عايز تعرف الحل الاكيد لكل مشاكل الازهر؟ ادخل واقرا

[casual]

ابدا بنفسك وبس

مدرس ولا وكيل ولا شيخ معهد ولا موجه ولا ادارى ولا عامل
ابدا بنفسك وادى عملك المطلوب منك على اكمل وجه
و 95% من مشاكل الازهر هتتحل ان شاء الله

لو عندك بيت واقع ومهدوم مش هيتبنى باللطم اوالصويت واتهام الناس
البيت وقع او لسه هيقع يبقى اشتغل ومتقفش تتفرج

فكر واشتغل
انقد واشتغل
ناقش واشتغل
اشتكى واشتغل
ولو عايز (تلطم) الطم بس اشتغل

الازهر هو انت ... مش كائن فضائى من كوكب زحل
ولما تراعى ضميرك وتعامل ربك بما يرضيه، الحال هيتغير
احنا الازهر والازهر هو احنا وحال الازهر اللى مش عاجبنا (هو حالنا)

شفت غلط قدامك فى معهدك فى قطاعك فى تفتيشك
سيح وافضح الدنيا واخربها عالفاسدين ومتخافش مش هتموت
بس متلطمش -اللطم- مش هيحاسب الفاسد ولا هيردعه
غاية ما هنالك هيجيلك سكر وضغط بدرى بدرى ومش بعيد تموت مقهور

شيخ معهدك احترمه وساعده واقترح عليه بالحب
كله بالحب
ولو شفت غلط صلحه (بالحب)
وتلاميذك ولا طلابك علمهم برضه (بالحب)
ولو شفت فاسد افضحه واشتكيه (بس مش بالحب)

انا مش مثالى ولا بدعيها محدش فينا كامل
لكنى باخد بالاسباب
بهز النخلة لوحدى يمكن تنزل بلح
لكن لو كله ساعد بعض هننزل البلح كله وناكله فى وقت وجيز

رؤساءنا وحكوماتنا علمونا ان الحكومة هى بابا وماما
عشان كدة مستنيين ان الطيب يقلع العمة ويلبس قناع سوبر مان
يلف عالمعاهد ويصلح الاخطاء
ويصلح الحنفية الخربانة
ويلم برشام الغش من لجان الامتحانات
ويعاقب الطالب الخيبان ويعدل المايلة ويلم الزبالة اخر اليوم الدراسى
وانا ابشركم ان العهد ده انتهى خلاص
كل واحد يعمل اللى يقدر عليه
وبالتدريج كل شئ هيتصلح بالوعى والضمير
مع مسئولية شيخ الازهر الكاملة ومسئوليتنا الكاملة ايضا

الصورة سودة .. ايوة سودة
بس انت بتزيد سوادها ليه هى ناقصة!
ما تجيب شوية تنر وشيل السواد ونضف على قد ما تقدر
مش مطلوب منك المستحيل
مطلوب شوية عمل وشوية ضمير وقليل من الكلام وكثير من الايجايبة

وفى النهاية انا ازهرى وافتخر
ومش بحب التربية والتعليم ولا عايز احول ليها
وعارف قيمة الازهر اللى شغال فيه
وهحاول واحاول ان شا الله اكون اخر واحد ومش هيأس
لانى واثق ان العمل + الضمير هما كلمة السر لعودة الازهر
والتحية