|
#16
12-10-2011, 01:46 AM
|
||||
|
||||
ايوه يا فامبير بس مش هتبقى مشكله خصوصا اناى فسنه اولى ولسه فى حاجات كتير بتعلمها وكل يوم بروح بدفتر معلومات جديده عليا اه انت قولتلنا على كل حاجه فى البوستات السابقه بس برضه العملى غير النظى وانا فعلا نفسى اخد انجلش لان بصراحه ومن غير اى خجل انا زباله جداااااا فيه اه بحب اتعلم لغه وكلمات ومحادثه وكده لكن جرامر ومنهج ودروس حاجه تقرف بس برضه مش عارفه اروح فين ولا اعمل ايه بس هو انا طول ما ماشيه بلاقى اعلان عن منح اوركل وحاجات كده المحاسب المحترف وانا حاسه ان دى لسنه رابعه ا تالته اذا كان احنا لسه بناخد التوصيل والقياس ومش عارفه انهى قرص او حتى اسمه ايه عشان ينا سيناسبنى ويبتدى معايا من السالب للمليون
__________________
ارجع يا زمااان حن ياماضى .......ايام الحب مكااااان مكاان عاادى ولكان الشوق للناس تهمه ولا نظره عين وحنين ازمه ولا عقل الناس خاوى وفاضى ........حن يا ماااااااضى |
|
#17
12-10-2011, 08:35 PM
|
||||
|
||||
|
English-EP1
يا صباح الصباح آخر مرة اتكلمنا فيها في البوست اللى فات كانت على نقطة مهمة وهى ليه الانجليش مهم في مجال سوق العمل جوا مصر واعتقد اغلبيتنا كان معتقد بالفكرة دي ولما قرا الكلام اللى قولته اقتنع اكتر عشان نبقى متفقين بقى من اولها كدا البوست دا هوا بداية قصة نجاحك باذن الله .. عشان كدا ركز فى كل كلمة هاقولها لانها عن خبرة وتجربة انا مش هاقولكو انى شغال مدير عام في شركة مش عارف ايه بس مريت بانترفيوهات كتير وشوفت شركات كتير والحمدلله كونت فكرة كبيرة عن المواضيع دي عشان انا عارف ان فيه ناس ممكن تقرا الكلام دا وتقول مين عم الحج اللى واجع دماغنا بذكرياته اليومية دي !! نبدأ ؟؟ . . قولو بسم الله ويلا بينا . . . سؤال بسيط جدا نبدأ بيه عشان نصحصح هوا ليه الانجليش بتاعنا زبالة اوي بالرغم اننا بقيلنا 12 سنة بندرسة في المدارس ؟؟ واحد هايقول .. عشان التعليم اساسا زفت والمنظومة التعليمية فاسدة واحد تاني هايقول .. الله يخربيتك يا مبارك انت والنظام الفاسد بتاعك واحد تالت وواحد رابع وواحد خامس .... وتستمر الاراء والاطروحات كلها اراء تحترم طبعا .. واراء صحيحة ومؤيد ليها تمااااااما بس تفتكرو ايه هيا الحقيقية الثابته ورا رداءة تعليم الانجليش في مصر ؟ والاجابة بكل بساطة تتلخص في اننا مش بنستخدم نفس طريقة التعلم اللى الطفل بيتعرف بيها على الجو المحيط بيه فاكرين لما كنت بقول في البوست اللى فات الطفل الامريكي بيتولد مش فاهم حاجة وبالتعامل مع الناس اللى حواليه بيكتسب اللغة ؟ هيا دي بقى طريقة التعليم المثلى عشان تتكلم انجليش مش فاهمين ؟ اوضح اكتر نظام التعليم الحالى في مصر هو كالاتى : - جوود مورنينج يا ولاد - قوم يا واد قولي البريزنت سيمبل بيتكون من ايه - ساعة يعنى ووتش وبنى يعنى براون - انت ازاى تخش عليا الكيــــلاس !! وكلنااااااااا بلا استثناء تقريبا خضع للتعليم المتخلف دا نطق غلط – معلومات غلط – قياس مستوي الطالب بطريقة غلط – امتحان بيقيس مدى قوة الحفظ والصم والغباء !! كله غلط فى غلط .. ونتج عن دا اننا وصلنا للمستوي المزري اللى احنا فيه دا مع انك لو في تعليم محترم .. وكنت بتدرس انجليش لمدة 12 سنة كان زمانك بقيت بتتكلم انجليش احسن من الامريكي والكندي !! طب على كدا بقى ايه هيا مواصفات التعليم المميز اللى من خلاله اقدر اتعلم انجليش صح ؟؟ انك تتعامل معاملة الطفل اللى لسه مولود وبيكتشف العالم من حواليه بنفسه حتى لو انت كان عندك 50 سنة ازاى ؟ انت بما انك مابتعرفش تتكلم انجليش .. دا معناه انك بتتساوي تماما مع الطفل اللى لسه مولود في امريكا ومابيعرفش يتكلم هوا كمان صح ؟؟ وبالتالى عشان تتعلم صح زيه يبقى شوف هوا اتعلم ازاى واتعلم زيه طب هوا اتعلم ازاى ؟ افتكر معايا البوست اللى فات لما قولت : طب غير الوضع وتخيل نفسك انك في امريكا مثلا وبرده اتولدت هناك ولسه خام مش عارف اي حاجة ومع الوقت برده عرفت ان لما تشوف حاجة عليها ارقام كتير وليها شاشة صغيرة كدا يبقى اسمها calculator ولما تشوف حاجة منورة وبتعرض حاجات دي يبقى اسمها TV اهو انت هاتبقى زيه بالظبط .. في الاول هاتقول ايه المعيلة اللى انا فيها دي .. مانا عارف الكلام دا وخدناه قبل كدا في المدرسة هارجع اقولك تعليم المدرسة دا اساسا فاااااشل ومالوش تلاتين لازمة لازم تتعلم لغة من اول وجديد .. لان حاجات كتيرة انت اتعلمتها غلط للاسف في الاول هاتتعب اوي .. وممكن توصل لدرجة اليأس .. بس صدقنى وخدها مني كلمة هاتستريح بعدين .. وبالممارسة هاتلاقي نفسك شغااااااال يونيفرسال وهاتحس بالفرق اذن نظام التعليم الامثل اللى المفروض تتعلمه هو : - good morning guys and girls, how r u? - Hey u, could u tell me how can I use the present simple? - watch is something that u see to know the time بمعنى ان مابيبقاش فيه استخدام ولو لكلمة واحده بالعربي في الكلاس يبقى كله اوول انجليش اوول ذا تايم فعلا اذن توصلنا لنقطة دلوقتى وهى ازاى اتعلم الانجليش بالطريقة الصح ============== كام واحد فينا بيشتكي من صعوبات في اللغة ؟؟ كتييييييييييييير طبعا طب ايه المشاكل اللى انت بتواجهها ؟ - بتهته فى الكلام وبقول كلمتين على بعض بالعافية وياعالم يا صح ياغلط - انا عارف كلمات كتيرة بس مش عارف اوظف الكلمات دي في المكان الصح - الجرامر عندي تعبااااااااان موله وبدخل الماضى في المضارع في المستقبل والجملة بيبقى شكلها يسد النفس - بنطق غلط والانجليش بتاعي فلاحي جدا لدرجة ان لو واحد امريكي سمعنى هايشتمي بالام والاب والعيلة كلها !! - انا بتكلم كويس وبنطق صح بس لساني تقيل ونفسي ابقى جامد كدا وانطلق بقى وابقى بتكلم زي الامريكان كدا تقريبا هيا دي اكتر مشاكل بتواجه الناس اللى بتتعلم الانجليش نعالج بقى المشاكل دي كلها ازاااااااااااااى ؟؟ اولاً .. تعيش نفسك فى امريكا وانت قاعد في مصر ثانياً .. تتكلم مع اي حد جنبك عشان تمرن لسانك ثالثا .. عليك ثم عليك ثم عليك بالكورسات وكل نقطة من دول هانتناقش فيهم بصورة مفصلة ان شاء الله في البوست الجاي وباذن الله هاتبقى هيا دي الزتونة بقى بعتذر عن اذا كان الموضوع بينزل على اجزاء بس انا فعلا كل يوم بكتب شوية وبنزله ودا عشان انا مابلاقيش وقت اصلا فاعذروني يعنى يتبــــــــع ،،، |
|
#18
12-10-2011, 09:30 PM
|
||||
|
||||
|
ايوه يا فامبير خش فى الموضوع بسرعه بليس
__________________
ارجع يا زمااان حن ياماضى .......ايام الحب مكااااان مكاان عاادى ولكان الشوق للناس تهمه ولا نظره عين وحنين ازمه ولا عقل الناس خاوى وفاضى ........حن يا ماااااااضى |
|
#20
13-10-2011, 09:51 PM
|
||||
|
||||
|
جزاك الله خيرا ...
طلب من أخى الحبيب محمود و هو أن نلتزم بخير الكلام ما قل ودل ...... يعنى أن يحتوى الموضوع على كذا نقطة جديدة .. ولا ينصب على حاجة واحدة .... بوركت ... وفقك الله وسددك ... |
|
#21
14-10-2011, 03:31 PM
|
|||
|
|||
|
شكرا على مجهودك الرائع يا فامبير
|
|
#22
15-10-2011, 11:32 AM
|
||||
|
||||
رد لفامباير و ياريت ترد عليا فيه ضرورى جداا او تاخد بالك منه
اولا شكرااااااا جداا جداا على الموضوع الاكثر من رااااائع ده بجد عاوز اقولك انى اخدت جمل انت كاتبها و كتبتها فى ورق عندى و علقتها جمب السرير عشان كل شوية اشوفها وعقل الباطن يحفظها  ثانيا عاوز اقولك انك بتخاطب فى البوست ده شريحة كبيره من طلاب سنه اولى لان معظمنا دخل على الموضوع و كده فا ياريت فى بوست كده تقولنا فى اجازة سنه اولى نعمل ايه و هكذا لحد سنه رابعه عشان نحدد خطة بالظبط و خد بالك اثناء الدراسه صعب جدااا ناخد كورسات او نهتهم ب اى حاجة و فى نفس الوقت عاوزين تقولنا الاجازات بتاعت اخر السنه نعمل فيها ايه بالظبط ... ّ!!! و سؤال كمااااان انا فى سنه اولى طبعا .. و بحب الانجلش جداا و البرمجه و الديزاين فا انا معايا ICDL , Toefel - Local و بتعلم oracele بس self study لما بكون فاضى و يعتبر باخد كورس المانى فى معهد goethe و بفهم تمام اوى ف java , c# , cinema4d يعنى لما بكون فاضى و معاد الكورس تمام بروح مش بواظب اوى عليه الصراحه قولى انا كده ماشى صح ولا ايه و اجازة سنه اولى اعمل فيها ايه ؟؟ و هل ينفع اخد كورس انجلش فى البيزنس بس يعنى مش انجلش عام .. مثلا كورس انجلش بيزنس فى ال AUC ولا محتاجين كورس عام فى ال AUC مثلا ولا ايه ياريت الرد على الاستفسارات اللى اعتقد انها مهمه لى و لاى حد بردو و هستنى الرد .. و ربنااااااااااا يجازيك خير عن مواضيعك يارب
__________________
I`ll thank Allah for open my eyes..Now and forever I`ll be there for you..And I ask Allah to bless all we do..You`re my friend..and my strength
 |
|
#23
15-10-2011, 08:20 PM
|
||||
|
||||
|
ناس كتيرة اضايقت من حكاية انى عمال ارغى ارغى وادي في مقدمات بس صدقوني والله كان لازم ادي في مقدمات عشان تبقو عارفين قد ايه الموضوع مهم وقد ايه انت لازم تتعلم لغة تانية غير العربى تاني حاجة فيه ناس بتشارك وبتكتب اسئلة وللاسف انا ببقى عايز ارد بس مش عايز الموضوع يبهدل منى .. ولذلك انا عملت موضوع فرعى للاسئلة والاستفسارات المتعلقة بالكورسات عموما ودا هايبقى ان شاء الله بمثابة مشاركة عامة من كل الناس مش شرط يعنى انى اجاوب انا عليه http://thanwya.com./vb/showthread.ph...67#post4048867 عرفنا في البوست اللى فات شوية حاجات كتير وكان اخر حاجة توصلنالها هيا المشاكل الشائعة اللى بتواجهنا لما بنيجي نتعامل مع الانجليش كلغة جديدة بنتعلمها او بنعرفها وبما ان الناس طلبت منى اخش فى الموضوع بدون رغى فاتس اوكي عشان تعالج المشاكل اللى انت بتتعرض ليها لازم تعمل 3 حاجات أولاً : تعيش نفسك في امريكا وانت قاعد في مصر انا ليه بقول عيش نفسك في امريكا ؟ واحنا بما اننا ماعندناش القدرة على السفر لامريكا فاحنا عايزين نطبق الموضوع دا دلوقتى واحنا قاعدين في مصرلان زي ماقولتلك قبل كدا تخيل انك نمت وصحيت لاقيت نفسك في امريكا ومش عارف تتكلم مع الناس ومجبر على التعامل معاهم وانت مش فاهم لغتهم اصلا .. هاتعمل ايه ؟؟ يااااااما ناس سافرت امريكا وماكنتش تعرف تفرق حرف الايه من البي ومع ذلك قعدو هناك سنين ورجعو مصر بيتكلمو احسن من اجدعها دكتور في اداب انجليش !! فيه وسائل كتيرة بس الوسيلة الاضمن والانجح والمتاحة للجميع هيا النت ازاى ؟ 1- تخش على ويكيبيديا وتقرا عن حاجات كتيرة بالانجليش ويكبيديا موسوعة مالهاش حل بجد وفيها كل حاجة تيجي في بالك باي لغة انت عايزها .. بس عشان احنا عايزين ننمى اللغة فلازم تقراها بالانجليش ولاحظ ان من الطبيعي جدا ان فيه كلمات كتيرة ممكن ماتعرفهاش بس ساعتها بقى لازم تتعب شوية وتحاول تجيب معناها وتشوف النطق الصح بتاعها 2- تفتح السي ان ان يومياً وتعرف الاخبار من عليه هاتلاقي المذيع بيتكلم بسرعة وهاتتخنق في الاول .. حاول تلتزم بالموضوع دا على قد ما تقدر وقدرتك على السماع هاتزيد وهاتعرف تلقط كلام كتير بعد كدا 3- تتفرج على افلام بدون ترجمة دا في حالة اذا كنت بتتخنق من حكاية السي ان ان والكلام دا .. بس في تلك الحالة انت هاتعمل حاجة حلوة اوي فيه افلام بتنزل بدون ترجمة .. حاول انت بقى تنزل الترجمة بتاعتها بس بالانجليش .. يعنى الترجمة يبقى مكتوب فيها الكلام اللى الممثلين بيقولوه بحيث انك تتطابق الكلام مع اللى انت بتسمعه .. دا هايعمل معاك فرق جااامد جدا جدا واسألونى انا :D 4- تسمع في اغانى وتحاول تلقط الكلام وتفهم (بس ابعد عن الراب) ودي خطوة موازية لخطوة الافلام .. نقى اغاني هادية ماتكونش سريعة وهات الكلمات بتاعتها lyrics وبرده طابق كلام الاغنية مع اللى انت بتسمعه هايعمل معاك فرق رهيــــب مع مراعاة حاجة مهمة .. وانت بتسمع وبتقرا الكلام بتاع الاغنية حاول تغنى مع الاغنية بنفس طريقة كلام المغنى عشان يظبط الاكسينت عندك ومع استمرارك في الحكاية دي والله فعلا الاكسينت هاتتحسن كتير وبعد كدا هايبقى حاجة تلقائية عندك وفعلا انا اللى ظبط الاكسينت عندي هيا حكاية الاغاني دي 5- الاهم من كدا بقى .. تعمل تشات مع الاجانب بالانجليش عندك مواقع التشات على النت مغرقة الدنيا .. كلم اجانب كتير سواء كتابة او مايك عادي يعنى دا هايفيدك في حاجتين .. اول حاجة الطلاقة فى الكلام .. ودي هانتكلم عنها بشكل تفصيلي كمان شوية تاني حاجة .. هاتستفيد ثقافة ليك ولنفسك بتعرفك على ثقافات الناس التانية لان تعاملك مع الناس اللى من جنسيات تانية احسن ميت مرة لما تقعد تقرا عن ثقافات الناس دي في الكتب ونصيحة بقى انصحك بيها ثالثاً : الكورسات ثم الكورسات ثم الكورسات اعمل لنفسك ساعتين او تلاته كل يوم .. وخلال التلات ساعات دول انت اجنبى .. يعنى تخش ع النت على حاجات انجليش تفتح التليفزيون على قنوات انجليش تشغل الام بي ثري على اذاعة انجليش او اغاني انجليش الموضوع ممكن يوصل معاك لانك تكلم نفسك بالانجليش .. وحصلي انا شخصيا قبل كدا وحسيت انى اتجننت :D ثانيا : تتكلم مع اي حد جنبك عشان تمرن لسانك غالبا صعب انك تلاقي حد تتكلم معاه .. فانتا ماعندكش غير بديلين : الاول : تعمل تشات مع الاجانب ع النت وبالمايك وماتتكسفش التاني : الكورسات يا معلم زي ماهانشوف كمان شوية فايدتها ايه بقى انك تتكلم مع الاشخاص التانية ؟ 1- انت دلوقتى لسانك تحس انه مربوط والكلمات بتطلع بالعافية وحاسس انك مكسوف ومش عارف انت بتتكلم صح ولا غلط .. فانتا بالخطوة دي بتحاول تفك لسانك واتكلم عادي حتى لو بتتكلم غلط او تنطق غلط بس المهم انك حاولت ومع الوقت وتنفيذك للي قولتلك عليه في الاول خالص هاتكتشف حاجات كتيرة غلط انت بتعملها وهاتصلحها 2- انت بتفكر بالعربى بعد كدا بتترجم انجليش وبعد كدا بتتكلم يعنى مثلا .. انت دلوقتى عايز تقول الراجل اللى بيتكلم دا رغاي اوي فانتا كدا فكرت بالعربى ودي خدت ثانية وعلى بال ماتترجمها بالانجليش خدت ثانية كمان يبقى كدا عشان تقول جملة زي دي يبقى كدا خدت منك ثانيتين بحالهم وكدا تبقى انت بطئ كلامك مع الاشخاص التانيين وتمرينك المستمر في الطريقة دي هايزود معدل السرعة عندك في التفكير والترجمة السريعة دي لغاية ما الموضوع بعد كدا هايتحول تلقائى لانك تفكر بالانجليش ومش محتاج انك تعمل عملية الترجمة دي فيه اخطاء شائعة بيقع فيها كتير من الناس زي : 1- عايز مركز يكون كويس وبيدي شهادة معتمدة 2- عايز اخش في ليفل عالى من الاول عشان انجز وعشان نعالج الاخطاء دي لازم نوضح هيا ليه اصلا غلط صح ؟ اولا .. بخصوص موضوع المكان الكويس اللى بيدي شهادات معتمدة عايز اقولك ان حوار الشهادة اللى بيخص تعليمك لاي لغة انساااااااااه خااااااااالص وفكك منه انت اللى يهمك انك تستفيد لنفسك وتكتسب اللغة وتبقى بتتكلم كويس تخيل انك واخد 20 شهادة من كامبردج و5 شهادات من اكسفورد وروحت عملت انترفيو في شركة ما والانجليش بتاعك مكسر هل الانترفيور اللى بيعملك الانترفيو هايقبلك ؟ اكيد لاء طبعا حتى لو واخد عشروميت شهادة طبعا الشهادة شئ كويس .. بس مش الحاجة الخطيرة الجامدة اللى هوا انا باخد الكورس عشان استلم الشهادة في الاخر وافرح بيها وبعدين عايز اقول معلومة في النص كدا مقولة بلدك بلد شهادات دي بدأت تموت وبقى الاتجاه اللى ماشى حاليا هو انت امكانياتك ايه ووريني ع الواقع واشوف بعيني ولو تستاهل هاشغلك ثانيا .. بخصوص حوار انك تبقى عايز تخش ليفل عالى عشان تقصر المسافة عليك وتخلص كل الليفلات على طول في اقل وقت باقل تكلفة دا هايضرك اكتر من اما هاينفعك ليــــه ؟ لانك لما تخش في مستوي انت مش قده اصلا هاتتعب يعنى مثلا انا في مرة كنت باخد كورس تبع معهد بيرلتز وعملت تحديد المستوي وفوجئت بانى دخلت ليفل وان .. مع انى مستوايا اعلى من كدا ودا بشهادة انستراكتورز تانيين ومع ذلك مازعلتش .. ليه ؟ قولت لنفسي اللى عملى الامتحان شايف ان مستوايا كدا وهوا ادري بدا اكتر منى وغير كدا انت هاتبتدي البداية الصح اللى هاتظبطك صح وفعلا فيه حاجات كتيرة كانت ممكن تفوتني لو كنت دخلت في ليفل اعلى من وان وبالتالى شيل من دماغك فكرة انا عايز اعلى ليفل ممكن اقدر اخشه خليك على طبيعتك خااااالص والمستوي اللى انت تستاهله خشه وانت راضى حتى لو كان ليفل زيرو مش وان حتى !! اي كورس انت هاتخشه في اي حتة خلقها ربنا في مصر هاتلاقيه متقسم لاتنين جينيرال – كونفيرسيشن 1- الجينيرال : دا بيبقى فيه الاساسيات بتاعة اللغة .. بيعلمك ازاى تكون جملة مظبوطة – ازاى تظبط الجرامر – ازاى تنطق صح .. الخ الخ ودا اللى بيبقى زيرو خالص في الانجليش بيخشه 2- كونفيرسيشن : وطبعا باين من اسمه انه خاص بالكلام والمحادثة .. ودا بيبقى مستوي متقدم شوية وبيركز على الكلام في اي مواضيع بحيث انه بيعلمك ازاى تتكلم بطلاقة من غير ماتفكر بحيث ان الكلام يطلع لوحده من بوقك ومن خلال الكونفيرسيشن دا انت مع الوقت باذن الله ممكن توصل لدرجة الفلونت والناتيف كمان ودا يقودنا لنقطة تانية وهو انك لما بتتخرج انت بتيجي في الحتة الخاصة بتقييم الانجليش عندك في السي في وبتكتبه .. وهوا لا يخرج عن حاجة من الحاجات الجايه دي : 1- Fair : يعنى فهم بصعوبة وكلام بالعافية 2- Good : بتفهم معقول وبتتكلم متهته وساعات بيبقى غلط 3- Very Good : بتفهم زي الفل وبتتكلم كويس بس ساعات بيقع منك حاجات قليلة بس نطقك صح والجرامر بتاعك صح 4- Fluent : يعنى وصلت لدرجة الطلاقة في الكلام اللى هوا الكلام بيطلع لوحده منك من غير ماتفكر فيه بالعربى وتقوم مترجمه 5- Native : دا بقى اعلى حاجة .. الناتيف دا اللى هوا لغة اهل البلد ذات نفسها .. يعنى لو انت ناتيف دا معناه انك بتتكلم زي لغة اهل البلد ذات نفسها وطبعا بيفرق الناتيف بتاع انجلترا عن الناتيف بتاع امريكا عن بتاع كندا عن بتاع استراليا وعشاااان كدا بقولكو اسمعو افلام كتير واغاني كتير عشان تلقطو الاكسينت بتاعتهم وتحاولو تقلدوها ووالله هايعمل معاكو فرق كبير جدا ناخد بريك بقى دلوقتى ونقف لحد هنا نستريح شوية وملحوظة حابب اقولها في وقت هاييجي عليا هانزل بوستات كاملة بالانجليش بدل العربى عشان اجبركو انكو تقرو انجليش وتيجو على نفسكو شوية في البوست القادم انا مش عارف هاقول في ايه اصلا لان ورايا خمس الاف حاجة اعملها .. بس اللى عنده اي كومنت يحطه في الموضوع الجديد الخاص بمشاركة الكورسات http://thanwya.com./vb/showthread.ph...67#post4048867 يتبـــــــع ،،،
|
|
#24
16-10-2011, 08:56 PM
|
||||
|
||||
|
بارك الله فيك أخى محمود ...
ربنا يوفقك و يسددك و ييسر لك كل خير ... ممكن تبقى تكتب بوست كل يوم ... تبقى افدتنا جامد ... |
|
#25
16-10-2011, 10:27 PM
|
|||
|
|||
|
شكرا ليك على مجهودك الرائع يا فامبير
|
|
#26
20-10-2011, 08:16 PM
|
||||
|
||||
|
Computer Basics
خلصنا الانجليش وعرفنا طريقنا صح والحمدلله وكدا يبقى العمود الاول اتبنى يتبقالنا عمودين (الكمبيوتر ، سوفت سكيلز) ناخد العمود الاول الا وهو ... الكمبيوتر اولا عشان نبقى متفقين .. لو انتو فاكرين ان الكمبيوتر يعنى شهادة ICDL يبقى بعد اذنكو اقفلو الموضوع وماتفتحهوش تانى ثانيا عشان نبقى متفقين برده .. مش كل من بيعرف يخش ع النت وبيتعامل مع الوورد والاكسيل بقى برنس زمانه ويبقى تمام وزي الفل طبعا البداية اللى انا ابتديتها تسد النفس شوية .. صح ؟؟ دا شئ حقيقي لان انا للاسف كنت فاكر كدا ان اي حد بيتعامل مع الوورد وبيعرف ينسق ويظبط ويخش ع الاكسيل ويعمل شيت ومعادلات وبتاع بقى جاامد جدي بس الحقيقة غير كدا تماما قولي ليه ؟؟ لان مهارتك في الكمبيوتر بالذات صعب انها تتعكس في الانترفيو بتاع الشغل .. على عكس الانجليش تماااااما اللى بيتفقس من اول مابتقول ماي نيم ايز كذا !! اللهم الا اذا بقى اتعملك امتحان قبل الانترفيو او بعد الانترفيو على وورد او اكسيل واتطلب منك حاجات تعملها .. بس شركات قليلة اوي اوي اللى بتعمل الحركة دي وبالتالى عشان تثبت مهارتك في الكمبيوتر عموما مش قدامك غير سكة واحده .. الا وهى شهااااااادة اول ماسمعتو كلمة شهادة اكيد جيه في بالكو الـ ICDL طبعا لن تزول قدم واحد دخل كلية التجارة وعايز يخرج منها الا ولازم يكون خد شهادة الـ ICDL وبالتالى دي بقى زيها زي اي مادة بتتاخد بقت واجب وفرض عين على كل مؤمن ومؤمنة ! وعشان كدا انا مش هارغى فيها ولاهافتح بوقي بكلمة واحده اساسا فيها بس انا شخصيا شايف ان ولا ليها تلاتين لازمة اصلا لان حتى اسمها متخلف اصلا يعنى ايه قيادة الكمبيوتر ؟! اللى اخترع اسمها واحد سيس !!! اهو المهم .. عيشو حياتكو انتو بقى فيها وصرفو نفسكو بس عشان تبقو عارفين ان الشهادة دي عمرها مابتعمل فرق في السي في .. يعنى اوعى تفتكر انك لو خدتها هاتبقى برنس وجامد لا خااااااالص طب اذا كان الاي سي دي ال مالهاش لازمة .. امال ايه بقى اللي ليه لازمة ؟؟ اولا عشان نبقى فاهمين فيه شهادتين للـ ICDL - Standard ICDL - Advanced ICDL بالنسبة للـ Standard دي بتبقى الشهادة الزارقة المتعارف عليها عند كل الناس والمعظم بياخدها ودي عادية جداااااا فيه بقى شهادة تانية اللى هيا الـ Advanced ودي بتبقى لونها دهبى .. ودي بتبقى اعلى من الـ ICDL العادية طبعا وللاسف ماحدش بيقدر ياخدها او حتى يتقدم للامتحان بتاعها الا للحاصلين فقط على الشهادة الزارقة اللى هيا الاستاندارد ايه بقى قصة الشهادة الدهبى دي ؟؟ الـ ICDL اول مانزلت مصر كانت جامدة جدا .. بس اللى خلاها فكسان ان ناس كتيرة جدا بقت تاخد الشهادة وبقى كل من هب ودب ياخدها وينجح ويقولك انا سيرتيفايد من الامم المتحدة واليونيسكو !! ولما الناس بتوع اليونيسكو لاقو ان الموضوع عليه اقبال رهيب قامو مخترعين حوار جديد الا وهو عمل مستوي اعلى من المستوي العادي والجدير بالذكر هنا انك في الشهادة الاستاندارد انت بيتكتبلك فيها انك مجرد بتجيد التعامل فقط مع ادوات الاوفيس اما شهادة الادفانسد فانتا هايتكتبلك فيها ان انتا بروفيشنال .. يعنى برنس زمانك واوانك وغير كدا انت بتخش تمتحن في كل موديول لوحده يعنى الوورد لوحده ولو نجحت بتاخد شهادة منفصلة والاكسيل لواحده ولو نجحت بتاخد شهادة منفصلة .. وهكذاااا انت في الادفانسد بتمتحن في اربع موديولات بس .. وورد – اكسيل – اكسيس – باور بوينت وطبعا زي ما قولنا كل موديول بتنجح فيه بيبقى عليه شهادة ولو ربنا كرمك ودخلت الاربع امتحانات ونجحت فيهم كلهم بتاخد شهادة خامسة فوق الاربع شهادات بتفيد انك انت ماستر ودا معناه ان انتا بامكانك انك تدرس الاي سي دي ال نفسها تمــــــــام ؟؟ كدا احنا خلصنا من قصة الاي سي دي ال نخش بقى على قصة تانية الا وهو شهادة عجيبة وكتير جدا من الناس ماحدش يعرفها اسمهـــا .. MOS ودا اختصار لكلمة Microsoft Office Specialist الشهادة دي هيا شهادة مهنية مقدمة من شركة مايكروسوفت ذات نفسها وبتختص بكل تطبيقات الاوفيس ميزة الشهادة دي انك لما بتدرسها وبتاخد شهادتها انت بتبقى : - سيرتفايد من مايكروسوفت ذات نفسها ودا شرف ليك طبعا - ان مايكروسوفت مخترعة الاوفيس ذات نفسه بتديك شهادة بتثبت انك انت استاااااااذ في التعامل مع الاوفيس باكيدج طبعا الشهادة دي من اوائل الشهادات اللى برشحها لاي حد في المجال التجاري انه يحصل عليها عشان فعلا من اهم ما يمكن وبتعمل فرق كبير جدااااااااا في السي في وبعض الشركات بتطلبها كمطلب تفضيلي يعنى ايه مطلب تفضيلي ؟ يعنى لو انت حاصل على الشهادة دي ومقدم في وظيفة هناك وواحد تانى مقدم معاك بس مش معاه الشهادة دي .. انت تاخد الوظيفة وهوا لاء ومن الشركات دي شركة فودافون وحصلت قدام عيني شرح الشهادة دي بسيط جدا الشهادة متقسمة على 3 مراحل : - المرحلة الاولى : Core Certificate ودي فيها وورد واكسيل بس .. وشهادة مالهاش لازمة وفكك منها لان زيها زي الـ ICDL العادية - المرحلة التانية : Specialist Certificate ودي فيها اربع موديولات (وورد-اكسيل-باوربوينت-اكسيس) وكل مابتنجح في موديول منهم بتاخد شهادة - المرحلة التالته والاخيرة : Master Certificate ودي برده فيها اربع موديولات زي المرحلة اللى قبلها بس لو نجحت في الاربع موديولات بتاخد لقب ماستر وماستر دي يعنى ماجيستير .. يعنى انت كدا يعتبر معاك ماجيستير في الاوفيس تخيل شوف بقى لو انت كتبت في السي في بتاعك ماستر شوف هاتعمل فرق معاك ازاى !! ولمزيد من التوضيح الصورة دي ممكن توضح اكتر  طبعا ناس هاتلاحظ ان فيه وجه شبه بين الـ Advanced ICDL والـ MOS يبقى كدا انت معاك شهادتين .. الـ ICDL ودي كدا كدا انت باذن الله هاتاخدها لانها اجبارية عليكبس الـ MOS افضل بمراحل لانها شهادة مهنية طالعه من الشركة اللى اخترعت البرنامج اصلا وبالتالى تاخد الشهادة وانت حاطط في بطنك بطيخة صيفى والشهادة التانية ربنا يكرمك بيها هيا شهادة الـ MOS ارزع الشهادتين دول في السي في وادعيلي :D وكدا نكون رمينا الاساس في الكمبيوتر طبعا فيه حاجات كتيرة متعلقة بالكمبيوتر تانية زي الجرافيكس والداتا بيز والاكاونتينج .. بس كل دي انا بعتبرها تخصصات وعشان كدا هايبقالها كلام منفصل لوحدها يتبقالنا السوفت سكيلز ودي بقى موال كبييييييير وليه قصة بحالها نبقى نشوفها في البوست الجاي باذن الله يتبـــــــــــــع ،،، |
|
#27
20-10-2011, 08:29 PM
|
||||
|
||||
|
Soft Skills
اثناء مانتا هاتبقى ماشي في الجامعة هايقابلك عروض عن كورسات كتيرة فحت تيجي تفتح بورشور تلاقي كاتبلك الدبلومة العبقرية الشاملة كمبيوتر وانجليش وسوفت سكيلز وكل دا بـ 350 جنيه بس ويا بلاش !! تفتح بورشور تانى تلاقي كاتبلك هدفنا هو وصولك لوظيفة احلامك تفتح بورشور تالت يقولك غير حياتك في 3 ايام مع المحاضر مش عارف مين .. ومابين قوسين عرض خاص بـ 200 جنيه بس ! ودماغك بقى هاتبتدي تتقلب وتقول هوا ايه كمية العروض الرهيبة اللى قدامي دي ؟ عشان تبقو فاهمين بس .. الناس دي هدفها ربحى وشششش ولا شئ غير ذلك وبيستغلو حاجة الطلبة وللاسف جهلهم في انهم يسوقو لكورسات زي دي طبعا انا مش هاقول ان الكورسات دي غير مفيدة .. لاء هيا مفيدة طبعا بس مش بالقدر اللى يخليك تجري عليها وتدفع فيها فلوس زي دي لان اولا انت هاتضيع وقتك في حاجة تعبانه .. ثانيا انت بتصرف فلوسك في حاجة انت مش هاتكمل فيها وبالتالى لازم تحط في دماغك مبدأ هــــــام جدا انا اى فلوس هادفعها في اي كورس دا لازم يضيفلى حاجة جديدة في مهاراتى وشخصيتى .. ولو ماضافش يبقى انا يا برمي فلوسي في الهوا يا انا اتقلبت دي كانت بداية صغيرة كدا عشان بس نوضح النقطة دي منعا لعدم حدوث حيرة او احساس انك تايه ومش فاهم حاجة موضوعنا النهارده بيتكلم عن حاجة هاتسمعوها كتير دا ان ماكنتوش سمعتوها اصلا .. SOFT SKILLS الكلمة دي انتشرت انتشار رهيب جدا لدرجة انها عملت هوس عن الناس ووصلت لدرجة ان السوفت سكيلز دي بقت حاجة مهمة جدا ولازم يتاخد فيها كورسات بالهبل عشان تبقى جامد مع ان الوضع مختلف تمااااااااما بس قبل مانخش في الجدل دا لازم نعرف يعنى ايه سوفت سكيلز اصلا ؟؟ بكل بساطة هيا مجموعة من المهارات اللى بيمتلكها الشخص بداخل شخصيته واللى بتميزه عن غيره .. ازاى ؟ كل شخص ربنا خلقه عنده عقل وقدر من الذكاء بيتعامل بيه ودا معناه ان مافيش حد اسمه غبى .. لان مصطلح الغباء اصلا يعنى انتفاء صفة التمييز والعقلانية وعشان كدا انت ماتقدرش تقول على الحيوان انه غبى .. ليه ؟ لان ربنا رزقه بالعقل ولكن نسبة الذكاء عنده لا تمثل شئ بالنسبة لذكاء الانسان السؤال المطروح هنا .. هل كل انسان ذكي بيبقى ناجح في حياته ؟ مش شرط خااااالص .. مانتا عندك جون جراي دا هوا مؤلف كتاب من اشهر الكتب (men from mars & women from Venus) والكتاب بيتكلم عن ازاى الراجل والمرأة يتعاملو مع بعض ومع ذلك الراجل دا اتجوز اربع مرات وطلق !! هل دا معناه ان هوا ناجح في حياته ؟؟ مثال آخر .. اينشتاين كان راجل عبقري جدا لدرجة انه توصل لامكانية السفر عبر الزمن بشرط اختراع آلة تمشي بسرعة الضوء ومع ذلك حياته الاجتماعية كانت فاشلة وطلق مراته ؟ هل دا معناه انه هوا ناجح في حياته ؟؟ اذن مصطلح النجاح هنا هو مصطلح نسبى ايه اللى بيخلي النجاح هنا نسبى ؟ لان الاعتماد على الذكاء بس بدون اي عوامل مساعدة دا بيفشل علاقتك بالناس ودا معناه ان الذكاء مش كل حاجة الخلطة السحرية بقى اللى ناس مؤلفين وسيكولوجيين اكتشفوها هيا خلط مهاراتك العقلية مع مهاراتك الاتصالية مع الاخرين والامثلة كتيرة جدا في الحكاية دي .. 1- جمال عبد الناصر : مهاراته الاجتماعية والاتصالية مع الناس كانت عالية جدا ودا اللى حبب الناس فيه .. بالرغم من انه كعقل وذكاء ممكن يكون مش على المستوي المطلوب 2- اوبــاما : مالوش فيها وبطيـــخة !! ومع ذلك مهاراته الاتصالية عالية جداااااااا لدرجة خلت الناس تصدق تصريحاته لما كان في جامعة القاهرة وقعد يقول ويوعد وعلى اساس الوعود دي خد جايزة نوبل اذن عشان تبقى بنى ادم ناجح في حياتك .. لازم تلعب على الوترين وتر العقل اللى ربنا مديهولك .. ووتر مهاراتك الاجتماعية واتصالك مع الناس المهارات الاجتماعية دي بقى زي ايـــه ؟؟ 1- مهارات الاتصال (Communication) : اتصال يعنى ان انت تبقى كونتاكت مع اي حد قدامك سواء بالكلام او بالاشارة او بالايماءات حتى .. بحيث ان انت تبقى مستعد لارسال شئ او استقبال شئ .. المهم يبقى فيه اتصال والحد اللى انت بتتصل معاه دا ممكن يكون انت (intrapersonal communication) او ممكن يكون حد تانى (interpersonal communication) وعشان تبقى بتتصل كويس مع الاخرين لازم يبقى عندك 3 حاجات - رسالة ذات هدف محدد انت عايز توصلها للطرف الاخر (Good Speaker) - بتسمع كويس من الطرف الاخر عشان تعرف ترد عليه (Good Listener) -طريقتك فى القاء الرسالة نفسها تكون كويسة ومعقولة والحمدلله معظمنا عندنا اول حاجتين اللى هيا الرسالة اللى بتتقال والسماع الكويس .. لكن طريقة انك تقول الحاجة هيا دي بقى اللى عايزة تظبيط وعشان تتظبط لازم تظبط حاجتين - درجة صوتك (Tone of your voice) ودي بتبقى على حسب المكان والموقف .. يعنى ماينفعش تبقى جوا شركة وتبقى بتتكلم مع مديرك مثلا بصوت عالى فالمهم .. الـ Body Language دا شئ مهم عشان اثناء مانتا بتتكلم لازم بتستخدم اشارات وايماءات بتعملها بجسمك سواء بحركة ايدك او وقوفك او حركتك او حتى تعبيرات وشك (Faicial Exprestions) اللى بتبقى من اهم ما يمكن في توصيل رسالتك للناس او تبقى في حفلة وطالع تقول كلمة وتبقى بتهسهس فى المايك - الاشارات الجسدية (body signals) وعلى فكرة المسمى الصح ليها body signal مش body language لان مافيش حاجة اسمها لغة جسد .. لان تعريف اللغة ذات نفسه هو عبارة عن مجموعة من الرموز او الحروف بتنطق او بتؤدى بطريقة معينة بحيث ان يتم الاتصال مع الناس من خلالها ودا معناه ان كل لغة بتبقى منعزلة عن غيرها .. يعنى الـ I فى الانجليش غير الـ je فى الفرينش غير الـ soy فى الاسبانى وبما ان الجسد دا حاجة موحدة بين البشر فامينفعش تقول لغة الجسد لانك لو قولت لغة الجسد دا هايبقى معناه ان اى اشارة معينة هاتعملها بايدك او بجسمك هاتبقى موحدة في اي حتة في الدنيا ودا شئ خاطئ لان فعلا الاشارات بتختلف من بلد لبلد .. يعنى لو طبطبت مثلا على كتف حد في مصر دا معناه ان انت بتثنى عليه وعايز تقوله جود جوب واستمر للامام مثلا وعلى العكس لو عملتها لو واحد في ايطاليا دا معناه انك عايز تقوله انت شاب مش تمام ومشكوك فيك !! وبالتااااالى هنا تنتفى صفة اللغة عن الجسد ودا لعدم وجود توحيد للاشارات بين كل البلدان يبقى لما حد ييجي يتفزلك عليك ويقولك body language شوط فيه ودا مش كلامي على فكرة .. دا كلام ناس باحثين وعلماء بس مشكلتنا فى مصر اننا دايما مش اب تو ديت .. واي تحديث لمعلومة معينة بيجيلنا بعدها بفترة طويلة 2- مهارات القيادة (Leadership) : نابليون بونابارت قال جملة مشهورة اوي " جيش من ارانب يقوده أسد افضل بكثير من جيش من الاسود يقوده ارنب " ودا بيعكس قد ايه القائد دا شئ مهم جدا لان هوا اللى بيبقي فيه ايده سلطة القرار وهوا اللى بيوجه الدفة شمال ولا يمين وعشان تبقى قائد كويس لازم يتوافر فيك كذا حاجة : 1- لازم يبقى عندك هدف وليك رؤية .. يعنى مثلا الثورة قامت بقالها فترة اهو وما زالت البلد متبهدلة ومانعرفش رايحة على فين والسبب في دا مين ؟ مين اللى ماسك قيادة البلد دلوقتى ؟ المجلس العسكري صح ؟ طبقا للنظريات الادارية هانلاقي ان المشكلة الحقيقية فعلا في المجلس العسكري .. لا هيا فى اخوان ولا هيا في فلول ولا هيا في شعب المشكلة في القيادة اللى ماعندهاش رؤية اصلا 2- لازم تبقى قادر على نقل الهدف بتاعك دا للناس التانية وتوضحهلهم بصورة سهلة وبسيطة .. زي مانا بعمل دلوقتى كدا :D 3- انك بخبرتك تهيأ الجو العام لاستقبال هدفك .. يعنى مثلا ماينفعش ابقى انا بقولك قوم صلى وانا اساسا مابركعهاش !! طبعااااااا مش معنى انك قائد تبقى بتتنك على خلق الله .. بالعكس انت اه قائد بس اذا فشلت هايتحسب عليك وهايتقال في يوم من الايام ان فلان الفلانى فشل في كذا وكان هوا القائد زي بالظبط هتلر بالرغم من انه كان قائد ناجح لفترة زمنية معينة بس اول ما وقع وخسر الحرب بقى قائد فاشل طبعا الكلام في الليلدرشيب كتير جدا وفيه حاجات انا عمري ماهقدر اغطيها .. بس انصحكو بالقراية كتير في البوينت دي 3- المشاركة في الفريق (Teamwork) : قبل مانتكلم لازم نوضح الفرق بين كلمة تيم وجروب تيم يعنى مجموعة من الناس ليهم قائد وليهم رؤية وهدف محدد ولازم يوصلوله وكل عضو في الفريق دا بيبقى عنصر مهم وبيتحسب على الباقى اما الجروب فهو عبارة عن مجموعة من الناس جمعهم الحظ والنصيب انهم مع بعض وبيقضو فترة معينة مع بعض وبعد كدا كل واحد بيروح لحاله وعشان كدا انت في الكلية بيبقالك جروب مش تيم اما لو كنت داخل في مشروع معين مكلفك بيه الدكتور ومعاك ناس فانتا كدا تبقى في تيم التــيم عموما من احلى وامتع الحاجات اللى فعلا الواحد ممكن ياخد خبرة من خلالها .. لان انت مثلا معاك 10 زمايلك وعايزين تعملو مشروع معين لازم تبقى عارف ومتأكد ان الكواليتي بتاعة المشروع لو عملتها لواحدك عمرها ماهاتبقى زي الكواليتي اللى بيشترك فيها 10 ليـــــــــه ؟؟ لان كل واحد من العشرة دول بيشارك بفكرة واتنين وتلاته وبالتالى بيطلع افكار كتيرة جدا بتساهم في خروج المشروع بافضل شكل ممكن دا غير ان لما انا اشارك بفكرة وغيري يشارك بفكرة .. انا نفسي بستفيد من فكرته وبتتضاف عندي من ضمن رصيد الخبرات 4- مهارات التفاوض والاقناع (Negotiation & Persuasion) : مهارة التفاوض غير مهارة الاقناع لان ناس كتيرة بتخلط بينهم برده بالرغم من انهم مرتبطين ببعض بس طبعا فيه فروق بينهم التفاوض : هو انك تبقى معتنق فكرة معينة وبتتناقش مع غيرك اللى معتنق فكرة مضادة ليك .. وانت بتحاول توصل معاه لنقطة تعادل بينك وبينه بحيث ان انتا تبقى عملت مكسب ليك وفي نفس الوقت ماخسرتوش الاقناع : هو انك تبقى معتنق فكرة معينة وبتتناقش مع غيرك اللى معتنق فكرة مضادة ليك .. وانت بتحاول ان انت تقنعه بفكرتك وتزيح عنه الفكرة اللى هوا مقتنعها اذن مهارة الاقناع هيا اعلى رتبة من مهارة التفاوض .. واى حد عنده مهارة الاقناع بيبقى عنده مهارة التفاوض والعكس غير صحيح عشان كدا تلاقي دائما وابدا اي حد بيشتغل في مجال الـ sales او الـ marketing بتبقى عنده مهارة التفاوض والاقناع دي عالية جداااا في الانترفيو ممكن يفاجئك ويديك قلم ويقولك بيعلى القلم دا عشان يقيس عندك قدرة الاقناع دي او يطلع سيجارة ويقولك انا مش عارف ابطل عادة التدخين دي ويسيب الانترفيو ويقعد يتكلم معاك في قضية التدخين عشان يشوف هل انت هاتقدر تقنعه بان التدخين حاجة وحشة ولا لاء 4- حل المشاكل (Problem Solving) : شئ ممتع جدا ان يبقى فيه مشكلة وانت بتقعد تحلها لان دماغك بتقعد تشتغل لغاية مابتجيب اخرها ومهارة حل المشكلة دي بيتم اكتسابها بالخبرة يعنى مثلا انت النهارده وقعت في مشكلة وتعبت عشان تحلها وفي الاخر اكتشفت الحل .. جيت بعد كدا وقعت في مشكلة شبيهة ليها في المستقبل هاتحلها طبعاااااا .. لانك خدت خبرة سابقة طبعا حوار حل المشاكل دا فيه طرق كتيرة ويمكن من اشهرهم الـ mind mapping والـ drill down والـ brain storm .. انا مش هاخوض في كل واحده واقعد اشرح فيها لان فعلا دي عايزة موضوع كااااامل عشان يتشرح .. بس حاولو تقرو في كل واحده فيهم وتدورو على النت هاتلاقو حاجات بالهبل 5- مهارة التحدث الحر (Free Speech) : فيه معهد امريكي مش فاكر اسمه سأل الناس ايه اكتر حاجة بتخافو منها وكانت نتيجة الاحصائية حوالي 65% من الناس بيخافو من انهم يتكلمو قدام عدد كبير من الناس !! المشكلة الرئيسية في خوف الشخص من انه يطلع يتكلم قدام الناس انه بيبقى عارف انه هايبقى فيه عيون كتيرة هاتبقى متركزة عليه هوا بس ودا بيخليه يقلق لانه بيبقى حاطط في دماغه ان هوا ممكن يغلط او يقول كلمة تضحك الناس عليه او يعمل تصرف ويبقى محل سخرية من الجميع .. الخ الخ مع اننا كل يوم بنتكلم مع اصحابنا وعادي جدااااااا .. يعنى مثلا كام مرة انت خرجت مع صحابك وكنتو كتير حوالي 10 مثلا وجيت في مرة قولت حاجة والعشرة كانو باصينلك ؟ هل عملولك حاجة ؟ عضوك ؟ قتلوك ؟! عااااااادي جدا مافيش اي مشكلة طب بلاش نبصلها من منظور المحاضر .. نبصلها من منظور المشاهد كام مرة انت حضرت محاضرة ؟ كتير ؟ هل لما الدكتور دخل بتقعد تتريق عليه عمال على بطال ؟ اه ممكن تتريق عليه مرة او اتنين بس لما بيخش في الشرح غصب عنك بتقعد تسمع لانك مهتم باللى هوا بيقوله الحل الوحيد للمشكلة العويصة دي هيا زيادة الثقة في النفس والتمرين والتمرين بييجي من خلال البريزنتيشنز الكتيرة والتحضير الكويس قبل البريزنتيشن ولو عايز تظبط الحكاية دي عندك حط كاميرا في اوضتك وصور نفسك واعمل البريزنتيشن كأنك بتتكلم قدام الناس ولما تخلص افتح الفيديو واتفرج على نفسك وشوف ايه العيوب اللى انت عملتها وحاول تتفاداها .. وصور نفسك مرة تانية وتالته وهكذاااااااا انا بالنسبالى اول مرة اعمل بريزنتيشن في حياتي كانت عن موضوع انفلونزا الخنازير وكانت بالانجليش كمان وطبعا ماقولكوش كنت قلقان قد ايه ووشي محمر وايديا ساقعة وودانى سخنة وحاجة منيلة بستين نيلة بس بمجرد ما قولت لنفسي اثبت واجمد وطلعت فعلا ووقفت واتكلمت ولاقيت الناس باصالى وقشطة مافيش حاجة دوووووووست والحمد لله البريزنتيشن عدي على خير طبعا اكيد كان فيه اخطاء زي عدم الحركة والتركيز على نقطة واحده وعدم الانتباه لتعبيرات الناس عشان اشوف انطباعاتهم والكلام دا بس طبعا مع الوقت والتمرين والبريزنتيشنز الكتير الموضوع بيختلف والموضوع بيتحول معاك من انك كنت خايف لانك بتبقى حابب الموضوع واول مابتسمع كلمة بريزنيتشن بترشق فيه على طول اللى عايز اقوله في نهاية موضوع السوفت سكيلز دا هوا كذا نقطة : 1- فيه فرق بين المهارة والموهبة .. لان المهارة انت بتكتسبها بالتعلم والممارسة والخبرة لكن الموهبة دي بتبقى ربنا رزقك بيها وحاجة جواك انت كدا كدا متفوق فيها زي الرسم والغنا والكتابة وبالتالى حاول ماتسيبش مهارة الا اما تتعلمها او على الاقل تعرف عنها حاجة 2- خليك اجتماعى ودوس مع الناس واعمل صداقات كتير لان كل شخص انت بتعرفه بيزود فيك حاجة وبتستفيد منه بحاجة .. واوعى تبقى منعزل عن الناس لانك انت الخسران في الاخر 3- شارك في انشطة الكلية وماتقعدش في الكلية زي البطة مابتعملش حاجة غير القعدة مع صحابك والاكل والشرب ولعب الاونو لان انشطة الكلية هيا اللى هاتفيدك فى تنمية المهارات اللى اتكلمنا عليها دي 4- كورسات التنمية البشرية كلها رغى فى رغى .. ليـــه ؟؟ كام واحد سمع لابراهيم الفقى ؟ كتييييييييييير طبعا وكلنا معجبين بيه وراجل جامد وكل حاجة بس هل احنا بنطبق الكلام اللى بيقوله ؟ لاء طبعا يبقى اذن المشكلة كلها هنا بتكمن في كيفية تطبيق الكلام اللى بيتقال في الواقع العملى انت بتحضر المحاضرة من دول ويقعد يشرح يعنى ايه مهارة اتصال ويعنى ايه مهارة انك تطلع وتتكلم قدام الناس وانت تبقى قاعد مستجم جدااااااا وبتقول يااااه دا ايه الكلام الجامد دا بس صدقنى بمجرد مابتخرج من المحاضرة بتنسي الكلام لانك مابتحاولش تطبقه عملى 5- اقرا كتيـــر وحاول توسع من ثقافة نفسك واوعى توقف نفسك عند نقطة معينة وتقول خلاص بقى كفاية انا تعبت لان كل يوم بيظهر نظريات جديدة وتحديثات لنظريات قديمة يعنى مثلا حتى تلك اللحظة في مادة الادارة هاتلاقو نفسكو بتدرسو النظرية التقليدية بتاعة فريدريك تيلور اللى اعتبر ان الانسان آلة .. مع ان النظرية دي عفى عليها الزمن من 80 سنة !! لغاية ماتكتشفو بعد كدا ان فيه واحد اسمه هنري فايول طور نظرية تايلور وقال ان الانسان كائن حيوي ماينفعش يبقى آلة ولكن لازم نراعى اعتبارات اخري .. والنظرية دي برده عفى عليها الزمن من 70 سنة !! وماتعرفوش ان فيه واحد ياباني اسمه ويليام اوشي جيه وضرب كل الكلام دا وعمل نظرية سماها نظرية Z وقال ان الموظف لو حسسته بالامان ودخلته من ضمن حلقة الانتاج بصورة مباشرة وحسسته بدا هايديك احلى شغل لانه انتمائه للشركة هايزيد اللى عايز اقوله ان كتب الكلية لو هاتعتمد عليها لمعلوماتك العامة هاتتبهدل .. انت تعتمد عليها عشان الامتحان بس لكن لثقافتك انت عيش ع النت واقرا كتير 6- فيه حاجة لذيذة اوي انا بقيت اعملها .. كل فترة كدا بقول لنفسي انا لازم اعمل بحث عن حاجة معينة وبحضرلها كانى بالظبط هاعمل بريزنتيشن وبترجم البحث دا انجليش وبعرف عنه اكبر قدر ممكن من المعلومات الكلام دا هايفيدك في المستقبل لما تيجي تتكلم مع الناس في موضوع معين او حتى في حياتك العامة هايتقال عليك مثقف وفاهم وواعى 7- حاول تشترك في اي موديل من الموديلز الموجودة جوا الجامعة .. هاتتعرف من خلالها على ناس كتيرة سواء شباب او بنات دا زائد ان من خلالها السوفت سكيلز بتاعتك هاتعلى اوي اوي فى البوست الجاي ان شاء الله هانعمل حاجة حلوة اوي هانبتدي نرشح ايه هيا اهم المراكز اللى باذن الله هاناخد فيها الكورسات اللى اتفقنا عليها خلال الفترة اللى فاتت دي سواء انجلش او كمبيوتر ونعمل جدول ظريف كدا نمشي عليه في الفترة الجايه اشوفكو على خيــــــــر يتبــــــــــــــع ،،، |
|
#28
20-10-2011, 08:40 PM
|
|||
|
|||
|
تمام يا فامبير بس احنا لسه مخلصناش الانجلش
auc ولا Brittish council ولا ameideast ??? انه الاحسن والعملى |
| العلامات المرجعية |
| الكلمات الدلالية (Tags) |
| سوفت سكيلز, كلية التجارة, كورسات, كورسات انجليزى |
«
الموضوع السابق
|
الموضوع التالي
»
العرض العادي
|
|
جميع الأوقات بتوقيت GMT +2. الساعة الآن 10:13 PM.
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
Copyright ©2000 - 2024, Jelsoft Enterprises Ltd.
