حاسبات ومعلومات افضل ام هندسة حاسبات ام علوم حاسب

[Eng M-Adel]

والله يا شباب الموضوع مشوق وئلب بحماس
بالنسبه لموضوع كلية هندسة ولا حاسبات ومعلومات فأنا مقدرش اقول حاجه غير ان هندسه ليها اسمها ده غير ان انت بيبقي ليك الأولويه في الشغل ( على ما اظن ) بس ده لو في حالة انك معاك كورسات وكده زيك زي غيرك
وبالنسبه بقي للأتصالات ولا حاسبات فانا سمعت خير اللهم اجعلوا خير ان بتوع قسم اتصالات ملهمش شغل كثير في مصر وانهما كثير اوي دلوقتي والي عاوز يخش اتصالات لازم يبقى ليه حد يشغله بره مصر
اما بئي حاسبات فكله الا حاسبات مع احترامي لأي حد .. ده مجال unlimited يعني اوعى وشك مفيش حد بقي يقولك محدش بيشتغل ولا الكلام التعبان ده ... عاوز حاجه يبقى تسعى علشان توصلها يعني مش تاخد شهادة البكالوريوس وتعد في بيتكم مستني شغل .. لا لا لا مش هياكل الموضوع ده لازم تبقى برانس في القسم ده بالذات
وده رأي من وجهة نظري المتواضعه

[Eng. Alios]

يمكن انا ح يكون ردي متأخر ...

الا اني ح اتكلم ...

انا الحمد لله جات لي حاسبات حلوان ...
و انا شايف ان المعظم بيكرهك في حاسبات و معلومات , مش عارف ليه ؟

أولاً : كلية الحاسبات و المعلومات دي اول ما طلعت كان تنسيقها اعلى من هندسة ... لكن دي اول ما طلعت !
ثانياً : رغم انها قلت في التنسيق السنة دي ... الا انها من اجمد الكليات في مصر !

سيبك من علوم حاسب , لان كله بيركز على الرياضة ...

و تعال اوضح لك الفرق :

هندسة الكمبيوتر اللي في كلية الهندسة : تهتم بالهاردوير اكتر من السوفتوير ... هما بياخدوا سوفتوير بس بيشتغلوا بيها على حاجات معمولة قبل كده , يعني مافيش جديد ... و الجديد هو الهاردوير ...

طب ليه الناس بتقول مالهمش اكل عيش ؟
لان مافيش مصنع في مصر يقدر يصنع بلاستيك ... فتتخيل ان مصر تصنع حتة بروسيسور ؟ او حتة هارد ؟ ... ما أظنش ..
و الكلام ده من خريجي هندسة كمبيوتر بنفسيهم ... انا مكلم كازا واحد يعني ...

فلو معاك فلوس و ريس مال حلو ... افتح مركز صيانة , و ح تكسب من ورا دهب ...
معاكش فلوس ... يبقى مافيش غير انك تتميز في قسم هندسة الحاسبات و تبقى من الاوائل علشان تشتغل في مايكروسوفت ...

--------------------

تعال بقى اوضح لك حاسبات و معلومات , على هيئة اسئلة و اجابات :

- بيقولوا حاسبات و معلومات مابيشتغلوش , هل ده صحيح ؟
لا , مش صحيح بالمرة ...

أولاً , وزير التنمية الادارية قال ان البطالة تكاد تكون معدومة في مهندسي البرمجيات ( اللي هما خريجي حاسبات و معلومات ) , يعني مافيش بطالة ...
ثانياً , مافيش واحد في اي قسم في حاسبات و معلومات قاعد مابيشتغلش , كلهم بيتخطفوا , لان العدد صغير في كل كليات الحاسبات , و بالتالي بيتخطفوا ...
ثالثاً , كل الكليات بتاعت حاسبات بتبقى عاملة في الآخر حاجة اسمها ملتقى التوظيف , دي بتيجي كل شركات الكمبيوتر زي اوراكل و مايكروسوفت , و بتختار الناس بدءاً من اللي جايب امتياز فالأقل فالأقل ...
و طبعاً مافيش حد بيتخرج و بيشتغل الا لما يكون جايب جيد على الاقل ....
رابعاً , خلال دراستك في الكلية , عليك كورسات اجباري علشان تاخد شهادة icdl , و كورسات برمجة زيادة كمان ....

- طب اسمي ايه لما اتخرج من الكلية دي ؟

اسمك على حسب قسمك ....
يعني ..

في كل كليات الحاسبات في تلات اقسام اساسية :
- علوم الحاسب : و ده قسم في كلية الحاسبات و المعلومات , و ده اهم قسم و يعتبر احسن , و كله بيدخله ... و مسماك الوظيفي في مصر حالياً قبل النقابة : اخصائي حاسب ..
الاسم مش ح يبقى عاجبك , علشان انت في مصر ! , لكن في امريكا و دول العالم الاول اسمك : مهندس برمجيات .
- نظم المعلومات : برضه ده قسم في منتهى الجمال , و اسمك برضه : اخصائي نظم معلومات , و في امريكا : مهندس معلومات.
- تكنولوجيا المعلومات : قسم جامد قوي قوي , و اسمك في امريكا : مهندس شبكات .

تعال بقى علشان في اقسام زيادة في بعض الجامعات :

- جامعة عين شمس و فيها :
- قسم الحسابات العلمية : و ده قسم ممتاز , و لما تتخرج ممكن تشتغل في مركز الحساب العلمي اللي في جامعتك , و المركز ده من اهم المراكز اللي في الجامعة ... لان هناك انت بقى اللي بتدير مواقع الجامعة على الانترنت , و انت اللي بتدير كل اجهزة الكمبيوتر هناك .... يعني شغلانة حلوة ,و مرتب حلو , لان انت شغال تابع الجامعة و في اهم مركز فيها ....
- قسم نظم الحاسبات : ده بقى شبيه بقسم هندسة الحاسبات لكن مش بقوته , لانه بيركز على البرمجة اكتر بقليل من الهاردوير ... القسم ده بتتعلم فيه ازاي تربط البرمجة بالهاردوير .... يعني ح تاخد حبة من ده على حبة من ده , القسم ممتاز , لكن مسماك الوظيفي ايه .. الله اعلم
- قسم العلوم الاساسية : و ده بتاخد فيه اساسيات الكمبيوتر , و كله رياضة و فيزيا ...
- قسم نظم المعلومات الحيوية : و ده قسم خاص و جديد جوة الكلية ... طبعاً ده بمصاريف فوق الـ 12 الف جنيه في السنة , و لو انت طالب علمي علوم , ف ح تدخل القسم و تاخد رياضة 2 في اول سنة , و لو انت طالب علمي رياضة ح تاخد احياء في اول سنة ..
طبعاً القسم ده في منتهى التميز , لانك بتتعلم فيه ازاي تدرس الشرايح الالكترونية اللي بتعالج البني آدمين من اشد الامراض , و ازاي تبرمجها و تجربها ... القسم ده يُقال انه شبيه بالهندسة الطبية , الا ان نظم المعلومات الحيوية تركيزه على الكمبيوتر اكتر ..
طبعاً بالاضافة الى : علوم حاسب , و نظم معلومات .

- جامعة القاهرة و فيها :
- قسم بحوث العمليات و دعم اتخاذ القرار : ده بقى شغلك ح يبقى تابع الحكومة , بس ده القسم الوحيد اللي لازم له واسطة , علشان تشتغل في الحكومة , و ممكن تشتغل تابع رياسة الجمهورية ...
او تحاول تتميز و تشتغل بره مصر ...
- قسم نظم المعلومات الجغرافية : و ده قسم يُقال انه خاص , لكن مافيش اي معلومات عنه , لكن واضح من الاسم , انك بتاخد بقى ازاي تدرس الرادار و كده ... شغله حلو على فكرة ..
بالاضافة الى التلات اقسام : علوم حاسب و نظم معلومات و تكنولوجيا معلومات .

- جامعة حلوان و فيها :
- قسم هندسة البرمجيات : ده بقى اجمد قسم ... و ده ح افصله لك علشان تطمن ...
أولاً , جامعة حلوان هى الوحيدة اللي فيها القسم ده , يعني القسم ده مش موجود حتى في الجامعة الامريكية .
ثانياً : هو قسم خاص , بس فلوسه تعتبر رخيصة بالنسبة للقسم بتاع عين شمس ... يعني السنة الواحدة تعمل 6500 ...
ثالثاً : ح تبقى ضامن شغلك , لان اسمك مهندس برمجيات رسمي في مصر , و مهندس البرمجيات ده مش شوية , و في وجهة نظري مهندس البرمجيات ده زيه زي مهندس البترول ... مرتباتك ح تكون خيالية ...
رابعاً : هندسة البرمجيات هنا ما بتركزش على البرمجة العادية , بل ح تاخد برمجة متقدمة , ح تبص للبرمجة من فوق بقى , لان انت ح يبقى ليك تبرمج الحاجات الكبيرة : ويندوزات , برامج اوفيس , برامج ادارة بنوك و شركات , مواقع انترنت ضخمة ...
و طبعاً خلال دراستك , عليك اجباري كورسات في الصيف , ح تاخد كورسات برمجة علشان تزود بيها نفسك و كورسات icdl ...
و مهندس البرمجيات ح يبقى افضل من خريج قسم علوم حاسب , لان مهندس البرمجيات بيشرف على البرامج و بيشوف ايه الغلط فيها يصلحه , و يحاول يعدل في حاجات في البرنامج .. علشان يسلم البرنامج للعميل في اقل وقت ممكن و بجودة عالية ..
و عموماً مهندس البرمجيات مابيستغناش عن علوم حاسب , و نشبه ده بمثال ....

تخيل ان انت مهندس معماري و جه واحد عاوز يبني بيت , انت ح ترسم و تحط اساساتك , و ح تودي رسمك للمقاول و تقول له نفذ ...
اهو المهندس المعماري هو مهندس البرمجيات ...
فتخيل ان واحد جالك عاوز برنامج ... انت مهندس برمجيات ح تخطط للبرنامج و تحط اساساتك , و عليه المبرمج ( خريج علوم حاسب ) ينفذ على اساساتك ...

طب في سؤال : - انت مش قلت ان علوم حاسب ح يبقى اسمه مهندس برمجيات بعد كده ؟
- آها ... بس لما تيجي منافسة في شغل , ح تكون الاولوية لمهندس البرمجيات الرسمي اللي هو خريج هندسة برمجيات , مش لعلوم الحاسب , لان مهندس البرمجيات بتاع علوم حاسب مش مهندس رسمياً , لكن انت تخصصك رسمي ...

فقسم هندسة البرمجيات يعتبر افضل ... و لا يمنع ان بقية الاقسام في منتهى الجمال ...

------------------

و على العموم فيه معلومة برضه ...
قسم علوم الحاسب اللي في الحاسبات و المعلومات , من المحتمل يتغير الى هندسة برمجيات ... لكن امتى , محدش يعرف , و لحد دلوقتي ماحدش وصل لاتفاق .... ساعتها لو انت دخلت القسم اللي في حلوان ده , ح تكون اشتغلت و استريحت , و يكون الاسم اتغير على نظام الثانوية العامة الجديد ...

- حكاية النقابة دي هى اللي باعداني عن الكلية , هى ح تتعمل امتى ؟

النقابة دي هى ح تبقى الحاسم بعد كده , و على العموم مشروع النقابة مازال النقاش فيه , لكن اساسياته ح تتطبق , و احتمال تبدأ اساسياته من السنة الجاية او اللي بعدها ...
و لو ما اتعملتش نقابة , ففي حاجة اسمها الجمعية المصرية لمهندسي البرمجيات , فمن المحتمل ان تكون الجمعية دي تتغير اسمها و تبقى نقابة مهندسي البرمجيات ... ( إن لم يوجد أمل )

- يعني الكلية دي ليها مستقبل ؟
الكلية دي الوحيدة اللي مش محتاجة وسايط في اي شغل , ما عدا قسم اتخاذ القرار ده .... لكن بقية الاقسام , مافيش حاجة اسمها وسايط , لانه بكورساتك و دراستك ح تقدر تشتغل , و كمان الشركات بتيجي لحد عندك في الكلية , مش انت اللي بتروح و تطلب ...
و على العموم زي ما قلت , مسمعناش عن واحد خريج حاسبات و معلومات و ما اشتغلش ...

- يعني ادخلها و امري الى الله ؟
لأ , لحظة ...

انا بقى ح اسأل لك سؤال : - ميولك كمبيوتر ؟ ميولك برمجة ؟

لو ميولك برمجة كمبيوتر , يبقى ادخل حاسبات و معلومات ... و اسمك مهندس برمجيات ...
لو ميولك صيانة كمبيوتر , يبقى ادخل هندسة حاسبات ... و اسمك مهندس حاسبات ...

و خلي بالك ... اللقب بتاعك ده آخر حاجة تفكر فيها ... لانك لو فكرت فيها اول حاجة , مش ح توصل لحاجة ..

طب و العمل علشان حكاية الشغل دي ؟

- مافيش ..... حاجة بسيطة قوي ....
عايزينك تطحن نفسك في المذاكرة من اول يوم في السنة ....

- يا عم مش للدرجة دي ... اول يوم ؟

آها , أول يوم ....
لان الاولوية هنا بقى للمتميز ....
انت ناسي ان مايكروسوفت بتاخد العشرة الاوائل من كل كليات الحاسبات و المعلومات و تشغلهم عندها ؟

- يا سلام ... طب كمل كمل ...

زي ما قلت لك , من اول يوم تطحن نفسك في المذاكرة ...
تزود نفسك في الكورسات ...
تتميز و تجيب امتيازات كل سنة , و لو جيد جداً ما يضرش ...
المهم تتميز ...
و تحب دراستك و مجالك اللي انت فيه ...
و صدقني , الشغل ما بيقولش لأ للمتميز ...
كمان ما تنساش صلاتك و قرآنك ...
لأن دول ليهم تأثير فعال في حياتك ... ح يشفيك و يريحك ...
و تحمد ربنا دايماً ...
و سيبك بقى من البنات و الاستهتار , لان دول بيضيعوا ...
و ساعتها تقول ياريت اللي جرى ما كان ...

و اي استفسار , فانا موجود ان شاء الله ...

[m_fci]

أنا أحب ان أعرفكوا ان المقارنة في الغالب ليست في موضعها لأن كل حاجة من قسم من دول ليس في محلة
وأنا أحب أن أتكلم عن رأيي الشخصي بما أنني خريج كلية الحاسبات والمعلومات جامعة المنوفية وأعمل في هذا المجال من فترة كبيرة وكان على سنتي كلية الحاسبات والمعلومات بتاخد أعلى من هندسة بكتييييييير في التنسيق طبعا وبما أننا في مصر والناس بصه للأسم والمسميات كان قدر هذه الكلية من أول ما أنشأت كان الاستهانة وعدم وضعها في قدرها الحقيقي
أولا أنا شايف ان الكلية دي مش وخده حقه أعلاميا وان وضع الكلية العلمي والهندسي أكبر بكتير مما أي أحد يتخيل
فالكلية من أول يوم وهي في أنطلاقة وتحرر كان المفروض يكون من زماااان ولكن الكلية أصبح بها تخصصات لا يوجد في مصر كلها ما يعوض هذا العجز وهذا الحاجة الكبيرة لهذه التخصصات التي لا غنى عنها في كل المجالات
وأنا من واقع شغلي بقول لأي حد عمال يقول الهندسة أفضل لأن أسمها حلو أقوله أن كلية الحاسبات والمعلومات تخرج بالفعل أفضل مهندسي مصر من الناحية المهنية والأكديمية وذلك من واقع شغلى والأن أصبحت الكلية في أنطلاقة كبيرة وأصبح يوجد هناك تخصصات وعلوم تدرس لم تكن موجودة من قبل في مصر.
وانا من رأيي أن الكلية دي كان لها الفضل والمنة على كثيييييييير من الشركات المصرية والشركات العالمية أيضا فأنا لا أرى أحد تخرج من كلية الحاسبات والمعلومات وكان مصيرهم الكافتيريا أو القهوة زي مكان حال معظم اصحابي الي دخلوا هندسة والناس دول بتوع هندسة حتى لما أشتغلوا أشتغلوا في شغل مهيييين وفي موضع مخالف تماما لما كانوا يحلوا بيه وفي الغالب في الوقع العملي كلية الحاسبات والمعلومات تفوق بكثييييير غيرها لان الكلية كما ذكرت من قبل كلية متحررة تدرس كل ما هو جديد في التكنولوجيا وبها هيئة محترمة من المدرسين الذين تفتخر بهم مصر وأيضا هي كلية إكسترييم كما يعبر عنها الجماعة الأمريكان لا يعرف قدرها إلا الي بيحب المجال وبيحب يكون متميز وعايز يتعلم لكن بالنسبة لكونها أربع سنوات وليست خمسة فلم أرى دولة في العالم من الدول المتقدمة إلا ويدرس بها العلوم الهندسية المختلفة من ثلاث إلى أربع سنوات ولكن الجماعة هنا في مصر فاكرين أنهم بيتعبوا لما خدوا سنة زيادة عننا ونسيوا أنهم بيدرسوا العلوم التى عفى عليها الزمن وبإعتراف من كثير من الأساتذة الجامعيين يرون أن هذه المنهاج لابد أن تتغير بأسرع ما يمكن ولا يظلون في مرحلة المسطرة حرف تي الي طولها مترين دي ويبدقوا يشوفوا الدنيا فيا أيه وانا عارف أن التطور في العلوم الهندسية موجود بالكليات بس بالصورة البطيئة التي تقيد الإبداع والتطوير. ولازم برده كلنا نبقه عرفين أن الكلية ما هي إلى بداية وليست النهاية فلابد أن يكون الأنسان طموحا وأن يقرا كثيييييرا ويتابع كل ما هو جديد فا موضوع ان الكلية أربعة ولا سته مش فرقة لأن الموضوع منتهاش بعد التخرج من الكلية وأستخراج كرنية النقابة . وللحديث بقية والسلام

[Ayman Azzam]

شباب ممكن اعرف ايه اخبار هندسة معاكم دلوقني بعد التخرج ؟؟ =d