الفسيولوجى - الهستولوجى - بيوكمسترى

[DPT-Blue Phoenix]

دى روابط المواد الى اتكلمنا عنها قبل كدا على المنتدى هنا

1- التشريح
http://www.thanwya.com/vb/showthread.php?t=614742

2- العلاج الكهربى
http://www.thanwya.com/vb/showthread.php?t=612757

3- العلاج المائى
http://www.thanwya.com/vb/showthread.php?t=613327

4- كيف نذاكر العلاج الكهربى والمائى
http://www.thanwya.com/vb/showthread.php?t=613722

5- علم النفس
http://www.thanwya.com/vb/showthread.php?t=616578

6- قوانين وآداب المهنة - مبادىء الجودة
http://www.thanwya.com/vb/showthread.php?t=613668

7- لغة انجليزية - حاسب آلى - علم الحياة
http://www.thanwya.com/vb/showthread.php?t=616942

............................

#‏الفسيولوجى‬ Physiology



- علم الفسيولوجى او الفسيولوجيا او علم وظائف الأعضاء .. يعنى هو لو ترجمناها على انها وظائف الاعضاء مش هتكون ترجمة صحيحة 100% .. خلينا نسميه علم الوظائف ..

- علم الوظائف يعنى : العلم الى بيدرس وظائف اجهزة ومكونات الجسم المختلفة .. هو علم كيفية بيقولك ازاى الجسم دا بيشتغل .. انما معظم الاناتومى وصف للجسم وبيتكون من ايه وكدا لكن دا ميمنعش ان الاناتومى بيقولك وظيفة وكدا .. لكن الفسيولوجى دا بيدرس الوظيفة تفصيلا ..

- علم الفسيولوجى بوجه عام علم واسع جدا وفى منه فروع كتير .. فسيولوجى الجهاز العصبى ودا فرع كبير جدا بيدرس ازاى الجهاز العصبى بيشتغل Neurophysiology .. عندنا مثلا فسيولوجى التمارين العلم الى بيدرس تاثير المجهود على وظائف الجسم المختلفة Exercise physiology .. وهكذا


من الحاجات الاساسية الى بندرسها فى علم الفسيولوجى العاااااام :-
1- Autonomic .. الجهاز العصبى اللاارادى بتدرس بيتكون من ايه وازاى بيشتغل ودور الجهاز السمبثاوى والباراسمبثاوى
2- Blood .. بتدرس مكونات الدم وفايدة كل مكون من مكوناته
3- Nerves and Muscles .. بتدرس فيه ازاى ان العصب بيحصله استثارة وبعدين يدى الاوامر للعضلة عشان تنقبض دا اذا كان عصب حركى يعنى .. وازاى العضلة دى بتنقبض
4- Cardiovascular .. بتدرسوا فيه القلب والاوعية الدموية ازاى القلب بينقبض وازاى الدم بيتنقل وازاى الدورة الدموية ماشية وكدا وايه الى بينظمها
5- Respiration .. بتدرس ازاى عملية التنفس بتتم وايه الى بيتحكم فيها وكدا
6- Metabolism .. بتدرس ازاى عمليات التمثيل الغذائى فى الجسم بتتم من بناء او هدم

وفى غيرها بس دا عامة الى ممكن تدرسوا فى اولى وخاصة اول 5 دول اساسى ..
المادة دى من 100 درجة فى كل ترم يعنى عليها 200 .. مادة تعتمد اولا واخيرا على الفهم الجيد ثم الحفظ .. لو فاهم المادة دى هتفهم جسمك دا ماشى ازاى مادة جميلة ولذيذة جدا جدا جدا وفى نظرى اجمل من الاناتومى لانها فهم بدرجة عالية جدا .. لكن لازم تكون مذاكر اناتومى عشان يساعدك فى الفسيولوجى لازم تكون فاهم تركيب الجسم الاول وبعدين تعرف ازاى بيشتغل دى نقطة مهمة جدا ترجعنا لاهمية الاناتومى زى ما قلنا فى الاول ..

لكن لازم نعرف ان علم الفسيولوجى حاجة اساسية فى العلاج الطبيعى عشان افهم الاجهزة لازم افهم تاثير الاجهزة الفسيولوجى على الجسم وتاثير التمارين وتاثير المجهود وغيره وكل دا لا يتم الا بفهم علم الفسيولوجى الأول .. عشان افهم ازاى مرض بيتم فى امراض بيعتمد فهمها على فهم فسيولوجى الجسم برده وهكذا ..

المادة دى فيها جزء عملى عبارة عن تجارب لكن غالبا بيجى زى اسالة برده اختبارى واكمل وكدا اونت بتحلها فعادى يعنى ..
المطلوب منك فى المادة تفهم كويس وبعدين تحفظ عليهم شوية وان شاء الله المادة هتبقى تمام معاكم لكن الفهم الجيد مطلوب هنا .. لو مفهمتش كويس هترخم معاك جدا فى الحفظ فلازم نفهم هنا كويس وربنا معاكم ان شاء الله ..

...............

#‏الهستولوجى‬ Histology


- علم الهستولوجى دا هو علم الانسجة .. يعنى ايه برده علم الانسجة ؟! العلم الى بيدرس التركيب الميكرسكوبى لاجهزة الجسم سواء بالميكرسكوب الالكترونى الدقيق الى بيجيبلك حتى بالخلية الواحدة باللون الابيض والاسود او الميكرسكوب الضوئى الى بيكون ملون وبيجيب نسيج على بعضه ..

- يعنى العلم دا مشابه لعلم التشريح لكن علم التشريح بيدرس التركيب العام للجسم عضلات اعصاب عظام جهاز عصبى .. اما علم الانسجة بيدرس بقى يقولك العضلة دى بتتكون من اكتر من طبقة وخصائص كل طبقة مثلا العصب دا طبقات الجلد طبقات .. الخلية دى بتتكون مثلا من شبكة اندوبلازمية وجهاز جولجى وميتوكوندريا والحاجات دى ووظيفة كل حاجة ..
- العلم دا مش بالاهمية بتاع العلمين الى فاتوا سواء اناتومى او فسيولوجى بالنسبالنا لكن علم مهم لو جلدية وحروق والحاجات دى .. وكمان مهم انى اعرف هل النسيج الى انا هشتغل عليه دا فى مثلا دهون كتير .. لان زى ما احنا عارفين ان الدهون دى تعتبر عازل للحرارة فلو انا بشتغل بجهاز حرارى مثلا تكون الحرارة اعلى شوية من انى اشتغل على نسيج عضلى او عصبى .. ونفس الكلام فى الاجهزة الكهربية .. غير انه بيفهمك حاجات برده عن الامراض ان المرض دا ممكن يكون فى طبقة معينة من العضو فى نسيج معين مش كله وهكذا فبرده علم مهم ..

المادة دى حاول تفهم فيها على قد ما تقدر وبعدين احفظها مرهقة شوية فى الحفظ واسمائها غريبة حبتين ثلاثة لكن هتتعود عليها .. ليها امتحان نظرى عادى كتابة واختيارى وكدا .. وليها عملى انك بتشوف صور الانسجة المختلفة وتتعرف عليها .. لكن حاولوا وانتم بتذاكروا يكون النسيج قدامكم فى اطلس وبتاخدوا الاطلس مع الكتاب وتذاكر من الكتاب عشان الحفظ ميبقاش عميانى وكدا وحلوا اسالة كتير على المادة دى و اسالة الامتحانات السابقة بتريح كتير .. ونفس الكلام فى باقى المواد ..

كل مواد طب فيها كتابة او اسالة مقالية يعنى فبتحتاج حفظ من اول السنة .. اكتر مادة فيها كتابة الاناتومى اقل شوية الفسيولوجى اقل الهستولوجى اقل الكيمياء الحيوية ..

......................


‫#‏الكيمياء_الحيوية‬
Biochemisty


علم الكيمياء الحيوية دا عبارة عن علم زى باقى علوم الكيمياء عادى جدا لكن بيدرس التركيب الجزيئى للمواد الى فى الجسم والتركيب الجزيئى للمواد الغذائية الى بناكلها التركيب الجزيئى للماء .. وبيدرس برده ازاى العمليات المختلفة بتتم فى الجسم وكدا لكن نفرق هنا الفسيولوجى بيدرس الوظيفة بتم ازاى بوجه عام لكن الكيمياء الحيوية تمسلك بقى تقولك الدم دا مثلا ..

بيتكون من كريات دم حمراء وبيضاء طيب كريات الدم الحمراء دى بتتكون من مجموعات كذا وشكلها الجزيئى عامل كذا .. طيب فى الانقباض العضلى مثلا تقولك لا العضلة دى فيها اكتين وميوسين وال2 دول بيرتبطوا بطريقة معينة وهكذا بتدرس التركيب الجزيئى للجسم وازاى العمليات المختلفة بتم فيه بس من وجهة نظر الكيمياء تفاعلات وروابط ووظائف وكيمياء الجسم يعنى .. بتدرس البروتينات والكربوهيدرات والدهون والفيتامينات والمعادن وعمليات التمثيل الغذائى فى الجسم وكدا يعنى ..

هى مادة صغيرة عندنا فى علاج ومادة مش صعبة اوى انك تعدى منها لكن لازم تفهم طريقة الاسالة بتيجى ازاى وازاى تجاوب على الاسالة المختلفة وتكون اجابتك محددة والا هتنقص فيها كتير وبرده تتذاكر من الاول لانها بيجى فيها كتابة ومحتاجة انك تعرف تكتب ..

.............

يبقى مواد طب بوجه عام لازم تحاولوا تذاكروا من البداية وبالتفويق ان شاء الله ..