كشف اسرار متفوقى الثانوية العامة موضوع متجدد95%- 98%

[samaazozarokaa]

انا عايزة حضرتك تساعدنى فى انى اعمل جدول للمذاكره ينظملى وقتى عشان انا حاسه انى بضيع كتير من اليوم على الفاضى ومش منظمه وقتى
مواعيد دروسى :

السبت :احياء الساعه 9ونص ,, وعربى الساعه 12 ..بخلص على 2 ونص

الاحد : فيزيا الساعه 7 بليل

الاتنين : انجليزى الساعه 9 الصبح

التلات : جولوجيا الساعه 1 وايطالى الساعه 3 ونص

الاربع : كميا الساعه 1

الخميس والجمعه فاضية

عايزة بقى حضرتك تعملى جدول ينظملى وقتى وميضيعش وقت كتير

وانا جبت كتب عربى : كتاب المستر وهو كتاب كبير جداا وفيه اسئله بالحل كتير ومناقشه كتاب المدرسة بالحل واسئله للواجب ..وكتاب الاضواء والامتحان

انجليزى : كتاب المستر برضو نفس نظام العربى ,و زى بيست وسربريس وجيم وانا جبت الكتب دى كلها عشان جربت كذا مدرس وكل مدرس كنت بجبله كتاب

فيزيا : مثالى ووسام والامتحان

كميا : الامتحان ووالوسام

عايزة حضرتك تقولى اقسم المذاكره من الكتب دى ازاى ؟ يعنى اذاكر من انهى كتب واحل من انهى كتب دلوقتى واخلى انهى للمراجعه وانهى للمراجعه نهائيه ولا بيبقى ليها كتب لوحدها ؟؟ ..واجيب كتاب المعلم كمان ولا كده هيبقى اووفر اوى للاسف انى قريت موضوعك بعد ما جبت كل الكتب

وجزاك الله خيرا

[عبد المقصود مصطفى]

حضرتك بتتاخر فى الرد ليه؟؟؟؟؟؟؟؟؟

[work_station]

بصوا يا جماعة طبعا مش ينفع انظم لكل الناس مواعيدها المفروض انا بتكلم كلام عام يفهم وعلى اساسة تبدا تنظم وقتك وعملت للاخت خطة بسيطة كمثال انا هكتفى للخطة للناس اللى فاتت لكن بعد كدا مش ينفع احط لكل واحد الا اذا كانت مواعيدة فعلا متلخبطة




بالنسبة لمصطفى


بما انك يوميا بتصحى الساعة 7 الصبح نام الساعة 12 مساءا يوميا وبعد ما تيجى من الدروس انتا تقريبا بتخلص حوالى 4 ويوم 5 خدلك ساعة رفرش وكمل الباقى بالنظام مزاكرة انهاردة ومراجعة كنظام تدريب مش ضغط مش لازم تظغط على نفسك لكن درب نفسك واوقاتك دى كويسة جدااا





بس انا ملاحظ حاجة غريبة انا كان نظامى انى باخد يوم السبت والاثنين والاربع زى بعض///الاحد والثلاثار والخميس زى بعض ونفس المواد والمواعيد اما انا ملاحظ ان الناس بتاخد كل يوم مختلف عن الاخر ............. هل دا نظام القاهرة الله اعلم .



بالنسبة بقا لسما



المواعيد عندك ممتازة جدا تقدرى يوميا تسهرى لغاية الساعة 4 او 5 الفجر ما عدا الجمعة بالليل لغاية مثلا الساعة 2 فجرا بعد ما ترجعى من المواد خدى نص ساعة راحة ان كنتى فى تالتة وساعة ان كنتى فى تانية يومك طويل حاولى تراجعى كتير اكبر كمية علشان مش تتفاجئئ ان المواد اتراكمت فوق بعضها

[مهاب احمد محمد]

انا دلوقتي مختلف مع حضرتك في حاجة واحدة بس الجدول في حد ذته كويس بس مينفعش حضرتك تحدد حد ينام امتي ويصحي امتي وقد ايه كدة لط وانا اضمنلكم انكم هتيجوا علي اخر السنة مش تمل بس من المذاكرة ممكن تتخنق ده لو كملتم الجدول اصلا

[محمود حسب الله]

شكرا لأنك تعبت جدا في الموضوع ده ..... وربنا يجعله في ميزان حسناتك .... انا محتاج جدا لمساعدة حضرتك ... انا مأجل فيزياء و احياء و لو قفلتهم " فرضا يعني " هجيب 98.78 ..... و بصراحة انا عمري ما مشيت على جداول في المزاكرة و ماشية معاية بالبركة و عمري ما نظمت وقتي ... انا طول عمري الاول على زمايلي الصبيان و من التلاتة الاوئل ع المدرسة .... مستواي بدأ ينزل تدريجيا لحد ما وصلت ل ال انا فيه دلوقتي لدرجة اني كنت بزاكر المواد لاول مرة في الايام ال بين الامتحانات و بالتالي مكنتش بخلص المواد ..... زمايلي ال كانوا اقل مني في المستوى الدراسي دخلوا كلهم هندسة و طب .... انا حاليا تقدر تقول بقيت معقد نفسيا من الاحياء و مش عارف ازاكرها و الفيزياء بالنسبة ليا اسهل في المزاكرة .
انا لسة صدمة التأجيل مأثرة عليا و لحد دلوقتي مزاكرتش اي حاجة في المادتين دول و السنة بتجري ... نفسي دايما يبقى عندي نظام و جدول مزاكرة بس مبعرفش اعمل كدة .... عمري ماحليت اي ملخصات في اي مادة ... بزاكر من من مزكرات المدرسين فقط ........... انا مبقاش عندي اي ثقة في نفسي و حاسس اني عمري ما هنفع بالرغم من ان امكانياتي كويسة جدا ..............ايه الحل لكل المشاكل ال عندي دي ؟؟؟؟؟؟؟؟؟؟؟؟؟؟؟؟؟؟؟؟؟؟؟؟

معلش علشان طولت عليك بس حبيت اقول كل حاجة و اتصدمت من كل ال انت بتقوله من تنظيم الوقت و كدة لأني مش هقدر اعمل 1/1000000 منه
شكرا

[work_station]

المشاركة الأصلية كتبت بواسطة مهاب احمد محمد

انا دلوقتي مختلف مع حضرتك في حاجة واحدة بس الجدول في حد ذته كويس بس مينفعش حضرتك تحدد حد ينام امتي ويصحي امتي وقد ايه كدة لط وانا اضمنلكم انكم هتيجوا علي اخر السنة مش تمل بس من المذاكرة ممكن تتخنق ده لو كملتم الجدول اصلا

كلامك جميل جدا انا مينفعش فعلا احدد لحد هينام امتا وهياكل امتا بس فكر معايا كدا لو واحد ماشى بالبركة لا عارف ينظم وقتة ولا يستغلة صح ولا حتى عارف يزاكر امتى دا المفروض انا اعملة ايه بحاول اساعدة !!! وبحاول اخلية يستغل افضل الاوقات بتاعتة انا فعلا ممكن اخططلة ينام امتى فى اول شهر او شهرين لكن ثق تماما انه بعد الشهرين دولى او الشهر بالكتير هو بنفسة هينظم وقتة بالطريقة اللى تناسبة وينام ويصحى فى الوقت اللى يناسبة .............لكن تذكر انه قبل لما يوصل للمرحلة دى لازم حد ينظملة وقتة.




والكلام دا طبعا مش هيشعر بية الا قليل الخبرة اما من الواضح ان حضرتك احتمال عندك امكانية تنظم نفسك بنفسك فهتشعر ان الصيغة بتاعتى اجبار وزى ما قال الشاعر : قال لماذا لا ارى ماشيا قلت ذاك لانك فارس (يعنى راكب حصانة ومش حاسس ولا حتى شايف حد ماشى او بيزحف من التعب).


اظن كدا انا وضحتلك وجهة نظرى .

[work_station]

المشاركة الأصلية كتبت بواسطة محمود حسب الله

شكرا لأنك تعبت جدا في الموضوع ده ..... وربنا يجعله في ميزان حسناتك .... انا محتاج جدا لمساعدة حضرتك ... انا مأجل فيزياء و احياء و لو قفلتهم " فرضا يعني " هجيب 98.78 ..... و بصراحة انا عمري ما مشيت على جداول في المزاكرة و ماشية معاية بالبركة و عمري ما نظمت وقتي ... انا طول عمري الاول على زمايلي الصبيان و من التلاتة الاوئل ع المدرسة .... مستواي بدأ ينزل تدريجيا لحد ما وصلت ل ال انا فيه دلوقتي لدرجة اني كنت بزاكر المواد لاول مرة في الايام ال بين الامتحانات و بالتالي مكنتش بخلص المواد ..... زمايلي ال كانوا اقل مني في المستوى الدراسي دخلوا كلهم هندسة و طب .... انا حاليا تقدر تقول بقيت معقد نفسيا من الاحياء و مش عارف ازاكرها و الفيزياء بالنسبة ليا اسهل في المزاكرة .
انا لسة صدمة التأجيل مأثرة عليا و لحد دلوقتي مزاكرتش اي حاجة في المادتين دول و السنة بتجري ... نفسي دايما يبقى عندي نظام و جدول مزاكرة بس مبعرفش اعمل كدة .... عمري ماحليت اي ملخصات في اي مادة ... بزاكر من من مزكرات المدرسين فقط ........... انا مبقاش عندي اي ثقة في نفسي و حاسس اني عمري ما هنفع بالرغم من ان امكانياتي كويسة جدا ..............ايه الحل لكل المشاكل ال عندي دي ؟؟؟؟؟؟؟؟؟؟؟؟؟؟؟؟؟؟؟؟؟؟؟؟

معلش علشان طولت عليك بس حبيت اقول كل حاجة و اتصدمت من كل ال انت بتقوله من تنظيم الوقت و كدة لأني مش هقدر اعمل 1/1000000 منه
شكرا

ليه الكلام دكلة وانتا ان شاء الله عندك امل كبيرررررررررررررررر جدا يعنى ما شاء الله لو قفلت المادتين اللى معندكش غيرهم هتجيب مجموع ان شاء الله يدخلك طب او صيدلة.





مشكلة التاجيل : اولا دى مش مشكلة دى حل لمشكلة اقولك معلومة الطلبة النصارى نسبة كبيرة منهم الرهبان والقساوسة بينصحوهم باخد تالتة ثانوى علشان كان فيها فيزياء ورياضة المهم بانهم ياخدوها فى سنتين ايه يعنى السنة الزيادة دى كانك نزلت سنة//كانك دخلت الجيش//كانك//كانك//......... المهم فى الاخر حط فى دماغك ان التاجيل كان حل ليك مش مشكلة ومن غيرة كنت هتدخل كلية تعبانة اما دلوقتى حللك المشكلة خالص وان شاء الله تدخل طب يبقى مش تزعل العكس تقول الحمد لله وناس كتير جدا فى كليات القمة بتاخد السنة فى سنتين طالما هيفيد.



كونك مش منظم فانتا لا هتعرف هتزاكر امتى ولا حتى ايه ولا وقتية وبالتالى هتشعر بالملل والخوف والتورتر حتى انك لا هتعرف تستمتع باللعب ولا حتى بشئ لازم تبدا من دلوقتى تنظم يومك على المادتين دولى بدون اى تقصير وفرصتك كويسة مادين يعنى هتعرف تشترى ملخصات كتير وتحل امتحانات .



المهم عن تنظيم الوقت اقرا الدروس اللى فوق لكنى بانصح باستغلال فترة الليل لان الناس كلهم نايمين حتى الاطفال والتركيز بيزيد ونزولك الشارع بيقل واستخدام الانترنت بيقل.



اظن كدا تبدا تفوق وتركز فى مستقبلك ما تقعدش تقول انا مأجل انا مأجل لا ابدا قول انا لو قفلت المادتين هدخل طب او صيدلة.

[مهاب احمد محمد]

المشاركة الأصلية كتبت بواسطة work_station

كلامك جميل جدا انا مينفعش فعلا احدد لحد هينام امتا وهياكل امتا بس فكر معايا كدا لو واحد ماشى بالبركة لا عارف ينظم وقتة ولا يستغلة صح ولا حتى عارف يزاكر امتى دا المفروض انا اعملة ايه بحاول اساعدة !!! وبحاول اخلية يستغل افضل الاوقات بتاعتة انا فعلا ممكن اخططلة ينام امتى فى اول شهر او شهرين لكن ثق تماما انه بعد الشهرين دولى او الشهر بالكتير هو بنفسة هينظم وقتة بالطريقة اللى تناسبة وينام ويصحى فى الوقت اللى يناسبة .............لكن تذكر انه قبل لما يوصل للمرحلة دى لازم حد ينظملة وقتة.




والكلام دا طبعا مش هيشعر بية الا قليل الخبرة اما من الواضح ان حضرتك احتمال عندك امكانية تنظم نفسك بنفسك فهتشعر ان الصيغة بتاعتى اجبار وزى ما قال الشاعر : قال لماذا لا ارى ماشيا قلت ذاك لانك فارس (يعنى راكب حصانة ومش حاسس ولا حتى شايف حد ماشى او بيزحف من التعب).


اظن كدا انا وضحتلك وجهة نظرى .

بالطبع حضرتك وصلتلي وجهة نظرك وفي النهاية انت بتحاول تساعد ربنا يوفقك

[ام غفران]

بجد جزاك الله خيرا علي موضوعك ده
انا ام لابناء لسه في مراحل الاعدادية والابتدائية
بس والله استفت كتير من كلااااااااامك
وفعلا المفروض اللي يدخل يقرا الموضوع ياخد اللي يناسبه منه
ولو مش عاجبك الكلااام اكيد في حد ممكن يستفيد ولو بفكرة واحده
ومينفعش نحبط حد
بجد الموضوع حلو للي عاوز يستفيد

[رزيق محمد]

السلام عليكم
انا فى سنة 2 ث وعايزة من حضرتك جدول لتنظيم الوقت وازاى استغل الوقت فى المذاكرة وانجاز اكبر كم ودى مواعيد درسى
الاحد : رياضة الساعة 4
الاثنين : عربى الساعة 2.5
الخميس : كيمياء الساعة 5.5
الجمعة انجليزى الساعة 5
وبقيت الايام ما فيش دروس المشكلة اننا بنام متاخر وبصحى متاخر برده وش عارفة اظبط نومى
انا عايزة من حضرتك جدول للمذاكرة ضرورى لان انا فى قمة الحاجة اليه لاننا للاسف بدات دروس متاخر وما انجزتش من المواد حاجة غيرمن كل مادة درس تقريبا دلوقتى انا الى يهمنى اكتر فى السنة دى انها تبقى استعداد ل 3ث وعايزة اعرف من حضرتك ازاى اتعود من دلوقتى على نظام مذاكرة 3ث وازاى اقوى نفسى فى الانجليزى ارجو الرد ضرووووووووووووورى

[مشتاقة لقيام الليل]

السلاام عليكم
انا طالبة لسه فى اولى ثانوى بس مكسله اووى والله وانا نفسى ادخل طب بس حاسه انى مش هقدر
وده لان كل اهلى بيقولولى مش هتقدرى توصلى للطب !! والكلام اللى بيتقلى كله احباط * احباط
اناا بصراحه نفسى حد يشجعنى وكمان نفسى احب المذاكره ونفسى اتفوق فى الثاانوى ..
انا فى مواد لسه مفتحتهاش لحد دلوقتى .. وكماان بقيت بناام كتير اووى ..

انا بصحى الساعه 6 كل يوم يعنى فى ايام المدرسه .. لان المدرسه بروحها بمواصلات .

يوم السبت مفيش مدرسه بس عندى 3 دروس ورا بعض .. درس من الساعه 10 الى 12 ساعتين فرنسااوى
وبعده الساعه 12 درس انجليزى وبعده الساعه 2 درس كيمياء ..
يوم الاحد .. طبعا بصحى ارووح المدرسه وبطلع من المدرسه اما 1 او 1.5 وساعاات 2 انا عندى يوم الاحد درس بعد المدرسه
عربى الساعه 3 مينفعش ارووح لانى هدووخ لو روحت فببقى قاعده لحد الساعه 3
وبرووح بوصل البيت على الساعه 4.5 كده وساعات 5
يوم الاثنين والخميس مفييش دروووووس
يوم التلاثاء عندى 3 درووس فيه .. درس انجليزى الساعه 6.5 الصبح وبطلع منه على المدرسه ودرس كيمياء الساعه 2 ودرس رياضيات الساعه 4 ,,
ويوم الاربعاء عندى درس عربى الساعه 3 زى الاحد بالظبط
ويوم الجمعه عندى درس رياضيات الساعه 9.5 الصبح

اتمنى لو تقدر تساعدنى فى تنظيم مواعيد نومى وكماان مواعيد مذاكرتى ابقى متشكره
لانى والله فى الضيااااااااع خالص وبقالى يومين مفتحتش كتاب خاالص

[مشتاقة لقيام الليل]

وعلى فكره انا اخدت الترم الاول كيمياء واحياء وتاريخ

[رزيق محمد]

ياريت تلبوا طلبى بسرعة لانى فى امس الحاجة اليه

[!! Dark Man !!]

انا عندي طول ايام الاسبوع دروس وبروح الساعة 10 بليبل من الدروس ويدوب اتعشي واتفرج ع التلفزيون واعمل واجب درس واحد كفابة وبعدين انام واصحي متاخر ع الساعة 11 ولا حاجة ومفيش مذاكرة الا نادرا وف 3 ث ومش عارف اعمل ايه

[work_station]

حاجة عاوز اقولها بسيطة جدا جدا






معظم الناس اللى بتشتكيلى بيشتكى من حاجة واحدة بس انا خايف وقلقان مش عارف لا ازاكر ولا انظم وقتى ومش ليا نفس ازاكر.







اسمع الكلام دا وبروزه عندك بخط عريض فى غرفتك






انا لما كنت فى بداية الثانوية العامة كنت تحت لا افقه شئ فى اى شئ كنت ببص للثانوية من برة خوف قلق تنظيم وقت يعنى ايه ويخيل ليا انى علشان اجيب المجموع العالى دا حلم بالنسبة ليا ومش هقدر لانى الثانوية دى كتله صعوبات********* فى نفس الوقت لما كنت بحكى واشوف تصرفات الناس اللى معروف عنها انها ممتازة من الطفولة كنت بلاقيهم فعلا ريلاكس وهاديين وخطواتهم ثابتة ومش عندهم القلق.







ولما ربنا رزقنى باللى بدا ينصحى زى ما بعمل معاكم كنت بقف معاه فى الشارع يوميا 3 ساعات يقولى يعنى اية المزاكرة الصحيحة والمجموع بيجى ازاى.
.
.
.
وفعلا بمرور الزمن وبعد شهور كنت الحمد لله لحقت نفسى وجبت كل الكتب اللى نصحنى بيها ورتبت غرفتى زى ما كان بيقولى وزاكرت فى المواعيد اللى رشحهالى .
.
.
.
والله زى ما بقولكم انا حسيت من جوه نفسى ان طلعت لمستوى الناس المعروف عنها بالتفوق ولاقيت نفسى تقلت وهديت واسلوبى اصبح متزن بفضل الله عرفت وقتها السر.


******************************

وهو ان المزاكرة كلام فارغ سهل جدا وصعوبة الثانوية ما هى الا اكذوبة بترعب الناس وتنفرهم من الهجوم عليها وبتشتت تفكيرهم وبتدمرهم ......وفقط فقط اللى عارف الكلام دا هما الناس المتفوقة والله هما بس اللى عارفين الكلام دا وبيستعجبوا من الطالب المسكين.

**********************************


وعلشان كدا لو طلبت النصيحة من طالب اصلا متفوق بكل بساطة مش هتلاقى عنده اجابة الا


-------------------------------------------
ذاكر اللى عليك هتنجح
-------------------------------------------

وروح جرب والله ما هيعرف يقولك ذاكر ازاى ولا ايه ولا امتى ولا مشاكلك ايه لانه ممرش بيها ....لكنى كنت تحت وشوفت الناس اللى تحت شكلهم ايه ومشاكلهم ايه لانى كنت منهم وبسرعة تدرجت لغاية ما اصبحت بفضل الله فوق مع الناس المتفوقة.




اذا لازم تزاكر بخطوات منتظمة تعرف انتا هتذاكر ايه وامتى ولو حصلك مشكلة مش تهدمك لا العكس تخليك تتدرب على حلها ذاكر بانتظام هتلاقى المزاكرة بسيطة ........هتسيب الدنيا تتراكم عليك مش هتقدر تلمها تانى الحق نفسك.



فى حاجة تانية مهمه جرب تهجم على المادة بدل ما خوفها مسيطر عليك وراعبك هتدنك كدا لامتى خايف من المادة دى والمادة دى مش عارف انزل لصحبة قولى اشرحلى الحتة دى مرة واتنين مكسوف من المدرس روح لصاحبك تانى وتالت ورابع اللى عاوز شئ بيسعى زى الديب وراه بالزوق وبالعافية هسعى وباذن الله هدمر الخوف منه لكن هتسلم نفسك من اولها انتا لسة عمرة 17 سنة مكنتش تتغلب على مشكلاتك من النهاردة هتكمل عمرك فاشل عمرك ما هتعرف تتغلب على مشكلاتك وللعلم حياتك كلها هتكون عقبات ومشاكل اسهل من الثانوية العامة والشاطر شاطر ومتفوق فى كل شئ والفاشل فاشل فى كل شئ .


حاجة تانية الثانوية فرصة واحدة هتحدد مسار حياتك كلها هتعب سنة وشوية فى الكلية وبعد كدا هتلاقى نفسك تقدر تتغلب على مشكلاتك بمعاونة الله ثم نفسك.


يارب الناس تفهم وتقدر واللى مش حاسس يروح يكلم واحد ضاعت منه فرصة الثانوية ويسمع رايه علشان يتقى الله ويقدر النعمة اللى فى ايدة ولسة مش طارت



والله الموفق والمستعان