اللى داخل امتحان الكادر 26/7/2011 يدخل هنا

[ندي محمد ابراهيم المليجي]

السلام عليكم اعزائي انج محمود مشتاقة

كل رمضان وانتم بخير جميعاً

دعواتكم لي جميعاً فأنا مسافرة بكرة إن شاء الله

واعذروني مقدماً في أي تقصير من الدخول بصفحتنا

ومش عارفة اريد تقديم العزاء اولا لنفسي ولمحبي اللواء عمر سليمان
فأنا فعلاً متأثرة لوفاة هذا الرجل المحترم وكنت أتمني أن يفتح كل الملفات التي لديه لنتعرف علي جزء مهم جداً في تاريخ مصر
ومرة ثانية ربنا يرحمه ويغفر له ويكون في أعلي مرتبه إن شاء الله

وسلامي للجميع وكل رمضان وأنتم جميعاً أحبائي بألف خير

[mahmoud1011]

تسافري وترجعي بالسلامه ياندى ويارب يكتبلك في كل خطوة السلامه.. يارب اجعلها اجازة سعيدة.. طمنينا عليكي دايما.. دايما بتهدينا فرحة كل ما تطلي علينا.. يارب يفرح قلبك وينولك كل اللي تتمنيه..

[eng wahab]

السلام عليكم ورحمة الله وبركاته
توصلى ياندى بالسلامة وضرورى تطمنينا عليك وعلى اهلك ان شاء الله تكونوا بخير
والله يرحم اللواء عمر سليمان ويسكنه فسيح جناته
عامل ايه فى الصيام يااستاذ محمود ربنا يقدرك على صيامه ويكتب لك حسن الجزاء
مشتاقة حاولى تكتبى لنا

[mahmoud1011]

وعليكم السلام يا انج.. الحمد لله انك بخير
انا ولله الحمد بخير وفي زحمة الشغل والدوام الطويل بيبقى صعب تنظم الامور شوية مع الصيام بس الحمد لله ماشي الحال والف شكر على السؤال.. بقول لندى منتظرينك تطمنينا عليكي وتحكيلنا عن احوال البلد بعد العودة واخبار الاهل ويا ترى رحتي المنزلة والا لسه.. عقبالي يارب

[mahmoud1011]

السلام عليكم
اخباركم ايه.. ندى: عامله ايه فينك عارف ان العزايم وزيارات الربع والاخوان واخده كل وقتك.. يارب تكوني بخير.. بس حبيت افكرك ان الشهر الكريم اصبحت ايامه معدوده..عاوزين نشوف مشأركاتك عن قريب.. انج: مستنينك.. بوجودكوا رمضان احلى..

[مازن شلبى]

حد يعرف امتحان الكادر للمدرسين الاساسيين هيكون امتى

[ندي محمد ابراهيم المليجي]

احبائي واصدقائي الاعزاء

اهديكم اطيب تحياتي من مصرنا الغالية
انا بخير والحمد لله واشكركم علي اهتمامكم انج وهاب - محمود

والأهل بخير والحمد لله
هنا رمضان له طعم ثاني غير اي مكان اخر فمع العائلة والتجمع في وجبتي الافطار والسحور سحر خاص
وربنا يديمها علينا وعلي المسلمين في كل مكان بالنعمة

الايام بتمر بسرعة وخايفة ارجع وأكون لسه ما شبعتش من ابويا الغالي ومن اخوتي

بس طبعاً مش قادرة اوصف لكم طعم الاجازة بمصر واللي مزعلني شوية إن أولادي زهقوا من مصر بسبب انقطاع الكهرباء المتواصل لدرجة أني كنت بالمستشفي والكهرباء انقطعت
فعلا موضوع صعب وخصوصا أثناء الافطار أو قبله مباشرة

والسنة دي المرور حاجة صعبة جدا مفيش نظام خالص

بس برده مصر أم الدنيا وهتفضل حلوة في عيونا

اسبكم دالوقتي وهبقي اكمل لكم يومياتي بمصر

بس مش هنسي ابعث لكم سلامي وتحياتي وربنا يطمنا دائما عليكم احبائي

[mahmoud1011]

السلام عليكم ورحمة الله وبركاته
تحية طيبة في ايام كلها خير يارب يعيدها بالخير على كل مسلم.. حمد لله على السلامه يا ندى.. الحمد لله انك والاهل بخير.. والف سلامه يارب ما تشوفوا شر.. مصر ام الدنيا اخبارها كل يوم بتزيدنا قلق وخوف.. عاوز احافظ على شوية تفاؤل بس مش هخبي عليكم حاسس بمرارة من اللي حصل على الحدود لاخواتنا واللي بيزود الاحساس ده ان اللي عمل كده مش معروف.. يارب اكشف الغمه واحفظ مصر..
مشكلة الكهرباء في ايام الحر دي بتبقى صعب قوي ترشيد ايه لما تنقطع الكهربا في عز الحر على اطفال نايمين او عن مستشفى.. الله يكون عونكم.. ويارب يعدي ايام الحر دي في مصر على خير.. ندى: زي ما قلتي رغم كل المشأكل دي بس وجودنا وسط اهلنا وحبايبنا بيهون علينا كتير.. في انتظار يوميات ندى في مصر اللي يارب تبقى كلها سعاده وفرحة..

[ندي محمد ابراهيم المليجي]

السلام عليكم جميعاً ورحمة الله وبركاته
اعزائي كيفكم وايه اخباركم

شكرا يا محمود علي ردك وطبعاً الاخبار هنا مش عاجبة احد
نفسي اسمع حاجة كويسة

الناس متضايقة بسبب انقطاع التيار الكهربائي اللي اصبح حاجة عادية دالوقتي

و اكيد زرت قبل كدة بورسعيد يا محمود وكنت بتشوف حركة البيع والشراء شكلها أيه أنا لما نزلت علي الاسواق والمحال التجارية لقيت الوضع صعب وربنا يكون في عونهم فبعد الحركة التي كانت لا تنتهي في الشراء حركة الاسواق راكدة والناس مزاجها وحش واصبحت عصبية وعلي اقل شي تتعصب

ممكن تلاقي محلات مقفولة مكنتش اتصور انها في يوم من الايام تتقفل
فعلا ربنا يسترها علي مصر عامة وبورسعيد خاصة
بس زي ما قلت لك من قبل انا قلقانة الوضع مش مريح وخايفة من ثورة ثانية

سلامي لانج وهاب ومشتاقة وربنا يطمنا عليكم

[mahmoud1011]

السلام عليكم ورحمة الله وبركاته
يارب يكون كل اخواتنا واحبابنا بخير ويارب تعود عليهم ايام الشهر بالخير والبركات..
ندى : يارب تكوني انت والاهل بخير.. بورسعيد في سنة 1998 كانت هي المدينة اللي فكرت اسافر ليها في اجازة الصيف علشان اشتغل وكمان تبقى فسحة علشان البحر و الاسواق اللي كل الناس بتحكي عنها كنت قبلها اشتريت من محل عندنا في البلد عجلة وكشاف شحن مع كاسيت بالتقسيط وكانت بورسعيد هي الحل..
كنت انا وواحد صاحبي لفينا في البلد اول يوم كتير بس قعدت وقت كتير اتفرج على القناة واركب المعدية اروح وارجع لما شفت بورفؤاد انبهرت.. دخلت صليت في مسجد كبير روعة قريب من المعدية.. علشان بحب البحر قوي لقيت اليوم خلص وما عملتش حساب حتى المكان اللي هنام فيه.. وما نمتش في الليلة دي خالص.. تاني يوم الصبح.. عدينا على محلات كتير نسالها على شغل.. اكمل بقى المرة الجاية..

[mahmoud1011]

السلام عليكم ورحمة الله وبركاته
يارب يكون اخواتي حبيابنا بخير..
ندى: يارب تكوني انتي والاهل بخير..
احداث كبيرة بتمر على مصر اليوم.. طبعا فرحان للتغيير وكان لازم منه لان طنطاوي ورفاقه انا شايف انهم ما عندش عندهم جديد ولابد من فتح جميع الملفات معاهم اللي ليهم واللي عليهم..
اسمحولي اكمل حكايتي مع بورسعيد
بعد اللف والدوران على شغل في اليوم التالي لوصولي بورسعيد.. كان محل البان الصفا بحي الازهار قريب من شارع الامين هو المكان المنتظر.. اشتغلت فيه لمدة ثلاث شهور كان العمل فيه لفترتين مساعد في تجهيز الحلويات زي الارز باللبن والمهلبية واساسا في عمل الزبادي الفريش حتى الساعة 3 صباحا.. كان في راحة الغداء لمدة ساعتين كنت اقضيها في الذهاب مشيا مرورا بالاستاد متوجها الى البحر والعودة بالذهاب الى الى شارع الحميدي والتجاري حركة لا تتوقف.. بضاعة اشكال والوان.. كنت في كل مرة اشتري هدايا لاسرتي بس طبعا في حدود المرتب مائتان وعشرة جنيها فقط لا غير.. كان السكن في بدروم والمرتبة عبارة عن عدد لا باس به من الكرتون باقي تفاصيل السكن لا داعي لذكرها بس كنت يوميا انام مجبرا على صوت اغنية وحيده كنت القهوة المجاورة تشغلها طول الليل هي تفرق كتير لفيروز..
ذكريات كثيرة حدثت لي في هذا المكان اتذكرها بالتفصيل.. وجميع اللي اشتغلت معاهم اتذكرهم جيدا رغم انقطاع الاتصال معهم بعد ترك بورسعيد.. انا متاسف للرغي الكتير ده.. بس ندى وكلامها عن احوال بورسعيد حاليا اعاد ذكريات جميلة عشتها هناك.. ندى: يارب ترجع بورسعيد زي الاول وارجع ازورها تاني..

في انتظار مشاركات اخواتنا الغايبين.. يارب يكونوا بخير..

[eng wahab]

السلام عليكم اخواننا ندى ومحمود ومشتاقة
والله انا بقى لى فترة ما دخلتش ولا قعدت على النت بنتى ورثتنى بالحياة اخدت الاب بتاعى
وانا مش راضية ازعلها غير انى ماليش قابلية ان اكتب وانا الان فى حالة صمت من كتر ما الواحد
بيفطر سياسة وبيسحر سياسة كل واحد بيعبر عن رايه بردوا الواحد بيفضفض شوية من كتر الاحداث المتلاحقة
وربنا يرفع الغمة عن مصر ويرجع الامن والامان اليها ويحل مشكلة الكهربا معلش رمضان هذا العام صعب شوية
وربنا يقدرنا جميعا وعن بورسعيد انا لم اذهب اليها ولكن ذهبت الى الاسماعيلية بس من فترة ليست بالقليلة
بس اعجبت بها كثيرا ويارب ما تكون اتغيرت كتير عن ما شفتها لانى بحب البحر والاسماك ولاانسى ايامى الجميلة
فى الاسكندرية مسقط راسى وسنوات تعليمى الى الجامعة فعندى عشق شديد للمدن الساحلية عكس زوجى
الصعيدى والى لقاء وكل عام وانتم بخير

[mahmoud1011]

السلام عليكم ورحمة الله وبركاته..
كل عام واخواتنا انج وندى ومشتاقه واحمد بخير.. وعيد سعيد عليكم وعلى كل اهلنا في مصر..
مر الشهر بسرعه جدا زي الحلم.. يارب يكون شاهد لينا مش علينا..
كل سنه وانتي طيبة يا انج وانا معاكي بلدنا فيها اماكن جميلة قوي زي بورسعيد واسماعيلية وسينا وكل المدن الساحلية ولو في تخطيط صح في الوزارة بتاعتنا او في البلد بصفه عامه يكون مسألة تنظيم زيارات منظمة بجد لاطفال المدارس لكل المدن دي ويعرفوا تاريخها وبطولاتها في اماكنها على الطبيعة اكيد المعلومه هيبقى ليها طعم تاني وهتسيب اثر اكبر في الطفل من صغره بدل ما نخلي حادثة في ماتش كورة تشوه صورة مدينه ومحافظة عظيمة زي بورسعيد.. انا شايف ان من حق كل طفل انه يشوف كل مكان في بلده على الطبيعة مش مجرد صور لا تثمن ولا تغني من جوع..
اخبارك ياندى: كل سنه وكل الاهل بخير ويارب عيد سعيد عليهم كلهم..
المشتاقه : اخبارك ايه.. مفتقدينك جدا.. ونفسنا نطمن عليكي في اقرب وقت يارب يكون اللي مانعك عننا خير..
مهما حصل طول ما اهلنا وحبايبنا بخير بإذن الله هنعيد..

[mahmoud1011]

السلام عليكم ورحمة الله وبركاته
كل عام وانتم بخير وصحة وسعادة..
اخبارك يا ندى وحشتنا يومياتك قوي..
احمد متشكرين على المعايدة وفي انتظار مشاركاتك وحشتنا جدا..
انج : خلاص المدارس قربت عاوزين نشوف مشاركاتك قبل العودة والمشغوليات وما الى ذلك..
مشتاقة: ربنا معاكي يعينك على الغربة.. حاولي تطمنينا عليكي ولو بكلمة..
تقبلوا خالص ودي..

[eng wahab]

عيد سعيد اصدقائى الاعزاء محمود وندى ومشتاقة
يارب يعيده علينا وعلى الامة العربية بالخير