برمجة " دروس البرمجة مع ++c " محمد القبانى

[msamido]

جزانا الله وإياكم كل خير وإن شاء الله قريبا

بس ألاقى وقت أنظم فيه دماغى وأبدأ اكتب الموضوع الجاى إن شاء الله

[msamido]

بسم الله الرحمن الرحيم

ازيكم يا جماعه معلش اتأخرت فى الموضوع التانى بس معلش أنا دماغى فيها مليون حاجه دلوقتى والشغل واخد معظم وقتى بس أنا إن شاء الله ناوى أكمل معاكم الكورس ده وبإذن الله هكمله
يلا نبدأ بقى الدرس التانى

لاحظنا من الدرس الأول إننا كتبنا حوالى 4 أو 5 سطور لمجرد إننا عايزين نطبع على الشاشة كلمة Hello World يا سلام هى البرمجة معمولة علشان اقعد اكتب شوية كلام على الشاشة بالتأكيد لأ طيب إيه بقى الخطوة اللى بعد كده فين ؟؟
الخطوة اللى بعد كده هتكون إننا هنتكلم عن حاجه اسمها الـ variables أو بالعربى المتغيرات "يععع "
طيب إيه هى يا عمنا المثقف بتاع الإنجليزى المتغيرات قصدى الـ variables ؟

أقولك يا سيدى بص يا عم خلينى الأول اعقدك وأقولك التعريف العلمى للموضوع ايه
الـ variables هى أسماء تشير لأماكن فى الذاكرة تحمل قيم معينه فهمت حاجه ؟؟ مش مهم شوف المثال ده.
لو أنا قولتلك حط فى دماغى رقم 5 وخليك حافظه وبعدين قولتلك حط كمان رقم 2 اشطه كده ؟
يبقى انت معاك دلوقتى رقمين فى دماغى 5 , 2 لما اجى بقى اقولك اجمعلى 1 على الرقم الأول هتكون النتيجة إنك هتجمع 1 على 5 وتبقى الناتج 6 ويكون فى دماغك دلوقتى الرقمين الجداد 6 , 2 دلوقتى بقى هقولك اطرحلى الرقم الثانى من الرقم الأول واحفظ الناتج هتكون النتيجة إيه إنك هجيب 6 وتنقص منها 2 وتخلى فى دماغك 4 يبقى انت معاك 3 أرقام دلوقتى الرقم الأول (6) والرقم الثانى (2) والناتج (4) شايفين بقى الكلام اللى بالأحمر ده ؟؟؟
هى دى المتغيرات فهمنا حاجه ؟؟
طيب ده فين بقى من البرمجة ومن الـ ++C اقولك
علشان تقول للبرنامج إنت عندك رقم 5 حطه فى الذاكره يبقى لازم تعرف variable وتديله أسم وتديله القيمة بتاعته اللى هى 5 وتعرف رقم تانى وتديله اسم وتديله القيمة بتاعته اللى هى 2 وهكذا
طيب نشوف فى الكود ؟؟ ؟؟ نشوف يلا بينا :

#include <iostream.h>
#include <conio.h>
void main ()
{
int x=5;
int y=2;
x = x +1;
int z = x - y;
cout<<"The First No. : "<< x<<"\n";
cout<<"The Second No. : "<< y<<"\n";
cout<<"The Result : "<< z;
getch();
}

ده الكود طبعا أول سطور متكررين مش محتاجين نتكلم فيهم صح ؟
طيب نيجى بقى من أول سطر كود داخل الـ main method وهو السطر ده :

int x=5;

أولا خلينا نقول إن ده السطر اللى بيعرف الـ variable ونقول إن أى variable عباره عن 3 حاجات :
1- أسم المتغير : واسم المتغير ده هو اللى بنادى على المتغير بيه لما نحب نستخدمه وهو هنا فى حالتنا هو xتمام كده .
2- القيمة التى يحملها المتغير وهى طبعا مش محتاجه تعريف وهى هنا فى حالتنا دى 5 طيب هو لازم كل ما اعرف variable أديله قيمه الإجابة لأأأ مش لازم بس مينفعش بعد كده تستخدمه من غير ما يكون فيه قيمة وإلا هتلاقى فيه قيمة غريبه وتبوظلك شغلك أوكشن حتى الأن ؟؟
3- نوع المتغير أو الـ variable Data tybe : طيب يا عم هو احنا خلصنا من variable لما تقولنا data type أقولك الـ data type هى ببساطه نوع الـ variable وهو اللى بيحدد نوع القيمةا اللى الـ variable ده بيشيلها
طيب يعنى ايه بردوه نوع القيمة يعنى هيشيل رقم زى حالتنا دى ونوع الرقم ده ايه رقم صحيح كده ولا رقم عشرى ولا هيشيل حروف ولا ايه بالظبط تمام كده ؟
فى حالتنا دى بقى هو int وهى اختصار لكلمة integer وهى معناها رقم صحيح يبقى مينفعش الـ variable اللى اسمه x يشيل مثلا رقم عشرى ولا حروف لأنه من نوع ايه ؟؟ int تماااااااااااام

يبقى أول سطر ده بقى بيقول إيه ؟؟
بيقول إن عندنا variable اسمه x من نوع int وبيحمل عدد صحيح قيمته 5 فل كده ؟؟
كذلك السطر التانى معناه ايه بقى ؟؟ مش قايل قولووا انتم

ولا اقولك يلا هقول انا وأمرى لله

int y=2;

بالمثل ده معناه إن الـ variable اللى اسمه y هو من نوع int أي يحمل رقم صحيح وقيمته 2
طيب أنت قولتلنا إن مش لازم أدي قيمة للمتغير وأنا بعرفه طيب الكلام ده يبقى إزاى ؟؟؟ الكلام ده يبقى كده يا جماعه.

int y;
y=2;

وفى الحالتين النتيجة واحدة طبعا نيجى بقى للسطر التالت

x = x+1;

طيب بالله عليكم أنا راضى ذمتكم ده سطر عايز شرح كلام فاضى يا جماعه بيقول للبرنامج اجمعلى واحد على المتغير اللى اسمه x وحط النتيجة فى x تانى
بس خلينى أقول حاجه مهمة فى النقطة دى :
عملية الجمع هنا تمت ازاى هو بيجيب المتغير اللى اسمه x ويجمع عليه 1 طيب والنتيجة هتروح فين فى المتغير x بردوه ده معناه إن خلاص القيمة القديمة للـ variable x خلاص كده شكرا ميعرفش عنها حاجه.

كذلك بقى وبكل بساطه يا جماعه السطر اللى بعده بيعرف متغير تالت اسمه z اللى هو كان الناتج بالأحمر فوق خالص وهو بردوه من نوع Int وبيشيل قيمة الناتج من عملية طرح الـ variable y من الـ variable x يعنى هيطرح 2 من 6 وتكون النتيجة أربعه نيجى بقى للسطر اللى بعد كده

cout<<"The Fisrt No. "<<x<<"\n";"

فى حاجه جديدة صح ؟؟؟
لغاية the first no. الكلام عادى ومفيش جديد هيطبع على الشاشه الكلامة ده لما نيجى بقى نحط العلامه دى تانى ونديله اسم المتغير يبقى هيكتب على الشاشه مش x لا ده هيكتب القيمة اللى بيحملها x يارب تكون واضحة النقطة دى
بعدين بقى نفس العلامة تانى وبين علامات تنصيص n\ علشان ينزل لسطر جديد
طيب كان ممكن نعملها ازاى تانى الحته الاخيرة بتاعة السطر الجديد دى ؟؟
ده أول سؤال للى متابع وهيطبق إن شاء الله

وكذلك السطر اللى بعده بالظبط بس بيطبع قيمة الـ y والسطر اللى بعده بردوه بيطبع قيمة الناتج z وبعدين السطر الأخيرر فى الكود وهو مشروح قبل كده وبكده يكون البرنامج ده خلص كده
حد فاهم حاجه ؟؟؟

طيب حد يقدر يتوقع كده وهو واقف هنا بلاش ينزل لتحت الناتج هيكون شكله عامل ازاى ؟؟؟

الناتج هيكون كده ياجماعه إن شاء الله

وبكده الحمد لله نكون خلصنا الدرس التانى هو درس بسيط بس مهم يا جماعه ولازم يتفهم كويس بإذن الله
ودلوقتى جه ميعاد الواجب بتاعكم بقى
مطلوب منك برنامج يحمل قيمتين أى قيمتين ويعمل عليهم الأربع عمليات الأساسية وهو الجمع والطرح والضرب والقسمة (+, - , * , / ) ويطلع الناتج ويكون القيمة الأولى كذا والتانيه كذا ونتيجة الجمع كذا والطرح كذا والضرب كذا والقسمة كذا
وعايز الكود والناتج إن شاء الله
سهل صح ؟؟؟
انا عارف

وفى النهاية عايز أقول يارب يكون وفقنى وقدرت أوصل معلومة بشكل مبسط وأنا متوقع منكم أسئلة بعد الدرس ده مش شرط تكون أسئلة مش فاهمين حاجه أو كده لا متوقع كمان أسئلة عن حاجات عايزين تعرفوها
مستنيكم تقولوا فهمتم وكان الكلام سهل ولا لأ ومستنى الواجب بسرعه يلاااا لا تؤجل عمل الـ ++C للغد
استودعكم الله
.
.

حقوق الطبع محفوظة لصاحب الموضوع ولمنتدى الثانوية العامة

[ananoo]

السلام عليكم

شغل راااااااااااائـــــــع

و الكلام مفهوم اخر حاجة لدرجة انه مفيش اسئلة و كمان الواجب اتحل




هاه صح كدة ولا ايــــــــــــــــه؟؟؟؟؟؟؟؟!!!!!!!!!!!!!

و بالنسبة لحكاية ازاي انزل سطر بالطريقة التانية اهو الكود و النتيجة كانت صح

cout<<"The first No. : "<< x;
cout<<"\n The second No.: "<< y;
cout<<"\n\n The result (1) (+) : "<< a;
cout<<"\n The result (2) (-) : "<< b;
cout<<"\n The result (3) (*) : "<< c;
cout<<"\n The result (4) (/) : "<< b;

وجزاك الله خيرا و جعله في ميزان حسانتك

[msamido]

المشاركة الأصلية كتبت بواسطة ananoo

السلام عليكم

وعليكم السلام ورحمة الله وبركاته

شغل راااااااااااائـــــــع

الحمد لله ومتشكر جدا لرأيك

و الكلام مفهوم اخر حاجة لدرجة انه مفيش اسئلة و كمان الواجب اتحل

الحمد لله إن الكلام مفهوم ده شئ يخلينى أستمر بإذن الله
وحكاية الأسئلة أنا كنت متوقع أسئلة مش فى الدرس نفسه لأن الحمد لله الدرس اتفهم بس كنت متوقع إن الدرس يفتح مجال تفكير فى البرمجة يخلينا محتاجين نسأل فى حاجات عايزين نعرفها
بالنسبة للواجب نشوف بقى





هاه صح كدة ولا ايــــــــــــــــه؟؟؟؟؟؟؟؟!!!!!!!!!!!!!

زى الفل الله ينور عليكى

و بالنسبة لحكاية ازاي انزل سطر بالطريقة التانية اهو الكود و النتيجة كانت صح

cout<<"the first no. : "<< x;
cout<<"\n the second no.: "<< y;
cout<<"\n\n the result (1) (+) : "<< a;
cout<<"\n the result (2) (-) : "<< b;
cout<<"\n the result (3) (*) : "<< c;
cout<<"\n the result (4) (/) : "<< b;

تمام أوى كده

وجزاك الله خيرا و جعله في ميزان حسانتك

جزانا الله وإياكم كل الخير وجعلنا ممن ينفع الناس بعلمهم

..

[ahmed abobakr]

انا اسف ياباشا انى كنت غايب شوية عن المنتدى

انا غيرت الوندوز وجيت اسطب البرنامج تانى لقيته فى مشكلة


ليها حل ولا احمل البرنامج تانى

[msamido]

أهلا بيك من تانى فى منتداك يا باشا
ومبروك الويندوز الجديد
بص هو بصراحه أنا مش عارف الـ error ده بس حاول تغير المسار بتاع الـ source وتحاول تانى ولو ظهرت اعمل retry بردوه مش مشكله وشوف كده وقولى
.
.

[ahmed abobakr]

شكرا على الدرس والشرح الرائع
انا دمجت الدرسين مع بعض
وده التطبيق

بس انا كان عندى استفسار بسيط جدا جدا ..... ازاى اعمل اقواس المجموعة من الكيبورد .. انا كنت بعملها copy من الكود اللى حضرتك كاتبه .

[ananoo]

السلام عليكم

بالنسبة للاسئلة فهو اكيد في دايمن اسئله خارج الموضوع بس بحب استنى لما يجي وقتها

و لكن بما ان حضرتك مستعد تجواب على اي اسئلة خارج الموضوع فانا بقى هسال براحتي

* هل ينفع اني اكتب بالعربي لاني كنت بحاول اغير الكتابة بس معرفتش؟؟؟

*هل ينفع اني اخلي الرقمين اللي انا دخلتوهم في الاول مش متحديدين بحيث اللي يفتح البرنامج يدخل الرقمين اللي هوة عاوزهم و تطلع بقى النتائج؟؟؟؟؟؟؟؟؟!!!!!!(و بكدة هحس اني عملت برنامج ليه فايدة في الحياة )

بس كدة و اول لما يجي في بالي اساله هسال على الطول ان شاء الله......

[!!!دمعة حزن!!!]

معلش بقى

انا بعمل كل اللى حضرتك عمله فوق

وبيطلعلى غلطات بالعبيط


تانى حاجه انا لما فتحت البرنامج لاقيت اسمى مكتوب فوق
معلش صايمه وكنت هتجنن على البرنامج بس مسكت نفسى بالعافيه

[msamido]

المشاركة الأصلية كتبت بواسطة ananoo

السلام عليكم

بالنسبة للاسئلة فهو اكيد في دايمن اسئله خارج الموضوع بس بحب استنى لما يجي وقتها

و لكن بما ان حضرتك مستعد تجواب على اي اسئلة خارج الموضوع فانا بقى هسال براحتي

إن شاء الله أنا مستعد أجاوب أى أسئلة بس كنت عايز أعرف من خلال أسئلتكم إن الموضوع فتج أفكار ومواضيع تانيه وتساؤلات فى البرمجة علشان أعرف إن كنت ماشى صح ولا غلط وإيه مدى استيعابكم للموضوع وطبعا اسألى برااحتك دايما

* هل ينفع اني اكتب بالعربي لاني كنت بحاول اغير الكتابة بس معرفتش؟؟؟


*هل ينفع اني اخلي الرقمين اللي انا دخلتوهم في الاول مش متحديدين بحيث اللي يفتح البرنامج يدخل الرقمين اللي هوة عاوزهم و تطلع بقى النتائج؟؟؟؟؟؟؟؟؟!!!!!!(و بكدة هحس اني عملت برنامج ليه فايدة في الحياة )

كلام جميل طبعا ينفع ودى أول حاجه هناخدها فى الدرس الجاى إن شاء الله
هنعرف أزاى نكلم اليوزر فى البرنامج بتاعنا يعنى مثلا نقوله دخل الرقم الأول والرقم التانى وهكذا إن شاء الله

بس كدة و اول لما يجي في بالي اساله هسال على الطول ان شاء الله......

منتظر أى اسئلة بإذن الله
انا عارف انى مش جاوبت حاجه بس أجابة سؤالك فى الدرس القادم بإذن الله وانا بحضره

المشاركة الأصلية كتبت بواسطة ahmed abobakr

شكرا على الدرس والشرح الرائع

العفو يا أبو حميد والحمد لله الدرس وصل تمام

انا دمجت الدرسين مع بعض
وده التطبيق

بس انا كان عندى استفسار بسيط جدا جدا ..... ازاى اعمل اقواس المجموعة من الكيبورد .. انا كنت بعملها copy من الكود اللى حضرتك كاتبه .

أقواس المجموعة هتبقى دى يا أبو حميد

بالضغط على shift + [ أو ] زى ما فى الصورة كده

والتطبيق تمام وزى الفل وربنا يوفقك ان شاء الله

المشاركة الأصلية كتبت بواسطة !!!دمعة حزن!!!

معلش بقى

انا بعمل كل اللى حضرتك عمله فوق

وبيطلعلى غلطات بالعبيط


طيب ليه أكيد فى حاجه عندك غلط ابعتيلى الكود وأنا أقولك الأخطاء فين

تانى حاجه انا لما فتحت البرنامج لاقيت اسمى مكتوب فوق

فوق فين

معلش صايمه وكنت هتجنن على البرنامج بس مسكت نفسى بالعافيه

تقبل الله منكم صيامكم

على فكره انت لسه ما شوفتيش حاجه فى البرمجة يعنى الجنان لسه بدرى عليه أوى أوى أوى
هاتى بس الكود وأنا اقولك اخطائك فين

[همس]

جزاك الله خيرا يا باشمهندس


بجد شرح رائع ووافي


يكفي ان حضرتك بدات معانا وانا عارفة ان شغلكم بجد متعب جدا


جزاك الله خيرا على هذا الشرح

وانا بدات متأخر انا عارفة لان الدرس التاني نزل

بس نظرا لاني كان عندي ظروف

ودا تطبيقي لاول درس

[همس]

المشاركة الأصلية كتبت بواسطة msamido

#include <iostream.h>
void main()
{
cout<<"annanoo";
int x;
cin>>x;
}

.
.

انا عندي سؤال يا باشمهندس هو الكود دا يفرق ايه عن الكود التاني ؟؟

معلش انا هتعب حضرتك معايا وعارفة اني جاية متأخر بس انا ان شاء الله هدخل على الدرس التاني واتابع معاكم

اسفة للمرة الثانية

[msamido]

المشاركة الأصلية كتبت بواسطة همس المشاعر

جزاك الله خيرا يا باشمهندس

جزانا الله وإياكم إن شاء الله


بجد شرح رائع ووافي


يكفي ان حضرتك بدات معانا وانا عارفة ان شغلكم بجد متعب جدا

الحمد لله إن الشرح كويس وأتمنى بس إن شاء الله نستفيد كلنا من الكورس
بالنسبة للشغل مش عايز أقولك قد ايه متعب بس فى نفس الوقت قد ايه ممتع

جزاك الله خيرا على هذا الشرح

وانا بدات متأخر انا عارفة لان الدرس التاني نزل

بس نظرا لاني كان عندي ظروف

أهلا بيكى معانا ونتمنى تكون الظروف خير إن شاء الله

ودا تطبيقي لاول درس

التطبيق لأول درس تمام

لو متابعة الردود بقى يا همس هتشوفى إنى طلبت من الناس تبدأ تكتب اكتر من سطر والناس عملت شغل كويس بسم الله ما شاء الله شوفيها كده

المشاركة الأصلية كتبت بواسطة همس المشاعر

انا عندي سؤال يا باشمهندس هو الكود دا يفرق ايه عن الكود التاني ؟؟

هو طبعا الكود يفرق ومعناه يفرق لكن النتيجة واحده حتى الآن لكن الفرق هيوضح بإذن الله بعد الدرس التالت اللى هحاول أنزله حالاُ بإذن الله

معلش انا هتعب حضرتك معايا وعارفة اني جاية متأخر بس انا ان شاء الله هدخل على الدرس التاني واتابع معاكم

ولا تعب ولا حاجه يا همس أنا بإذن الله طول ما أنا موجود وعندى وقت على الأقل إنى ادخل المنتدى هتلاقينى بإذن الله وهجاوب على كل أسئلتكم إن شاء الله يلا تابعى معانا على ما انزل الدرس التالت

اسفة للمرة الثانية

مش عايز حكاية اسفه والكلام الفاضى ده
إحنا اخوات

[msamido]

بسم الله الرحمن الرحيم

النهارده إن شاء الله الدرس التالت وبإذن الله سينقسم إلى جزئين أساسين الجزء الأول ما يتعبرش جزء أوى يعنى بس خلينا نقول عليه جزء وهنتكلم فيه عن كيفية أستقبال data من اليوزر ؟
عارفين الأول يعنى إيه يوزر ؟؟؟
ومش قصدى طبعا اختبر قدرتكم اللغوية والاقى حد بيقولى يعنى مستخدم أنا قصدى اليوزر بتاعى كـ developer أنا كـ developer نتيجة شغلى بتكون مجازاً هنقول برنامج والبرنامج ده ليه مستخدمين هما دول الـ users اللى أنا قصدى عليهم
طبعا كلام عبيط اللى انا قولته ده !!!!
بس أنا قاصد اقوله علشان أقول إن أول حاجه وأهم حاجه لما أحب اعمل برنامج أعرف انا بعمله مين واليوزر اللى هيستخدمه مين وعايزه ازاى طبعا ده مش هيفرق معانا دلوقتى لأننا بنتمرن والبرامج اللى بنعملها كلها مجرد تعليم للبرمجة بس كده احنا اتفقنا على مفهوم اليوزر ووجوده فى البرنامج .
طيب نرجع بقى لكلامنا فى الجزء الأول وهو استقبال الـ data من الـ user
وده إجابة على سؤال ananno

*هل ينفع اني اخلي الرقمين اللي انا دخلتوهم في الاول مش متحديدين بحيث اللي يفتح البرنامج يدخل الرقمين اللي هوة عاوزهم و تطلع بقى النتائج؟؟؟؟؟؟؟؟؟!!!!!!

وكمان هيوضح سؤال همس بخصوص الفرق بين الكود ده

#include <iostream.h>
void main()
{
cout<<"annanoo";
int x;
cin>>x;
}

والكود الموجود فى أول درس .... رغاااى أنا مش كده ؟؟؟ يلا ما علينا

الأول هنقول إن زى ما فى جملة بتكتب على الشاشة وهى >>cout فى جملة بستقبل بيانات من الشاشة وهى <<cin .
طيب ازاى بقى نستعمل جملة <<cin دى ؟
أولا جملة <<cin دى معناها بتقول للـ compiler استنى استقبل داتا من اليوزر طبعا اليوزر بيتكب داتا وبيضغط انتر هنا بقى البرنامج بيبدأ يكمل كل ده كلام نظرى صح ؟؟
طيب يلا نشوف مثال عملى ونتكلم عليه زى ما اتعودنا
بس الاول قبل المثال خلينا نقول إن زى ما قلنا قبل كده إن كل syntax ليه الـ library بتاعته ... حد فاكر الكلام ده ولا إيه ؟؟؟
طيب الـ syntax اللى هو <<cin الـ library بتاعته إيه هى ؟؟
بردوه هى iostream.h يعنى مش هنحتاج نعمل include لأى library تانيه
نبدأ بقى فى المثال العملى

#include <iostream.h>
#include <conio.h>
void main()
{
cout<<"Enter The First no. : ";
  int x;
  cin>>x;
  cout<<"Enter The Second no. : ";
  int y;
  cin>>y;
  int z= x+y;
  cout<<"The Sum. is : " << z;
  getch();
}

نبتدى سطر بسطر زى ما اتعودنا طبعا فى حاجات كتير قولناها قبل كده بس نقول تانى والتكرار بيعلم
أول سطر زى ما قولنا قبل كده بنعرف الـ compiler إننا هنستخدم دوال من الـ library اللى اسمها iostream
طيب إيه بقى الدوال اللى استخدمناها فى البرنامج من الـ Library دى ؟؟؟
مش هقول علشان انا قولت قبل كده وده سؤال ومستنى اجابته
طيب والسطر التانى زى الأول بالظبط وبيقول إننا هنستخدم دوال من الـ library اللى اسمها conio.h والدالة اللى هنستخدمها من الـ library دى هى ()getch اوكش ؟؟
طبعا السطر التالت هو الـ Main method بتاعتنا وقولنا ان البرنامج هيدور عليها وتكون أول حاجه يبدأ يشغلها يدخل جواها بقى ونشوف اللى بعد كده أول حاجه بنقول لليوزر دخل الرقم الأول ودى جمله هتطبع على الشاشة زى ما احنا عارفين بما إننا كتبنا >>cout طيب وبعدين هيعمل ايه البرنامج هيعرف variable اسمه x من نوع int ومش هيديله قيمه .... فاكرين درس الـ variables طبعا وبعدين نيجى بقى لجملتنا الجديدة النهارده وهى :

cin>>x;

دى معناها بيقول للـ compiler استنى لما اليوزر يدخلك قيمة وتاخد القيمة دى تحطها فى الـ variable x وده معناه إن البرنامج هيقف هنا ومش هينفذ الكود اللى بعد كده يبقى النتيجة هتبقى ازاى لغاية دلوقتى ؟؟
هتبقى زى الصور دى

وهنا بقى مفروض اليوزر يدخل قيمة ويضغط انتر يبدأ الcompiler يكمل شغل وياخد القيمة اللى دخلها اليوزر يحطها فى الـ variable x ويشوف السطر اللى بعده
عادى جدا بيطبع على الشاشة دخلى الرقم التانى والسطر اللى بعده عادى بردوه بيعرف variable اسمه y من نوع int وملهوش قيمة وكذلك السطر اللى بعده خلاص بقى قديم هو كمان بيقول للـ compiler استنى من اليوزر قيمة وحطها فى الـ variable y ويقف الـ compiler مستنى حضرة سعادة اليوزر وتبقى النتيجة كده لغاية دلوقتى

وطبعا اليوزر يدخل القيمة التانيه ويضغط إنتر ويبدأ الكومبايلر يكمل شغل وياخد القيمة اللى اليوزر دخلها ويحطها فى الـ variable y ويشوف السطر اللى بعده وهوه بردوه سطر قديم بيعرف فيه variable جديد اسمه z من نوع int بردوه ويديله قيمة هى نتيجة جمع الـ x,y وينقل للسطر اللى بعده اللى بيقول اطبع على الشاشة نتيجة الجمع هى كذا والنتيجة النهائية هتكون كده

والسطر اللى بعده بقى بيقول استنى من اليوزر أى حرف يدخل أو أى تكة زرار علشان تنهى البرنامج
أعتقد كده الفرق واضح يا همس ؟؟؟
ولا مش واضح ؟؟
لو مش واضح قوليلى بس !!!

وانتهى كده الجزء الأول من درس النهارده
موضوع سهل وثلث وبسيط جدا جدا جدا صح ؟؟

الواجب بقى
نفس بتاع الدرس السابق لكن نخلى اليوزر يدخل الأرقام بنفسه ونطلعله نتيجة الجمع والطرح والضرب والقسمة ؟؟

نيجى بقى للجزء التانى إن شاء الله

بصراحه الجزء التانى طويل شوية ودلوقتى أنا نازل علشان هفطر بره يلا معلش هبقى وقت تانى إن شاء الله بس لغاية كده اعتبروا الدرس ده هو الجزء الأول بس وعايز اشوف الواجب إن شاء الله
.
.

[همس]

دا تطبيقي لواجب الدرس التاني يا باشمهندس محمد


وجزاك الله خيرا على المجهوود الرائع الي بتبذله معانا