لطلاب الثانوية اسالنا اى سؤال عن اى جامعه

[vampire1188]

يا جماعة انا عايز اعرف كلية السن بتاخد كام فى درجة الانجليزى

ماهو دا بيتحدد على اساس التنسيق الداخلي بتاع الكلية على حظك بقي

النظام ياسيدي بيبقي كالآتى

ان انتا اما بتخلص الثانوية العامة بتاعتك ويظهر نتيجة التنسيق (اكيد طبعا مرحلة اولي)

واانتا خلاص ربنا كرمك وقدمت في الالسن واتقبلت اللي بيحصل انه بيبقي فيه تنسيق داخلي

التنسيق الداخلي دا بقي انتا وحظك فيه بيبقي على حسب مجاميع الناس اللي متقدمة في السنة بتاعتك

بس اعتقد غالبا يعني بياخدوا ممكن من 48 لـ 49.5

عشان بديهيا اللي بيجيب الدرجة النهائية في الانجليش في الثانوية العامة بيخش ياباني او كوري

والله اعلم

[vampire1188]

ممكن اعرف كليه حقوق بتاخد من كام انتساب وانتظام من ادبي

والله دا بيبقي على حسب المرحلة بتاعة التنسيق

واللي بيحكم دا بعض المتغيرات

زي المرحلة الكام (اولي ولا تانية ولا تالته) ، ادبي ولا علمي ، مستوى المجاميع في السنة بتاعتك ،
جامعة ايه

كل دا انتي ماحدديتهوش .. وبالتالي انا للاسف مش هاقدر افيدك

بس عموما انا هاسترشد بتنسيق السنة اللي فاتت (كمرجع مش اكتر)

اعلى مجموع في حقوق دايما بيبقي للاقاليم .. زي جنوب الوادي وبني سويف والحتت دي

السنة اللي فاتت (2008) خدت مرحلة اولي أدبي مجموع 328 في جنوب الوادي

وبني سويف خدت 299 .. وانتي في النازل بقي

وطبعا اعتقد بما انك جيبتي سيرة منية النصر .. يبقي دي تبع المنصورة على ما اعتقد

يبقي جامعة المنصورة / كلية الحقوق / المرحلة الاولي / أدبي (2008) كان مجموعها 289.5

وكليه تربيه نوعيه بردوا كذلك خصوصا منيه النصر

السنة اللي فاتت (2008) خدت مجموع 346.5

ومعا ذلك نصيحة مني ليكي .. كل سنة بيختلف التنسيق عن السنة اللي قبلها ..

عشان كدا اوعي تاخدي تنسيق السنة اللي فاتت كدليل ليكي عشان تسترشدى بيه عن تنسيق السنة دي المتوقع

اللي بيتحكم في نتيجة التنسيق المجاميع العامة للطلبة في الامتحانات ..

لو كانت عالية يبقي التنسيق عالي .. كانت منخفضة يبقي التنسيق في النازل

انتي بنفسك قارني مابين تنسيق سنة 2007 بـ 2008 .. هاتتلاقي مافيش وجه مقارنة اصلا

لان امتحانات 2007 كانت جايه سهلة فالمجاميع عالية .. قام التنسيق جيه عالي

2008 ت الامتحانات صعبة .. فالناس نيلت الدنيا وحلت وحش .. قامت المجاميع نازلة ..
قام التنسيق نازل

وهكذاااااا .. يارب تكون فكرتي وصلتك

دا دليل تنسيق 2008 (أدبي) >>

http://www.tansik.egypt.gov.eg/appli...imitsA2008.htm

[vampire1188]

السلام عليكم
حد عنده فكره كلية الهندسة بجامعة مصر الدولية وجامعة 6 أكتوبرأسعارها كام

كلية هندسة / جامعة 6 اكتوبر >> 22000 في السنة

كلية الهندسة جامعة مصر الدولية >> 27500 في السنة

[vampire1188]

معلومات عن طيران امبابه
انا سمعت انوا معهد مش جاعه وبيقول وحش هل الكلام ده صحيح ؟
ويا ريت معلومات عن السعار والمجموع وكده

بالعكس مين قال كدا .. دا معهد مشهور وليه سمعته وكيانه على مستوى الشرق الاوسط كله

بص ياسيدي .. الناس اما بتسمع كلمة معهد بتفتكر انه حاجة وحشه ..

عشان اغلب المعاهد اللي في مصر تلاقيها لوكال شوية

بس عموما .. اللي اعرفه ان معهد الطيران بتاع امبابة دا عبارة عن مجموعة معاهد في بعض

يعني مش معهد واحد بس .. ومقره دلوقتى في 6 اكتوبر مش امبابة زي مالناس كلها عارفه عشان نقلوه

وكل معهد او كل فرع فيه بيدرس جانب معين من جوانب الطيران .. زي مثلا :

- معهد مصر للطيران ... يخرج طيار مدني .. ومدة الدراسة فيه 18 شهر .. بس طبعا لازم تخضع لاختبارات قبول ..

وتقريبا والله اعلم لازم تكون جاي من مدرسة طيران

- معهد المراقبه الجويه ... دا بيخرج مراقب جوى في البيز بتاعة المطار ..

اللي بيشوف المطار كله من برج المراقبة

وبيكون على اتصال دائم بأى طيار راكب طيارة في المجال الجوي بتاع المطار ..

ودا مدة دراستة حوالي 4 سنين

- معهد هندسه و تكنولوجيا الطيران ... ودا بيخرج مهندسين طيران على أكفأ مستوى

وبيبقوا احسن من خريجين هندسة ..

لإن الدراسة بتتم فيه بالتخصص من اول سنة على طول ومدة دراستة 5 سنين

بالنسبة بقي للمصاريف .. عندك في قسم الطيران .. دا بـ 300.000 جنيه

بس خد بقي كدا شوية نصايح عشان تبقي عارف برده

1- دلوقتي الدراسة في المعهد دا اما بتخلصها بيديك رخصة معتمدة من مصر بس .. يعني مش رخصة عالمية .. بمعني .. انتا دلوقتي اما بتتخرج ماينفعش تسوق طيارة الا تبع شركة في مصر لان رخصة سواقتك مش هايعترفوا بيها في اي شركة تانية بره مصر

2- طبعا بعد ما هاتقرا الملحوظة الاولي هاتقولي بس خلاص لاقيتها .. انا اشتغل في مصر للطيران وامري لله .. هاقولك استني .. مصر للطيران الشغل فيها صعب جدا وبواسطة كمان .. غير كدا في دفعات قبل كدا لسه ماشتغلتش .. فاكيد بياخدوا بالاولوية

3- عدد الساعات اللي انتا هاتتمرن بيها 205 ساعة .. العدد دا طبعاااا مش كافي .. عشان كدا دا مش هايأهلك لانك تشتغل بره مصر .. وبالتالي هاتدفع وتكع 300 الف جنيه وانتا مش ضامن اصلا انك تشتغل

4- طيارين كتير شغالين على خطوط مصر للطيران بينصحوا بان الدراسة تتم في امريكا أو كندا .. واللي انتا هاتدفعه هنا ممكن تدفعه هناك ..

اه وقبل مانسي .. بالنسبة للمجموع بقي

كان في 2008 الحد الادني --> 350

و 2007 كان --> 365 ..

و 2006 كان --> 310.5

دي كانت شوية ملحوظات قولت ابلغك بيها قبل ماتدبس .. وربنا معاك يا معلم

[vampire1188]

بـعد ازنكـ عاوز بس استفسـر كلية التجارة جامعه خاصة المصاريف الاوراق الحاجات دى عاوزها فـ تلت مناطق فـ ( القاهرة - الاسكندرية - المنصورة ) عشان اعرف الفرق واللى يكون احلى ليا فـ التلاته ياريت تفدونـــى

نمسكهم منطقة منطقة

1- القاهرة :

طبعا فيه جامعات خاصة كتيرة في القاهرة .. واشهرهم 6 اكتوبر ومصر الدولية

- جامعة 6 اكتوبر :

دي فيها دراسة عربي ودي بـ 10500 في السنة .. وفيها دراسة بالانجليش ودي بـ 13000 في السنة

- جامعة مصر الدولية :

دي الدراسة انجليش على طول بدون اختيار طبعا .. بـ 26250 جنيه في السنة

2- الاسكندرية :

ماعتقدش ان فيه في اسكندرية جامعة خاصة غير جامعة فاروس

جامعة فاروس كلية تجارة فيها بـ 8750 جنيه في السنة

3- المنصورة : ماعرفش عنها حاجة صراحة (من قال لا فقد أفتى)

[vampire1188]

اسنفسار
هل يوجد كلية فنون جميلة قسم ديكور فى الجامعات الخاصة
لو يوجد ما شروطها وتابعة لاى جامعة وما مصاريفها

ماعتقدش ان فيه جامعة خاصة في مصر اصلا فيها كلية فنون جميلة

هوا فيه كلية فنون تطبيقية اه .. في جامعيتن تقريبا ..

1- جامعة 6 اكتوبر .. ودي فيها اقسام تصوير واثاث واعلان

2- الجامعة الامريكية ..

بيتهيألي غير كدا مافيش

[vampire1188]

وعموما .. انا آسف يا جماعة للتأخير على أسئلتكوا .. لكن بجد والله دا شئ خارج عن ارادتي

اولا لسبب الامتحانات كانت جايه ورا بعض ..

ثانيا كان فيه ظروف مرضية جاتلي فماقدرتش اتابع اول بأول معاكوا

وأي استفسارات انا تحت امركوا جميعا ..

[specter]

الف شكر ليك وبجد معلومات مفيده جدا س انا كنت بسال عن هندسه الطيران مش الطيران المدني يعني حلوة وفي التوظيف وادوس فيه ولا بلاش؟

وايه رايك ادخل هندسه الطيران دي ؟

ولا ادخل فنيه عسكريه قسم هندسه طيران بيقولوا احسن هندسه الطائرات الحربيه

ومعلش اخر طلب عاوز مجموع الفنيه العسكريه ونظام التقديم والاختبارات

يا رب مكنش تقلت عليك

[نورهاان]

انا عاوزة اعرف الامتحانات الى فى كليه فنون تطبيقيه هتبدأ امتى وهى عامله ازاى

[romosh]

والله يا اخوتى اللى يعرف اخر موعد لسحب استماره التقديم لاختبارات فنون تطبيقيه امتى يا ريت يقولى
انا سمعت انها بدات من اليوم
ومش عارفه هلحق والا ايه النظام
انا فعلا روحت الكليه وقدمت للكورسات والامتحان وطلبوا منى شويه حاجات
والكورسات هتبدا من يوم التلات ان شاء الله بفنون تطبيقيه دمياط
لكن هل سحب الاستماره بيبقى كم يوم وممكن اقدمها وانا رايحه اول يوم لى فى الكورسات والا ايه؟
جاوبونى الله يكرمكم وربنا يوفقنا جميعا ياااا رب وتكون سنه خير علينا كلنا
قولوا امين

[دنيامجدى]

اريد معرفة التنسيق الداخلى لكلية الفنون الجميلة اناتم ترشيحى لكلية الفنون الجميلة واريد ان التحق بقسم ديكور

[vampire1188]

الف شكر ليك وبجد معلومات مفيده جدا س انا كنت بسال عن هندسه الطيران مش الطيران المدني يعني حلوة وفي التوظيف وادوس فيه ولا بلاش؟

مانا قولتلك دا بيبقي على حسب احتياجات شركات الطيران اللي موجودة في مصر

ومتهيألي مفيش اصلا شركة طيران في مصر الا شركة مصر للطيران .. والله اعلم بقي

وايه رايك ادخل هندسه الطيران دي ؟

شغلانه محترمة ومرتبها محترم ..

دا يكفي يا اخي ان احمد حلمي كان طالع فى دور مهندس طيران في فيلم اسف ع الازعاج !

ولا ادخل فنيه عسكريه قسم هندسه طيران بيقولوا احسن هندسه الطائرات الحربيه

فنية عسكرية مستقبلها مضمون في الشغل .. لإنك بتشتغل تبع القوات المسلحة

يعني لا محتاج واسطة ولا بتاع .. تتخرج وتشتغل على طول .. بس قرفها بقي في الاوامر وكدا

بس طبيعي انتا بما انك راجل في الجش فاكيد هاتكون واخد على كدا يعني

لكن هندسة طيران في المدنى مستقبلها مش مضمون لانه كل على حسب احتياجات شركات الطيران

ومعلش اخر طلب عاوز مجموع الفنيه العسكريه ونظام التقديم والاختبارات

المجموع : 90 % وانتا طالع فوق .. بس تكون علمي رياضة

نظام التقديم : بعد ما نتيجة الثانوية العامة بتظهر ..

في شهر 8 بيفتحوا باب التقديم بتاع كليات الشرطة والقوات المسلحة ..

ودي فروعهم ..

- المكتب الرئيسي بالكلية الحزبية / طريق العروبة - القاهرة

- المدرسة العسكرية الرياضية / سوحة - اسكندرية

- مركز قيادة المنطقة الجنوبية العسكرية - اسيوط

- المدرسة العسكرية الرياضية - المنيا

نظام التقديم كالآتى :

أولا اختبار السمات الشخصية:

1-يهدف اختبار السمات الشخصية إلى الوقوف عل قدرة الطالب على التكيف مع الحياة العسكرية وأن رغبته هذه ليست نتيجة ضغوط معينة عذا بالإضافة إلى قياس تناسب شخصية الطالب مع متطلبات الحياة العسكرية وكيفية التصرف في المواقف المختلفة .

2-يتم اختبار الطالب في نفس يوم تقديمه طلب الإلتحاق على أن يكون مع الطالب الأدوات الكتابية للإختبار .

3-تعلن نتيجة هذا الإختبار بمقر مكتب التنسيق وعلى الطالب معرفة توقيت الكشف الطبي الموضح أعلى الكشف المدون به إسمه حيث أن توقيتات الكشف الطبي ليست واحدة لجميع الطلبة .

ثانياً اختبار المستوى الطبي:

يستغرق الكشف الطبي يومان في الغالب ما لم يقرر غير ذلك.

1-يهدف الأختبار الطبي إلى تحديد اللياقة الطبية للطالب ليكون مبدئياً لائقا طبياً كطالب بإحدى الكليات والمعاهد العسكرية. (كلية حربية-كلية بحرية-كلية جوية-كلية فنية عسكرية-كلية دفاع جوي-المعهد الفني).

2-يقوم بهذا الأختبار لجنة طبية تشكل لهذا الغرض ويكون قرارها نهائياً ولا يعتد بأي قرارات خارجية ، كما يتم الأختبار بمقار اللجان الطبية وفي المستشفيات التي يتم الإعلان عنها.

3-يتم أختبار المستوى الطبي للطالب في جميع التخصصات الطبية وفقا للمستوى المعمول به في داخل القوات المسلحة والمستويات الطبية المطلوبة لكل كلية والمستويات المطلوبة لكل فئة أو تخصص ويجب تواجد بطاقتك الشخصية معك أثناء الكشف الطبي .

4-ترشح اللجنة الطبية من تطبق عليه شروط الترشيح للكشف في الكلية الجوية لأستكمال الكشف في المجلس الطبي الجوي.

5-يتم إخطارك بنتيجة الكشف الطبي فور إعتمادها م رئيس اللجنة الطبية كتابة ومعها يحدد موعد اختبار اللياقة البدنية الذي يكون في اليوم التالي غالباً.

- نصائح وتوجيهات طبية:
اللياقة الطبية لمصلحتك حيث أن من لا يستطيع تحقيق المستوى المطلوب للقبول بالكليات والمعاهد العسكرية لا يستطيع الإستمرار في الكلية لذلك:
1-دون الإقرار الطبي بأمانة .
2-تجنب الحصول على أية دواء يغير من صفتك الطبية أو نتائج التحاليل .
3-تأكد من نظافة الأذن ويجب غسلها قبل توقيع الكشف الطبي عليك .
4-إفصح عن الأمراض أو العمليات الجراحية التي أجريتها في أية مرحلة من حياتك قبل الكشف الطبي وذلك لعرضك على اللجنة المختصة .
5- الطالب الذي يحق له الكشف بالنظارة عليه أن يتأكد من أن مقياس النظارة سليم ومناسب له .
6-لا يعتد بأي كشوفات أو تحاليل أو تقارير طبية بخلاف ما تصدره اللجنة الطبية العسكرية .

ثالثاً اختبار الثقة والسباحة واللياقة البدنية:

1- عند إجتيازك لإختبار المستوى الطبي يحدد لك ميعاد إختبارات الثقة والسباحة واللياقة البدنية التي تكون في الغالب بعد إنتهاء الكشف الطبي وعليك الحضور في ذلك اليوم تمام السابعة صباحاً ومعك الملابس الرياضية و لباس البحر .

2-سيتم إعطائك رقم رياضي تتعامل به أثناء تأديتك لإختبارات الثقة والسباحة واللياقة البدنية .

3- الاختبارات التي يؤديها الطالب
أ-اختبار الثقة:
(1) يعتبر هذا الأختبار شرطاً أساسيا لراغبي الألتحاق بالكليات والمعاهد العسكرية .
(2) يجب أن يؤدى هذا الأختبار بنجاح للإستمرار في الأختبارات التالية ويعتبر هذا الأختبار أيضاً شرطا للإستمرار في الكلية حيث أنه يؤدى بشكل دوري .
(3)إختبار الثقة هو القفز بالأرجل من برج حمام السباحة من إرتفاع 7.5 م .
(4) التقييم :
مضى . قصر .
ب-إختبار السباحة:
(1)هو السباحة لمسافة 50 متر بأية طريقة من طرق السباحة وهذا الأختبار يقيم بالزمن. (2)أسلوب التقييم:
سباحة 50 متر في زمن حتى 45 ثانية 50 درجة.
سباحة 50 متر في زمن حتى 60 ثانية 30 درجة.
سباحة 50 متر في زمن أكثر من 60 ثانية 20 درجة.
سباحة عرض حمام السباحة 10 درجات.
ج-إختبارات اللياقة البدنية:
يؤدى هذا الأختبار في سبعة تمرينات تقيس عناصر اللياقة الدنية للطالب .
العقلة "الشد لأعلى" 40 درجة
تمرين البطن 40 درجة
تمرين الضغط "الإنبطاح" 40 درجة
تمرين الوثب الطويل من الثبات 10 درجات
العدو 100 متر 15 درجة
التوازن 10 درجات
تمرين الجري المتعرج "الرشاقة" 10 درجات
العدوم مسافة 1500 متر 25 درجة
ومنه اختبار المهارات الرياضية (التفوق في رياضة بعينها) .

رابعا الإختبار الشخصي أو كشف الهيئة:

1- إحضر في يوم الأختبار الساعة السابعة صباحاً ولا يُسمح بالتخلف أو التأجيل .
2- الإختبار الشخصي يهدف إلى إنتقاء أفضل العناصر التي تلتحق بالقوات المسلحة والتي تتوفر فيها :
أ-السمات الشخصية والنفسية المناسبة.
ب-اللياقة الطبية والبدنية التي تؤهل الطالب للنجاح في عمله .
ج-قوة الشخصية والقدرة على التصرف .
د-المعلومات العامة والثقافية.
هـ-الرغبة الأكيدة للطالب للإلتحاق بالكليات العسكرية .
3-يتم الأختبار وفقاً للشروط واللوائح والقوانين المنظمة وطبقاً لإحتياجات القوات المسلحة في الأفرع الرئيسية المختلفة .
4-تذكر أنك تتقدم لمجلس مديري الكليات والمعاهد العسكرية لأختيارك من ضمن آلاف المتقدميين فحافظ على مظهرك وأرتدي الزي المحدد بالطريقة المناسبة .
5-في يوم إختبارك سيحدد لك موعد العرض الطبي العام .
6-بعد إعلان نتيجة العرض الطبي العام سيحدد لك موعد إعلان نتيجة القبول بالكليات والمعاهد العسكرية .
7-تذكر أنك في مسابقة وليس معنى وصولك للعرض الطبي العام أنك تم إختيارك لكن عليك بذل أقصى جهدك لتكون من المتفوقين.

اظن تمام كدا ..

[vampire1188]

انا عاوزة اعرف الامتحانات الى فى كليه فنون تطبيقيه هتبدأ امتى وهى عامله ازاى

اتفضلي خشي ع اللينك دا وهاتتلاقي اللي انتي عايزاه ان شاء الله

http://www.thanwya.com/vb/showthread.php?t=53816

[سما666]

سلام عليكم انا كنت عايزه اسال علي كلية اداب اعلام وهي نفس كلية الا علام ولا مواد تانيه وعايزه اعرف بتقبل من كام في المجموع

[vampire1188]

سلام عليكم انا كنت عايزه اسال علي كلية اداب اعلام وهي نفس كلية الا علام ولا مواد تانيه وعايزه اعرف بتقبل من كام في المجموع

آداب اعلام عبارة عن قسم من احد اقسام كلية الآداب ..

ودا موجود في جامعتين بس تقريبا .. عين شمس وحلوان واعتقد ان فيه جامعة المنصورة واسيوط برده والله اعلم

والنظام ان اعلام زيه زي اي قسم تاني ليه تنسيق داخلي

في اداب اعلام تقريبا بياخدوا عدد محدود ممكن 200 او 250 على حسب الاحتياج والكثافة

وطبعا بياخدوا اعلى مجاميع متقدمة ..

بس النظام بقي انهم بياخدوا مجموع اللغات على بعض .. التلات لغات يعني

ومايكونش اقل من 75% .. ودا طبعا بيتم تحديده من خلال مجلس الكلية ورئيس القسم

بس اكيد يعني كلية اعلام احسن .. لانها معمولها كلية مخصوص