مستنياك..... ياسمين و كريم

[الضوء الشارد]

قصة جميلة أوى مستنيين الباقى

[beautiful pearl]

الفصل الرابع

جيه كريم واهله وياسمين قدمت العصير بس وسلمت وخرجت مش شرط يعد معاها لانه عارفها واتفقوا على الشبكة وهينزلوا يشتروها كمان يومين واحلى حاجة فى الموضوع انهم اهل وفاهمين الدين كويس وكل طرف شارى التانى يعنى محمد عمره ماقال لكريم انا عايز شبكة بكذا ولا كذا لان محمد ومصطفى اتفقوا ان مفيش مشاكل ان شاء الله واحنا متفقين كريم فعلا راجل ومحمد بيثق فيه جدا وماجاش وهو بيدرس وقال لابوه انا بحبها او قالها هى كدة وبعدين انا مش عارف اعمل ايه !



اما ياسمين فقنوعة جدا وحقيقى هى عندها كريم بالدنيا لو حتى هيتقدملها بخاتم حديد ولا صفيح هيبقى عندها احسن من الالماظ كفاية رجولته ودينه واحساسها انه بيحبها وعايز يسعدها
واشتروا غويشتين وخاتم ودبلتين وكان معاد الخطوبة يوم الجمعة

كريم كان طاير من الفرحة ان ياسمين خلاص هيبقى خطيبها ادام كل الناس ويلبس دبلتها وبعد شهور هتبقى انيسه فى ايامه صاحبته اللى يكلمها وحبيبته اللى يشكلها واخته اللى يشاكلها وكان نفسه يقولها كل الكلام ده لكن قال خلاص مش فاضل غير ليوم الجمعة وبعدين هايبقى يكلمها ان شاء الله على موبايلها مادام مش هيكلمها كلام over وقعد يشغل باله بالتخطيط لحياته معاها من بعد يوم الجمعة والهدايا اللى نفسه يجبهالها والتعابير اللى عايز يقولها لها من غير ماتتكسف وتعبر عن اللى جواها كمان وكلها كام شهر اصبر ياعم


وبدات ياسمين تجهز نفسها وكانوا عاملين خطوبتها عندهم فى البيت reception بتاعهم واسع وممكن يتعمل فيه الحفلة وياسمين كانت بتقول لمامتها هى عايزة ايه وهما يتفقوا مع كريم والغريبة انهم كانوا متوافقين فى تفكيرهم من غير مايقولوا لبعض

كان الفرح صغير بس عازمين فيه قرايبهم واصحابهم وطبعا بشكل حلو عشان يكون فرح اسلامى ومن غير فصل بس من غير اختلاط

ياسمين وكريم قاعدين على كنبة الصالون وهى كنبة واسعة وكوكتيل الاغانى اللى شغال جميل وكل معانيه رائعة ------- ومرت الليلة على خير والحمد لله

كريم كان عارف وقت ال break بتاعها كان لازم كل يوم يكلمها فيه حتى لو مش هايقول حاجة بس يسلم عليها وماكانش بيرضى انها تكلمه ابدا لو اتصلت بيسبها ترن للاخر وبعدين يتصل هو بيها فعلا انسان رقيق جدا و jentle اوى كل يوم ياسمين بيزيد اعجابها بيه بس كريم كان معاهد نفسه ان مشاعره وكلمه اللى نفسه يقوله هيستنى عليه شوية لمدة 3 شهور فقط

البنات فعلا بياثرهم الاهتمام وبيرضيهم جدا ومن بموت فى دباديبك وكلام الافلام ده ده انا رنة كريم عليا بس بتعايشنى فى عالم تانى فترة الخطوبة دى حلوة جدا انى اعرفه اكتر واسمع كلامه واعرف طريقة تفكيره ويشعرنى اهتمامه من باب وقدموا لانفسكم واى حاجة عرف من ماما انى محتاجاها عشان المشروع كان بيساعدنى علطول من غير ماطلب وانا من طبعى اى حد يعملى حاجة لازم اشكره وطبعا بيقولى العفو وبيبقى مبسوط من شكرى ليه وتقديرى لمساعدته الا كريم كان بيزعل اوى ويقولى ياسمين لو قلتى كدة تانى انا هازعل بجد انتى بتشكرينى ؟

ياسمين \ انا كمان كان نفسى اخلص بقى وتعدى الامتحانات على خير

واخيرا ظهرت النتيجة كان كريم عايز يجبهالى بس انا خفت لحسن الدرجة متكونش حلوة اوى وانا نفسى اكون ادام كريم على الاقل احسن واحدة فى الدنيا فروحت انا قبله عشان اجيبها رغم انى ماكنتش هاكدب عليه لكن برده مردتش انه هو يروح وجبت جيد جدا مرتفع كنت فرحانة جدا ان الحمد لله تعبى مضاعش على الفاضى وسهر الليالى ورجلى اللى اتكسرت على اللوح ويوم والتانى وانا مبنامش عشان المشاريع تخلص كل ده راح اول ماشفت النتيجة الحمد لله وكمان كريم وشه حلو عليا

وعملنا حفلة صغيرة كدة مع خلاتو وطبعا كريم حضرها ومامتو واباه ومحدش جابلى هدية ولا بابا ولا ماما ولا خالتو هالة ولا عمو مصطفى وف وسط الحفلة لاقيت كريم قايم بكل شجاعة وجراة وباسلوبه اللذيذ ودمه الخفيف ووقف فى وسط ال reception وقال

كريم \ انا عايز اسمع دلوقتى احلى زغرودة وانا بلبس ياسمين الخاتم ده

والناس بقى هيه وضحك وزغاريد بس عشان اسلوبه

وراح عند ياسمين وكانت مامته قاعدة جمباها قام اداها الخاتم وهو باصص لياسمين وقالها احلى خاتم لاحلى ياسمين بس اخر خاتم ماما اللى تلبسهولك الدور عليا انا بقى

وبعدين قام عمو ابو ياسمين وقال ياجماعة ان شاء الله كلكم معزومين عندنا اول خميس الشهر اللى جاى عشان فرح ياسمين وكريم

[welcomeeee]

بجد جميله اوى
انا اول مره اقراها بس عجبتنى مووووووووووووووووت
مستنين الباقى ومتتأخريش علينا بقى

[COoL HEaRT]

يارب تكمل ع خير عارفه لو القصه طلعت حزينه والنهايه ماساويه والبت تموت ويطلقوا والافلام دى بجد هزعل

[earth]

المشاركة الأصلية كتبت بواسطة بنوته اهلاويه

يارب تكمل ع خير عارفه لو القصه طلعت حزينه والنهايه ماساويه والبت تموت ويطلقوا والافلام دى بجد هزعل

نفس رايك يا بنوته اهلاوية

[Dr|shereen]

قصه جميله جداا فى انتظار باقى الموضوع

[Prof.Dr/A.T.M]

حلوة جدا ياريت تكملى بسرعة

[beautiful pearl]

الفصل الخامس



كريم وياسمين واحمد وايمان وعمر وهالة ومصطفى قاعدين فى بيت ياسمين

ياسمين \ كريم الاودة دى كبيرة اوى ومبالغ فيها وصدقنى مش عايزاها

كريم \ لا طبعا يا ياسمين مينفعش اودة النوم دى مسئوليتى وان شاء الله هجيبها مالكيش دعوة

عمر \ يابنى صلى على النبى فى ايه هى الاودة دى مش بتاعتكوا انتوا الاتنين ابقى ياعم جبلها اودة نوم بتاعة يوليوس قيصر دهب خالص ياسيدى اوول ماربنا يفرجها ان شاء الله

كريم \ ياعمر افهم ان شاء الله هاعمل جمعية واقبض الاول واكمل على اللى معايا واجبهاا لياسمين

ياسمين\ ياكريم هندخل كدة فى ديون جامدة علينا واحنا لسة نبدا وبعدين اصبر بقى انا هاعملك design محصلش

احمد\ كريم بص يابنى انت ياحبيبى مقصرتش وجايب الشقة والصالون الحمد لله يعنى هى مشكلة اودة النوم بس هتحلها ياسمين واحنا علينا المطبخ والرفايع واتكلوا على الله

حبيبة وياسمين فى بيت ياسمين

حبيبة \ صحيح يا ياسمين انتوا اخدتوا شقة فين ؟ تلاقيها جنب مامة كريم ولو انتى جامدة بقى تبقى اقنعتيه تخدوا شقة جنب مامتك

ياسمين \ لااااااااااا احنا خرجنا من ضيق المدينة الى سعة الاحياء الجديدة ---الشقة فى اكتوبر ان شاء الله

حبيبة \ اكتوبر يابنتى ده فيها مواصلات اقله ساعة وبعدين لسة جديدة ياياسمين يعنى الخدمات مش زى هنا والاهم هتبقى بعيدة عن مامتك

ياسمين \ والله ياحبيبة احنا ربنا كرمنا اوى الحمد لله الشقة واسعة والجو هناك تحسى انه نضيف اوى وكل المنطقة هناك ناس لسة متجوزين جداد واهم حاجة ان صاحبها كرمنا اوى فى السعر ايجار جديد ودفعنا 3 الاف وبعدين ايجار 200 جنيه

حبيبة \ اه لو امى تسمعك ياياسمين مياكلش معاها الكلام ده خالص انتى عارفة انجى اختى قعدت مخطوبة سنتين وشوية عشان ماما مش راضية على شقة فى حتة جديدة ووالله لدرجة ان الموضوع كان هيتفركش لولا قرايبنا ادخلوا وفى الاخر برضه حى جديد واللى اتغير بس ان الايجارزاد عليهم
ياسمين \ انتى عارفة ياحبيبة والله لو روحتى هناك هتلاقى المكان يرد الروح وحتة انها جديدة والخدمات قليلة فمش هتفرق معانا اوى احنا قدامنا على الاقل 7 سنين على مانحتاج مدرسة مثلا وبعدين احنا مش قاعدين فى صحرا فى ناس كتير عايشة هناك ومبسوطة الحمد لله

حبيبة \ بس كدة ياياسمين انتوا ريحتوا كريم على الاخر يعنى كان المفروض يدفع دم قلبه عشان يعرف مقامك ويحافظ علكى ويعرف انه مش واخدك بالساهل لكن انتوا اتنازلتوا فى حاجات كتير اوى

ياسمين \ عارفة ياحبيبة انا بحس دايما ان احنا فينا افكار بتعقد حياتنا والموضوع بسيط مش مستاهل ابدا وبعدين ايه اتنازلتوا والكلام ده هو انا قاعدة فى الشارع ونايمة على الارض ؟ !! الحمد لله ربنا رزقنا شقة جميلة وف مكان كويس ولعلمك قى انا كل سم فى حاجتى اغلى عندى من مال قارون

حبيبة \عموما ياحبيبتى ربنا سبحانه وتعالى هيرضيكى مدام انتى راضية كدة وعلى فكرة الواد كريم بقى امه داعياله!!!!

[welcomeeee]

جمييييييييييييييييله اوى ومستنين الباقى

[Dream girl]

شكرا على القصة الجميلة دى وتسلم ايديكى ياقمر ومنتظرة الباقى
الحلقات كلها تحفة تقبلى مرورى

[رونالدينهوو]

بصراحة قصة ملهاش حل
ياريت تكمل بسرعة لانى اندمجت فيها جاااااااااااااااااااااااااااااااامد

[beautiful pearl]

الجزء السادس (اللي قبل الاخير)

بحبك ياستانلى !!!

ياسمين فى اكتوبر!

ياسمين \ ياه عمرى ماهنسى ابدا يوم فرحى كان يوم رائع بجد الواد كريم كان شكله جامد اوى وابسامته ليا حلوة جدا اول مرة يمسك ايدى واحنا فى الزفة حسيت انه بيدفيها وانه مش بيدينى ايده ده بيرميلى قلبه !

انا فاكرة شكله وهو بيرقص مع اصحابه موتنى من الضحك اول مرة اشوفه بالانطلاق ده

واللى فعلا مانسهوش اننا وحنا فى وسط الفرح لقيته مرة واحدة ماسكلى بوكيه كله ورد احمر جامداوى وبيديهولى معرفش كان جيبه منين من غير ماعرف

انا لسة شايلة البوكيه ده عندى رغم انه بقى مجفف خلاص بس انا شايلاه فى كيس وكاتبة عليه التاريخ وكتبت رسالة منى لكريم لحد دلوقتى هو مقرهاش

الشقة بتاعتى جميلة اوى لان كل ركن فيها ليه فيه ذكرى حلوة مع كريم الحاجة الوحيدة اللى مضايقانى منها انها بعيدة عن شغل كريم اوى ومحتاج 10 جنيه مواصلات رايح جاى عشان كدة بيضطر يبيت عند مامته عشان يبقى جنب الشغل --بيجى اكتوبر يوم الخميس بعد الشغل ويعد الجمعة والسبت والاحد --والاتنين بيروح على هنا برضه والثلاثاء والاربعاء والخميس بيكون عند مامته

كريم \ ياسمين بتوحشنى اوى وانا مش عارف اعمل ايه فى المواصلات دى ومش هاين عليا ابدا انها تعد لوحدها كدة فى البيت ياه ده انا نفسى اجيبلها الدنيا كلها صابرة معايا اوى واحدة غيرها كانت عيطتلى وقلتلى عايزة اروح لماما !!
والماهية دى صغيرة اوى وحتى فلوس المواصلات بتفرق معانا !! ادى 200 جنيه الايجار و500 جنيه طول الشهر لما 10 يروحوا فى مواصلات كل يوم هيبقالنا كام ؟ 200 جنيه ! يعنى كل يوم 15 جنيه !!!

ياسمين \ اجمل حاجة فى كريم انه رومانسى جدا وبيحب الحياة ويحب الخروجات والفسح ومعيشنى كاننا اتنين مراهقين بنحلم ببكرةويهديلى اغنية بيحبها ولا الورد ده مفيش خروجة الا وفى وسطها الاقى وردة حمرا وهدية وعليها كلمة بتاثرنى بجد!!!

كريم \ رغم ان الفلوس قليلة لكن ياسمين دى كلها بركة وخيربحس ان الفلوس معاها بتضاعف لما بيجى نص الشهر بحط ايدى على قلبى واقول اكيد الفلوس خلصت مع ياسمين اروح الاقيها عملالى الاكلل اللى بحبه وعمرها ماشتكت ابدا ان الفلوس على الاد


ياسمين \ واما احلى خروجة بقى مع كريم كانت لما روحنا اسكندرية انا فاكرة كل كلمة قلهالى فيها كانت اجمل مفاجاة عملهالى لحد دلوقتى

خدنا قطار الساعة 6 الصبح وقبل مانمشى كنت عاملة حسابى ربع كيلو جنة على نص خيار وبطاطس بيوريهوعصير رتقال كنت عاملاه وتورمس الشاى وكان كاجوال اوى شال الحاجة فى الشنطة وعلقها على ظهره وكل واحد نظارته الشمس وانطلقنا

لعبنا شطرنج لما هريت كريم وكانت المنافسة فظيعة ويقولى يابنتى انسى اقوله لاااا انت محتاج كورسات عشان توصل لمستوايا ده انا بلعب اللعبة دى من قبل ماتتولد

وفضلنا طول الطريق مبطلناش كلام والطريق كان شكله يجنن الخضرة والسما تحسى كانك بتحضنى الكون كريم قالى تعالى نعمل مسابقة لمدة ربع ساعة نشوف مين هيقدر ياخد ثواب اكتر قلتله اظبط ساعتك

ومفيش خمس دقايق ولقيت كريم عينه بدمع ابتسمتله كدة وضحكتوقلتله مش هارحمك انا اللى هاكسب
ضحك وقالى قعدت احمد ربنا على نعمه اللى مالهاش حد عليا لحد ماوصلت ليكى وبقيت مش عارف اشكره انك معايا ازاى

انا بقى كنت بدعيلك بعدد حبات المطر اللى روت الارض دى وبعدد كل خلية فى النباتات دى

ونزلنا من القطر اول مرة احس انى مش تعبانة بعد السفر وطلعنا على البحر ولعبنا ركت وقطعت كريم بس هو عشان اطول منى معرفتش اقطعه اوى يعنى واتمشينا على البحر وخدنا اكتر من شاطىء مشى
وكنا بنصلى كل صلاة فى مسجد ونقول هتشهدلنا يوم القيامة الارض دى اننا صلينا عليها

وجيه الليل وطلعنا على كوبرى استانلى
وقالى كريم فاكرة زمان لما جينا هنا مع خلاتو وقعدنا نطير بلالين وطارت راحت الناحية التانية تيجى نعملها دلوقتى ؟؟
ياسمين \ طيب ماشى بس هاتها كبيرة وحمراء
كريم \ ياواد ياكريم ياجامد معايا ياباشا وايه مطابقة للمواصفات
وطير كريم بالونة كبيرة كانت على شكل قلب واعدنا نبص عليها وهى طايرة والناس قعدت تتفرج علينا وعليها لان البالونة كان مكتوب عليها بحبك

واتصورنا صور جميلة جدا على الموبايل كريم صورنى صور جامدة ساعة الغرو ب على البحر وانا كمان روقته برضه واتصورنا مع بعض فى ستانلى بس شوية صور تجنن

وبعدين قضينا طول الليل فى خالد ابن الوليد واتعشينا سندوتشات حواوشى جامدة اوى وطلع الفجر علينا قلتله كريم تيجى نفطر فول بس من العرية وبصل بقى واديله وفعلا والفول عمل عمايله معايا قلتله بس كدة تمام ياكريم على الا مكروباص بقى وعلى مصر انا النوم كبس عليا

ياه ربنا يخليك ليا ياكريم كنت حاسة اننا مخطوبين ومن زمان واحنا مش بنام فى المصيف مع قرايبنا بس المرة دى غير غير يعنى
وكوبرى ستانلى ده بجد بعشقه وكل مكان روحته معاه المساجد فى رمضان ودريم بارك فى العيد وحتى الجنينة اللى قدام بيتنا اللى بنتعشى عنده ذرة مشوى!!

[welcomeeee]

جمييييييييييله اوى
بس انا زعلانة انها هتخلص بسرعه اوى كده

[beautiful pearl]

الفصل الاخير

انوار وكهرباء مضاءة رجال ونساء تغشاهم الرحمة والسكينة الكل يبكى بمختلف الاعمار والمستويات الاقارب والغرباء يسمعون قول الحق سبحانه وتعالى

(وسيق الذين اتقوا ربهم الى الجنة زمرا حتى اذا جاؤها وفتحت ابوابها وقال لهم خزنتها سلام عليكم طبتم فادخلوها خالدين-- وقالوا الحمد لله الذى صدقنا وعده واورثنا الارض نتبوء من الجنة حيث نشاء فنعم اجر العاملين--وترى الملائكة حافين من حول العرش يسبحون بحمد ربهم وقضى بينهم الحق وقيل الحمد لله رب العالمين )

بصتلها اخر نظرة وعينى مليانة بالدموع --لقيتها بتبتسم !!اكيد انا مش شايف كويس مسحت دموعى بكمى وبصتلها تانى --- ده كل وشها بيضحك كانها بطمنى عليها وعايزة تقولى حاجة بس انا مش عارف ايه هى
قمت ابتسمت اول ماشفتها وماحسيتش بنفسى الا وانا ساجد بعيط واقول الحمد لله انا لله وانا اليه راجعون

احسبك شهيدة ياياسمين !!
النهاردة الخميس كنت جيلك على البيت ومش رايح لماما

وكان ماما عارفة ايه اللى فى دماغى لقيتها بتقول وهى بتبكى/
قلتلها فى التليفون الصبح وهى بتصبح عليا عادى زى كل يوم عمك تعبان شوية ياياسمين وانا لوحدى مش عارفة اعمل ايه

ياسمين \ متقلقيش ياخالتو --مفيش حاجة تلاقيها شوية برد ولا حاجة انا جيالك ياحبيبتى مسافة السكة علطول متتصليش بكريم ولا معتز عشان ميقلقوش هو باذن الله هيبقى زى الفل تامرى بحاجة وانا جاية

هالة \ لا سلامتك يابنتى متتاخريش

وبعدين لقينا تليفون بيقولنا الخبر وصاحب العربية اللى عمل الحادثة قعد يعيط ويقولنا والله العظيم هى اللى كانت مش واخدة بالها من الطريق انا معملتلهاش حاجة والله

والغريبة لقيت ناس معرفهاش جاية تعزى مرات البواب بتاعة العمارة وحتى ناس من السوق قاعدين فى العزا وهما بيبكوا ويقولوا كانت ست كلها انسانية ولسانها حلو وعلطول تضحك فى وشنا وتكرمنا ربنا يرحمها يارب --صدقة ياياسمين ده الفلوس كانت على الاد خالص دلوقتى عرفت ربنا كان بيبارك فيها ازاى

ولما رجعت البيت اول مرة ارجع ومالقهاش فيه لقيت الشقة جميلة والاكل اللى بحبه كانت عملاه ولقيت ورقة سيبهالى مكتوب فيها

وحشتنى ياحبيبى --عمو عنده شوية برد صغيرين ايه رايك نعد معاهم النهاردة ونتعشى النهاردة سميط وبيض على النيل ؟؟ اكلة نفسى فيها بقالنا كتير مرحناش النيل --اتغدى براحتك ونام شوية وتعالالنا باليل

متتاخرش

مستنياك

مستنياك --ياه هى دى الكلمة اللى وشها كان بيصرخ بيها ليا !!

طول السنين اللى فاتت دى وانا فى السعودية كلمتها ليا كانت ادام عينى بقى كل املى انى اعمل خير واسعى فى الدنيا دى علشان اقابلها نفسى اكون معاها فى درجتها فى الجنة او اعليها وتبقى معايا واول ماربنا فتحها عليا قررت انى احقق حلم ياسمين عملت الشركة اللى كانت دايما فى خيالها وسميتها على اسمها ودلوقتى بقى سهل اوى على كل اتنين متجوزين انهم يبداوا حياتهم ويفرشوا بيتهم ببساطة وكل حد مايشترى من الشركة واشوفه هو وخطيبته بفتكر تضحيتها معايا اللى محدش يرضى بيها غيرها واصبر نفسى بكلمتها مستنياك
وشقتنا اللى فى اكتوبر مسبتهاش مقفولة خليتها حضانة وكانت اول حضانة متطورة تتفتح فى المنطقة وبمصاريف بسيطة --كنت عايز اطفال يتعلموا فيها الحاجات الحلوة اللى ولاد ياسمين كانت اكيد هتبقى فيهم

وكل الافكار دى جاتلى لما كنت بتفرج على صورنا واحنا مع بعض وخصوصا عند كوبرى ستانلى وعنيا دمعت وحضنت الصور لقيت الفكرة دى اتنقلت جوايا ومليت عليا كيانى

كل صلاة وكل عمرة زكل صدقة بفتكرك ياياسمين وبحس انك معايا فيها وفى نيتى زى مكنا مع بعض علطول كل ده نصه ليا ونصه ليكى

لما بتوحشنى باقوم اصلى ركعتين وابكى وانا ساجد وادعى ربنا سبحانه وتعالى واقول

يارب ياودود ياانيس من لا انيس له
الحمد لله انك الباقى --ياحى لا يموت
اللهم اغفر للمسلمين والمسلمات والمؤمنين والمؤمنات الاحياء منهم والاموات
اللهم بلغها مبالغ الشهداء والحقنى بها ياواسع العطاء

تمت بحمد الله

ياريت محدش يزعل من النهاية دي انا عارفه انها مأساوية بس هي الحياه كده لازم يكون فيها ابتلائات واكيد موتها دا احسن من انها تتطلق او ان يكون في مشاكل زوجية بينهم والاجمل من كده لو اتجمعو تاني مع بعض في الجنه
ويارب مغزي القصه والدروس المستفاده منها
تكون وصلتلكو
وشكرا لكل اللي تابع القصه معايا

انا عندي قصه كده شبيهه بيوميات اتنين مخطوبين (سارة وعمر) بس اسمها خناءات اتنين مخطوبين (احمد وندي)
دي قصه حقيقيه وحلوة كتيير ونهايتها مش ماساويه لو تحبو ممكن انزلهلكو بس هستني اسمع ارائكو

[براءة]

عاجبك كده ادينى عيطت
انا نفسي يوم فى حياتى يعدى من غير ما ابكى بقى
والله القصة جميلة جدااااااا جدااااااااااااااااااا
شكرا ليكـى ع الموضوع