برمجة " دروس البرمجة مع ++c " محمد القبانى

[msamido]

المشاركة الأصلية كتبت بواسطة ahmed abobakr

السلام عليكم ..
ازيكم يا جماعة ..اتمنى ان كله يكون تمام .

بالنسبة لل byte و الbinary عارفهم و الحمدلله اخدنا انظمة العد كلها فى الكلية .

كنت عاوز اعرف ايه دخل الجهاز فى size و range ?

والدرس واضح والحمدلله بس محتاج تطبيق للتأكيد .

شكرا ليك يابشمهندس

ازيك يا أبو حميد

منور

بس أنا عايز أعرف يا جماعه هو انتوا ليه سيبتوا الدرس كله وأفشتووو فى الجملة دى والله الموضوع كبير ومش مكانه هنا ومش هتحتاجوه دلوقتى
انسو الجملة دى خالص

بالنسبة للتطبيق هيظهر إن شاء الله فى الدرس القادمة

.
.

[ananoo]

السلام عليكم


معلش انا اتاخرت في الرد عن الدرس
المهم الحمد لله يعني العملية وضحت و ان شاء الله في التطبيق بعد كدة نفهم اكتر

بالنسبة للbyte و الbinary بصراحة مش متاكدة مية في المية اني فهمام
يعني ممكن اكون اخدتهم في الكلية بس مش اكيد

[همس]

الحمد لله

الحمد لله

الحمد لله

اني فهمت الدرس بتاع اللآلة الحاسبة

وبتاع الـ data tybes

بس فاضل الدرس الأخير الي هو التفصيل بتاعهم

بس انا فهمت الدرس الي قبل الأخير الحمد لله

وطبقت كود الآلة

وفهمت الحمد لله


فاضل بس آخر درس يا باشمهندس

هخلصه ان شاء الله

ومش هيآخد مني وقت


يعني تقدر حضرتك تنزل الدرس الجديد وقت ما تحب

وربنا يكرمك يااااااارب

وانا سعيدة اوي اني بتعلم سي بلس بلس

بجانب الجافا الي بدأت فيها كورس برده

وأد اييييييه انا فلا استفدت من البداية الي بدأتها في السي مع حضرتك
في بداية كورس الجافا

جزاك الله خيرا

[همس]

مش الـ binary دا الي هو وحدة التخزين الاساسية في الكمبيوتر ؟؟

الي هما الصفر والواحد ؟؟

والchar الوحدة الي يقدر ال user يفهمها

الي هي عبارة عن ارقام وحروف

يعني الinput في الكمبيوتر بيكون char ولما يحصل ليه encode بيتحول الى bits الي هي بتآخد مساحة في الميموري ... ؟؟

مش عارفة انا فاهمة ولا بقول كلام من عندي


بس انا فهمت ال data types الحمد لله

جزاك الله خيرا على مجهودك الي بتبذله معانا


دمت في رعاية الله وحفظه

[ananoo]

السلام عليكم

ايه الاخبار يا جماعة ؟؟

[همس]

والله انا متظرة زيك الدرس الجديد بقالي فترة طويلة جدا

ربنا يقدم الي فيه الخير

اكيد باشمهندس محمد مشغول

ربنا يعينه في شغله

[msamido]

السلام عليكم ازيكم يا جماعه
أنا بجد أسف إنى أتأخرت عليكم فى الدرس الجديد بس بجد كنت مشغول أوى فى الفترة اللى فاتت كانت عندى project محتاج يتسلم وكان فى شغل كتير بس أوعدكم قريبا جدا واحتمال يكون النهارده أنزل الدرس الجديد

بس أحاول اجمع أفكر وافضى دماغى شوية

شكرا لمتابعتك واسف لانتظاركم
.
.

[msamido]

السلام عليكم ورحمة الله وبركاته
ازيكم يا جماعه
أخباركم ايه وأخبار الكليات أيه والميد تيرمات وأخباركم ايه مع السى بلس بلس ؟؟
معلش أتأخرت كتير عليكم بس إن شاء الله نبدأ نكمل سوا ابتداءا من النهارده
كان فى كلامنا الأخير سألنا عن الـ byte والتمثيل الـ binary وإن شاء الله النهارده هنتكلم عن الموضوع ده ؟
وهنبدأ نقول يعنى ايه binary ؟
زمان واحنا فى ابتدائى أو فى كى جى one or two واحنا بنتعلم الأرقام والرياضيات كنا بنشوف الأعداد فى خانات يعنى لما نقول 123 ده معناه 3 فى خانة الأحاد و2 فى خانة العشرات وده معناه عشرين و1 فى خانة المئات وده معناه 100 صح وبتجميعهم مع بعض تبقى النتيجة مئة وثلاث وعشرون صح ؟؟
وبعد كده بدأنا نفهم إن خانة الأحاد دى فى النظام العشرى Decimal يعنى 10 أُس 0 وخانة العشرات يعنى 10 ُأس واحد وخانة المئات يعنى 10 أُس 2 وهكذا يعنى العدد 123 هو فى الحقيقة نتيجة : حاصل ضرب 3 فى (10 أس 0 ) + حاصل ضرب 2 فى (10 أس 1) + حاصل ضرب 1 فى (10 أس 3) ....
وطبعا النظام العشرى بيتعامل بالأرقام من 0 - 9 .. وجود كل رقم فى خانة سواء الأحاد أو العشرات أو المئات أو الألاف أو خلينا نقول بقى 10 أس 0 و 10 أس 1 و 10 أس 2 وهكذا معناه ان الرقم ده مضروب فى قيمة الخانه بتاعته دى.. صح الكلام ده ولا ايه ؟؟
بالظبط بقى النظام الـ binary هو نظام تمثيل الأعداد الثنائى اللى بيعتمد على الأرقام 0-1 فى خانات تحمل الأساس 2 بمعنى إن أول خانة فيه تمثل 2 أس 0 وتانى خانه تمثل 2 أس 1 وثالث خانة تمثل 2أس 2 وهكذااا
حد فاهم حاجه ؟؟
على فكرة بالمناسبة اللذيذة دى لما نقول كده من الشمال لليمين 0^2 ده معناه 2 أس 0 يعنى الرمز ده ^ بيمثل أس
يعنى الخانات بتاعة النظام الثنائى هتبقى كالأتى :

0^2 | 1^2 | 2^2 | 3^2 |

يعنى لما نقول 1111 ده معناه 1 × (0^2) + 1 × (1^2) +1× (2^2) + 1× (3^2) يعنى فى النظام العشرى يمثل :1+ 2 +4+ 8 يعنى بيمثل 15 وهكذاااا

طيب ده ازاى بنعرف الـ binary بيمثل كام فى النظام العشرى وعرفناه طيب لو عندنا رقم بالنظام العشرى وليكن مثلا 6 عايزين نمثله فى النظام الثنائى يبقى ازاى :
عندنا الخانات زى ما قلنا فوق الخانة الأولى بتمثل 1 عشرى أو 0^2 binary والخانة الثانية بتمثل 2 والخانة الثالثة بتمثل 4 طيب علشان نعمل 6 يبقى ازاى
يبقى نحط 1 فى خانة الأتنين و 1 فى خانة الأربعة وزيرو فى خانة الواحد ويبقى كده 110 أى 6 بالعشرى
يارب يكون الكلام واضح بس ...

ده مثال :

النتيجة العشرية تبقى كام ؟؟؟

اعتقد كده معنى الـتمثيل الـ binary بقى واضح فى بقى العمليات الحسابية على الموضوع ده بس ده مش مجالنا لو حابين نعمل درس للموضوع ده نبقى نعمله درس لكن خارج نطاق منهجنا الأساسى وهو البرمجة باستخدام لغة السى بلس بلس

طيب إيه بقى قصة الـ byte ده ??
عمنا الأخ byte ده هو وحدة التخزين فى الكمبيوتر يعنى ايه بردوه ؟؟
يعنى مثلا الmemory بتاعتنا لما نقول مساحتها كام ؟ يعنى بنقول بتقدر تخزن كام بنقول كذا byte أو الهارد ديسك مساحته كام بنقول كذا byte طبعا مش بنقول byte لأن الـ byte ده وحده صغيرة جدا جدا جدا طيب إيه هى الوحدات دى بقى ؟؟
اصغر وحدة هى الـ bit ودى بتشيل يا إما 0 يا إما 1 بس (طبعا إحنا عارفين إن لغة الكمبيوتر هى الـ 0 والـ 1)
اللى أكبر منها شوية هو عمنا الـ byte واللى هو يعتبر 8bit
وأكبر منه شوية هو الـ kelo byte أو kb وده بيمثل 1024byte
وبعدين ييجى الـ mega byte أو MB وده بيمثل 1024kb
وبعدين الـ giga byte أو GB وده بيمثل 1024MB وفى بقى أخر حاجه توصلنا ليها وهى
الـ terra byte وده بيمثل 1024GB

وبكده تنتهى قصة سؤالنا فى الحلقات السابقة وبتنتهى حلقة النهاردة من برنامجكم المفضل .........

برنامج ايه ؟ ايه يا عم انت هتعيش
سورى قصدى خلصنا درس النهاردة ونلقاكم فى الدرس القادم بإذن الله
شكرا وإلى لقاء
.
.
.

[msamido]

السلام عليكم ورحمة الله وبركاته

رجعنا بسرعه أوى صح ؟؟
معلش حسيت إن الدرس اللى فات صغير وانا كمان النهارده فايق شوية قلت استغل الموقف وانزل كمان درس كده ( بينى وبينكم موضوع إنى ابقى فايق ده بقى صعب أوى اليومين دول)
نبدأ بقى نتكلم فى الدرس الجديد بسم الله
إحنا كنا اتكلمنا عن الـ conditional statements اللى هما أخوانا if وبنت خالتها switch case وكنا شرحنا فيهم مفهوم الـ true والـ false فى السى بلس بلس وإمته الـ condition يبقى true وامته يكون false والـ flow بتاع البرنامج فى الحالات إذا كان true أو false فاكرين ؟؟؟
درسنا النهارده بقى عن الـ loops ؟؟ عارفين لو لقيت حد مترجمهالى وبيقولى الحلقات الدوارة زى الكتب اللى بالعربى دى هعمل فيه إيه ؟؟؟
طيب يعنى ايه loops بقى من غير رغى ؟؟
مفهوم الـ loops ده هو تكرار بعض العمليات أكتر من مرة بدون الإضطرار لكتابتها سوى مرة واحدة ... بردوه يعنى إيه ؟؟
يعنى تخيلوا مثلا إن أنا عايز أكتب اسمى 10 مرات تحت بعض على الشاشة اعمل إيه ؟؟
عادى يا عمنا انت يعنى جيت فى جمل ؟؟
هنعمل جملة cout ونكتبها عشر مرات تحت بعض ولو قصد سيادتك إنك هتكتب كتيير وكده طيب ما احنا ممكن نعملها copy و paste وتبقى خلصت ايه يعنى ؟؟؟
طيب لو انا عايز اكتبه 100000 مرة هتقعد تعملها copy و paste العدد ده من المرات ؟؟
طبعا مش منطق صح ؟؟
هنا بقى ييجى دور الـ loops وهى بنكتب جملة cout مرة واحدة بس ونحطها جوه الـloop ونحددله عدد المرات اللى احنا عايزينه يتكرر فيه وهو هيقوم بالواجب كله
شوفتو الموضوع سهل ازاى ؟؟؟
طيب عملنا مقدمة للموضوع وفهمنا يعنى ايه loops ؟؟؟ نتكلم بقى بشكل برمجاوى شوية ....
الـ loops فى الـ ++C ليها 3 أنواع النهاردة هنتكلم عن النوع الأول وهو while loop ?
شكله إيه بقى أخينا ده ؟؟
شكله بيبقى كالآتى :

while(condition)
{
// do something ....
}

وبيقول طول ما الـ condition اللى جوه ده متحقق أو نتيجته بـ true هيفضل يكرر نفسه ويعمل اللى جواه تانى وتانى وتانى لغاية ما نتيجة الـ condition ده تبقى false هيخلص ويشوف اللى بعد كده ...
نقول بمثال أحسن ؟؟
نقول بمثال :

#include <iostream.h>

#include <conio.h>
void main()
{
int i=0;
cout<<"Loop lesson \n";
while(i<10)
{
  i++;
  cout<<"\n Mohamed ElQpany";
}
cout<<"\n \n end of Loop";
getch();
}
 
 

بيقول ايه بقى الكود ده ؟؟
البدايات والكلام اللى قلناه كتير ده مش هنكرره لكن إحنا بنعرف variable اسمه i و بنعمل intialize بزيرو وبعدين بنقول while إن الـ variable i ده أقل من 10 اعمل ما بداخل القوسين اللى جايين ده وده كده بيمثل الـ loop جوه الـ loop بقى بنزود قيمة الـ i بواحد ودى جملة جديدة ما شوفنهاش قبل كده لما نقول لمتغير من نوع int أو float أو double ++ يعنى زود واحد على القيمة السابقة ليه يعنى كأننا بالظبط بنقول i=i+1 ودى بينفع للمتغيرات اللى بتمثل أرقام بس يعنى مثلا مش هينفع مع الdata tybe char اوك ؟؟
وبعدين نقوله اكتبلنا على الشاشه الجملة اللى عندك دى ...
يعنى طول ما ال i اقل من 10 نفذ فى أول مرة كان الـ i بصفر وطبعا اقل من 10 يعنى الـ condition ب true يدخل ينفذ يزود الـ i وتبقى قيمته 1 وبعدين يطبع الجملة ويرجع يشوف الـ condition تانى الـ i بواحد اقل من 10 يعنى الـ condition بـ true ينفذ تانى يزود الـ i تبقى 2 ويطبع الجمله ويرجع يشوف الـ condition وهكذا لغاية ما تبقى الـ i بعشرة يشوف الـ condition هل الـ i أقل من 10 لا هى بتساوى يبقى نتيجة الـ condition بـ false يروح ميدخلش بقى بين القوسين ويكمل بعد كده ويطبع الجملة end of loop وينهى البرنامج والنتيجة تكون كالآتى :

إيه رأيكم بقى فى البرنامج ده ؟؟؟
حلوه الـ loops صح ؟؟
ومفيدة جدا مش كده ؟؟

طيب مش هنقول أكتر من كده ومش هندخل فى الأنواع التانيه النهارده وهنكتفى بكده إن شاء الله
سيبونى بقى افكرلكم فى واجب تعملوه

يلا حاجه سهلة كده
اعملوا برنامج بيعد من 1 لـ 100 وبيطبعهم على الشاشة ؟؟
وورونى الكود طبعا والنتيجة ... سهل مش كده ؟؟

حاجه أخيرة بقى ؟؟
عايزين تعليق على أسلوبى فى الشرح ؟
يعنى هل هو كويس ولا فى انتقادات على الإسلوب ولا مستوى الكلام وأى تعليق تحبوا تقولوه هكون سعيد بيه ؟
شكراااااااااااا
.
.

[ananoo]

السلام عليكم و رحمة الله و بركاته

و اخيــــــــــــــرا الدرس نزل

الدرس الاول مفهوم جدا و الحمد لله و اخدناه في الكلية هوة و النظام الثنائي و الثماني و السادس عشر كله اخدناه الحمد لله

الدرس التاني لذيذ جدا ومفهوم برده

و الواجب



تمام كدة؟؟!!



و بالنسبة لاسلوب حضرتك في الشرح بجد ممتع جدا و مفيش بالنسبة ليا اي انتقادات
و بجد انا مش بجامل

جزاك الله خيرا و جعله في ميزان حسناتك

[msamido]

جزانا الله وإياكم كل الخير يا ananoo والحمد لله إن الدروس وصلت والـ homework تمام الله ينور
وإن شاء الله هحاول على قد ما أقدر مش هتأخر فى الدرس الجديد بإذن الله علشان نكمل درس الـ loops
وبالنسبة لشرحى وأسلوبى متشكر أوى على رأيك وأتمنى لو فى أى وقت حسيتى إن فى حاجه غلط تنبهينى علطول

شكرا ananoo وربنا يوفقك بإذن الله
.
.

[همس]

ايه دا يا باشمهندس

حضرتك نزلت دا كله امتى ؟؟؟


دا انا عندي امتحانات ميد تيرم

وبالعافية بفتح المنتدى


كدا انا متأخرة جداااااااااااااا


انا قلت ان حضرتك هتستنى شوية لحد ما الكل يشوف الدرس الي قبل الاخير

ربنا عالم انا محتاسة أد ايه

والدكاترة ربنا يكرمهم بجد مش عارفة اقول ايه على الي بيعملوه فينا




يعني من جميع النواحي

[MOHAMED ELKHODARY]

الاستاذ احمد ابو بكر عنده الغلطة انه سايب مسافات في السطر بتاع الانكلود يعني المفروض السطر
<include<iostream.h#
و كمان المفروض يبقى يدوس alt +f9 عشان يعمل كومبيلشن للبرنامج قبل ما يعمل رن

[msamido]

المشاركة الأصلية كتبت بواسطة همس

ايه دا يا باشمهندس

حضرتك نزلت دا كله امتى ؟؟؟

من كام يوم نزلتهم ورا بعض علطول علشان مش ضامن بصراحه أنزل درس جديد دلوقتى وكنت فاضى شوية ودماغى رايقة قلت استغل الموضوع وانزلهم

دا انا عندي امتحانات ميد تيرم

وبالعافية بفتح المنتدى


كدا انا متأخرة جداااااااااااااا

معلش شدى حيلك فى الإمتحانات ربنا معاكى وأنا منتظر إن شاء الله الفترة دى معتقدش إنى هعرف أنزل درس جديد شدى حيلك بس انتى وربنا معاكى ويوفقك بإذن الله فى الإمتحانات

انا قلت ان حضرتك هتستنى شوية لحد ما الكل يشوف الدرس الي قبل الاخير

ربنا عالم انا محتاسة أد ايه

والدكاترة ربنا يكرمهم بجد مش عارفة اقول ايه على الي بيعملوه فينا

معلش هتتعودى إن شاء الله هى سنة أولى دايما صعوبتها فى كده



يعني من جميع النواحي

أنا مستنى على الدرس الجاى إن شاء الله ومش هنزل حاجه غير لما تتابعينا وتقولى إنك خلصتى اللى فات ومعانا بإذن الله ومستنى أشوف الhomework

المشاركة الأصلية كتبت بواسطة MOHAMED ELKHODARY

الاستاذ احمد ابو بكر عنده الغلطة انه سايب مسافات في السطر بتاع الانكلود يعني المفروض السطر
<include<iostream.h#
و كمان المفروض يبقى يدوس alt +f9 عشان يعمل كومبيلشن للبرنامج قبل ما يعمل رن

أهلا بيك يا محمد منور بس أنت بتتكلم فين بالظبط
اعتقد إنك بتتكلم على مشاركات قديمة أوى
عموما بالنسبة لموضوع المسافات فى سطر الـinclude اعتقد مفيش أى مشاكل لو سبت مسافة بين الـ include# و <iostream.h>
وطبعا alt+f9 لعمل compilation كلامك مظبوط
مستنيك تعرفنا بنفسك إن شاء الله واهلا بيك معانا
.
.

[MOHAMED ELKHODARY]

متشكر و معلش انا ردي متأخر حبتين بس بكره عندي ميدترم في البرمجة فقلت اما اراجع حبه معاكم