مخنوق؟زهقان؟فقدت الأمل؟..خش هنا

[ArabianPDA]

السلام عليكم..

اخواني في الله يارب تكونوا كويسين يارب وتكون الامتحانات كويسه معاكم .. آمين
في ظل بعض البؤس الي انا شايفه في عيون ناس حواليا كتير في الثانويه حبيت اقول حاجه انا عشتها لما كنت قدكم وبجد نادم عليها جداااا ومش عايزكم في يوم تعيشوها..

اليأس

وطبعاً اقصد اليأس من امتحان عدي بنتيجه مش طيبه أو بتعب من المذاكره وانك مش قادر تفتح الكتاب تاني وزهقت خلاص من بعد السنه الطويله دي ..
انا عشت الاتنين ..

وانا هقولكم حاجه ..
امتحان التفاضل بتاعنا انا خرجت منه عاكك بالمعني الحرفي والرياضه كانت اسهل ماده عندي والكيميا كنت بكرهها وقلت يومها خلاص وانا مستقبلي ضاع وبقيت بذاكر الكيميا من غير نفس "مهي باظت"
سبحان الله الي يخلي الماده الي بكرهها كره العما اقفلها والماده الي بحبها انقص فيها وانا ساعتها عرفت حاجه انتو هتحسوا بيها ممكن مش دلوقتي لكن يوم النتيجه اكتر..
انا ليه شغلت نفسي بشئ متعملش اصلاً وحسابات ربنا غير حساباتنا خالص ما يمكن ربنا اداك قرصه ودن صغيره لو من غيرها كنت جيت في ماده تانيه ونقصت جداااااااا..
يمكن ربنا خلاك تنقص شويه في تانيه عشان متنامش في تالته وكله بينام في تالته وكاتبلك مجموع انت نفسك محلمتش بيه ..
انا عندي زميلي والله كان جايب في تانيه 96 في تالته جاب من غير المستوي 99.8!!! تصووووور معايا يعني 204.5 في تالته!
وبلسانه ان نقصانه في تانيه احسن شئ حصله لأنه علمه حجات كتير يمكن لو مكانش اتعلمها وجاب مثلا في تانيه 98 ولا 99 كان استمر ع الي بيضيع وقته "منا كدا كدا بجيب درجات من غير ما اذاكر" وبلط في تالته!

فكر ديماً بإيجابيه وان ربنا مش هيكتبلك حاجه وحشه بل انه مدام من صنع ربنا فهو اجمل ما في الوجود..
ومتقولش خلاص انا عكيت في الي فات اكمل عك ابداااااا
حسابات ربنا غيرنا خالص
والكلام الي بتسمعوه عن ان المصحح يمكن ميقراش الغلط ده حقيقي ووالله بتحصل معجزات بس خليك مع ربنا
صدقني ربنا مدام انت معاه هتخرج من اي امتحان وعندك شئ اسمه راحه البال بأن ده في ايد ربنا ..

انا عندي زميل ليا في الكليه ربنا يحفظه والله والله بيدخل الامتحان ويمكن مفتحش الكتاب بجد بس تلاقيه ديماً خارج مبتسم وديماً المصحف في ايده والله ما شفته في حياتي غير وفي ايده مصحف وتلاقيه جايب امتيازات ومش العيل الي بيخبي ابداً الفكره ان بالرغم انه بيذاكر قليل بس ربنا بارك في وقته وفي عقله وفي ورقته

خليك كده مش ليه يارب بتنقصني انا وانا بذاكر وبعمل وفلان لأ
ببساطه لأن ربنا عالم الاحسن ليك

وتعبير كليات القمه مش صح لأن كل الكليات قمه
والتعبير ده طلاب الكليات الي اسمها القمه اطلقوها علي كلياتهم مش اكتر لكن والله نص الي معانا في طب بيشيلوا مواد!
تصور واحد جايب 99 ولا 100 وارقام كده وبيشيل واهو في كليه قمه ! وفي المقابل واحد دخل تجاره اي شئ ورضي وذاكر واتعين معيد شوف ده هيبقي فين وده فين


اما الزهق فده طبيعي ومفيش مانع تدي نفسك ريست انت مثلا قدامك احياء ولا كيميا ريح يوم وابعد عن المذاكره خااااااالص..لأن ده احسن من انك تذاكر بدون شغف بالي بتذاكره بالعكس انت لما تقضي يوم مع اصحابك وكده هترجع مشتاق للكتب وهتنجز بشكل رائع

واياكم ان تفقدوا الامل"معرفش الجمله صح نحويا ولا لا"
وربنا معاكم يارب ويسعد ايامكم

P.S:
وحشتوني وربنا بقالي كتير مدخلتش وحبيت اطمن عليكم