هو انا اتجننت ولا ايه؟

[كلمه حب]

أقولك على حاجه يابوسى انتى ممكن يكون الموضوع فعلامضايقك ومضايق ناس حواليكى بس اكيد ده بيحصل لسبب

معين جواكى وانتى بس اللى تعرفيه وممكن اوى كمان ماتكونيش عايزة

تواجهى نفسك بيه ومتقلقيش ده بيحصلنا كلنا عادى يعنى بس بدرجات بقى تختلف من شخص والتانى

مش مجنونه ولا حاجه ماتخافيش ولو ان الجنان ده ألذ حاجه فى الدنيا يابنتى المجانين فى نعيم بجد

وأوقات كتير بتحسى انك نفسك تبقى مجنونه ومش بتفكرى فى حاجه وعايشه اليوم بكل تفاصيله وجنونه

بس اللى عندك ده انتى بس اللى تقدرى تفهميه علشان تعالجيه لو مضايقك كده .

[فنكوشه المنكوشه]

لا اطمني ليه عقلك فيه حته سليمه :D
علي فكره انا زيك بالظبط يمكن اكتر
انا ممكن اكون مخنوقه فوق ما تتخيلي واعده بضحك ولا في دماغي او عامله انه ولا في دماغي
هي بتبقي شخصيه الانسان كدا ممكن تكوني انطوائيه متحبيش التجمعات الكبيره زي حالاتي
ممكن تكوني مبتحبيش الافراح مثلا
وممكن تكوني هوائيه
وناس كتير زي وزيك
يعني انا ممكن شهر اعد من غير ما اكل اي حاجه يعني حاجات تعيش بس
وفي يوم تاني تلاقيني باكل اكل غير عادي :D
عيشي حياتك :D

[MohammeD el_SadaT]

لاء متقلقيش مش إنتى لوحدك كده
مش عارف أقول كلنا ولا اتكلم عن نفسى بس جد فعلاً ده بيحصل معايا حرفياً
بس أنا عكسك أنا عارف إيه السبب
و
السبب إننى إتعودت على الحزن وبقيت بخاف أفرح زياده عشان لما أرجع تانى لحزنى ميبقاش صعب عليا
أنا طول عمرى بدعى دعوه وحده
يارب إن كانت الدموع هى مصيرى الوحيد فلا تدع أحد يضحكنى

فى عز فرحتى بحس بحزنى طالع يقولى متفرحش زياده يا أستاذ المكد لسه جاى
بجد
أنا خلاص إتعودت مفرحش زياده وخدت الحزن صديق ليا مرفقنى فى كل حاجه

[h_m_y_2010]

ده المنتدي كلوا طلع نس الحاجة
ربنا يكملكوا بعلقوا ويشفيكوا

[the black rose]

اعتقد ان الموضوع ده شبه ده
http://www.thanwya.com/vb/showthread.php?t=16595

[Rien]

عارفة يا بوسى
لو ده اوقات بيحصلك
ف انا بقى حياتى كلها كدة !!

[SmSm Basha]

المشاركة الأصلية كتبت بواسطة bo$y

يعني مثلاً اكون في فرح
رقص و هيصه و مبروك و لولولولولي و عريس و عروسه و ناس منفوشه :D
فجأه كده انا وبدون سابق إنذار ..
اسيب القاعه و اطلع بره و اقعد لوحدي و مش طايقه حد يكلمني ..
و انكد على اللي حواليا و ابوظ لهم اليوم ..
بلاش في فرح
في المصيف مثلاً .. حاجه حلوه اهي
بحر و رمله و هوا و آخر روقان ..
فجأه الاقيني عايزه اقعد لوحدي و مخنوقه و مش برد عالموبايل على حد ولا ليا دعوه بحد و انكد على اللي حواليا كلهم .. و على نفسي أولهم و ساعات الحاله بتوصل لإني بعيط

ليه و عشان ايه ولا ايه اللي حصل ؟؟؟ ولا حد يسألني لإني مش ببقى عارفه ..

و فجأه برضو تلاقيني مبسوطه اوي و آخر فرحه و هيصه
و اي حد يكلمني اقعد اضحك و اهزر معاه زي ما يكون فيه حلم حققته كنت بحلم بيه من زمااان
و مش ببقى عايزه أبطّل ضحك ..

أنا بقى نفسي اعرف ايه يعني ..
مره ابقى نكد و انكد عاللي حواليا كلهم و اسمع اغاني حزايني و سابني وراح و ضاقت بيك و حاجات كتيره
و ساعات بعيط من غير سبب ..
و مره تلاقيني فرحانه اوي و ماليه الدنيا ضحك و هزار و اسمع اغاني فرايحي بقى و الليله ليلتك يا معلم و حاجات من هذا القبيل
تفتكروا ده جنان ولا ايه .. ؟

عايزه بجد الاقي حل قبل ما اللي حواليا يقولوا اني مجنونه فعلاً , و يسلموني للعباسيه :D

هههههههه

عادي جدا يا بوسي انا حياتي كلها كدا .......انا حاسس انهم عايزين يولعوا فيا في البيت ......... في الاوقات اللي المفروض اني ابقى مبسووووووووط و هموت من الفرحة ابقى مضايق و في اوقات تانية اشعر بالفرحة والسرور بدون اي سبب او داعي و لما بتجيلي حالة الهزار دي كل واحد يقولي مالك في ايه ........ كانوا بيقولولي كلمه كدا بدل موودي ........... اه ....... انت بغزالة ...........ههههههه كاني مركب غزالة في ديلي (قال يعني عندي ديييل):D:D .........ههههههههه ............ اسف على الاطالة و شكرا ليكي على الموضوع ....... و تقبلي مروري

[bosy .. mostafa]

بسم الله الرحمن الرحيم
بجد فرحت اوي بالردود دي .. مع اني زعلانه هههههههه << بطلي رخامه بقى يا بوسي

سندريلا
شكراً يا جميل لردك و لمرورك
==
كوكو
مش لوحدك اتجننتي
واضح ان الدنيا كلها اتجننت مش لوحدي الحمد لله
يعني بجد الحاله دي عند ناس كتيره؟؟
انا فاكراها لوحدي والله
يعني لما اضحك تلاقيني بضحك بشكل هستيري لدرجة ان اللي يشوفني يقول بوسي مش راح تخلص ضحك في يومها ده
و لما اعيط .. بعيط برضو بشكل هستيري لدرجة ان اللي يشوفني يقول بوسي عايشه في حالة نكد
وربي كنت مره بعيط اوووووي في اوضتي و كان الكلام ده قبل الإمتحانات بشهر بس مش كنت بعيط عشان الإمتحانات .. ولا اعرف اصلاً كنت بعيط ليه .. المهم فأخويا دخل عليا و بيضحك و قالي (يا بوسي .. لا تبكي إن الإمتحان سهل) والله وقتها بطلت عياط و قعدت اضحك على طريقته .. مش بزمتكم هبل ! :D
شكراً للمرور الجميل ده
==
الصقر الذهبي
لما تفهم الموضوع قولي ..
و شكراً لمرورك
==
مشمش
مهو انا اللي مجنني انه مافيش حاجه بتنغض عليا حياتي او قارفاني في عيشتي مثلاً
عندي اهلي و اصحابي بيحبوني .. يعني مش مكروهه بين الناس
و متفوقه الحمد لله في دراستي ..
طيب فين المشكله ولا حد يسألني
شكلي بعمل مشكله من مافيش .. يعني بعمل من الحبه قبه
==
احمد
شويه !!
شوية مين بس .. ده قول شويتين تلاته سبعه وعشرين شويه !!
مش بقولك هو انا اتجننت ولا ايه؟ :D
شكراً لمرورك
==
شيرين
شكراً يا قمر لمرورك الجميل و تعقيبك
==
دكتور احمد
انا برضو برجح ان الحاله دي ان التغيرات اللي بيصاب بيها الإنسان في مرحلة المراهقه
خصوصاً في الحاله النفسيه بيبقى كل يوم بحال قصدي كل ثانيه سوري
كل يوم دي طويله شويه :D
عموماً يا أحمد شكراً و جايز جايز يكون تفسيرك صح
بس الحاله دي عندي من يوم ما وعيت عالدنيا !!
==
كلمة حب
يا عسل برضو صدقيني بدور على حاجه قارفاني يمكن هي السبب
إني ألاقي .. أبداً .. نهائي .. إطلاقاً ..
مش بقولك بعمل من الحبه قبه :D
و فعلاً انا ساعات بعيش اليوم بكل جنوني و ببقى مجنونه بكل ما تحمل الكلمه من معاني
شكراً للمرور يا قمر
==
ساره
انا فعلاً مش بحب التجمعات الكبيره
يعني لما اجي اخرج مع اصحابي اخرج مع واحده بس !
ماحبش اننا نكون اكتر من اتنين .. مش عارفه مش بحس اني فرحانه
بحس اني لوحدي و كأن محدش جنبي
نفس الكلام في الأفراح .. مش بحبها و لا بحب الدوشه
بحب اكون قاعده في اي مكان هادي .. مش بحب الهيصه و لولولي و الحاجات دي كلها
و كل البنات في الأفراح بلاقيهم يطلعوا يرقصوا مع العروسه انا بكتفي اني اتفرج من بعيد
او اقف اسقف وخلاص .. ده غير كده الرقص حرام ... مش ناقصه ذنوب بقى
في حكاية الأكل انا زيك تماماً .. ساعات بحس اني جايه من الصومال و اول مره اشوف اكل و آكل بإفترا
و ساعات بحس اني مش عايزه آكل اصلاً و عندي هم الأكل ده زي هم المذاكره كده :D
شكراً يا جميل لمرورك الجميل
==
محمد السادات
على فكره انا برضو بخاف افرح
يوم لما بلاقيني فرحانه في يوم ببقى خايفه اوي اوي .. بخاف بعد الفرحه دي اتصدم في اي حد او اتصدم في الفرحه نفسها و ده غالباً اللي بيحصل
شكراً ليك للمرور
==
h_m_y_2010
يعني حضرتك اللي مش نفس الحكايه ولا حاجه؟؟
لا تعليق
==
منى
يا حبيبتي هو انا قلت اوقات
ده دايماً
ميرسي يا عسل للمرور
==
سمسم باشا
انا بيقولوا عليا موديه و ساعات مقلوبه هههههههه
محسسني اني صوره مش عارفه ليه :D:D
حاسه ان اللي حواليا عايزين يخلصوا مني !!
شكراً ليك و لمرورك

[bosy .. mostafa]

حد يشوف لي حل في الصفحه دي بجد
ايه حكاية الصفحه البيضا دي
بتشجع الزمالك ولا ايه
انا دمي اتحرق وفار و شاط كمان

[bosy .. mostafa]

هو انا الردود بتاعتي بتتاكل ولا ايه؟؟

[ahmed2845]

المشاركة الأصلية كتبت بواسطة Doom'S DaY

لاء متقلقيش مش إنتى لوحدك كده
مش عارف أقول كلنا ولا اتكلم عن نفسى بس جد فعلاً ده بيحصل معايا حرفياً
بس أنا عكسك أنا عارف إيه السبب
و
السبب إننى إتعودت على الحزن وبقيت بخاف أفرح زياده عشان لما أرجع تانى لحزنى ميبقاش صعب عليا
أنا طول عمرى بدعى دعوه وحده
يارب إن كانت الدموع هى مصيرى الوحيد فلا تدع أحد يضحكنى

فى عز فرحتى بحس بحزنى طالع يقولى متفرحش زياده يا أستاذ المكد لسه جاى
بجد
أنا خلاص إتعودت مفرحش زياده وخدت الحزن صديق ليا مرفقنى فى كل حاجه

والله العظيم يا مان انا زيك بالظبط
بخاف افرح عشان لما بفرح لازم تجيلى مصيبة ترجعنى للحزن تانى
عمرى ما فرحت فى حاجة الا وانتهت بحزن
انا كنت فاكر نفسى انا الوحيد اللى كده بس طلع فى ناس زى اهو

[h_m_y_2010]

دا أنا اللي مبتدعة الموضوع بس محدش يزعل أنا كنت بهزر

[biob]

على فكره
انا برضه زيك
وعارف احنا ليه كده
وعارف انتى ليه كده
عموما هو ده طبيعى
لانك مراهقه
ده رايي
ويارب يكون مقنع

[bosy .. mostafa]

هي فعلاً ظاهره من ظواهر مرحلة المراهقه
ربنا يعدي فترة الجنان دي على خييييييير

[Dr|shereen]

ولله يا بوسى انا كده بالظبط بزعل فى اوقات المفروض مزعلش فيها وافرح فى اوقات المفروض مفرحش فيها وكمان فى البيت بيسمونى المعقدة وصحابى بيقولوا عليا كئيبة معرفش لبه بس دة اكيد من اثار الثانوية يارب نعدى منها على خير ونحقق احلامنا