|
||||||
| اجتماعيات طالب قسم خاص بالطلاب للتعارف و تبادل المعارف و الحلول للمشكلات التعليمية |
| مشاهدة نتائج الإستطلاع: ايه هي أحسن مادة عندك؟ | |||
| 1. لغة عربية |
   
|
10 | 6.21% |
| 2. لغات ( اولي - ثانية ) |
  
|
28 | 17.39% |
| 3.جبر وحساب مثلثات |
  
|
21 | 13.04% |
| 4.هندسة مستوية |
  
|
10 | 6.21% |
| 5. أحياء |
  
|
21 | 13.04% |
| 6. فيزياء |
  
|
24 | 14.91% |
| 7. كيمياء |
|
27 | 16.77% |
| 8.جغرافيا |
|
6 | 3.73% |
| 9.تاريخ |
|
9 | 5.59% |
| 10.فلسفة ومنطق |
|
5 | 3.11% |
| المصوتون: 161. أنت لم تصوت في هذا الإستطلاع | |||
 |
|
|
أدوات الموضوع | انواع عرض الموضوع |
|
#406
30-07-2009, 05:14 PM
|
||||
|
||||
اقتباس:
 على فكرة ال15 صفحة دول لأكتر من سري جداً يعني كذا واحد كان عارض مشكلته هنا لو عندك مشاكل انت كمان اعرضها ومتخفش مش حقول لحد عليك
__________________
It was over 3 years since my last visit  |
|
#407
07-08-2009, 05:49 PM
|
||||
|
||||
|
طبعا مع احترامى لكل الاراء الا ان كم وكيف المذاكره ودرجة حب الماده عليها عامل كبير جدا جدا هى اللى بتحدد يعنى مثلا ماده زى الكيمياء انا كنت بعشقها فكنت متفوقه فيها وعلى طول الاولى على مجموعتى والمجموعه كمان عليها عامل مهم جدا فى المذاكره يعنى مثلا لو مجموعه شاطره او مختلطه(بنات وصبيان)مفيش حد بيحب يتكسف قدام حد خصوصا فى الظروف دى فتلاقى الكل بيذاكر ويحب يتفوق وده بيدى حافز ويا سلام كمان لو فى حد بتحبو فى المجموعه دى سواء المدرس او زمايلك حتلاقى نفسك حابب تروح الدرس وبالتالى تفهم وتذاكر الماده وتستمتع بيها وكمان طبعا دوافع الشخص والهدف اللى عايز يحققه(مذاكره علم نفس كويس ههههه) عن نفسى هى دى الحاجات اللى قصرت معايا وخلتنى اتفوق الحمد الله وعالفكره انا دخلت صيدله يعنى كليه حلوه الحمد لله معلش طولت عليكو وهو ده راى فاى حد عنده اعتراض او تحفظ على اى نقطه فيه او راى مخالف احب اسمعه ونتناقش ان شاء الله وشكرا
__________________
من الجميل ان تبتسم فى الموقف الذى يتوقع فيه منك الجميع ان تبكى hapyhopa
|
|
#408
08-08-2009, 01:22 AM
|
|||
|
|||
|
ازيكو يا جماعة
بعد السلام انا 2 ثانوى و مرحلة الثانوية الصعبة جدا ربنا يوفقنا يارب وغالبا داخل على موضوع حب وارتباط عاطفى وخايف من الموضوع ده ياثر على مذاكرتى او تركيزى مع العلم انى هعرف افرق كويس اوى بين كل حاجة وانى هدفى السنتين الجايين فوق الطموح العادى وان شاء الله ربنا يكرمنى بس برضو انا لسه خايف جدا رايكم ايه وياريت تشاركونى |
|
#409
08-08-2009, 04:53 AM
|
|||
|
|||
|
اقتباس:
اولا :
مرحلة الثانوى مش صعبة ولا حاجة المهم انك مش تديها اكبر من حجمها ولا اقل يعنى تعمل اللى عليك .. بس من غير ضغط نفسى وتوتر وحاول تحب الحاجة اللى بتعملها عشان تبدع فيها وطالما هدفك فوق الطموح العادى يبقى لازم تشتغل عشانه كويس جدا واعرف ان اى تقصير هاتلاقى نتيجته ف الاخر انا السنة دى مثلا قصرت ف مذاكرة العربى طول السنة ومع انى حليت ف الامتحان كويس جداا وكنت متأكدة انى مش هانقص جبت 26 ونص والاقتصاد ذاكرته كويس جدااا طول السنة ودخلت الامتحان كان طويل .. مالحقتش اراجع بعد ما جاوبت طبعا وحسيت انى ممكن انقص فيه .. بس الحمد لله جبت فول مارك اللى اقصده ان نتيجة اللى بتعمله سواء كان تعب ومجهود او استهتار ولعب هاتلاقيها ف الاخر ولو مالقيتهاش ف النتيجة اخر السنة هاتلاقيها ف كليتك بعد كدة او ف شغلك عشان كدة بجد اعمل اللى عليك كويس جداا كفاية احساس ان ضميرك مرتاح بانك مش مقصر احساس تحفة اصلا ومش هايخليك تحس باى قلق حاجة كمان لازم تحسن علاقتك بربنا وتحافظ عليها وده مش على مدار السنتين دول بس .. هاا وخصوصا تحافظ على الصلاة لان اللى مش بيصلى بيكون خرج من الاسلام  .. .. .. .. .. .. ثانيا : حكاية الارتباط العاطفى دى هانبصلها من ناحيتين الناحية الاولى :.. انا درست ف علم النفس السنة دى ف اسس الاستذكار انك عشان تكون منتبه للحاجة اللى بتذاكرها لازم تفضى دماغك من اى مشكلة نفسية او اى حاجة تشغل تفكيرك ماتقولش انا هاعرف افصل .. كان غيرك اشطر زى ما بيقولوا وانت لو بجد عندك طموح وهدف عايز توصله هاتلاقى نفسك مش بتفكر ف اى حاجة تانية بس لو فكرت ف حاجات تانية يبقى انت بتوهم نفسك ان عندك طموح ف حاول تعرف كويس انت عايز مين فيهم .. الارتباط ولا الهدف على كل حال نسبة النجاح ف انك توفق ما بين الدراسة واى حاجة تانية متهيألى ماتزيدش عن 1% او اقل كمان وانا باتكلم عن نماذج حصلت فعلا قدامى ولو انت من ضمن الـ1% دول ماكونتش هاتكتب الرد ده ودى حاجة انا متأكدة منها لان مجرد انك خايف ده معناه انه ماينفعش فكر ف نفسك ومستقبلك وفرحتك لما تحقق هدفك وبرضو فكر ف نفسك واحساسك لما تضيع هدفك والاتنين ف ايدك توصلهم ان شاء الله بمجرد انك تختار اللى عايزه .. والناحية التانية بقى :.. ف السن ده ناس كتير بتعيش تجارب وارتباطات وبتفشل لان لسة هما مش قادرين يختاروا صح ف بمجرد انك تحس انك معجب بحد بتكون عايز ترتبط بيه وبعدها بفترة الارتباط ده ينتهى طبعا بعد ما تكون ظلمت نفسك وظلمت معاك واحدة كل ذنبها ان هى كمان ماعرفتش تقدر الوضع صح صدقنى بجد الغالبية من التجارب دى بتكون وقتية وفاشلة ماتقولش انا هاكون من الاقلية اللى بتنجح لان خوفك وسؤالك ده معناه انك مش متأكد من اى حاجة ولا متأكد من مشاعرك ولا متأكد من انك هاتقدر تنجح وتوصل لكل اللى عايزه اوقات بيكون لازم تضحى بحاجة عشان حاجة تانية افضل واهم والحاجة اللى انا واثقة انك هاتندم لو ضحيت بيها هى مستقبلك الحاجة التانية ممكن تتضايق شوية لو سيبتها .. بس بعد كدة هايكون عادى احتمال بعدها بفترة تقول انا ازاى كنت بافكر كدة ربنا يوفقك يا رب ويحميك وان شاء الله تحقق الهدف اللى عايز توصله .. فى رعاية الله وآسفة انى طولت بس كان لازم آخر تعديل بواسطة Rien ، 08-08-2009 الساعة 05:00 AM |
|
#410
08-08-2009, 10:11 PM
|
|||
|
|||
|
اقتباس:
أنا يمكن خوفى من موضوع الإرتباط هو إنى خايف أكون مشتت، كل هدفى الفترة دى إنى أكون مكرس كل مجهوداتى وتفكيري وتركيزي تجاه الكتاب إللى قدامى عشان هو اللى حيوصلني، يعنى انا مش خوفى يعنى قلقى أو إن أفكارى غير منظمة ومتداخلة، أنا خوفى من إن المرحلة الأهم فى حياتى إللى نويت أدخلها بقلب جامد إن شاء الله تناوشها أمور تانية مش ده وقتها.. لكن حضرتك أكيد عارفة إن شعور كل واحد فينا مش بإيده يتحكم فيه ويغيره أو يأجله، أه طبعا أنا أقدر أحجمه وأديله حدوده، لكن مقدرش وقت المذاكرة أمسحه من دماغى! وده هو خوفى الحقيقي انا يمكن اللى كان بيديلى احساس انى ادخل المرحلة دى "بحرص" ان ممكن تأثيرها عليا يكون إيجابى ودورها تشجيعى ليا إنى أعمل أقصى ما عندى عشان أقدر أوصل للطموح إللى أنا عايزه، لكنى متأكد متأكد متأكد وعلى يقين تماماً إنى علاقتى بيها مش هيكون له أى لازمة بدون ما أوصل لأعلى مكانة إن شاء الله عشان أكون جدير بكده، وعشان كده أنا مشتت جداً، وأكيد أنا خبرتى قليلة لسه، بس بعرف أوزن الأمور والكلام، وعشان كده كنت بطلب المساعدة من أهل الخبرة. وألف شكر لحضرتك على الإهتمام ، ربنا يخليكى |
|
#412
23-08-2009, 06:54 AM
|
||||
|
||||
|
أهل سلف .. وطن سلف
اذيكم يا شباب المستقبل (بنات وولاد )
كنت قلت انا وايمان ان احنا هنعمل فكره لذيذه كده -من رايي يعنى -ان احنا هنجيب مشكله عجبتنا وبيعانى منها ناس كتير ممكن يكون انا ممكن تكون انت ونحاول نعالجها احنا مع بعض وفى الاخر نجيب رأى جايب الخلاصه المشكله دى بجد خلتنى اضايق واعتقد ان اى حد هيقراها هيحس انه قرفان اوى من بلده من النظام من كل حاجه اسيبكم معاها ونتناقش بعد كده  أنا عمري 21 سنة، أنا مخنوق من أهلي ومن الدنيا كلها.. ماعندكمش أهل سلف؟! طبعا أنا ماقصدش.. مهما خنقوني فهم أولى بيّ وأنا أولى بيهم.. المشكلة إنهم فاكرين إني دايماً عايش في رغد المعيشة وإني تمام ومش ناقصني حاجة، بس يمكن عشان أنا بطلت أطلب منهم من زمان، من ساعة ما حسيت إنهم بيتطحنوا في الحياة عشان يأكلوني ويلبسوني! أنا ناقصني إن حد يقول لي: "مالك؟ إيه اللي مزعلك؟ عملت إيه النهارده؟ مش نفسك تتجوز؟! إيه أخبار الكلية معاك؟" الكلية اللي أنا طالب فيها مع إيقاف التنفيذ، وماشي فيها بخطوات سلحفاة ومش بإيدي؛ لأني لا معايا آخد كورسات، ولا الكتاب نافع، ولا هو بينزل أول السنة ولا أنا معايا 60 جنيه أسبوعياً عشان أحضر محاضرات، ولو حضرت وسافرت فهل الدكتور كمان هييجي من الإسكندرية لدمنهور ولاّ لأ؟! ولو جِه، أنا هافهم منه وهو قرفان مني، ودايما فاكرنا أغبياء وبيتكلم بالقطارة؟؟ والله وأنا في سنة أولى كنت طالب مجتهد، وكنت باحضر وأذاكر وكمان كنت باشرح لزمايلي المحاضرات، لكن بصيت لقيت نفسي شايل في سنة أولى 10 مواد!! طيب كنت باذاكر ليه، ومقطّع نفسي على إيه؟ ومن ساعتها بقت الكلية الحلم الضائع.. وبعدين لمّا أخلصها وأروّح، فين أهلي؟ مش عايزين يفهموا كده طبعا، دايما بيسألوا: "أمال الناس اللي بتنجح دي بتنجح ازاي؟"، وأنا نفسي ألاقي أي رد عشان أقوله لهم بس مش عارف. ازاي أهلنا بيطلبوا منا إننا نكون مثاليين وزي ابن فلان وبنت علان اللي هم شايفينهم حلوين. مايعرفوش اللي أنا أعرفه عنهم، وأهالينا أساساً مش مثاليين، ازاي أنا مش باعرف أقرأ واقول لك: "اقرأ".. ازاي؟!! كده حرام، علِّمني القراءة وبعدين ابقى عاقبني إني مش باقرأ. يعني وفّر لي ظروف الطالب الناجح وبعدين اسألني إنت بتسقط ليه. واللي أكتر من كده إنهم كل شوية بيقولوا: "يا فاشل يا ساقط، إنت مش راجل، ومالكش لازمة"، تخيل؟! طيب لو ماليش لازمة ربنا كان خلقني ليه؟ وبعدين اللي في نفس سني بيعملوا إيه غير إنهم ياخدوا المصروف ويخرجوا يتفسحوا ويهزروا.. والله أنا عمري ما خرجت مع بنت، وأنا عندي واحد وعشرين سنة دلوقتي، ولا انبسطت! هافرح إمتى؟ لما أكون صاحب عيال؟! طول عمري في حالي وماليش دعوة بحد.. باشتري طقم واحد كل سنة ونص وراضي، مش عارف أدخل سينما وهي حبي الأول لأنها بتقعدني في البيت 3 أيام مانزلش عشان يكون معايا 12 جنيه أدخل بعشرة وأركب مواصلات وأشرب القصب قبل وبعد السينما وراضي.. طيب أجيب كريم للشعر منين وماكينة حلاقة منين، ولو اتهفّيت في عقلي وحبيت أحط بارفان؟؟! دي طلبات أساسية وبسيطة لكن..... بطلت سجاير عشان مش معايا تمنها وكمان عشان كنت باتخنق من الناس اللي بيطلبوا مني سجاير، وأنا مش باعرف أقول لأ!! أو أكدب، مش بُخل لكن لأنها بحساب يعني، وكده الجدول هيبوظ! ده أنا عشان أشتري كتاب عاجبني وأنا من مدمني القراءة باحسب ألف حساب، عشان أشتري الجورنال اللي بحبه وأنا مصروفي 4 جنيه، منهم جنيه للنت، والباقي مواصلات أو تمن كوباية عصير القصب اللي بيسعدني، أو باكو مناديل أو مصاريف استثنائية كتير قوي. وكمان زي ما بطلت التدخين بطلت أروح جيم؛ لأنه كان بـ2 جنيه.. مش حاجة يعني، بس كانوا بيفرقوا معايا جدا.. أنا باكون في أشد الحرج لما أركب مواصلة ويكون فيها حد أعرفه، أو هو راكب معايا وأنا مش معايا غير تمن نفر واحد، وأنا مش عايز حد يدفع لي.. باكون مش عارف أدفع لوحدي وكده هيقول عليّ كلام، أو هيظن ظنّ مش كويس، ولاّ أعمل عبيط! أنا مش عايز حد يدفع لي ويكون ليه جميل عليّ، ومن أكبر المشاكل اللي عندي بقى إني مش قادر أحب.. ماعنديش الإمكانيات إني أحب.. أنا مش عايز مصروف زيادة من أمي؛ لأنها كتّر خيرها لحد كده،. بس طالب منهم يحسوا بيّ، دايما فاكرين إني عايش مقضيها زي الشباب الهايف اللي مش فاهم حاجة عن الدنيا ولا عن بلده واللي حاصل فيها، كل كلامي ياخذوه باستهزاء، فعلا ماحدش بيحس بالإنسان غير نفسه، أنا مش عارف إيه الحل في البلد دي.. حسبي الله ونعم الوكيل.. مش لاقي حل.. كل ده وماحدش من أهلي -لا أبويا ولا أمي- حاسس بيّ، لأن الاثنين منفصلين، وأبويا مش بيسأل عليّ، وأمي الغلبانة عينيها طالعة عشان نلاقي نأكل، هي مدرسة بقالها 19 سنة، مدرسة أولى ومرتبها 290 جنيه، وأنا عندي أختين بنات، منهم واحدة في ثانوي وواحدة عايزة عريس وأنا ماعنديش أي أمل إن بكرة يتصلح.. سنة بتفوت وراء سنة وأنا حاسس إني باعجِّز وقلبي بقى كله تجاعيد وأنا عندي 21 سنة وعندي اكتئاب وكاره الدنيا.. والله ساعات بامشي في الشارع عايز أضرب الناس ويضربوا فيّ لحد ما أرتاح، بس أرجع أقول هم مالهم؟ إنت هتتجنن ولاّ إيه؟! كل ما أشوف البنات اللي ماشية خاربة الدنيا، والشباب اللي بيدخن السجاير الأجنبية اللي تمنها يساوي مصروف يومين ليّ وبيفكر النهاردة هنسهر فين وراكبين عربيات شبابي، ومعليين الكاسيت، وأنا واقف مستني الأوتوبيس أو الترام، وألاقي عربية مكيفة فيها كلب مطلع لي لسانه بيغيظني وبيقول لي: "أنا كلب بس واخد حقي، راكب عربية وإنت مش لاقي النقل العام يا (.....)". كل ده أبويا وأمي مش حاسين بيّ، ولا كمان أصحاب البلد اللي المفروض إنهم بيشتغلوا عندنا، هو ده اللي أنا طالبه.. طالب إن الناس كلها تحس ببعضها وماحدش يلوم على التاني غير لما يعرف ظروفه.. ولاّ ليه يلومه؟! طالما مش هيساعده، يسيبه في حاله عايش في اللي هو عايش فيه، ويوفر عليه حرقة الدم.. يا رب كلامي يوصل في وسط الزحمة.. حتى لو ما وصلش أديني اتكلمت وفضفضت مع الكمبيوتر يمكن يشوف لي حل!! |
|
#413
23-08-2009, 03:02 PM
|
||||
|
||||
|
كفاية رغى
فكرة ممتازة يا اسمك ايه
:::::::::::::: بس الشخص دا مسود الدنيا اوى مش مستاهلة كل ده هو ذكر فى الاول انه اهله مطحونين علشان يوفروله اكل وشرب ولبس اذا هو عارف ظروفهم ومستواهم المادى ودا شىء فى حد ذاته كويس بس بعد كدا قال ان فى فجوة بينه وبين اهله فجوة اسرية يعنى محدش بيسأل عنه ومحدش بيسأل فيه اكيد هو عارف انهم عايزينه يبقا احسن شخص فى الدنيا وبيحاولو على قد ما يقدرو يوفروله احتياجاته بس ما باليد حيلة ااذن هو عنده فجوة اجتماعية لانه مش مقرب اوى لاهله ودا شىء يخليهم مش يحسو بيه او ميكونش عندهم دراية بظروفه النفسية فياريت يحاول يقرب من اهله شوية يتكلم معاهم يحكيلهم اكيد هيحسو بيه بس المشكلة النفسية دى ناتجة عن الظروف المادية لان ظروفه المادية زى مهو واضح من كلامه مش كويسة ومش راضى برزقه اللى ربنا قاسمهوله كلنا بردو ظروفنا مش اد كدا مش كل يوم فى سينيمات ولا نوادى ولا ديسكوهات ولا خروجات بردو ومع ذلك راضيين بللى ربنا قاسمهولنا الرسول بيقول ارضى بما قسمه الله لك تكن اغنى الناس ) او فيما معناه والحياة مش كويسة علطول ولا وحشة علطول كل واحد فينا له ظروفه ويوم حلو ويوم وحش الدنيا مش بتثبت على حالة وبكره زى ما بيقولو تروق وتحلى كل اللى عليك انك تصبر وربنا هيعدلها ان شاء الله وبخصوص الكلية هيا الكلية دى النجاح فيها بالنصيب كدا مش شرط انك تزاكر وتنجح دا بيبقا تبع مزاج الدكتور واللى يشترى الكتاب ينجح غير كدا ممكن مينجحش ربنا يهدى الدكاترة بس مش معنى كدا انك تستسلم وتحط ايدك على خدك لا لازم تزاكر تانى وتحاول تكون افضل وربنا بردو مش بيضيع تعب حد ان الله لا يضيع اجر من احسن عملا وبالنسبة للظروف المادية ممكن انت تظبطها شوية تشوف شغلانة بجانب الكلية اهى هتحسن الوضع المادى شوية متسودش الدنيا كدا ودايما متبصش للى اغنى منك لا بص للى حالته اقل منك هترتاح جامد انا رغيت كتير اوى بس مش مهم فوتتكو بعافية
__________________
 ......استودعكم الله الذى لاتضيع ودائعه.... ....closed 4 ever
|
|
#414
23-08-2009, 07:39 PM
|
||||
|
||||
|
اولا بالنوسبة للفكرة ياجماعه
احنا عملنا كده كتنشيط للموضوع لانه زي ماحنا عارفين النوم بيجيب نوم (دايما بيقلوهالي ايام الدراسة )يعني طول ماهو مش شغال كده محدش هيحس بيه بالنسبة للمشكلة بقى مش عارفة انا شكلي كان ليا مزاج للنكد امبارح بس لما قربت المشكلة تاني ناو بتركيز مش حسيت اني متعاطفه مع الولد اوي ايوة هو ظروفه صعبه جدا بس لو بصينا ع الاسباب نلاقي هو ليه ايد فيها اولا هو بيقول باباه ومامته منفصلين الاب مش بيسأل عليهم والام 290 جنيه ف الشهر عنده اختين بنات واحده عايزة تتجوز والتانية عايزة دروس وهو راجل 21 سنة سايب مامته تشتغل ومستني منها المصروف لاء وكمان مش عاجبه اربعه جنيه ف اليوم يعني 120 جنيه ف الشهر تقريبا نص مرتب ماماته الحل من وجهه نظري انه يستغل الوقت اللي بيفكر فيه ف ظروفه ده ويروح يشوفله شغل حتى لو ف محل يوفر بيه مصروفه ويصرف ع نفسه بس ويوفر الفلوس اللي بياخدها من مامته دي لاخواته المحتاجين هو بردو مشكلته انه حاطط ف دماغه الناس التانية اللي ف نفس سنه بيتفسحو ومش عارفة مين راكب عربية طيب انت فين مش كل الناس زي بعضها انت ظروف اهلك صعبه حاول انت اللي تعمل نفسك حاول تساعدهم مش تطلب منهم زياده انت لو اشتغلت وصرفت ع نفسك واخواتك هتدي لمامتك انها تسأل عليك وتهتم بيك لان اكيد زي مانت مدايق من الظروف بتاعتك اهلك اكيد مش مبسوطين بردو يعني دلوقت من وجهه نظري حل المشكلة كلها ف ايده انه يشتغل ويذاكر ويساعد نفسه ويبطل تفكير ف حال الدنيا والظروف السودا اللي هو فيها ويعرف انه احسن من غيره بكتير بس مش يقعد يفضفض لكمبيوتر !!
__________________
لو صرخت الدنيا ف وشي اكيد هعلي حسي ... لو كان ده وقت الانهيار انا حاطه روحي ع كفي ... لو كان ده وقت الانفجار .. اكيد ملغمه نفسي ...!! * ** فى حياة كل منا ذكرى تمنى الا يمر بها ولكن لولا ألمها لارتكب المزيد من الاخطاء فى حق نفسه وفى حق الاخرين* ** الحمدلله |
|
#415
23-08-2009, 08:02 PM
|
|||
|
|||
|
اقتباس:
بص الشخص ده كان برضه مرتبط بطرف تاني قوي قوي قووووي وبرضه قدامه المذاكره والكلام ده بس حط قدامه ده اني عشان اكسبها اصلا لازم اني اجتهد وابذل اقصي جهد عندي وفي نفس الوقت عادي انا ملتزم بحبي للشخص ده وبكافح عشانه فانت تحط في بالك كده انك هتمر بمرحله زي دي وانت كمان بتذاكر وقدامك ثانويه عامه يبقي لازم تذاكر عشان تكسبها لازم تنجح عشان توصلها في الاخر يعني تخلي المذاكره والارتباط مع بعض بمعني انك تبقي حاطط في بالك انا هذاكر عشانها يبقي لو مذاكرتش خلاص فبكده هتذاكر وفي نفس الوقت مش هتخلي الارتباط بينكم يطغي علي مستقبلك مش عارفه اقولها غير كده الصراحه يارب تكون فهمتني
__________________
B,M,Y مع السلامه اتمني تبقوا افضل حالا
|
|
#416
25-08-2009, 02:14 AM
|
||||
|
||||
اقتباس:
الشاب ده حاسس بمشكلته و حاسس بظروفه بس نفسه يبقى أحسن حال من كده لكن مش قادر
و واضح إن عنده نسبة من عدم الرضا و دى مشكلة كبيرة جداً لإن القناعة و الرضا فى الزمن ده مش بنلاقيهم كتير هو من النوع اللى عايز دفعة قوية من حد علشان يشتغل و ينجح فى حياته و يكون لنفسه حياة مستقرة بس ده مش هيجى إلا من إصراره لازم يكون عنده عزيمة أكتر حال البلد تعبان ومفيش شغل بس ليه مانتعبش أكتر و نحفر فى الصخر والدته مش هتسرق علشان يعيشوا كويس ولا إخواته بإيدهم يعملوا حاجة هو اللى فى إيده المفتاح هيتعب أوى بس معلش .. على الأقل يحس إنه ليه قيمة المفروض يدور على شغل فى أى مكان حتى لو هيشتغل سباك .. بس المهم إن يكون معاه قرش حلال و حتى لو المرتب مش هيصرف على أمه و اخواته على الأقل يصرف على نفسه و يحمد ربنا إنه فى نعمة مش حاسس بيها .. مستواهم المادى الضعيف خلاه لا يمشى مع بنات و يبطل السجاير و يا ريت لما ربنا يفتحها عليه مايرجعش تانى للغلط محدش هيحس بمشكلته و حاله اللى عايش فيه إلا هو أنا شفت شباب حالهم أسوء من حال الشاب ده و طبعاً مانقدرش نقول غير ربنا يصلح حال الجميع و نحمد ربنا على كل نعمة عايشين فيهل و لو بسيطة الحمد لله على كل حال أخيراً رديت .. ربنا يصبركم عليا مشرفة فاشلة و النت بتاعها أفشل منها سلام عليكم
__________________
إذا فقدت كل شىء و بقيت ثقتك بالله فإنك لم تفقد شيئاً
آخر تعديل بواسطة أسيل رزق ، 25-08-2009 الساعة 10:13 PM |
|
#417
26-08-2009, 01:34 AM
|
||||
|
||||
|
ايه ده
ده انتي مسوداها مسوداها هرد تاني |
|
#418
27-08-2009, 09:15 AM
|
||||
|
||||
|
اقتباس:
اقتباس:
احم والله انا سايبه الموضوع لغايه مترد لقيتك معبرتش قلت انزل ده وخلاص رد الحاجه دعاء سمير كانت عامله كتاب عسل بجد فيه مشاكل متخلفه اسمه حب بلون البنفسج فى مشاكل تحسوا انكم فى بلاد الواك واك فعلاً ::::::: عارفة إنك لما نويت تفضفض لنا يا م. لم تكن تأمل في حل سحري، بقدر ما كانت المسألة بالنسبة لك مجرد فضفضة يهمك إنها توصل، وعلى حد تعبيرك "وحتى لو ماوصلتش أديني اتكلمت وفضفضت مع الكمبيوتر يمكن يشوف لي حل".. أديها وصلت يا صديقي وأديني باتكلم معك. وأنا أقرأ فضفضتك للمرة الثانية، لم أحتمل ما اعتمل فيّ من مشاعر متخبطة بين التأثر والغضب، فقطعت قراءتي وسألت أصدقائي هنا: "إذا أردت أن أرسل رسالة لمسئول كبير -قد يهمه الأمر-، هتوصل له هو ولاّ الحاشية بتاعته هي اللي هتستقبلها؟!" كنت أريد أن أريهم إلى أي حال آلت حياتنا، وكيف لم نعد نحظى بحياة آدمية في بلدنا! قبل ما ندوّر -مع بعض- على حل يا م، سأناقش معك حياتك التي أصبحت بكل أحلامها، وخيبات آمالها، وعقباتها، نموذجاً متكرراً في قطاع كبير جداً من جيلنا، وإن كانت بدرجات متفاوتة. بل ويوجد ما هو أسوأ من ذلك. لن أضحك عليك وأقول لك إن التعليم يتطور، ويقترحون إنشاء معامل حقيقية في المدارس فيها موقد "بنزن" ومخابر مدرجة، وسيتم تخصيص حمامات للبنات فقط وللأولاد فقط في المدارس المشتركة! وخفضوا ساعات الامتحان إلى ساعتين مع الاحتفاظ بنفس نوعية وكــمّ الأسئلة التي تحتاج إلى أربع ساعات أحياناً!! وأصبح لدينا رحلات استكشافية لطلبة الجامعة في الصحراء الغربية والواحــات، دول حتى رجعوا سنة سادسة ابتدائي كمان!! ولن أقول لك إنه يوجد حلول سحرية لن تحتاج فيها غير إنك تمسح مصباح علاء الدين. إنما سأمسك كل خيط مُتاح من أصله. بمعنى أنه لو أنا أتفق معك في بعض ملاحظاتك عن الدراسة في الجامعة، فهذا لا يعني أني أقول لك: "سيبك من التعليم.. ده مش جايب همــّه وروح اتعـلم لك حــرفــة"! -وعلامة التعجب دي من عندي طبعاً!!-.. ولو اتفقت معك إن ظروفك صعبة، فهذا لا يعني أني أقول لك: "استنى لحد ما حال البلد يتصلح"، أو أكون غير واقعية وأقول لك إنك -رغم ذلك- عندك القدرة على أن تغير حياتك كلها في غمضة عين على نظام "انسف حمامك". إنما كلامي هذا لا يعني أبداً أن تركن إلى الظروف وتسلّم نفسك لطول الأمل الذي لن يأتي مادمت لم تتحرك من مكانك. وحتى لو افترضنا أني اتفقت معك في كل شيء، فأنا لا أتفق معك إطلاقاً في النبرة التشاؤمية التي غلبت عليك. شوف يا م. الكثيرون من المثقفين والكبار لم يكونوا خريجي مدارس "ليسيه" أو تعليم أجنبي. ولم تكن والدتهم سيدة أرستقراطية تتحدث الإنجليزية والفرنسية أكثر من تحدثها بالعربي -اللهم إلا إذا أرادت أن تأمر الخدم لكي يفهموها!- إنما كانت ربة بيت إذا كانوا من أهل المدينة، وغالباً ما تكون ربة بيت ريفي تطعم البهائم وتحلبها. وأغلبهم لم يكن والدهم ذا نفوذ ومال وجاه، إنما فلاح بسيط قد يكون اضطر لبيع جزء من أرضه حتى يصرف على تعليم ابنه الذي صار دكتوراً أو عالماً. كل ما قاموا به أنهم (أرادوا ونووا) -واخد بالك إني حاطة الكلمتين بين قوسين؟-. وبعدما أرادوا ونووا، اتجهوا لهدفهم بكل ما أتيح لهم وقتها: تركيز، وطبلية، ولمبة جاز، وشوية إيمان، ودعوة من الوالدين. لم يكن متوفراً وقتها ورق كاف ليذاكروا فيه ويحفظوا، ولم يكن لديهم نت تحت أيديهم يخدمهم في البحث والدراسة، وكان أكلهــم يشبه المقـررات الدراسية الآن -هو نفسه كل يوم لا يتغير، إلا في بعض المناسبات وليست كلها!!-، وكانت وسيلة الترفيه الوحيدة لديهم أن يلعبوا ماتش في "الجـُرن" وهم حافيين، وتبقى منتهى الرفاهية إذا كان العمدة أو أغنى من في البلدة قد أنعم الله عليه بصفقة استطاع أن يشتري بثمنها "راديو"، وما بعد منتهى الرفاهية إذا كان كريماً ووضع الراديو في الشباك في أول خميس من كل شهر فيستمعون لحفلة "أم كلثوم"! إذا لم تستغرب أنت، فأكيد سيستغرب آخرون... لكن والله هذا متوسط ما كان يحدث. يعني فيه قصص كثيرة جداً فيها الحياة بأنياب ومخالب وتعضّ. لن أمضي في ضرب الأمثلة يا صديقي لأن كل النهايات كانت ناجحة ونجاح من النوع الكبير، مش اللي يسد الخانة. وكذلك بدايتهم كانت واحدة وألخصها مرة ثانية في حكمة إنجليزية تقول: "When there is a will, there is a way" يعني بالعربي البسيط: "إذا صدق العزم، وَضـَح السبيل". ضع أمامك هدف يا م. وكن صادقاً في نيتك، وإياك والوقوع في فـخ العناوين الكبيرة: "أنا لازم أنجح" أو "أنا لازم أطور نفسي وأبقى كويس"، لأنك لو تركت النجاح والتطوير مفتوحاً هكذا ستقع في فـخ آخر اسمه التسويف لأنك لم تحدد من البداية. ماحدش بيبني السطح قبل ما يحفر ويضع الأساس ويرفع الدور الأول! ليكن أول هدف لك ونحن في بداية سنة جديدة، أن تنجح هذه السنة بدون مواد. وبما أنك نجحت بإذن الله، ضع الهدف الثاني، إنك تشتغل في الصيف وتتعلم لغة بالاعتماد على نفسك وليس بالضرورة أن تدفع شيء وشويات في كورس، من متابعة إذاعة بنفس اللغة أو مشاهدة أفلام ومسلسلات تتحدث بها، أو حتى بأن تمسك القصص التي كانت مقررة عليك من قبل وتذاكرها كلغة وتراكيب وليست كقصة وترتيب أحداث. ثم الهدف الذي يليه إن أول قرش يرزقك به الله من الشغل تجيب منه 2 كيلو مانجو للبيت وتأكلوه مع بعض، وتشتري منه كتب من مكتبة الأسرة بأسعارها الزهيدة وكتبها عالية القيمة، وتروح السينما -بس ياريت تكون فيه أفلام تستحق ساعتها-. ستتعجب من الأهداف البسيطة التي اقترحتها عليك. لكن هذه هي الحياة يا صديقي؛ فتافيت، حاجات صغيرة، وأشياء بسيطة، تتراكم فوق بعضها لتصنع جبلاً، أو ملحمة، أو حدوتة، وفي كلٍ منها حياة. أقول لك دعكَ من الذين يتمرغون في النـِعَم والمال بين الكلاب والقطط حتى لا تتعب ولكي لا يتعمق إحساسك بما ينقصك وأنت تستحقه، وبما لديهم وهم لا يستحقونه في نظرك. ولا تشغل بالك ببعض الناس ممن تقول عليهم إنهم توفرت لديهم أسباب النجاح وسبله. لكنهم فشلة.. ويا ريت نقف عند فشلة فقط!!. لديهم مال يشتري مدينتك لكنهم يصرفونه في تدمير أنفسهم، وأنت تعرف ما فيها كما قلت. ولا تضع في ذهنك أن أسرتك تقصد إهانتك يا م. حين يتساءلون عن لازمتك في الحياة. ألم تسأل نفسك يوماً كيف يجتمع كلام والدتك القارس كالبرد أحياناً واتهامها لك بالفاشل، مع شغلها ليل نهار حتى توفر لك ولأخوتك لقمة عيش شريفة فلا تمتد يدك لأحد ولا تمشي وأنت مكسور النفس؟؟!! أعتقد أنك لو فكرت بطريقتك المنظمة، والعميقة التي بدت لي في طريقتك في الحكي، كنت ستصل إلى أنها تريدك أحسن الناس لأنها -ببساطة- تحبك وتراك مستحقاً لتكون أحسنهم. أعرف أنك لم ترسل لنا لكي أخبرك بـ(أفضل 5 طرق عبقرية للنجاح في الكلية بأقل إمكانية). ولم تفضفض لنا أيضاً لكي أقترح عليك (أشرف حيلة ذكية تخليك تعيش مية مية).. أعرف أن كل ذلك يهون مع إرداتك وحبك للاطلاع سواء بالقراءة أو الفرجة على السينما، لو كنت تشعر بالدفء مع أسرتك للدرجة التي جعلتك تتهكم في عبارة تشبه الكوميديا السوداء وتسأل: "ماعندكش أهل سَلَف؟!". وإن كنت اتفقت معك في كثير مما قلت، فهذه هي النقطة الأخرى التي لا أتفق معك فيها إطلاقاً. لو قلّبت أسئلة مامتك واستفسارها عن مستواك واتهامها لك بالفشل، ستجد وراءه -كما قلت لك- حباً وحرصاً. لكنه ليس بالطريقة التي ترجوها أنت. والدتك تسعى يا م. بكل ما أوتيت، وكونها توفر لك أقل ما تحتاج إليه فهذا -في وجهة نظرها- حب وهذا هو الدفء. وتعبها، وطلباتك حتى وإن لم تعد تطلب، وجري الأيام لا يجعلها تتوقف لتربت على ظهرك وتقول لك: "مالك؟" أو "عامل إيه؟" أنا لست مع وجهة نظرها تماماً التي قد لا تعيها هي، ولست ضدها. لكنني متفهمة لها وهذا ما نصفه بأن الحياة واخداه. ومعلش إذا قلت لك: "لا تطلب منها ذلك". بل قـم به بنفسك يا صديقي. كن لها صديقاً، وفكر معها بصوت عالٍ حتى لو لم تتقبل منك ذلك في الأول، حتى لو صدتك وقالت لك: "روح ذاكر لك كلمتين بدل الرغي ده". اسألها عن أحداث يومها، واعرف جدولها بما أنها مـُدرسة، واعرف المواضيع التي تشتملها مادتها. احكٍ معها واستمع لها. خذها في تمشية بسيطة غير مكلفة على كورنيشكم اللي يردّ الروح مع هواء البحر وطعم اليود فيه. وبينك وبين نفسك، فكر كيف ضحت من أجلك وإخوتك، وكيف حاربت وحدها يا م. وقارن بينها وبينك لما تعتبر أن التضحية التي قدمتها لها أنك لم تعد تشرب سجاير لأنك لا تجد ما تصرفه عليها، وأنك توفر لكي لا تشتري الجـِلّ!! وبعدين يا أخي الجـِلّ ده يسيء للشعر، وأعتقد إن كل واحد مدخن عنده وعي عليه إنه يبطل السجاير. أنت لست في حاجة لأهل سَلَف يا م. بل في حاجة لتبدأ بنفسك الأول، ولتزيل الغبار من على روحك وروح البيت كله. ولا تحبس نفسك في التفكير في كيف اشترى فلان هذا القميص الذي يكفي سعره مصروفاً لك لمدة 6 شهور. ولا في أن كيف هذا الشاب المستهتر زميلك في الجامعة، يركب سيارة لا تحلم بلمسها من الخارج! دعكَ من القشور يا م. -اقروا البتاعه دى بجد- يوجد ناس يا صديقي والله العظيم ما تلاقي لقمة يومها. ألم تسمع عن القصة التي تناولها كل من يهتم بحال الناس عن التلميذة التي سقطت مغشياً عليها في الفصل. ولما لم تجد المـُدرسة -وهي جديدة على المدرسة- أي رد فعل من التلاميذ وكأن الأمر شيء عادي، استنكرت. وبالفعل أخبرها التلاميذ أن إغماء تلك الطفلة متكرراً. ولما سألتها المـُدرسة عن السبب، قالت الطفلة إنها لم تأكل من اليوم السابق. ولما سألتها المدرسة وليه؟ كان رد البنت: "لسه دوري ماجاش"...!! أسرتها مكونة من كذا فرد، ودخل باباها صغير جداً.. فاضطرت مامتها إنها تعمل "جدول" -ليس كجدول مامتك الدراسي- بل جدول لكل واحد من أفراد الأسرة لكي يأكل!! يعني السبت يأكل "حسين"، والأحد "مريم"، والإثنين "تامر"....!!!! خـلاصــة القول يا م. لأني أطلت عليك.. احمد ربنا على كـل النـِعم التـي وهبــها لك. احمــده على والــدتـك -السيدة العظيمة التي أنحني لها إجلالاً وبلّغها تحياتي-، واحمده على صحتك وأنك فيك القدرة على الوقوف على قدميك وكسب رزقك بنفسك. واحمده على العقل الذي وهبه لك ولم تستخدم منه حتى الآن إلا نسبة قليلة جداً من إمكانياته التي ظهرت في طريقتك، وكلامك. وبعد الحمد والشكر الذي وعدنا الله بأننا لو شكرناه فسوف يزيدنا من نعيمه.. وخد بالك في الآية قال تعالى: "إن شكرتم لأزيدنكم".. و"لام جواب القسم" هنا أكيدة من "سوف" التي قلتها أنا في معنى الآية. يعني أكيد، أكيد، ربنا سيزيدنا إن شكرناه. تفاءل، واجعل لديك إيمان يا م.؛ إيمان بالله، وإيمان بما أعطاك الله، وإيمان بكل شيء خير سيوصلك بإذن الله للخير سواء كان زيادة في الرزق، أو بالحب، أو بركة في الأهل والعمر. وأعتقد إن معظمنا يذكر معنى الإيمان، وهو ما وَقـَـر في القلب وصدقه العمل. فلو أنت وثقت في رحمة ربنا، ستعمل على أن تكسبها ولا تجلس تنتظرها. ولو آمنت أنك قـادر -بعون الله- على تحقيق مرادك من العلم، والمادة، والاطلاع، ستجد نفسك بمنتهى البساطة تتجه بكل ما أوتيت من مقومات وإمكانيات شخصية وعقلية تدركها أو لم تدركها بعد إلى تحقيق ذلك مهما طال عليك الطريق يا صديقي. تحياتي وتحيات كل زملائي من القلب لك، وأتمنى إنك تطمنّا عليك، ويارب -ولو بعد سنين- يا م. تتذكر فضفضتك دي وتضحك وأنت راض وحامد ربنا لأنها كانت ماضيا أعدك لحاضر سعيد، ومبهج، وناجح. :::::::::: بجد ردها رائع والردود اللى فوق جميله بس البت دى رغايه اوى بس ردها نفسه مفيد |
|
#420
27-08-2009, 09:22 PM
|
||||
|
||||
|
اقتباس:
موضوع استاذ أحمد ماكملش و بما إن الموضوع هنا مثبت و نشيط يبقى ليه مانعرضش فيه المشاكل أهلاً بيك فى الموضوع :::::::: سمنة كنتى تحطى المشكلة و وراها الرد بتاع دعاء بصراحة رد ممتع و فيه كمية أمل و تفائل رهيبة ربنا يجازيها كل خير و جزاكم الله جميعاً كل خير
__________________
إذا فقدت كل شىء و بقيت ثقتك بالله فإنك لم تفقد شيئاً
|
|
| العلامات المرجعية |
| الكلمات الدلالية (Tags) |
| ....الخ, مساعدة, مشكلة, اخوات, اصدقاء, اسرة, بوابة الفارس التعليمية, حلول, شرح, عائلية, عاطفية, فضفة, نفسية |
«
الموضوع السابق
|
الموضوع التالي
»
العرض العادي
|
|
جميع الأوقات بتوقيت GMT +2. الساعة الآن 12:15 PM.
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
Copyright ©2000 - 2024, Jelsoft Enterprises Ltd.
