للرد على اى سؤال او استفسار هنا فقط

[mahmoudalsapagh]

....................

[mahmoudalsapagh]

اجابة سؤالك يا استاذ مصطفى ان الالكترون يخرج من الذرة وتصبح الذرة ايون وليست ذرة

[ابراهيمنت]

يا استاذ سيد لو سمحت انا عايز افهم كويس درس قواعد توزيع الالكترونات انا عايز افهمه كويس جدااااااااا

[ابراهيمنت]

بسم الله الرحمن الرحيم
اود ان اشارك معكم بشرح درس توزيع الالكترونات و جاب طريقه سريعه للفهم
ارجو ان يعجب حضراتكم وان تقيموه

ندخل فى الدرس
بعد ما اتعرفنا ع الماده و تركيب الماده و عرفت انها بتتكون من وحدات اصغر تسمى الجزيئات و هناك ما هو اصغر منها تسمى الذرات
و دخلنا عالم الذره و عرفت ان الذره اللى مش بتتشاف دى داخلها عالم كبير و فهم العالم ده هو سبب تطور امريكا و اوربا
و عرفت كمان ان الذره بتتكون من حاجتين
1 -- النواه 2 -- الالكترونات
عرفت كمان ان النواه بتتكون من
جسيمات صغيره موجبه الشحنه تسمى البروتونات و جسيمات اخرى متعادله تسمى البروتونات
و عرفت ان الالكترونات هى الجسيمات السالبه اللى تدور حول النواه
و عرفت كمان ان الالكترونات بتدور فى مستويات حول النواه تعرف بمستويات الطاقه
النهارده ان شاء الله هنعرف مع بعض ازاى الالكترونات دى بتتوزع فى مستويات الطاقه
هل هذه الالكترونات بتدخل كده عشوائى فى اى مكان ؟
ام هل هناك قواعد ثابته و محدده لتوزيع الالكترونات فى مستويات الطاقه ؟
قبل اما نجاوب ع السؤالين
عاوز اسئل سؤال
لو واحد فينا بنى منزل و عاوز يأجره ع شان الناس تسكن فيه هل بيدخل اى حد ام انه بيكتب عقد مع اللى ناوى يسكن عنده ؟
التلاميذ قالوا طبعا بيكتب عقد
انا هقول لهم ده اللى حصل معانا فى التوزيع
هنفرض ان فى واحده اسمها الست نواه
الست نواه دى ست غنيه و معاها فلوس كتير عملت منزل كبير مكون من سبع طوابق اللى هما اسمهم مستويات الطاقه
بس قالت كل دور هياخد عدد معين من السكان مش اى حاجه او اى عدد انا بشترط كده
الناس قالت يا ست نواه هو بمزاجك هتدخلى اللى انتى عوزاه و اللى انتى مش عوزاه مش هتدخليه
قالت الست نواه ع شان مظلمش حد
انا هعمل علاقه لعدد السكان اللى هيدخلوا فى الادوار
بناء ع العلاقه دى هنشوف كل طابق او مستوى طاقه هياخد كام ساكن ( كام الكترون )
الناس قالوا موافقين
ايه هى العلاقه دى يا ترى
قالت الست نواه الالكترونات هتدخل مستويات الطاقه طبقا للعلاقه
2 ( ن ) تربيع
حيث ( ن ) هو رقم الدور او رقم مستوى الطاقه
الالكترونات قالوا موافقين ( صاحبت البيت بئه و تعمل اللى هى عوزاه فينا نستحمل وخلاص )
كده يكون الدور الاول اللى اسمه المستوى الاول هياخد طبقا للعلاقه دى
2 * 1 تربيع = 2
الست نواه فرحت و قالت كويس ع شان دول هيكونوا قريبين منى و مش يوجعوا لى دماغى بالدوشه
الالكترونات قالت موافقين اصلا الدور او المستوى الاول صغير يادوب باخد اتنين الكترون
اما المستوى التانى هياخد طبقا للعلاقه دى
2 * 2 تربيع يعنى 2*4 = 8 الكترون
الست نواه وافقت و الالكترونات وافقوا
المستوى التالت هياخد طبقا للعلاقه
2*3 تربيع يعنى 2 * 9 = 18 الكترون
واو الالكترونات وافقوا و فرحوا اوى قالوا احنا بحب اللمه و كمان كل واحد فينا هيدفع فلوس اقل بس الظاهر ان الست نواه مش موافقه هى لحد الان ساكته مش اتكلمت
اما المستوى الرابع هياخد
2 *4 تربيع يعنى 2 * 16 = 32 الكترون
الالكترونات كانت فرحانه جدا بس الست نواه ساكته لسه و شكلها متغاظ اوى ( يظهر ان الكلام مش عاجبها )
المستوى الخامس كده بنفس الطريقه هياخد 50 الكترون هنا النوان قالت
لاء لاء لاء لاء لاء لاء لاء لاء لاء
مش موافقه
50 الكترون ؟ دول يجننونى لاء العلاقه دى مش تنفع
الالكتروناتقالوا فى ايه بس ؟ مش انتى اللى قلتى العلاقه دى ؟
قالت نعم بس كده هكون مش مستقره
و قالت انا عندى تعديلات بسيطه ترضى كل الاطراف
قالوا خير ؟
قالت العلاقه دى تنطبق ع الاربع مستويات الاولى فقط
اللى هم
k l m n
قالوا الاكترونات طيب ليه بس احنا بحب اللمه قالت لانى كده هكون مش مستقره
قالوا ماشى موافقين
قالت التعديل الثانى
ان المستوى الاول هياخد 2 الكترون زى ما اتفقنا
و التانى 8 الكترون زى ما اتفقنا
و التالت هياخد ع الورق بس ادام الحكومه يعنىو ع شان الضرايب 18 الكترون بس بينى و بينكم هياخد 8 بس
قالت الالكترونات يعنى مش هياخد غير 8 هو كمان ؟
قالت اه و المستوى الرابع هو كمان بدل 32 الكترون هياخد 8 بس
يعنى 32 ع الورق لكن فى الحقيقه هياخد 8
الالكترونات قالوا موافقين مع ان ده ظلم
و بدلءنا نوزع الالكترونات ع المستويات و امثله كما يلى
مثال عنصر مثل الهيدروجين عدده الذرى واحد بس
كده هيدخل المستوى الاول
اما عنصر زى الصوديوم اللى عدده الذرى 11 نوزعه كما يلى
المستوى الاول هياخد 2 و التانى 8 و التالت 1 بس
طيب عنصر زى الكالسيوم عدده الذره 20
حد يوزعه لى
قول يا مروان
يقول مروان المستوى الاول 2 و كده هيتبقى عندى 18 الكترون 8 منهم هيدخلوا المستوى التانى و كده هيتبقى 10 الكترون 8 منهم هيدخلوا المستوى التالت و هيتبقى 2 الكترون يدخوا المستوى الرابع
انتهى الدرس
عوزكم توزعوا لى فى البيت العناصر التاليه
الاكسجين اللى عده الذرى 8 و الماغنسيوم اللى عدده الذرى 12 و الكلور اللى عدده الذرى 17
شكرا و السلام عليكم و رحمه الله و بركاته

[ابراهيمنت]

اود ان يعجبكم الموضوع
عايز ردود 8-}

[حسن عبد الصادق]

ردا على الأخ مصطفي
بور قال أن المنطقة بين مستويات الطاقة الأساسية محرم على الالكترون التواجد فيها لذلك إذا اكتسب الإلكترون كما من الطاقة أكبر من الفرق في الطاقة بين المستويات الاساسية سوف ينتقل الى المستوى الفرعي أوسينتقل ألى الأوربيتال أو منطقة الفراغ

[Dr.abdo salem]

الاجابة ومن غير تردد 6 مستويات فرعية لان:
رقم المستوى الرئيسى يدل على عدد المستويات الفرعية
وبما أن هناك 3 مستويات رئيسية فإن :
k=1s l=2s.2p m=3s.3p.3d

[Dr.abdo salem]

انا هسأل سؤالين البعض منكم سوف يتخيل أنهم سهلين قوى ودا الصح بس فيه نااس كتير قوى بتقع فيهم :
** لكى ينتقل الكترون من المستوى الثالث إلى المستوى الخامس يحتاج......كوانتم.
**من هو العالم الذى فسر الطيف الخطى وتبين انه يتكون من عدد محدود من الخطوط الملونة.

انا مستنى الإجابة

[sky tears]

ميرسي كتيير

[أ.إسلام]

كيف وفق بور بين ماكسويل ورازرفورد

[أ.إسلام]

اختر الجابة الصحيحة مع التعليل :- اوربيتالات المستوى الفرعى الواحد(متساوية فى الطاقة--متشابهة فى الشكل--مختلفة فى الشكل والطاقة--متساوية فى الطاقة ومتشابهة فى الشكل)

[مستر أسامه]

اجابة أسئلة ابو سالم : لكى ينتقل الكترون من المستوى الثالث إلى المستوى الخامس يحتاج......كوانتم.
الاجابة : 1 كوانتم
ن هو العالم الذى فسر الطيف الخطى وتبين انه يتكون من عدد محدود من الخطوط الملونة.
العالم سمرفيلد

[مستر أسامه]

كيف وفق بور بين ماكسويل ورازرفورد
الاجابة : بإفتراضة ان الالكترونات اثناء دورانها حول النواة لاتفقد او تكتسب اى طاقة

[مستر أسامه]

ختر الجابة الصحيحة مع التعليل :- اوربيتالات المستوى الفرعى الواحد(متساوية فى الطاقة--متشابهة فى الشكل--مختلفة فى الشكل والطاقة--متساوية فى الطاقة ومتشابهة فى الشكل)
الإجابة : متساوية فى الطاقة

[سيد عثمان]

متساوية في الطاقه ومتشابهة في الشكل