احاديث و أسمار لطلاب الثانوي الشطار

[mariam 1]

طب هو مفيش اى ميزة فى كليه الطب دى خالص ؟

[ahmedfezo]

شوفى يا دكتورة (ان شاء الله يعنى)

أنا شخصيا لو رجع بيا الزمان (ده لو رجع أصلا )كنت هخش أسنان

أنا من أول ما خلصت نتيجة الثانوية بتاعتى وأنا بفكر فى أسنان وبحلم بيها

بس طبعا أنتم عارفين لما يظهر التنسيق وتكتشف أن مجموعك معدى طب

يصاب الأهل بحالة هستيرية

وغير كمان أن انا أول واحد فى العيلة
فطبعا كانت رغبة جماهيرية عريضة

احنا مش بنقولكم متدخلوش طب

احنا بنقولكم على الصعوبات للى هتواجهكم فيها بس مش أكتر


علشان تبقوا عارفين الطريق من الأول

الطب مجال حلو وجميل جدا
بس للأسف أسلوب الدراسة فى مصر جحيم لا يطاق

ناهيك عن الوضع الصحى الزبالة فى مستشفيات وزارة الكحة (احم احم ....الصحة)

أنتم بس ريحوا نفسكم الأجازة دى لأنها مبتتعوضش

وخشوا للى انتوا عاوزينه مش للى يملى عليكم (بضم الميم)

عاوزين طب خشوا طب عاوزين أسنان خشوا أسنان المهم تبقوا انتم للى عاوزين مش أهاليكم

وتكون نيتكم خالصة لوجه الله أولا ثم الطب ثانيا (مش عشان الفلوس وغيره من الكلام الفاضى )


الطب عامل زى الست المصرية
لازم تحبها غصب عنك أو بمزاجك علشان تتاقلم معاها

فلازم تحبو الطب علشان تمشوا فيه

الكلام دلوقتى بالنسبالكم سهل لكن لما تخشوا المعمعة حتلاقوا أن فكرة حب الطب تبدوا شبه مستحيلة




وعموما متخدوش كلامى 100% ده مجرد تنفيس عن النفس

[DrMostafa2015]

المشاركة الأصلية كتبت بواسطة mariam 1

طب هو مفيش اى ميزة فى كليه الطب دى خالص ؟

... طب كلية زيه زي كل الكليات .. مميزات و عيوب

مميزاته هيديهالك المجتمع .. و عيوبه انه محتاج مجهود جامد و يا حبذا لو النيه فيه خالصة لله .

في ناس بتبقى متميزة بجد و بتحب حاجات .. يعني لو حد قالي فيزياء مثلا بفتكر واحد معين .. لو حد قالي فلك بفتكر واحد معين

الناس دي خسارة يدخلوا طب عشان اي حاجة و هي مجتلهمش على بال ولا على خاطر لمجرد ان اهله عايزين او انه شاطر اوي ..

بس من الاخر يا دكتورة انا مش عايز ابقى منفر من الكلية .. الكلية زيها زي غيرها .. كل حاجة ليها صعوبتها .. و قلت لحضرتك مادام هتدخليها كدة كدة بطلي تفكري في الموضوع و خلاص .. هتدخليها و هتحسي بالمجهود المطلوب زيك زي زميلاتك و مع بعض هتخلصوا و خلاص و تتخرجوا بالسلامة ان شاء الله و تدوروا على تخصص مناسب للبنات و خلاص و تستمر الحياة .. و دة احسن طبعا من واحدة داخلة كلية "نظرية " بمجموعها برضه اللي وداها و هتتخرج ماتشتغلش و متاخدش جوايز مجتمعنا .. وضعك احسن من غيرك برضه بدخولك طب

[DrMostafa2015]

المشاركة الأصلية كتبت بواسطة ahmedfezo

شوفى يا دكتورة (ان شاء الله يعنى)

أنا شخصيا لو رجع بيا الزمان (ده لو رجع أصلا )كنت هخش أسنان

أنا من أول ما خلصت نتيجة الثانوية بتاعتى وأنا بفكر فى أسنان وبحلم بيها

بس طبعا أنتم عارفين لما يظهر التنسيق وتكتشف أن مجموعك معدى طب

يصاب الأهل بحالة هستيرية

وغير كمان أن انا أول واحد فى العيلة
فطبعا كانت رغبة جماهيرية عريضة

احنا مش بنقولكم متدخلوش طب

احنا بنقولكم على الصعوبات للى هتواجهكم فيها بس مش أكتر


علشان تبقوا عارفين الطريق من الأول

الطب مجال حلو وجميل جدا
بس للأسف أسلوب الدراسة فى مصر جحيم لا يطاق

ناهيك عن الوضع الصحى الزبالة فى مستشفيات وزارة الكحة (احم احم ....الصحة)

أنتم بس ريحوا نفسكم الأجازة دى لأنها مبتتعوضش

وخشوا للى انتوا عاوزينه مش للى يملى عليكم (بضم الميم)

عاوزين طب خشوا طب عاوزين أسنان خشوا أسنان المهم تبقوا انتم للى عاوزين مش أهاليكم

وتكون نيتكم خالصة لوجه الله أولا ثم الطب ثانيا (مش عشان الفلوس وغيره من الكلام الفاضى )


الطب عامل زى الست المصرية
لازم تحبها غصب عنك أو بمزاجك علشان تتاقلم معاها

فلازم تحبو الطب علشان تمشوا فيه

الكلام دلوقتى بالنسبالكم سهل لكن لما تخشوا المعمعة حتلاقوا أن فكرة حب الطب تبدوا شبه مستحيلة




وعموما متخدوش كلامى 100% ده مجرد تنفيس عن النفس

فرست ايد على مكتبي يا اخ احمد

[شرف الزملكاوى14]

السلام عليكم يا دكتور مصطفى كان عندى سؤالين بس

1. هل طالب كلية الطب مش بيلاقى وقت مثلا للحياة العادية (غير المذاكرة ) زى الكورة مثلا وما شابه
( ومش شرط ان الطالب ده يكون مثلا عاوز يرتب مثلا او امتياز كل سنة .. يعنى يعدى وخلاص ( جيد مثلا )

((( وياريت حضرتك تطمنى )))

2 هوا حضرتك ليه لما لقيت طب فى اول سنة صعب مثلا او كده ليه محولتش ؟ّ!

وجزاك الله خيرا على الموضوع وعلى النصائح االرائعة دى

[DrMostafa2015]

1. هل طالب كلية الطب مش بيلاقى وقت مثلا للحياة العادية (غير المذاكرة ) زى الكورة مثلا وما شابه

لا يا دوك بيلاقي عادي بس اكيد طالب طب مش عايز يلعب كل يوم يعني ... انت غالبا هتبقى مطالب عشان تمشي كويس و متتحطش في مأزق زي كتير من طلاب اولى انك تذاكر يوم بيوم اللي خدته و دي حاجة حلوة بصراحة هتخليكك متطمن في وقت الامتحانات انك بتبدأ من على ارضية موجودة اصلا مش لسة هتقول يا هادي .. و بناء عليه فالموضوع ده مقدم شوية على الترفيه لانه هيجيب ترفيه من نوع تاني او رفاهية انك تراجع و دي رفاهية مش متوفرة كتير لطلبة طب اللي يا دوب بيخلصوا عشان يدخلوا الامتحانات عكس ثانوي اللي فيه فترة مراجعة كافية .. فقبل ما تحط وقت الترفيه فكر في الموضوع ده و ان شاء الله تفضل تقابل اصحابك و تلعب مفيش حاجة هتتغير وسط الاسبوع مذاكرة و الويك اند لعب ... خليك اوروبي في الحتة دي

حاجة تانية .. واحد عايز يعدي او يجيب جيد .. دكتوري و زميلي الجديد ... احب اقولك ان المناهج اللي انت هتمتحن فيها دي مثلا خلينا نقول زي الحجر الكبير .. مثلا .. لو قلتلك حركهولي قدام 10 متر او 15 متر .. في الحقيقة العقبة الاكبر في انك تنقل الحجر دة من وضع السكون لوضع الحركة و مش بعيد بعد كدة تمشية قدامك زي الكورة 20 متر كمان ... فكون الطالب يسعى انه يجيب جيد انت مطالب بالجزء الاكبر من المجهود ان هو انك تنجح و ده محتاج مذاكرة + ضيف عليه عبء القلق لانك مش مسيطر على المنهج و احتمال انك لا قدر الله متنجحش لو حصل ظرف طارئ هتبقى واردة و لو قليلة بس هتنغص عليك تفكيرك ... فانت الاحسن تعمل على انك ت master منهجك تلمه و تسيطر عليه مش هو اللي يسيطر عليك .. التعب واحد اما مجهود pure او مجهود شوية و قلق شويتين .. و ده في كل الكليات مش طب بس يعني .. بس "إن الله يحب معالي الامور و أشرافها و يكره سفسافها " فخليك دايما عينك على معالي الامور ..

2 هوا حضرتك ليه لما لقيت طب فى اول سنة صعب مثلا او كده ليه محولتش ؟ّ!

يا دكتور في امر بسيط .. انا في الموضوع مجبتش سيرة صعوبة الكلية ولا انتقدت طب ككلية .. انا انتقدت طريقة تفكير و اتخاذ قرار بعيدا عن الفرد .. احنا للاسف تحس اننا في طاحونة زي نظام القبيلة زمان الفرد فيه ملوش قيمة و رأيه مش مهم اما انك تبقى مع القبيلة او انك تبقى صعلوك و قبيلتك تنبذك و تبقى من اللي "في كل واد يهيمون " ..

فللاسف انا عارف ان بعض الطلاب هيقرأ الموضوع من وجهة نظر ثابتة و معندهاش استعداد تاخد و تدي بناء عليه هيفتكر ان انا ضده و بعاديه في حاجة هو عايزها .. او بكرهه في الكلية - اللي هو مقتنع في داخله - انه بيعشقها و انه اتخلق عشانها بدليل انه جاب مجموع طب زي الطلاب الشطار فلازم يتقبل المهمة المنوطة بالمتميزين امثاله و يقبل التكليف المجتمعي و فرض العين العرفي و يدخل "طب " في حلة الابطال و صبر المرابطين .

مشكلتنا اعلام و مجتمع من الفقر و الاستهلاك و قلة الابداع بقى كله شبه بعضه كله عايز يتميز عن التاني فبيتخذوا المصائر فرصة للتميز عن بعضهم البعض ..

الحقيقة انا مع الطالب الشاطر ممكن انا اكتر واحد في صفه .. انا مع ناس اتصادر حقها في التفكير و انهم يبصوا حواليهم للدنيا الواسعة .. و رابطوا على فرض العين "الطب "

كلية طب حلوة بجد و الله مش تريقة و هترتبط بيها عاطفيا و هتبقى حتة منك سنة ورا سنة .. هتحس بكدة انها بقت غالية عليك .. بس المشكلة ان ممكن متبقاش هي " الافضل " لبعض الناس اللي لو راحوا مكان تاني هيبقى احسنلهم و احسنلنا و هيبقى تذكرة درجة اولى لمستقبل باهر و شهرة و ليك في دكتور "على مصطفى مشرفة " اينشتاين العرب مثال .. مكنش دكتور بشري يعني .. لكنه بدأ ثورة علمية منسية و هي دي الثورة اللي بجد هتغيرنا مش ثورات الميادين سهلة القمع و الافشال ..

اني محولتش بعد سنة اولى .. بص انا حاولت احول بس بعد اجازة سنة اولى و لحد الاجازة دي و انا رايح رابعة في افكار في دماغي.. بس انت عشان تسيب طب لازم تروح حاجة تضمن انك تتعلم فيها كويس و دة انا ببصله لما بمشي في اي موضوع مش مجرد اني احول و خلاص ... بس اعذرني انا مش عايز اتكلم في الموضوع ده على الملأ لاسباب متعددة بس مبدأ التحويل كان عندي و كنت بفكر فيه . و لو عايز تعرف اوي ممكن اقولك على الخاص على الكام محاولة اللي انا حاولتهم ..

عموما طالب مخلص ثانوي غالبا نص طلبة طب بيبقى ينطبق عليهم شروط منح في جامعات زي الالمانية و الامريكية و جامعات كويسة فيها مجالات كويسة جدا لكن هم مش بيفكروا في الحجات دي زي ما بيقولوا الحمد لله اني جبت مجموع طب مش هضيعه .. بس في فرص لطلبة مخلصين ثانوي فريش انهم يروحوا اماكن فيها " تعليم " و بشدد على الكلمة دي في مجالات ممكن تبقى اقرب لشغفهم من الطب المقدس بس يا دوك

[ahmedfezo]

المشاركة الأصلية كتبت بواسطة شرف الزملكاوى14

السلام عليكم يا دكتور مصطفى كان عندى سؤالين بس

1. هل طالب كلية الطب مش بيلاقى وقت مثلا للحياة العادية (غير المذاكرة ) زى الكورة مثلا وما شابه
( ومش شرط ان الطالب ده يكون مثلا عاوز يرتب مثلا او امتياز كل سنة .. يعنى يعدى وخلاص ( جيد مثلا )

((( وياريت حضرتك تطمنى )))

2 هوا حضرتك ليه لما لقيت طب فى اول سنة صعب مثلا او كده ليه محولتش ؟ّ!

وجزاك الله خيرا على الموضوع وعلى النصائح االرائعة دى

للأسف مش هتلاقى وقت لأى حاجة غير المذاكرة

حتى لو انت من بتوع جيد

لانك ببساطة أول ما تشرفنا هتكتشف أنك لازم تجيب تقدير تتعين بيه فى حتة كويسة تتعلم بيها كويس

بمعنى أو بأخر التقدير فى كليتنا مهم علشان تاخد التخصص للى نفسك فيه والا هتتسوح ....صدقنى هتتسوح


بالنسبة للتحويل مش هتقدر لأنك للى حواليك مش هسيبوك

وغير كمان انك هتتعب قوى فى سنة أولى وتقول لنفسك(بعد التعب ده أحول؟ )