يوميات شاب عادي ..مسلسل جديد..تابعونا ..

[!~¤§¦الفارس المقنع¦§¤~!]

الحلقة الخامسه و الثلاثون




ابدأ صح..




استيقظ عبد الرحمن فى صباح اليوم التالى وكله همة ونشاط ..

ذهب الى الكليه..

وهناك ..قابل صديقه محمد ..


عبد الرحمن : السلام عليكم ورحمة الله وبركاته..



محمد: وعليكم السلام ورحمة الله وبركاته..



عبد الرحمن : ازيك يابنى.. فينك كده؟؟


محمد: الحمد لله ..انا موجود اهو بس كنت مشغول حبتين..
متعرفش معاذ مختفى فين كده بقاله كام يوم..؟؟؟



عبد الرحمن : ده انا اللى لسه كنت هسألك عنه..!
اخر مره كلمته فيها كان الخميس اللى فات وقالى انه مش هيقدر يجى الكليه الاسبوع ده علشان عنده ظروف..



محمد: ان شاء الله يكون بخير..


عبد الرحمن : يارب..


محمد: مش عاوز مني حاجه علشان مستعجل؟؟


عبد الرحمن : شكرا..ابقى طمنا عليك وعلى معاذ..


محمد: ان شاء الله..
السلام عليكم..


عبد الرحمن : وعليكم السلام ورحمة الله وبركاته..



عاد عبد الرحمن الى المنزل ..


وفى طريق العوده ..اتصل به عبد الله..


عبد الله: السلام عليكم ورحمة الله وبركاته..


عبد الرحمن : وعليكم السلام ورحمة الله وبركاته..

كنت لسه هتصل بيك والله اول ما اروح..



عبد الله: القلوب عند بعضيها..ايه اخبارك؟؟


عبد الرحمن : الحمد لله..انا بجد محتاج اقعد معاك انهارده ضرورى يا عبد الله..



عبد الله: خير ان شاء الله..

هستناك بعد المغرب زى كل مره..

خلاص ..ماشى باذن الله..



عبد الرحمن : باذن الله..
السلام عليكم



عبد الله: وعليكم السلام ورحمة الله وبركاته



عاد عبد الرحمن الى المنزل..

تناول الغداء..

ثم نزل وصلى العصر فى جماعه..

ثم جلس فى المسجد يقرا القرآن..

حتى بلغت الساعه الرابعه والنصف..

فخرج من المسجد وذهب للقاء عبد الله..

وصل اليه فى اذان المغرب..

فذهبا وصليا المغرب جماعة ..

وبعد الصلاه دار هذا الحوار..



عبد الرحمن : بص بقى يا عبد الله..

انت عارف انى بعتبرك انت ومعاذ زى اخواتى بالظبط..

وربنا يشهد انا بحبكم قد ايه..

انا الحمد لله نويت اتوب لربنا ..ونفسى تاخد بايدى علشان ابدأ صح ..




عبد الله: الف مبروووووك يا حبيب قلبى..

والله انت مش حاسس انا فرحان بكلامك ده قد ايه دلوقتى..

ربنا يحفظك ويثبتك يارب..

بص بقى يا سيدي..

لازم تعرف الاول ان التزامك ده مش شطاره منى او منك ..ده فضل من ربنا انه هداك ووجهك للطريق الوحيد اللى فيه سعادة الدنيا والاخره..طريق الاستقامه..

وده الطريق اللى بنظلب من ربنا انه يهدينا ليه فى كل صلاه ..احنا مش بنقول فى كل صلاه فى الفاتحه (اهدنا الصراط المستقيم) ..؟؟


عبد الرحمن : تمام..



عبد الله: واللى يأكدلك ان ده فضل من ربنا عليا وعليك ان انا وانت عارفين ناس كتيييييييير فى الضياع ..مع انهم عارفين انهم ماشيين مسدود وفيهم ناس كتير عارفين الصح فين ..وعارفين ان اللى بيعملوه غلط..ومع ذلك مستمرين فيه..وللاسف ناس كتييييييير منهم ماتت على معصية ربنا والعياذ بالله..
فالحمد لله على نعمة الهداية ..


عبد الرحمن : الحمد لله..



عبد الله: الحاجه التانيه..
مش عاوزك تدخل فى الدين حامى..وتتقل على نفسك..علشان بعد فتره متعملش زى اغلب الناس وتلاقى نفسك سبت كل حاجه مره واحده..

وطبعا مش قصدى التدرج فى ترك المحرمات..لا طبعا..قصدى التدرج فى العبادات والطاعات..

النبى صلى الله عليه وسلم بيقول (إذا نهيتكم عن شئ فاجتنبوه ، وإذا أمرتكم بأمر فأتوا منه ما استطعتم ) رواه البخاري

وربنا بيقول ( وَمَا كَانَ لِمُؤْمِنٍ وَلَا مُؤْمِنَةٍ إِذَا قَضَى اللَّهُ وَرَسُولُهُ أَمْرًا أَنْ يَكُونَ لَهُمُ الْخِيَرَةُ مِنْ أَمْرِهِمْ وَمَنْ يَعْصِ اللَّهَ وَرَسُولَهُ فَقَدْ ضَلَّ ضَلَالًا مُبِينًا)

يعنى ايه؟؟

يعنى طالما عرفت ان الاغانى حرام ..يبقى سمعا وطاعه يارب..

عرفت ان الشات والكلام مع البنات حرام..يبقى سمعا وطاعه يارب..

انما مثلا لو فى الاول صليت الخمس صلاوات بس ومصليتش النوافل ..مفيش مشكله..شوية بشوية وهتلاقى نفسك باذن الله بتزيد فى الطاعه..

ماشى يا سيدي؟؟



عبد الرحمن : ماشى..

وده فعلا اللى انا عملته والحمد لله..

انا رميت كل شرايط وسيديهات الافلام والاغانى اللى كانت عندى ومسحت كل حاجه من على الجهاز..



عبد الله: الحمد لله..
شوفت بقى ربنا بيحبك قد ايه علشان يوفقك لكل ده..



عبد الرحمن : الحمد لله..



عبد الله: الحاجه التالته علشان تبدأ صح ..

لازم يكون ليك جدول وثابت وورد محاسبه تحاسب نفسك عليه..متسبش العمليه ماشيه سبهلله كده..لو مشيت من غير جدول محاسبه هتلاقى نفسك مره تفوت صلاة الجماعه..مره تنسى ورد القران ..مره تنسى الاذكار ..وهكذا..

الجدول هنبتدى فيه الاول بحاجات اساسيه ..وان شاء الله نزود حاجه كل فتره..

ماشي؟؟



عبد الرحمن : ماشي..



عبد الله: الجدول عندى فى البيت ..وكلنا مشينا عليه فى الاول..هو عباره عن حاجه بسيطه جدااا..زى
- صلاة الجماعه
- ورد قرآن ثابت يوميا
- أذكار الصباح و المساء
- أذكار بعد الصلاة
كده يعنى..



عبد الرحمن : هستناك تجيبهولى ان شاء الله..



عبد الله: ان شاء الله..
دلوقتى فيه حاجه مهمه جداااااااااا لازم نعملها الاول..


عبد الرحمن : ايه ؟؟



عبد الله: عايزين نشتغل على نظافه..



عبد الرحمن : ازاى يعنى؟؟



عبد الله: احنا شغلنا كله عبادتنا وطاعتنا لله قائمه على القلب..
فلازم ننضف القلب من التراب اللى الذنوب والمعاصى راكمته عليه ..علشان تحس بلذة الطاعه بعد كده ولما تعوز قلبك تلاقيه موجود..

والنضافه دى بقى هتبقى عن طريق سماع دروس عن الدار الاخره ..الجنه والنار ويوم القيامه والقبر وهكذا..

ماشى؟؟



عبد الرحمن : ماشى..



عبد الله: على بركة الله..

هات ايميلك..

واول ما اروح هبعتلك رابط اسطوانه خطييييييره عن الدار الاخره لمجموعه من الشيوخ..

وفيه موقع كمان اسمه احلى حياة فى طاعة الله..هتلاقى هناك احلى صحبة تعينك على طاعة الله ..


وكمان فيه سلسله رووووووعه لازم تسمعها..اسمها على فين يا شباب..للدكتور حازم شومان..



عبد الرحمن : سبحان الله..

كنت لسه هقولك دلنى على حاجه اسمعها للراجل ده..

انا سمعتله لغاية دلوقتى درسين واثروا فيا جدااااااااااااا لابعد ما تتصور..




عبد الله: نحسبه على خير ولا نزكيه على الله من الدعاه المخلصين..


عبد الرحمن : ربنا يبارك فيه ويزيده..



عبد الله: اللهم امين..

صحيح قبل ما انسى..

فيه حاجه مهمه عايز اقولهالك..



عبد الرحمن : قول..



عبد الله: بحبك فى الله..



عبد الرحمن : وانا كمان بحبك فى الله انت ومعاذ وربنا يجمعنا مع النبى فى الجنه ان شاء الله..

عبد الله: اللهم امين..



انتهى الحوار بين عبد الرحمن وعبد الله..

ثم صليا العشاء..

وعاد كل منهم الى منزله..

وهكذا..

بدأ عبد الرحمن يشق طريق الالتزام خطوة بخطوة..



تابعونا ..

= = =
==

درس بعنوان

إنت ما بتزكيش ليه ؟

[!~¤§¦الفارس المقنع¦§¤~!]

الحلقة السادسه و الثلاثون




أَحَسِبَ النَّاسُ أَنْ يُتْرَكُوا أَنْ يَقُولُوا آمَنَّا..؟؟؟؟




بدات اللقاءات تتكرر بين عبد الرحمن وعبد الله..



وقام عبد الرحمن بالاستماع للاسطوانه والسلسله التى نصحه بها عبدالله..




والتى كانت بفضل الله سببا فى علو همته واقباله على الله..




وكان عبد الله فعلا نعم الرفيق والاخ والصديق..




لايترك عبد الرحمن..




يسأل عليه باستمراره ..




ويتابعه فى اوراده..




ويلبى له اى طلب يطلبه ..




ولا يبخل عليه بالنصح والارشاد..


وبدا عبد الرحمن فى حفظ كتاب الله..




وفى اسبوع واحد بفضل الله كان قد اتم حفظ جزء من سورة البقرة وتعلم احكام التجويد..




وبدأ يحافظ على حضور الدروس الايمانيه مع عبد الله ..ويتعرف على بعض الاخوه الجدد..




تغيرت حياة عبد الرحمن بالكامل..

من اصغر شئ فيها الى اكبر شئ..


كل شئ..مأكله وملبسه ونمط نومه واستيقاظه وتعامله مع والديه..الخ




كان والديه فى قمة السعاده ان يروا عبد الرحمن بهذه الاخلاق وهذا الالتزام..



على الاقل تجاههم ..


فقد اصبح عبد الرحمن شديد البر بوالديه..


لا يُسمع له صوتا وهما فى المنزل..


يساعد والدته فى امور المنزل..


ولا ينام قبل تقبيل ايديهما..


أصبح من رواد المسجد فى كل الصلوات ..

خاصة صلاة الفجر..


بل اصبح هو الذى يوقظ والديه واخته للصلاه..





وهاهى امه تدخل عليه منذ يومين قبيل الفجر ..فتجده قائما يصلى لله..


فدعت الله ان يثبته..


وان يبعد عنه شياطين الجن والانس..





مضى ثلاث اسابيع ..


وعبد الرحمن من طاعة لطاعة..


بدأ يشعر بلذة الطاعه..


وحلاوة الايمان..


..



ولكن ..


وفى احدى الليلي..



كان عبد الرحمن جالسا قبل الفجر ..



يستغفر الله ..



ويطلب من فيض عطاياه..




اذ بصوت الهاتف المحمول يعلن عن وصول رساله..



وبعدما انتهى ...


قام وفتح الرساله..



فوجدها رساله فارغه من رقم غير مسجل..



تعجب كثيرا..



من الذى يرسل رساله فارغه فى هذا الوقت..



اتصل بالرقم ..

ولكن (عفوا ..رصيدك الحالى لا يكفى لاتمام هذه المكالمه) ..



لم يكن مع عبد الرحمن رصيد ..



فتجاهل الامر..




نزل لصلاة الفجر..




وبعد عودته..


دخل غرفته..




واخذ يقرأ أذكار الصباح..




ولكن قاطعه صوت المحمول ..




انه نفس الرقم الغير مسجل ..




ولكنه يتصل هذه المره..!




ضغط عبد الرحمن على الزر الخاص بالرد ولم يبدأ هو بالسلام..




جلس الطرفان برهه فى انتظار من يبدأ الحديث..



المتصل : ألو


( كاد عبد الرحمن يُغشى عليه من رقة الصوت!! )





تذكر عبد الرحمن انه أصبح انسانا جديدا..



فقال بصوت خشن:

وعليكم السلام ورحمة الله..

مين حضرتك؟؟




المتصل : أنا .........





تابعونا ..

= = =
==

ياليتني كنت معهم

[( أبو خديجة )]

أخى الحبيب بجد وحشتنى جداً وأفتقدك بشدة

أسأل الله أن يرضى عنك ويبارك فيك

وايه الأحداث المثيييييييييرة جداً دى


حدثت تطورات كثيرة جداً أثناء غيابى

وسامحنى لعدم تواجدى على الايميل فقد كنت مريض بعض الشئ ولكن اللهم لك الحمد فقد تعافيت وأصبحت الأن بصحة جيدة


أسأل الله أن يرضى عنك ويبارك فيك ويحفظك


أحبك فى الله

[!~¤§¦الفارس المقنع¦§¤~!]

والله إنت اللي واحشني مووووووووووووووووت
وما تعرف انا حبيتك والله قد إيه

إنت مثل " معاذ " بالظبط . { في أخلاقه وسمته يعني }

ربنا يخليك يا حبيب قلبي ويشفيك

وألف مليون سلامة يا جميل

ولسه فيه تطورات خطيرة أكثر وأكثر
لسه الإثارة لم تأتي بعد

[!~¤§¦الفارس المقنع¦§¤~!]

الحلقة السابعه و الثلاثون




::في مواجهة الفتن::






عبد الرحمن : مين حضرتِك؟



المتصل: انا.......

مش معقول معرفتش صوتى لسه...؟؟؟




عبد الرحمن : معلش اصلى اليومين دول بنسى بسرعه..




المتصل: الف سلامه عليك..



عبد الرحمن : مين حضرتك لو سمحتى؟؟




المتصل: انا .........

أنا نورهان ..




وما ان سمع صاحبنا الأسم حتى سرت رعشة فى جسده.. وازدادت ضربات قلبه..وتلعثم لسانه..ولم يعرف ماذا يقول..؟؟



انهى الاتصال ..وقام باغلاق الهاتف..



(نورهان.. زميلة عبد الرحمن..كانت فى احدى مدارس اللغات ولكنها كانت تحضر دروس اللغه الانجليزيه مع عبد الرحمن منذ الصغر...وكان عبد الرحمن معجبا بها كباقى زملائه وباقى الشباب ..فهى فتاة شديدة الرقه..فاتنة الجمال..من يراها يستولى عليه حسنها ورقتها..وكان الجميع يسعى الى كلمة او حتى نظرة منها..ومع ذلك فقد كانت لا تدع الفرصه لاحد ان يفعل ذلك..
حتى نجح عبد الرحمن فى الوصول اليها..ونشأت بينهما قصة حب كأغلب قصص الحب بين الشباب فى هذا السن..لكنها لم تستمر طويلا..نظرا لوفاة والدتها ..الأمر الذى جعل الوالد يأخذ نورهان لتكمل تعليمها فى انجلترا.. )



أخذ عبد الرحمن يحدث نفسه..


نورهان؟؟!!


مش معقول؟؟!!


ايه اللى فكرها بيا دلوقتى؟؟


وجابت رقمى منين؟؟


وعايزه منى ايه ؟؟


جلس عبد الرحمن فى سريره يحاول ان ينام فما استطاع حتى طلع الصبح..


وقبل ان يذهب الى الكليه..


فتح الموبايل..


وفور فتحه..


ظهر له وصول رساله جديده من نفس الرقم..


قام بفتحها..


[ أنا متاكده انك مقفلتش ..اكيد الموبايل فصل شحن..انا كنت عايزه اطمن عليك..ويارب تكون بخير........ نورهان ]



ازدادت ضربات قلب عبد الرحمن ثانية..

وتسارعت الاحداث فى رأسه تعيد له شريطا من الذكريات..


حاول ان يتغلب على تلك الوساوس..


استعاذ بالله من الشيطان الرجيم..


ثم توضأ وصلى ركعتين..


وقال فى نفسه: ان شاء الله مش هتتصل تانى..

انسى بقى يا عبد الرحمن..

انسى..

انسى..



يارب اعوذ بك من شر نفسى وشر الشيطان..يارب..


ثم ذهب الى الكليه..


انهى محاضراته كالعاده..


وذهب لصلاة الظهر فى المسجد..


بحث عن معاذ فلم يجده..


لقد طال غيابه..!!


ترى ماذا حدث له؟؟


بحث عن محمد فلم يجده ايضا..


فقرر العودة الى البيت..


وعند خروجه من باب الكليه فوجئ بشخص داخل سياره فخمه جدااااااااااا ينادى:
عبد الرحمن.. عبد الرحمن..


انه ذلك الصوت..!!


ذهب عبد الرحمن ليرى من المنادى..


إنها هي..


إنها نورهان..



نورهان : ايه ..شكلى متغير ولا ايه؟؟



عبد الرحمن : اكيد فيه تغييير..!!




نورهان : طيب اركب يلا..اركب..




تخشب عبد الرحمن فى مكانه!!


ماذا يفعل..؟؟


هل يركب وهو يعلم ان ذلك حرام شرعا ولا يحل له ذلك ..
ام يرفض وهو يعلم انها سوف تغضب كثيرا ان رفض ..؟؟!!




عبد الرحمن : حضرتك انا بركب مواصلات..

شكرا..



نورهان: هو انا هتحايل عليك ولا ايه؟؟

وبعدين ايه حضرتك دى؟؟




عبد الرحمن : آسف يا فندم.. انا مضطر امشى..



ثم تركها عبد الرحمن ورحل..



نورهان: حضرتِك..وافندم..!!

هو فيه ايه؟؟؟؟!!

مااااااااااااشى.........

ثم انطلقت بالسياره..




تابعونا ..

= = =
==


الإنذار الأخير

[!~¤§¦الفارس المقنع¦§¤~!]

الحلقة الثامنه و الثلاثون




::إنَّ كَيدَهُنَّ عظيم::





عاد عبد الرحمن الى البيت وهو يفكر فيما حدث طوال الطريق..



هل فعل الصواب ؟؟



اما ماذا؟؟



وفى ذلك اليوم..كان هناك درس للشيخ ابراهيم..



نزل عبد الرحمن..وذهب للدرس..



وبعد انتهاء الدرس قال له عبد الله: مالك انهارده يا عبد الرحمن؟؟

طول الدرس سرحان ؟؟فيه حاجه؟؟



(تحير عبد الرحمن.. هل يخبر عبد الله بما حدث ..؟؟ام ماذا؟؟)




عبد الرحمن: أبدا ..

شوية مشاكل فى الدراسه وان شاء الله تتحل..




عبد الله: استعن بالله ..وعليك بالدعاء..

وانا ان شاء الله مش هنساك فى الدعاء..





عبد الرحمن: ياريت يا عبد الله..انا محتاج الدعاء فى الوقت ده اوووووى..



ثم انصرف الصديقان..


وفى تلك الليله ..


وبينما عبد الرحمن يستعد للنوم..


اذا بصوت قدوم رساله على المحمول..


واذ به يسرع الى المحمول ويفتحها..


كان متأكدا أنها هي..


[ على فكره ..انا زعلانه منك على الموقف بتاع انهارده..
لو عايز تصالحنى ..استنانى بكره قدام الكليه الساعه 12..
MiSSing U ToOoOo MuCh ,,, ]



ماذا ستفعل يا عبد الرحمن؟؟


بدأ عبد الرحمن يفكر فيما يفعل..


وبدأ الشيطان ايضا يلعب برأسه..


فأخذ يحدث نفسه..


( يابنى دى فرصه مش هتتعوض..


البنت اللى انت بتحبها وهى بتحبك جايالك لغاية عندك!!

جمال: تقول للقمر قوم وانا اقعد مكانك..

مال: تشتريك انت وعيلتك ..

حسب ونسب: من اكبر العائلات فى مصر..

دين: هى آه لبسها مهبب بطين.. وشكلها مبتركعهاش..!!!!

بس عادى..بعد الجواز ممكن تخليها تلبس الحجاب الشرعى وتصلى وتبقى زى الفل!!)


وكلامى معاها مش هيبقى حرام ..!!

لان نيتى خير وانا بجد ناوى اتقدم ليها فى اقرب فرصه..

صح ولا ايه عبد الرحمن؟؟


صح..انا كده مش بعمل حاجه غلط..

-------



وفى صباح اليوم التالى..


ذهب عبد الرحمن الى الكليه ..


وفى المعاد المتفق عليه..


كان واقفا امام باب الكليه..


واذا بنورهان بسيارتها تقف امامه وتقول :

نورهان: كنت متأكده انك مش هتقدر على زعلي..

اركب يلا..



بدأ صاحبنا يقدم رجلا ويؤخر اخرى حتى دخل السياره..


وانطلقت نورهان مسرعه..


حتى وصلوا الى احد الكافيتريات الراقيه على النيل..



نورهان: ايه يا سى عبد الرحمن..مفاجأه..صح؟؟

مكنتش متوقع انى هرجع تانى؟؟




عبد الرحمن: الصراحه اه..




نورهان: وكنت هتقدر تعيش من غيرى؟؟



لم يرد عبد الرحمن..




نورهان: ايه مالك؟؟

انت متضايق انك جيت معايا هنا؟؟



عبد الرحمن: لا ابدا ..اصلى بقالى كتير مخرجتش مع حد..



نورهان: عايز تعرفنى انك مبتخرجش مع بنات..

متخافش..انا متاكده انك متعرفش بنات غيري..

انا عارفه عبد الرحمن كويس..




عبد الرحمن: ومالِك واثقه من نفسِك كده ليه؟؟




(فتحت نورهان حقيبتها واخرجت منها شيئا.. )


نورهان: فاكر الورده دى يا عبد الرحمن..

فاكر لما اديتهالى وقولتلى ساعتها انا عمرى ما عرفت حد قبلك ولا عمرى هعرف حد بعدك مهمه حصل..ووعدتنى بكده..



عبد الرحمن: يآآآآآآآآآآآآآآآآه..الورده دى لسه عايشه..!!



نورهان: انا شايلاها فى قلبى..




عبد الرحمن: طيب ..سيبيكى من الورود دلوقتى وقولى تشربى ايه ؟؟



نورهان: تشرب انت ايه..انا اللى عزماك انهارده..



عبد الرحمن: براحتك..هاخد واحد لمون..



نورهان: وانا كمان..




عبد الرحمن: وانتى ايه اللى رجعك بعد الغيبه دى..




نورهان: الصراحه زهقت من القاعده هناك..


انت عارف ان بابا مشغول جداااااااا فى الشغل ..

وسايبنى فى البيت لوحدى طول الوقت ..!




عبد الرحمن: طيب وانتوا هتفضلوا هنا فى مصر ولا هترجعوا تانى..؟؟؟



نورهان: انا راجعه لوحدى مصر..ومش ناوية ارجع تانى..

وبابا وعدنى انه هيصفى شغله هناك فى غضون سنه وهيرجع..




عبد الرحمن: يرجع بالسلامه ان شاء الله..

طيب ودراستك؟؟؟




نورهان: هكمل هنا فى مصر فى الجامعه المفتوحه..




عبد الرحمن: بالتوفيق..




نورهان: مالك يا عبد الرحمن؟؟؟

انا كنت متوقعه انك هتطير من الفرحه لما تعرف انى رجعت؟؟

هسألك سؤال وعايزاك تجاوبنى بصراحه..؟؟




عبد الرحمن: اتفضلى..




نورهان: انت لسه بتحبنى يا عبد الرحمن؟؟




عبد الرحمن: انتى عندك شك فى كده؟؟؟




نورهان: طيب قولها..

قولها دلوقتى..




عبد الرحمن: اقول ايه..؟؟؟




نورهان: قولى ..بحبك.. بصوت عالى..





عبد الرحمن: انتى هتغنى ولا ايه؟؟!!

بحبك..

استريحتى يا ستى..؟؟




نورهان: ومالك بتقولها من غير نفس كده؟؟!!




عبد الرحمن: يعنى انتى دخلتى جوى قلبى وعرفتى بقولها بنفس ولا من غير نفس..!!

لسه غلاباويه زى ما انتى..




نورهان: انا غلاباويه..ماشى ..ماشى يا عبد الرحمن..




عبد الرحمن: طيب..يلا بينا بقى علشان انا اتاخرت جامد..





نورهان: مش بقولك مش عايز تقعد معايا..!!




عبد الرحمن: انا بجد اتاخرت عليهم خصوصا انى مقولتلهمش انى هتاخر ..




نورهان: طيب..يلا..




خرج عبد الرحمن من الكافيتريا وهو يتحدث مع نورهان ..

وذهب ليركب السياره معها..

ولكن وقعت عينيه على شخص يعرفه..!!!!




تابعونا ..

= = =
==

لما قضي الأمر

[( أبو خديجة )]

سبحان الله نسأل الله أن يثبتنا على الحق

مشكلة كبيرة يا أخى الحبيب إن بعد التوبة والاستقامة الواحد يفتكر انه ممكن يدعو صديقة الماضى

[!~¤§¦الفارس المقنع¦§¤~!]

فعلا يا غالي
أكبر مشكلة هذه
ربنا يثبتنا وإياك

[!~¤§¦الفارس المقنع¦§¤~!]

الحلقة التاسعه و الثلاثون




::إن مع العُسر يُسرا::






خرج عبد الرحمن من الكافيتريا وهو يتحدث مع نورهان ..

وذهب ليركب السياره معها..

ولكن وقعت عينيه على شخص يعرفه..!!!!



وقعت عين عبد الرحمن على تلك الفتاه الشقراء..

انها ساره..اخت معاذ..

ترى هل مازالت تتذكره..؟؟


دخل عبد الرحمن السياره سريعا..


وانطلقت نورهان حتى وصلت به الى بيته..


ثم ودعته وغادرت..



صعد عبد الرحمن الى الشقه..


استقبلته أمه هذه المره..



الام : كنت فين كل ده يا عبد الرحمن؟؟


اتأخرت كده ليه؟؟



عبد الرحمن: معلش يا ماما ..الطريق كان زحمه شويه..




الام : يابنى انت بقالك يويمن مش بتصحى تصلى الفجر..
وبفضل اصحّي فيك مبترضاش تصحى..!




عبد الرحمن: معلش يا ماما ..

انتى عارفه انى باجى من الكليه تعبان ..

ان شاء الله هنام بدرى انهارده علشان اصحى اصلى الفجر..




(بدأت آثار المعصيه تظهر على عبد الرحمن..

منذ يومين وهو لايصلى قيام الليل ولا حتى الفجر..!

واليوم اضاع صلاتى الظهر والعصر..!!

وهاهو يكذب على امه ليبرر تاخره.,!!

ترى ماذا سيحدث اذا استمر فى معصيته.. )



-----

على الجانب الاخر..


كان قرابة الشهر قد مضى..


ووالد معاذ ينتظر بفارغ الصبر قدوم اخيه وابنته من المملكه العربيه السعوديه..


وإذ بهاتف المنزل يرن..


انه اتصال دولى..



اسرع الوالد ورفع السماعه..



الوالد : الو ..مين معايا؟؟



المتصل: ازيك ياابو معاذ؟؟




الوالد : ازيك يابو شيرين؟؟عاملين ايه؟





العم: الحمد لله..


الواحد هنا مبسوووووط على الاخر..


مهما حكيتلك مش هتتخيل..





الوالد : ربنا يفتحها عليك كمان وكمان..

وهترجعوا امتى ان شاء الله؟

عايزين نفرح بالعيال بقى..؟




العم: بص يابو معاذ..

ومتزعلش من كلامى..


انت عارف كويس وانا كذلك ان ابنك مش موافق على بنتى ولا بنتى موافقه على ابنك..!!


واحنا كنا هنغصبهم على الجوازه دى ..وده حرام..


انا سألت الشيوخ هنا وقالوا ان الفاتحه اللى قريناها دى بدعه اصلا وملهاش لازمه..


وفيه واحد مصرى هنا اتعرفت عليه طلب ايد البنت..

وانا وافقت..


والحمد لله..الدخله كانت الخميس اللى فات وكل حاجه تمت على خير..


والراجل ربنا يجازيه خير شافلى شغل هنا فى السعوديه ..


وانا الصراحه مش عاوز اسيب البلد هنا..

خصوصا ان شغلى جنب الحرم المكى على طول ..




احس الوالد ان احدا طعنه بخنجر فى صدره من هول ما يسمع..



سكت برهه..

استجمع قواه ..

ثم رد بصوت يائس..


الوالد : مفيش مشكله يابو شيرين..

الجواز قسمه ونصيب..

ربنا يزيدك من نعيمه..




العم: مش عاوزين اي حاجه ابعتهالكوا من هنا؟؟؟




الوالد : عايزين سلامتك..



العم: سلملى على الجماعه عندكوا وكل الناس اللى فى البلد..




الوالد : يوصل باذن الله..




العم: سلاموا عليكو..




الوالد : وعليكوا..



أنهى الوالد الاتصال وتغير لون وجهه..


ورمى جسده على احد الكراسى فى الحجره..


واخذ يحدث نفسه..


بقى كده يا اخويا تكسفنى قدام الواد واهل البلد..؟؟


بقى دى عمله تعملها فيا؟؟؟

مكث قليلا..


ثم توجه الى غرفة معاذ..

فتح الباب..


فوجد معاذ يقرأ القرآن بصوته العذب الندي..

نظر اليه نظرة تحمل معانى كثيره..


ثم قال له: ربنا نجاك منى المره دى..!!



وترك الباب مفتوحا .. ثم غادر البيت..




تابعونا ..

= = =
==

درس جديد ونظرة مختلفة
مع

أوقات فراغ

[!~¤§¦الفارس المقنع¦§¤~!]

الحلقة الأربعون




::عودة للحرية::



عاد الوالد الى البيت ...

فوجده ما زال فى غرفته ...

فتعجب كثيرا !!!!!!


الوالد : إنت عجبتك الحبسة فى الأوضة للدرجة دى ؟؟؟؟؟

ده أنا فكرت هاجى ألاقيك طفشت من البيت وريحتنى !!




معاذ : أنا مستنى حضرتك لما تيجى علشان أستأذن إنى أخرج ولا لأ ؟


شعر الوالد بإحراج شديد جراء هذا الرد ..


ثم رد قائلا :

الوالد : لا اخرج ياخويا براحتك ..
إن كان عليا مش عايز أشوف وشك السمح ده تانى...



ثم إنصرف الوالد الى غرفته،،،،



وخرج معاذ من غرفته وذهب الى حجرة الصالون حيث توجد شرفة تطل على الشارع ...

وقف فيها وأخذ يستنشق هواء الحرية ...

وإذا بأخته سارة تلحق به وتقف بجانبه ..


ســـــاره : مبروك..



معاذ : على أيه ..؟

هو فى مشروع جوازة تانية ولا أيه ؟؟؟



ســـــاره : هههههههههه .... إنت خلاص اتعقدت من الجوازات ؟؟!!!

قصدى مبروك الإفراج ...



معاذ : الحمد لله..



ســـــاره : المرة دى جت على قد شهر ....

ياعالم المرة الجاية ممكن تبقى تأبيدة !!!



معاذ : كله خير ..


ســـــاره : هى كل حاجة عندك خير ... خير .... خير...؟

نفسى أعرف الخير اللى فى الحبس ده ؟؟!!


معاذ : طبعا كل حاجة خير .... النبى صلى الله عليه وسلم بيقول ( عجبا لأمر المؤمن فإن أمره كله خير .. إذا أصابته ضراء صبر فكان خير له .. وإن أصابته سراء شكر فكان خيرا له .. ولا يكون هذا إلا للمؤمن ) ..

وربنا بيقول ( وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ ) ..


ســـــاره : طيـــــب .....!


معاذ : محدش سأل عليا الفترة اللى فاتت ؟؟



ســـــاره : صاحبك عبد الله جالك البيت كذا مرة وأبوك قاله إنك مسافر عند عمك ,,,,



معاذ : أو عبد الرحمن مسألش عليا ؟؟


ســـــاره : مين عبد الرحمن ده ؟؟؟



معاذ : اللى كان واقف معايا فى المسجد آخر مرة جتيلى فيها هناك......



ســـــاره : أيوة ...أيوة ... عرفته ...لأ .. ده مسألش عليك ....

على فكرة ... أنا شوفته إمبارح خارج من كافتريا على النيل مع واحدة .. إنما أيه ..... قمر ... وركب معاها العربية ....


معاذ : انتى متأكدة إنه عبد الرحمن ؟؟؟



ســـــاره : أيوة ...متاكده..



معاذ : يمكن اخته ولا حاجة ...

بس اللى أعرفه أنهم معندهمش عربية ..!



ســـــاره : أنت غلبان أوى يامعاذ ...

فى حد هياخد أخته ويروح يقعد معاها فى كافتريا ع الكورنيش ...؟؟



معاذ : برده مش هنسئ الظن بيه ،،،!!!



ســـــاره : طيب ؛؛؛ أروح أنا اجهز الغدا بقى !!!



معاذ : ربنا يقويكى...

وأنا هروح مشوار صغير وهارجع على طول بإذن الله ...


(خرج معاذ وذهب الى بيت صديقه عبدالله ليطمئن عليه ...

فتح له عبدالله الباب ...

واندفع تجاه معاذ يحتضنه فى شوق كبير .. )



عبدالله : مش معقول ....

حمدا لله على سلامتك يامعاذ


أيه الغيبة الطويلة دى كلها ؟

مرة واحدة تختفى من غير سلام ولا كلام ؟



معاذ : ربنا يعلم إن غصب عنى ....


عبدالله : إتفضل .. إحنا هنفضل واقفين ع الباب كده ؟


( .... دخل معاذ وعبدالله الى البيت ودار بينهما هذا الحديث ....)


عبدالله : بجد إنت متعرفش أنا كنت قلقان عليك قد أيه .....!!!

أنا روحتلك البيت كام مرة لحد ما حسيت إن أبوك خلاص عايز يضربنى....


معاذ : هههههههههههه .... ليه بس كده ؟؟

أنا عارف بفضل الله إن الناس كلها كانت قلقانه عليا .... بس زى ما قولتك غصب عنى ....



عبدالله : كنت فين بقى المدة اللى فاتت دى كلها ؟

ومن أولها ... أنا متأكد إنك ماكنتش عند عمك ...!



معاذ : فعلا أنا ماكنتش عند عمى ...
دا حتى عمى مسافر ..

أنا كان عندى شوية ظروف والحمد لله عدت على خير ،،،


عبدالله : تانى هتقولى الظروف.....؟!

ظروف أيه دى اللى تخليك تختفى من البيت شهر وتقفل موبايلك ومحدش يعرف عنك حاجة ؟!



معاذ : إنت عارف ياعبدالله إنى مابحبش أخلى حد يشيل همى ومشاكلى ...



عبدالله : وهو أنا أى حد برده يامعاذ ؟؟!!



معاذ : لأ طبعا .... بس بالله عليك قفل على سيرة الموضوع ده بقى ...

أنا الحمد لله كويس وزى الفل ....



عبدالله : الحمد لله ....



معاذ : أنا مضطر أمشى دلوقتى علشان مستنينى على الغدا فى البيت ...


عبدالله : وده كلام برده ؟؟

تبقى فى بيتى وتقولى همشى علشان أروح أتغدا ؟؟!


معاذ : معلش بقى ... ما أنت عارف بابا ..!!

وبإذن الله هاقبلك بكره فى درس الشيخ إبراهيم ....



عبدالله : خلاص ماشى..بإذن الله ..



معاذ : السلام عليكم ورحمة الله وبركاته ...


عبدالله : وعليكم السلام ورحمة الله وبركاته ....




تابعونا ..

= = =
==

يا أخي بقى

إبدأ صح

[( أبو خديجة )]

ربنا يبارك فيك أخى الحبيب ويحفظك ويرفع قدرك

بس انا شايف الحلقات بقت صغيرة اوى

كده مش ينفع , احنا بندعيلك دايماً على الحلقات الرائعة دى اللى بجد بنستفيد منها كتير


ظبطنا بقى فى الحلقات الجاية شوية

[haderya]

السلام عليكم ورحمة الله وبركاته

مسلسل مميز ... وموضوع قيم بكل ما تحمله الكلمة

جزاك الله خيراً وزادك من فضله

ســـــاره : أنت غلبان أوى يامعاذ ...

فى حد هياخد أخته ويروح يقعد معاها فى كافتريا ع الكورنيش ...؟؟



معاذ : برده مش هنسئ الظن بيه ،،،!!!

يا الله ... يحاول التماس العذر وعدم إساءة الظن !!!

أسلوب وطريقة تفكير هذا الشاب "معاذ" إيجابية لأبعد الحدود ...

ليتنا ننتهج نهجه ...

بارك الله فيك !~¤§¦الفارس المقنع¦§¤~!

[!~¤§¦الفارس المقنع¦§¤~!]

المشاركة الأصلية كتبت بواسطة ( أبو خديجة )

ربنا يبارك فيك أخى الحبيب ويحفظك ويرفع قدرك

المشاركة الأصلية كتبت بواسطة ( أبو خديجة )

بس انا شايف الحلقات بقت صغيرة اوى

كده مش ينفع , احنا بندعيلك دايماً على الحلقات الرائعة دى اللى بجد بنستفيد منها كتير


ظبطنا بقى فى الحلقات الجاية شوية

وإياك حبيبي الغالي
وبالنسبة لإن الحلقات بقت صغيرة فده لإننا قربنا أوي على النهاية الغير متوقعة
بس ربنا يبارك فيك لإنك بتدعيلي
أحبك في الله

[!~¤§¦الفارس المقنع¦§¤~!]

المشاركة الأصلية كتبت بواسطة haderya

السلام عليكم ورحمة الله وبركاته

المشاركة الأصلية كتبت بواسطة haderya

مسلسل مميز ... وموضوع قيم بكل ما تحمله الكلمة

جزاك الله خيراً وزادك من فضله




يا الله ... يحاول التماس العذر وعدم إساءة الظن !!!

أسلوب وطريقة تفكير هذا الشاب "معاذ" إيجابية لأبعد الحدود ...

ليتنا ننتهج نهجه ...

بارك الله فيك !~¤§¦الفارس المقنع¦§¤~!

وإياك مدرسي الفاضل
ربنا يبارك فيك ويحفظك ويعلي من قدرك
وعن طريقة تكفير معاذ فهذا والله أراه في عدد كبير جداً من الملتزمين
ويجب أن نكون كلنا كذلك ملتزم وغير ملتزم
ولكن الإلتزام يربي فينا هذه الأخلاق الفاضلة
وأخيراً
جزاك الله خيراً على قراءتك للمسلسل أستاذي الفاضل
أحبك في الله

[!~¤§¦الفارس المقنع¦§¤~!]

الحلقة الحاديه والأربعون




::ثمرات الصبر::





وفي مساء اليوم التالى ..


ذهب معاذ لحضور درس الشيخ إبراهيم ..



وبعد إنتهاء الدرس ..


معاذ : ياااااااااااااااااااااااه ...الشيخ كان واحشنى جدا والدرس والأخوة ..

الحمد لله على نعمه التى لا تعد ولا تحصى ...


عبدالله : الحمد لله ..

وعملت أيه بقى ياسيدى فى الفترة اللى فاتت دى ؟



معاذ : ما هيا دي البشرى اللى عايز أبشرك بيها ..

إتفضل يا سيدي..



( ثم أخرج معاذ ملزمة من الأوراق من حقيبة كانت معه .... )



عبدالله : إيه ده !!!؟؟



معاذ : كتاب ألفته بفضل الله ..




أخذ عبد الله يتصفح الكتاب ويقول ..




عبدالله : ما شاء الله .... لا قوة إلا بالله ....اللهم بارك


أيه الحلاوة دى .. الكتاب شكله رائع ..



معاذ : كله بتوفيق ربنا وبفضله ..


إن شاء الله هوديه لأحد الشيوخ الكبار يراجعه ويقدم ليه ..



عبدالله : ربنا يتملك على خير ويرزقنا وإياكم الإخلاص ..


معاذ : وخد عندك كمان ..!!



عبدالله : قول يا عم ربنا يفتح عليك..



معاذ : بفضل الله ... خلصت جزء متقدم جدا من العقيدة والفقه ..

وأن شاء الله هخلى الشيخ إبراهيم يختبرنى فيهم قريب ..



عبدالله : ما شاء الله ...... اللهم بارك ..

ربنا يزيدك .... ويبارك فيك ..


معاذ : ربنا يرزقنا شكره وحسن عبادته ..



( فى خلال تلك الفترة القصيرة ....

إستطاع معاذ بفضل الله أن يتم دراسة جزء كبير من العقيدة والفقه ....

وأن يؤلف كتابا يزيد عن 400 صفحة فى الرقائق الايمانيه...

وأن يختم القرآن عدة ختمات ..

بالاضافة الى قراءة العديد من الكتب الأخرى ..

هذه هى ثمرات الصبر والإحتساب ..

وذلك فضل الله يؤتيه من يشاء .. )



معاذ : وأيه أخبار عبد الرحمن ؟؟؟؟؟


تعرف عنه حاجة ؟؟؟؟؟؟؟؟



عبدالله : أعرف عنه حاجة !!!


ده بقى صاحبى أكتر منك ياعم ...!!!



معاذ : على كده بقى ..... شكله بدأ حياة جديدة ..!!




عبدالله : بفضل الله ....

وخد خطوات كبيرة جدا فى الإلتزام ...



معاذ : الحمد لله .....

ربنا يجعله فى ميزان حسناتك...



عبدالله : بس فيه مشكلة ....!!


مش عارف بقاله كام يوم متغير وحاسس إن فيه حاجة غريبة بتحصل وهو مش راضى يقول عليها ؟؟


حتى أنا كنت ناوى أقعد معاه إمبارح ...... مجاش الدرس ..!!

و زى ما إنت شايف إنهارده كمان مجاش ...!!!



معاذ : لعل المانع خير بإذن الله .....

هحاول أتصل بيه وأشوف أيه الموضوع ...



عبدالله : إن شاء الله .....




أنهى الإثنان حديثهما وانصرفا..





وعندما عاد معاذ للمنزل ..

حاول الإتصال بعبد الرحمن ولكن كان هاتف عبد الرحمن مشغولا..



..... أعاد المحاولة .......



ما زال مشغولا .......



إنتظر قرابة نصف ساعة ....


ثم أعاد الإتصال .....



ما زال مشغولا .....!!



مضى قرابة الساعتين وأعاد الإتصال ..



ولكن لا زال مشغولا ..



ياترى بتكلم مين كل ده ياعبد الرحمن ؟؟؟؟؟!




تابعونا ..

= = =
==

يا عم بطل نوم بقى

صح النوووووووووووووم