية الطب البشرى .. على عكس ‫‏العلاج_الطبيعى‬ مجال كامل زيه زى الطب البشرى و الأسنان و الصيدلة ..


- التخصص دا يعتبر جزء من الباطنة .. هو تخصص بيتغير اسمه كتير الحقيقة مرة يقولك الطب الطبيعى .. مرة روماتيزم و تأهيل .. مرة طب طبيعى و روماتيزم و تأهيل



- كل مجال الروماتيزم من اسمه دا المفروض انه يختص ب (( أمراض الروماتيزم و ما الى ذلك .. عن طريق تشخيص حالة و وصف دواء وبقيت الطرق المتاحة للبشرى ))
يبقى فى النهاية دا مجرد تخصص فى البشرى لأ أكثر ولا أقل لا ليه دعوة بعظام ولا أعصاب ولا أطفال ولا صحة المرأة ولا اصابات ملاعب ولا اوعية دموية ولا قلب ولا صدر ولا اى شىء وكل دى تخصصات فى العلاج الطبيعى زى ما قلنا وازيد منها كمان


- خدعوك_فقالوا (( التربية الرياضية فيها قسم علاج طبيعى هاهاهاهاها )) بص للصور الى تحت بص اوى دى تخصصات كلية التربية الرياضية شفت


- طيب ايه وضع التربية الرياضية دول ؟!


- ‫‏تربية_رياضية‬ : التربية الرياضية مش من حقه انه ‫#‏يتعامل_مع_مرضى‬ دى مخالفة قانونية ولا من حقه يفتح مركز علاج طبيعى هو ملوش اى علاقة بالمجال الطبى من قريب او بعيد ..
- طيب ايه عقوبة الى يمارس العلاج الطبيعى غير خريجى كليات العلاج الطبيعى ؟!
- دا يعتبر منتحل صفة وعقوبته بتوصل للسجن والغرامة


‫‏قوانين_مهنة_العلاج_الطبيعى‬ :


1- المادة الأولى : الى يحق ليه ممارسة العلاج الطبيعى فقط خريجى كليات العلاج الطبيعى فى مصر سواء الحكومية أو الخاصة وكل كليات العلاج الطبيعى هى الى موجودة فى الصورة تحت بالاضافة الى كلية العلاج الطبيعى جامعة جنوب الوادى ( قنا )
2- المادة السادسة : لا يجوز لغير المقيدين بسجل أخصائى العلاج الطبيعى انشاء مركز خاص لمزاولة المهنة .. ويشترط لانشاء المركز الحصول على ترخيص بذلك من مديرية الشئون الصحية التى يقع فى دائرتها المركز ..
‫‏المختصر_المفيد‬ : العلاج الطبيعى خاص فقط بدكاترة العلاج الطبيعى خريجى كليات العلاج الطبيعى غير كدا يبقى منتحل صفة لو اثبتت عليه التهمة وليه عقاب .. دا لو شفت واحد منهم تبلغ عنوانه للنقابة العامة أو اقرب نقابة فرعية



------------------------------------------------------------------------------------------


‏خدعونا_فقالوا‬ (( الأكذوبة الثالثة ))
‫‏انت_بيتحكم_فيك_الروماتيزم‬ !!!


- أول ما نشأ العلاج الطبيعى فى مصر نشأ كمعهد زى ما قلنا لو قرأتوا فى سلسلة تاريخ العلاج الطبيعى هنا على المنتدى وبالتالى فى الفترة دى كان بيشرف عليه دكاترة بشرى من مختلف التخصصات وبشكل خاص دكاترة الروماتيزم وفى الحالة دى هقولك عندهم حق لأن العلاج الطبيعى كان لسه معهد أول ما بدأ فى مصر ..


- لكن طبعا لما اتحول العلاج الطبيعى لكلية من كليات القمة وذكرت تاريخ العلاج الطبيعى تفصيلا عشان نفهم ولما اتكلم نبقى فاهمين الدنيا كانت ماشية ازاى وازاى اتطورت وكلية القمة دى بتدرس دراسة عالية ومش أى دراسة عالية دا من 9-11 مادة فى كل ترم مواد طبية وعلاجية وكمان تكميلية ولو طبقنا ال Entry-level DPT فى مصر هنبقى بندرس عدد سنين اكتر من الى بيدرسه البشرى فى مصر فمبقاش الكلام دا ليه اساس ولو هنمشى بمبدأ الى يدرس سنين اكتر يتحكم فى الباقى يبقى احنا سعتها الى نتحكم فيهم بقى على المنطق دا صح


- وطبعا دا لأن العلاج الطبيعى مجال والبشرى مجال .. البشرى لا يعرف أى شىء عن المواد العلاجية الى احنا بنقعد على مدار 6 سنين ندرسها محاضرات وسكاشن ومستشفيات وكمان بنحضر دراسات عليا فيها ودبلومات متخصصة وكمان ورش عمل وكورسات ومؤتمرات سنوية وغيرها .. وبرده احنا ملناش دعوة بمجال البشرى لأن دا مجال ودا مجال


- ‫‏القوانين‬ :

- ‫‏المادة_الثامنة‬ من قرار وزير الصحة رقم ( 150 ) لسنة 1986 باللائحة التنفيذية للقانون (3) لسنة 1985 فى شأن تنظيم مزاولة مهنة العلاج الطبيعى بتقول : على المرخص له بمزاولة المهنة أن يضع برنامج العلاج الطبيعى و يحدد أساليب العلاج وطرق تنفيذه .. بناءا على تشخيص الدكتور البشرى و ان يكون فى اتصال دائم بينك و بين الطبيب دا حتى الآن .


- نبص بقى كويس للحاجات الى انا حاطط عليها علامات بالأحمر :O هتقرأوا فى قوانين المهنة انه يحق ليك تفتح مركزين وكلمة مركز معاناها انك تقدر تفتح اكتر من تخصص واكتر من دكتور علاج طبيعى بيشتغل فيه لأن احنا على عكس البشرى مش هنكشف على مريض ويمشى لأ احنا بنقعد نشتغل مع المريض جلسة كاملة وممكن بتطول فلازم بيكون فى عدد


- الى بيرأس قسم العلاج الطبيعى هو دكتور علاج طبيعى وعلى فكرة دكتور العلاج الطبيعى ممكن بيمسك مدير مستشفى كاملة عادى جدا



- انت الى بتستقبل الحالة بعد ما تتحول من الدكتور وبتعمل أنواع التشخيص الخاصة بينا الى على اساسها بتشتغل وبتقيم الحالة وتحط برنامج العلاج وتنفذه وتتابع مع المريض


- ‫‏قرار_الفصل‬ : الفصل بين الروماتيزم والعلاج الطبيعى تم من زماااااااان بس القرار الى تحت دا هو قرار وزارى حديث لا يقبل الطعن عليه مفاده انه مش من حق حد انه يشرف عليك .. يعنى الموضوع منتهى .

‪‬


------------------------------------------------------------------------------------------------


خدعونا فقالوا (( الأكذوبة الرابعة ))

اتحاد نقابات المهن الطبية


- ييجى واحد يقولك العلاج الطبيعى مش من موجود ضمن اتحاد نقابات المهن الطبية وبالتالى فى مصر هو مش مهنية طبية ولا دكتور وكلام كتير ملوش لازمة كدا طيب ايه هى قصة اتحاد نقابات المهن الطبية دا وايه فايدته ؟!


- ايه هو اتحاد نقابات المهن الطبية وايه هو تاريخه ؟!
- الأول تعالوا نشوف بعض الأمثلة لنقابات المهن الطبية والصحية فى مصر وهما زى نقابة الأطباء ونقابة الصيادلة ونقابة الأسنان ونقابة البيطريون ونقابة العلاج الطبيعى ونقابة التمريض ونقابة العلوم الصحية وهكذا .. دى النقابات الى بتهتم بقوانين وحقوق وفرص عمل وكل حاجة تخص المهن دى كل نقابة مخصوصة بالمهنة بتاعتها ولها علاقة بالجهات التنفيذية وتعديل قوانين المهنة وهكذا



- ومال ايه اتحاد نقابات المهن الطبية دا بقى ؟!
دا عبارة عن نقابة خدمية ليس لها اى علاقة لها باي جهة تنفيذية ولا تمنح أى شىء الا معاش وخدمات أخرى



- طيب ايه تاريخ اتحاد نقابات المهن الطبية دا وايه قصته مع العلاج الطبيعى ؟!


- الاول

- لو جينا نشوف تاريخ الكليات الطبية فى مصر هنلاقى انه لحد قبل سنة 1938 كان الطب البيطرى والصيدلة مع كلية الطب البشرى وهكذا كلهم تحت مسمى كلية الطب وبعد كدا بدأوا ينفصلوا ويكون فى كلية صيدلة وكلية طب بشرى وكلية طب بيطرى وهكذا ..



- بعد ما انفصلت لكليات دى عن بعض جت فكرة اتحاد نقابات المهن الطبية

و بدأ تاريخ الاتحاد دا لما صدر القانون رقم ١٣ لسنة ١٩٨٣ بشأن اتحاد نقابات المهن الطبية الجريدة الرسمية - العدد ١٠ في ١٠ مارس سنة ١٩٨٣ باسم الشعب رئيس الجمهورية قرر مجلس الشعب انشاء اتحاد يسمى " اتحاد نقابات المهن الطبية " تكون له الشخصية الاعتبارية مقره مدينة القاهرة ويضم أعضاء نقابات الأطباء والصيادلة وأطباء الأسنان والأطباء البيطريين ويمثله قانونا رئيس مجلس الاتحاد ..


- كل دا اتعمل والعلاج الطبيعى كان لسه مظهرش فى مصر لأنه البداية الفعلية للعلاج الطبيعى فى مصر تعتبر فى سنة 1969 بقى ‫#‏المعهد_العالى_للعلاج_الطبيعى‬ ‫#‏معهد_مستقل‬ بعد كدا فى سنة 1975 انضم المعهد لجامعة القاهرة .. وبقت الدراسة فيه 5 سنين وفى يوم 6 من شهر 1 سنة 1992 صدر القانون الجمهورى رقم (( 20 )) بتحويل المعهد العالى للعلاج الطبيعى ‫#‏لكلية‬ تابعة لجامعة القاهرة .. وبقت كلية العلاج الطبيعى جامعة القاهرة ‫#‏الكلية_الوحيدة‬ من نوعها فى مصر والبلاد العربية واصبحت الرائدة فى مجال العلاج الطبيعى


- وبعد كدا اتعملت نقابة العلاج الطبيعى سنة (( 1994 )) يعنى بعد ما تم انشاء اتحاد نقابات المهن الطبية بحوالى (( 11 )) سنة بعد كدا العلاج الطبيعى قدم طلب للانضمام لاتحاد ..


- طيب هل وافق الاتحاد عن انضمام العلاج الطبيعى ؟!
الاجابة اه .. الاتحاد وافق من فترة طويلة وارسل خطاب بهذا الموضوع بالفعل العلاج الطبيعي حصل العلاج الطبيعي على خدمات الاتحاد من نادي وخدمات طبية أخرى .. الى اخر موضوع انضمام العلاج الطبيعى لحد دلوقت كان الامكانيات المادية والفلوس لأن الاتحاد طبعا ليه اشتراكات وعدد خريجى العلاج الطبيعى كان لسه قليل جدا جدا جدا جدا و حتى لسه قليل اوى مقارنة بباقى الكليات الطبية فى مصر وبالتالى نقابة العلاج الطبيعى مكنتش امكانياتها تسمح لكن دلوقت بقت تسمح والعلاج الطبيعى اتطور جامد



- طيب بما ان الاتحاد وافق ونقابة العلاج الطبيعى بقى عندها الامكانيات الكافية ايه الى فاضل ؟!



الى فاضل بس هو تعديل قانون اتحاد نقابات لمهن الطبية وزى ما احنا عارفين ان مصر كانت بتمر بظروف صعبة الفترات الى فاتت ومكنش فى وقت تعديل قوانين لكن ان شاء الله السنة دى 2016 نقابة العلاج الطبيعى حطت دا ضمن الاعتبار وهيتعرض على مجلس الشعب وهتتم الموافقة عليه باذن الله ويتعدل قانون الاتحاد فالموضوع دا موضوع وقت ليس الا



------------------------------------------------------------------------------------------------

خدعونا فقالوا (( الاكذوبة الخامسة ))
‫دكتور_العلاج_الطبيعى_ملوش_فى_التشخيص‬ !!!!!
‫‏اصل_كدا_الروماتيزم_هيبقى_لازمته_ايه_دا_كلام هم‬

دلوقت ايه قصة التشخيص فى العلاج الطبيعى بقى !!!


- طبعا كتير من دكاترة الروماتيزم او غيرهم ساعة ما يسمعوا كلمة التشخيص فى العلاج الطبيعى يعترض ويقولك ومال احنا يبقى لازمتنا ايه ؟! هو عارف بس بينكر لأنهم عايزين يتدخلوا فى الى ملهومش فيه ليس الا البشرى ليه مجال والعلاج الطبيعى ليه مجال ..
- طيب عشان نفهم القصة دى لازم نفهم الأول هو يعنى ايه تشخيص Diagnosis ؟!
- Diagnosis : the term which denotes the disease from which the person suffers
يعنى اننا نعرف المرض الى بيعانى منه الشخص
دا تعريف انا عايز بقى تعريف تانى ودا الى هنقسم من خلاله الأنواع الى هنقولها حالا :
- Diagnosis : the art of applying scientific methods to the elucidation of the problems presented by a sick patient
- يعنى معناه هو فن تطبيق طرق علمية ( قائمة على اسس موثقة ) عشان نوضح المشاكل الى بيعانى منها المريض ..


- التعريف دا بقى تعريف أشمل ويقدر يتضمن كذا حاجة أولا احنا قلنا هى طرق قائمة على اسس علمية انا بطبفها ليه ؟! عشان اعرف المشاكل الى بيعانى منها المريض وبناءا على ذلك هنقدر نقسم التشخيص ل 3 أنواع :
1- The Presumptive diagnosis
2- The Working diagnosis
3- The Definitive diagnosis
- يعنى ايه بقى ؟؟؟


- نبدأ بأول واحد Presumptive diagnosis التشخيص الافتراضى او الاحتمالى : دا غالبا بيكون قائم على تاريخ المرض والأعراض والعلامات الى ظاهرة على المريض والفحص الجسدى
Signs - Symptoms - History - Physical examination
أكيد لازم أول ما بيروح المريض للدكتور بيعرف الأعراض والعلامات الى ظاهرة وتاريخ المرض ويعمله فحص جسدى هو ممكن يتوصل من خلال دا للمرض وممكن يستبعد احتمالات كتير ويحط احتمالات معينة ويتطلب سعتها بعض أنواع الاختبارات والفحوصات اللازمة عشان يتأكد تماما .. بس دا فى النهاية اسمه تشخيص


- طيب ايه هو Definitive Diagnosis تشخيص حاسم او مؤكد : دا بقى الوصف الدقيق للمرض الى بيشتكى منه المريض والأدلة كلها متوفرة وأكيدة على المرض يعنى مثلا عملت تحليل للبلهارسيا وطلع فى التحليل ان المريض مصاب بالبلهارسيا يبقى هو أكيد مريض بيها دا تشخيص حاسم ومؤكد .
يعنى تعريفه بالانجليزى :
An accurate description of the patient's complaint based on all evidence including special investigations and treatment
- ‫‏ررررررررركز_هنا_بقى‬ : ال Working diagnosis
التشخيص العملى الذى بناءا عليه تقام خطة العلاج
Working diagnosis : the diagnosis on which the treatment is planned
يعنى هو التشخيص الى انا بعمله لأنه بناءا عليه هحط خطة العلاج الى انا همشى عليها .


زى ايه ؟!


Observations .. اقدر مثلا من خلال دراسة ميكانيكية المشى فى الميكانيكا الحيوية الاحظ المريض بيمشى ازاى واقدر اعرف انه عنده خلل فى حاجة معينة
التاريخ المرضى والأعراض والعلامات الى بشوفها على المريض والتشخيص الجسدى والاختبارات الخاصة Physical examination and special tests
بعد كدا بحلل المعلومات الى انا حصلت عليها كلها .. وبناءا عليها بحدد المريض دا محتاج ايه بالظبط وعلى اساس كدا بحط خطة العلاج بتاعتى


‫‏مثلا‬: طفل مريض بالشلل الدماغى متحول من عند دكتور بشرى والشلل الدماغى دا نوعه كذا هل ينفع انى اشتغل مع المريض مباشرة ؟؟؟؟ قلتلك لأ


لازم انا بعمل الاختبارات اللازمة وبالوسائل الى قلت عنها فى المواضيع الى فاتت عشان اعرف بالظبط المريض دا محتاج ايه وبتختلف من مريض للتانى اهى التفاصيل أو المشاكل الى انت بتكتشفها دى هى الى على اساسها بتحط خطة العلاج بتاعتك لكن هى مش حفظ حالة كذا هعمل معاها كذا ..


وبالتالى من هذا المنطلق
Physical Therapy's diagnosis is a working diagnosis


----------------------


- ***لك كمان فى كتب مخصوصة لينا بحاجة اسمها Differential Diagnosis الى هو لما يكون فى اكتر من مرض متشابهين فى اعراضهم ازاى اقدر افرقهم عن بعض ودا فى كتب مخصوصة لدكاترة العلاج الطبيعى بيه !!!


- غير كدا لو اتكلمنا عن بلد زى ‫‏أمريكا‬ وفيها Direct Access يعنى ممكن المريض يجيلك مباشرة بدون تحويل ومن حقك حديثا تطلب وتقرأ الآشعة فى مصير .. يبقى انت ممكن تنفذ
presumptive diagnosis


وممكن لو طلبت أشعة وقرأتها توصل بالظبط ل definitive diagnosis ان المريض دا مثلا عنده كسر ..


لكن خلينا فى الأساس كدا كدا انت بتشخص عشان تحط خطة العلاج وزى ما قلنا هو دا ال Working diagnosis


- كل دا ومقولتش ان الدكتور البشرى ممكن يكون مشخص غلط اصلا وبالتالى انت لو متأكدتش هتحط خطة علاج كلها غلط أو ممكن المريض يحصله حاجة وانت تلبسها بقى
- طيب هل دا انتقاص مثلا من حق البشرى او الروماتيزم او غيرهم ؟!


- هقولك لأ طبعا هما ليهم وساااااااائل كتييييييييييير جدا للتشخيص ومعظما التشخيصات الى بيعملوها بتبقى حاسمة ومؤكدة من تشخيصات دم لبول وغيرها لاجهزة وانواع اشعة كتير جدا لعينات لمزارع لغيره .. التشخيصات الطبية الخاصة بيهم وكمان لو فى امريكا انت مقدرتش تشخص حالة مريض بتحولها لدكتور بشرى هو الى يشخصها يبقى دا مش انتقاص من حقهم ..
- لكن كون انهم يقللوا من الباقى عشان نبقى احنا الى كويسين دا الى بنعارضه زى ما انت بتدرسوا حاجات احنا برده بندرس حاجات حضراتكم لا تعرفوا عنها اى شىء




-------------------------------

تقدر تشوف الصور المرفقة للتأكيد على الكلام الى قلناه وكمان تشوف الصور المرفقة بأول كومنت والسلام عليكم ورحمة الله وبركاته

Amr Elsareih
صفحة ( يومك طبيعى )

[DPT-Blue Phoenix]

باقى الصور للتأكيد

[DPT-Blue Phoenix]

واخيرا
http://ask.fm/Elsareih/answers/138695156037

[DPT-Blue Phoenix]

الف الف مبروك لمهنة العلاج الطبيعى
تم اليوم الخميس
25 أغسطس 2016 انضمام نقابة العلاج الطبيعى لاتحاد نقابات المهن الطبية رسميا وان شاء الله مهنة العلاج الطبيعى من تقدم لتقدم دائما باذن الله